Jenesis 42

Ol brata blong Josef oli kam long Ijip blong pem kakae blong olgeta

1Nao long taem ya, Jekob* olgeta oli stap long Kenan,* mo taem hem i harem nius we i gat kakae i stap long Ijip, hem i talem long ol pikinini blong hem se, “?From wanem yufala i no mekem wan samting? 2#Wok 7.12Mi mi harem nius se i gat kakae i stap long Ijip. Yufala i mas go long ples ya blong pem sam kakae blong yumi, blong bambae yumi no ded long hanggri.” 3Nao ten brata blong Josef oli aot long ples ya, oli go long Ijip blong pem kakae blong olgeta. 4Be Jekob i no save letem Benjamin* we i stret brata blong Josef i go wetem olgeta, from we hem i fraet se maet trabol bambae i kasem hem long rod. 5Nao olgeta oli wokbaot wetem ol narafala man Kenan, oli go long Ijip blong pem kakae, from we i gat hadtaem blong kasem kakae long ples blong olgeta.

6Be long taem ya, Josef i stap lukaot long kantri ya, mo i stap salem kakae long ol man blong evri kantri long wol Nao ol brata ya blong hem oli kam, oli bodaon long fes blong hem, we fes blong olgeta i godaon i kasem graon. 7Nao taem hem i luk olgeta, hem i luksave olgeta se ol brata blong hem, be i stap mekem olsem we i no save olgeta nating. Oltaem hem i gat man#42.7: Tok ya i folem fasin blong tok long Bislama, mo tingting blong hem i kamaot long vas 23 daon. blong tanem tok blong hem mo hem i stap toktok long lanwis blong ol man Ijip, nao hem i tok raf long olgeta, i talem se, “Yufala i kam wea?”

Mo olgeta oli talem se, “No, mifala i aot long Kenan ya, mifala i kam blong pem kakae blong mifala.”

8Nao nating we hem i luksave ol brata blong hem, be olgeta oli no luksave hem nating. 9#Jen 37.5-10Nao hem i tingbaot tufala drim ya blong hem we i bin luk bifo, we olgeta oli bin bodaon long hem, nao i tok strong long olgeta se, “!A! Yufala ya i kam nomo blong lukluksave ples blong mifala ya. Yufala i wantem faenemaot mifala, se mifala i strong no nogat, blong yufala i save kam mekem faet long mifala.”

10Be olgeta oli talem se, “No, masta, i no olsem. Mifala i olsem ol slef blong yu nomo. Mifala i kam blong pem smol kakae blong mifala. 11Mifala evriwan ya i brata, mifala i gat wan papa nomo. Mifala i no kam blong lukluksave ples. !Mifala i kam long stret fasin nomo!”

12Nao hem i tok long olgeta bakegen, i talem se, “!Nogat! !Yufala i kam blong faenemaot mifala ya!”

13Nao olgeta oli talem se, “Masta, mifala ol pikinini blong wan man nomo we i stap long Kenan. Fastaem, mifala twelef, be wan brata blong mifala i lus, mo lasbon long mifala i stap wetem papa blong mifala longwe.”

14Be hem i talem se, “!Mi talem finis! !Yufala i kam nomo blong lukluksave ples ya! 15!I gat rod i stap blong faenemaot yufala! Long nem blong king, mi mi talem tru long yufala. Sipos lasbon long yufala i no kam long ples ya, bambae yufala i no save aot bakegen. 16!Wan long yufala i mas go tekem hem i kam! Yufala ol narawan, bambae yufala i stap long kalabus gogo mifala i faenemaot we tok ya blong yufala i tru no i no tru. Sipos no, mi mi talem tru long yufala, se bambae mifala i savegud we yufala i man blong lukluksave ples nomo.” 17Nao hem i putum olgeta oli stap long kalabus blong tri dei.

18Nao long namba tri dei blong hem, hem i talem long olgeta se, “!Olgeta! Mi mi man blong ona long God, mo sipos yufala i mekem olsem we mi mi talem, bambae mi letem yufala i stap laef. 19Sipos yufala i wantem soemaot we yufala i no giaman, yufala i tru, ale, wan long yufala i mas stap olwe long kalabus ya. Nao yufala ol narawan, yufala i save tekem ol kakae ya we yufala i pem, yufala i save gobak blong givim long ol pikinini blong yufala we oli stap hanggri. 20Be yufala i mas tekem lasbon brata blong yufala i kam long ples ya, blong mi mi luk hem. Long fasin ya, bambae yufala i save soemaot we tok ya blong yufala i tru, nao bambae mi mi no kilim yufala i ded.”

