Jenesis 44

Panikin blong Josef i lus

1Nao Josef i talem long slef ya blong hem we i bos long olgeta samting insaed long haos blong hem se, “Yu fulumap kakae long ol bag blong ol man ya, gogo oli fulap gud. Mo long evri bag, antap long kakae, bambae yu putum mane blong olgeta i gobak long bag blong olgeta bakegen. 2Mo yu tekem silva panikin ya blong mi, yu putum i go insaed long bag blong lasbon blong olgeta, wetem mane blong hem we i pem kakae long hem.” Mo man ya i mekem olsem we hem i talem.

3Nao long nekis dei, long eli moning, ol slef blong Josef oli givhan long Juda* olgeta blong oli putum ol kakae long ol dongki blong olgeta, nao olgeta oli aot, oli go. 4Nao taem oli aot long taon, oli go lelebet, hem i talem long slef blong hem se, “Ale, yu hareap, yu resis biaen long olgeta ya. Sipos yu kasem olgeta, bambae yu tok long olgeta, yu talem se, ‘!Masta blong mi i mekem i gud tumas long yufala! ?From wanem yufala i mekem i nogud long hem? 5?Weswe yufala i stilim silva panikin blong hem?#44.5: Tok ya long fas haf blong vas ya i folem olfala translesen blong Oltesteman long lanwis blong ol man Gris bifo, we i kamaot long olfala Oltesteman long lanwis ya Hibru, be long Oltesteman long Hibru we i stap tede, tok ya i no stap. Panikin ya, hem i stap dring long hem oltaem, mo i stap yusum tu blong faenemaot ol strong samting. !Fasin ya we yufala i mekem i nogud we i nogud!’ ”

6Nao taem slef ya i kam kasem olgeta, hem i talem tok ya long olgeta. 7Be olgeta oli talem se, “!No masta, be mifala i no save mekem wan samting olsem! I nogud yu stap pusum tok ya i kam long mifala. 8Yu yu save finis. Mane ya blong mifala we bifo, mifala i luk long ol bag blong mifala, taem mifala i aot long Kenan,* mifala i karem i kambak long ples ya. ?From wanem bambae mifala i stilim gol no silva long haos blong masta blong yu? 9!Yu traem lukaot! Sipos yu faenem we wan long mifala i holem samting ya, hem bambae i mas ded, mo mifala ol narawan bambae mifala i mas kam slef blong masta blong yu.”

10Nao man ya i talem se, “Ale, bambae i olsem. Be man we i stilim panikin ya, hem nomo bambae i kam slef blong masta blong mi, yufala ol narawan, bambae yufala i save go fri.” 11Nao kwiktaem nomo, olgeta oli tekemaot ol bag kakae long ol dongki blong olgeta, oli putumdaon, nao oli openem olgeta. 12Nao slef ya i stap lukluk gud insaed long ol bag ya, i stat long bag blong fasbon, gogo i kasem bag blong lasbon. Mo long bag blong lasbon ya, hem i faenem panikin ya i stap. 13Nao ol brata ya oli stap harem nogud tumas, we oli stap terem* klos blong olgeta from. Nao oli putum ol bag ya long ol dongki ya bakegen, mo oli gobak long taon.

14Nao taem olgeta oli kamtru long haos blong Josef bakegen, hem i stap yet long ples ya, nao oli bodaon long fes blong hem, we fes blong olgeta i godaon i kasem graon. 15Nao hem i tok long olgeta, i talem se, “?Weswe yufala i mekem olsem? ?Yufala i no save? Mifala ol haeman, mifala i gat rod blong faenemaot ol samting we i kamtru. !Mifala i save faenemaot yufala!”

16Nao Juda i talem se, “?Masta, bambae mifala i save talem olsem wanem? Mifala i no moa gat poen blong talem. Mifala i no save stretem nem blong mifala bakegen. God i soemaot finis we mifala i mekem i rong. I nogud man ya nomo we yufala i faenem panikin ya long bag blong hem i kam slef blong yu, bambae mifala evriwan i mas kam slef blong yu.”

