Jenesis 45

Josef i talemaot hem long ol brata blong hem

1 # Wok 7.13 Nao Josef i no moa save haedem tingting blong hem. Hem i harem se bambae i krae long fes blong ol slef blong hem, nao i sanem olgeta oli go afsaed. Nao taem hem i talemaot hem long ol brata blong hem, i no gat narafala man i stap, ol brata blong hem nomo oli stap insaed. 2Be hem i stap krae bigwan, we noes blong hem i kasem ol man Ijip afsaed, nao olgeta oli go talemaot nius ya long ol man long haos blong king. 3Nao Josef i talem long ol brata blong hem se, “!Mi mi Josef ya! ?I tru we papa blong yumi i stap yet?” Be taem olgeta oli harem tok ya, oli fraet we oli fraet, nao oli no save talem wan samting. 4Nao hem i talem long olgeta se, “Plis, yufala i kam klosap.” Oli kam klosap long hem, nao hem i talem se, “Mi mi Josef ya. Mi mi brata blong yufala, we yufala i bin salemaot mi bifo, blong mi kam slef blong ol man blong ples ya. 5Be i nogud yufala i stap harem nogud, mo i nogud yufala i stap jajem yufala from we yufala i salemaot mi olsem. Hemia i no wok blong yufala, i wok blong God ya, we hem i sanem mi mi kam fastaem long yufala long ples ya, blong mi save sevem laef blong ol man. 6Hemia i namba tu yia nomo blong hadtaem ya we bambae i no gat kakae long ples ya. Be i gat faef yia blong hem i stap yet, we ol man bambae oli no save mekem garen, mo oli no save tekemaot kakae long garen. 7God i mekem we mi mi kam fastaem long yufala long ples ya, blong mi sevem yufala long fasin ya we yumi evriwan i sapraes tumas long hem, mo blong mi save mekem rod blong olgeta we bambae oli kamaot biaen long yufala bambae oli no lus, oli stap gud nomo. 8I no yufala we i sanem mi mi kam long ples ya, God nomo i sanem mi. Hem i putumap mi mi kam nambawan haeman blong king, nao mi mi bos long olgeta samting long haos blong hem, mo mi stap lukaot long olgeta ples long kantri ya.

9 # Wok 7.14 “I gud yufala i hareap, yufala i gobak long papa blong yumi, yufala i talemaot tok ya blong mi long hem se, ‘Mi mi Josef, mi pikinini blong yu. God i putumap mi blong mi stap lukaot long olgeta ples long kantri ya Ijip. I gud yu aot long ples blong yu naoia nomo, yu kam stap wetem mi. 10Bambae yu save stap long ples ya Gosen, we i klosap nomo long ples blong mi. Nao yu, wetem ol brata ya blong mi, mo ol smol bubu blong yu, mo ol anamol blong yufala, mo ol narafala samting we yu yu gat, yufala evriwan i save stap long ples ya. 11Sipos yufala i kam stap long Gosen, bambae mi mi save lukaot gud long yu. Hadtaem ya blong kasem kakae bambae i stap faef yia bakegen yet ya, mo mi mi no wantem we yu, wetem ol brata ya blong mi, mo ol anamol blong yufala, bambae yufala i ded long hanggri.’ ”

12Mo bakegen, hem i talem long olgeta se, “Yufala ya wetem yu Benjamin,* yufala evriwan i luksave finis we mi mi Josef tru. 13Yufala i mas talemaot long papa blong yumi, paoa ya we mi mi holem long kantri ya. Mo yufala i mas talemaot olgeta samting ya long hem, we yufala i luk long ples ya. Mo yufala i mas hareap blong tekem hem i kam stap long ples ya.”

14Nao hem i holem stret brata blong hem, mo i stat krae. Mo brata blong hem i holem hem, mo hem tu i stap krae. 15Nao hem i go holem ol narafala brata blong hem wanwan, i stap kis long olgeta, mo i stap krae. Nao biaen, ol brata blong hem oli stat toktok wetem hem.

16Nao taem nius i kasem king wetem ol haeman blong hem long haos blong hem, se ol brata blong Josef oli kam, olgeta oli glad tumas. 17Nao king i kam talem long Josef se, “Yu talem long ol brata blong yu, se oli mas putum ol bag kakae ya blong olgeta long ol dongki blong olgeta, nao oli mas go long Kenan* bakegen 18blong tekem papa blong yufala wetem ol pikinini blong olgeta oli kambak long ples ya bakegen. Bambae mi mi givim ol nambawan graon long kantri ya i go long olgeta, mo bambae oli save kakae ol nambawan kakae blong ples ya. 19Mo yu talem long olgeta tu blong oli tekem ol kat blong ples ya oli go, blong oli save karem ol woman blong olgeta wetem ol smol pikinini blong olgeta oli kam. Olgeta oli mas tekem papa blong yufala i kam. 20Sipos oli luk se oli mas livim sam samting blong olgeta i stap longwe, yu talem long olgeta blong oli no letem tingting blong olgeta i kam nogud. Bambae ol nambawan samting blong kantri ya oli blong olgeta.”

21Nao ol pikinini blong Jekob* oli mekem olsem we king i talem. Josef i givim ol bigfala kat long olgeta, olsem we hem i talem, mo i givim ol kakae blong rod long olgeta, 22mo i givim ol niufala klos tu long olgeta. Be stret brata ya blong hem, hem i givim faef niufala klos long hem, wetem wan handred fifti taosen vatu.* 23Mo hem i sanem ten dongki i go long papa blong hem we oli stap karem fulap ol nambawan samting blong ol man Ijip i go, mo ten narafala dongki we oli stap karem wit mo bred* mo ol narafala kakae blong rod. 24Nao hem i sanem olgeta i go, mo i talem long olgeta se, “Taem yufala i stap wokbaot i go, bambae yufala i no raorao long yufala.”

25Nao olgeta oli aot long kantri ya, oli gobak long papa blong olgeta, long Kenan. 26Nao oli talem long hem se, “!Papa! !Josef i no ded ya! !Hem i laef yet, mo naoia, hem i stap lukaot long olgeta ples long Ijip!” Be papa blong olgeta i sek bigwan long tok ya, nao tingting blong hem i lus, i no save bilif long olgeta.

27Be taem olgeta oli talemaot olgeta tok ya long hem we Josef i talem long olgeta, mo i luk ol kat ya we hem i sanem olgeta i kam blong karem hem i go long Ijip, tingting blong hem i kam gud bakegen. 28Nao hem i talem se, “!O, i tru tumas! !Pikinini ya blong mi i stap yet ya! !Bambae i no longtaem mi mi ded! !Mi mi mas go luk hem fastaem!”

Currently Selected:

Jenesis 45: BBR

Highlight

Copy