Olgeta oli agri long tok ya blong hem, 21mo oli stap taltalem long olgeta se, “!Yu luk! Naoia yumi stap kasem panis from trabol ya we yumi mekem long brata ya blong yumi bifo. !Yumi luk we hem i stap harem nogud tumas, be taem hem i krae blong yumi givhan long hem, yumi no harem tok blong hem! !Taswe bigfala trabol ya i kasem yumi naoia!”

22 # Jen 37.21,22 Nao Ruben* i talem se, “Long taem ya, mi mi talem long yufala se, ‘Hem i yangfala nomo. Yufala i no spolem hem,’ be yufala i no save harem tok blong mi. !Naoia yumi stap panis from ded blong hem!” 23Josef i haremsave ol tok ya blong olgeta, be olgeta i no save samting ya, from we oltaem, taem oli stap toktok wetem hem, be i gat man i stap tanem ol tok blong olgeta. 24Nao hem i aot long olgeta, i go krae, mo taem hem i harem gud bakegen, hem i kambak, nao i jusumaot Simeon* blong i stap, mo long fes blong olgeta, ol man blong hem oli fasem hem.

Ol brata blong Josef oli gobak long Kenan

25Nao Josef i talem long ol man blong hem se, “Yufala i fulumap ol kakae ya long ol bag blong ol man ya. Olgeta oli pem ol kakae ya finis, be mane we man i pem i mas gobak long bag blong hem, wetem kakae blong hem. Mo yufala i mas givim kakae long olgeta blong oli kakae long rod.” Mo ol man blong hem oli mekem olsem. 26Nao ol brata ya blong hem oli putum ol kakae ya long ol dongki blong olgeta, nao oli aot.

27Nao long naet, taem oli spel, wan long olgeta i openem bag blong hem blong givim kakae long dongki blong hem, nao i sek we mane blong hem i stap wetem kakae ya long bag. 28Nao hem i talem long olgeta se, “!Ei, olgeta! !Oli givimbak mane blong mi ya! Hem i stap long bag blong mi, wetem ol kakae ya.” Nao tingting blong olgeta i foldaon, from we olgeta oli fraet tumas, nao oli stap asaskem long olgeta se, “?God i stap mekem wanem long yumi?”

29Nao taem oli kambak bakegen long papa blong olgeta long Kenan,* oli talemaot long hem olgeta samting we i kasem olgeta. 30Oli talem se, “Man ya we i stap lukaot long olgeta ples long Ijip, hem i stap tok raf tumas long mifala. Hem i ting se mifala i go nomo long kantri blong hem blong lukluksave ples blong hem. 31Mifala i talem long hem se, ‘Mifala i no kam blong lukluksave ples. Mifala i kam long stret fasin nomo. 32Mifala ol pikinini blong wan papa nomo. Fastaem, mifala olgeta twelef, be wan brata blong mifala i lus, mo lasbon long mifala i stap yet wetem papa blong mifala long Kenan.’ 33Nao man ya i talem se, ‘I gat rod i stap blong faenemaot yufala. Wan long yufala bambae i mas stap wetem mi long ples ya. Yufala ol narawan, bambae yufala i aot. Bambae yufala i save tekem ol kakae ya i gobak long ol pikinini blong yufala we oli stap hanggri. 34Be yufala i mas tekem lasbon brata blong yufala i kam long ples ya bakegen blong mi luk hem. Long fasin ya, bambae mi mi save we yufala i no man blong lukluksave ples, tok blong yufala i tru. Bambae mi letem brata blong yufala i gobak long yufala, i stap wetem yufala, nao bambae yufala i save go olbaot long kantri ya olsem we yufala i wantem.’ ”

35Nao taem olgeta oli kafsaedem ol kakae blong olgeta, olgeta evriwan oli luk we ol bag mane blong olgeta oli stap wetem ol kakae blong olgeta. Mo taem oli luk ol mane ya, oli fraet, mo papa blong olgeta tu i fraet. 36Nao hem i tok long olgeta, i talem se, “?Weswe? ?Yufala i wantem mekem mi mi lusum olgeta pikinini blong mi? !Josef i lus finis! !Simeon* i lus finis! ?Mo naoia, yufala i wantem tekem Benjamin* bakegen? !Ol trabol ya i stap spolem mi nomo!”

37Nao Ruben* i talem long hem se, “Papa, i gud yu putum Benjamin long han blong mi, nao bambae mi mi tekem hem i kambak long yu bakegen. Sipos mi no tekem hem i kambak, bambae yu save kilim tufala pikinini boe ya blong mi i ded.”

38Be papa blong olgeta i talem se, “!Nogat! Pikinini ya blong mi bambae i no save go wetem yufala. Stret brata blong hem i ded finis, hem wan nomo i stap. Maet wan samting bambae i kasem hem long rod. Mi mi olfala tumas, mo sipos yu mekem mi mi harem nogud tumas, bambae mi ded from.”

Currently Selected:

Jenesis 42: BBR

Highlight

Copy