17Be hem i talem se, “!Nogat! Mi mi no save mekem olsem. Man ya we mifala i faenem panikin ya long hem, hem nomo bambae i kam slef blong mi. Yufala ol narawan, yufala i save gobak gud nomo long papa blong yufala.”

Juda i tok from Benjamin

18Nao Juda* i kam klosap long Josef lelebet, i talem se, “Masta, plis yu lesin smol long toktok ya blong mi. Mi mi save we yu yu wan haeman tru, yu sem mak wetem king blong kantri ya, be plis yu no kros long mi. 19Bifo ya, yu yu askem long mifala se, ‘?Olsem wanem? ?Papa blong yufala i stap yet? ?Yufala i gat narafala brata blong yufala i stap?’ 20Mo mifala i talem se, ‘Yes, papa blong mifala i stap, be i olfala. Mo lasbon brata blong mifala i stap, we papa blong mifala i bonem taem hem i olfala finis. Mama blong lasbon ya i bonem tu pikinini boe nomo blong hem, be fasbon i lus finis, lasbon ya nomo i stap. Mo papa blong mifala i lavem hem tumas.’ 21Nao yu yu talem long mifala se, ‘Ale, yufala i go tekem hem i kam long ples ya, blong mi mi save luk hem.’ 22Be mifala i talem se, ‘Masta, boe ya i no save gowe long papa blong mifala. Sipos hem i gowe, papa blong mifala bambae i ded ya.’ 23Nao yu yu talem se, ‘Ale, sipos brata blong yufala i no kambak wetem yufala, mi no wantem luk fes blong yufala bakegen long ples ya.’

24“Nao taem mifala i gobak long papa blong mifala, mifala i talemaot tok blong yu long hem. 25Nao biaen, taem papa blong mifala i talem long mifala se, ‘Ale, yufala i godaon long Ijip bakegen, yufala i go pem smol kakae blong yumi bakegen,’ 26mifala i talem se, ‘Mifala i no save go. Man ya longwe i talem finis se, “Sipos lasbon brata blong yufala i no kam wetem yufala, mi mi no wantem luk fes blong yufala bakegen.” Hem i mas go wetem mifala. Hemia nomo rod blong mifala. Sipos no, bambae mifala i no save go.’ 27Nao papa blong mifala i talem long mifala se, ‘Yufala i save we mama blong hem i bonem tu pikinini boe nomo blong mi. 28Wan long tufala i gowe long mi finis. Ating ol wael anamol oli kakae hem, from we taem hem i aot, kam kasem tede, be mi mi no moa luk hem. 29Mi mi olfala tumas. Sipos yufala i tekemaot narawan ya, nao wan samting i kasem hem longwe, bambae mi mi harem nogud tumas, we bambae mi ded from.’ ”

30-31Nao Juda i talem bakegen se, “Masta, sipos mi mi gobak long papa blong mifala we lasbon ya i no kam wetem mi, nao papa blong mifala i luk samting ya, bambae hem i ded ya. Laef blong hem i stap olgeta long lasbon blong hem, mo hem i olfala tumas. Sipos mifala i mekem hem i harem nogud olsem, samting ya bambae i kilim hem i ded wantaem nomo. 32Nao antap long ol samting ya, mi mi promes finis long hem, se bambae mi mi lukaot long lasbon blong hem. Mi talem long hem se, ‘Papa, sipos hem i no kambak gud long yu, mi bambae mi karem panis blong samting ya olwe nomo, gogo mi ded.’ 33Masta, mi mi rere blong stap long ples ya. Mi rere blong tekem ples blong hem, blong kam slef blong yu. Be plis yu letem hem i gobak wetem ol brata blong mi. 34?Sipos mi mi gobak be hem i no kam wetem mi, bambae mi save go luk papa blong mifala olsem wanem? !Mi mi no wantem luk we bigfala trabol olsem bambae i kasem hem!”

Currently Selected:

Jenesis 44: BBR

Highlight

Copy