Exodo 20

Ipiyaskel it Ampuꞌang Diyus it ki Moises i sang puluꞌ nga urdin

1Atkaytu na i inaat it Ampuꞌang Diyus duꞌun it kadakel ngayti. 2“Aku i AMPUꞌANG DIYUS mi, nga nagpaliꞌwan it imyu duꞌun it Egipto baw duꞌun it pagkaꞌuripen mi.

3Kuydaw ka#20:3 Maꞌyag kat Hinebreo nga ampang nga lamang katataawan i inurdinan it Ampuꞌang Diyus, temed bilang pagꞌesa-esaen ya sirat pakisugi-sugid. it may kilalaen baw sirbiyan mu nga maski unu nga ganti mu it aken.

4Kuydaw ka it buwat it ladawan nga sambaen mu nga subung it ladawan it maski unu nga kat langit, kat banwa baw kat danum.

5Kuydaw mu masalyaan it panluudan nga sambaen i mga iyan ngayan, ka aku nga AMPUꞌANG DIYUS mu, maꞌimun. Talagang rigaen ku i muꞌsa nga pablag it aken, pati mga anak nira seked it ikaꞌpat nga tungtung-inapuꞌ. 6Temed seked it maski rinibu nga tungtung-inapuꞌ, ildawan ku sira nga magkayli it aken baw sumunud it mga urdin ku.

7Kuydaw mu masalyaan it sumangpit i ngaran ku kat egay kapulusan u galang. Sabap aku nga AMPUꞌANG DIYUS mu, talagang rigaen ku i maski siyu nga sumangpit it ngaran ku it daꞌgay kakapulusan u galang.

8Ega lipatan mu nga ibagiꞌ mu it aken i Aldaw it Kapaꞌnaan. 9Seked lamang it enem nga aldaw i buwatan mu it mga buwaten mu. 10Ikapitung aldaw, Aldaw na it Kapaꞌnaan. Ibagiꞌ mu na it aken nga AMPUꞌANG DIYUS i itung aldaw. Kat ikapitu ngaytu nga aldaw, kuydaw ka kasalya muwat it maski unu nga buwaten mu, pati anak mu, katabang mu, mga ayep mu baw maski ega kabilug mu basta asan kanya it pamalay-balay mu. 11Sabap seledat enem nga aldaw, kiyumplitu ku i mga kugunaen ku nga langit, banwa, dagat baw muꞌsang betang nira. Pagꞌabut it ikapitu ngaytu nga aldaw, ega nay binwat ku ka nakumplitu nay muꞌsa. Aypaꞌ ka ipiyablag ku na i itung aldaw, ka ipagpabetang ku nga ega basta-bastang aldaw.

12Galangen mu i amaꞌ baw inaꞌ mu, isaꞌun paꞌlayen ka duꞌun it banwa nga ibgay ku it imyu.

13Kuydaw ka it pangimatay it masigkataw mu.

14Kuydaw ka it pamakun duꞌun it ega asawa mu.

15Kuydaw ka it panakaw.

16Kuydaw ka it panistugu it egay matuud kuntraꞌ kat maꞌiba mu.

17Kuydaw ka it kaꞌirak. Ega irakan mu i pamalay-balay it masigkataw mu. Ega irakan mu i asawa ya, mga uripen ya, mga ayep ya, u maski unu nga kusas ya.”

Ereꞌeret talagay iꞌlam it mga Israelita

18Namagyegyeg it iꞌlam i mga Israelita ngayti, pagkagneg nira it pamsar it duldug ngayti baw tingeg ngaytit taburi, baw pagkalteg it kilat, pati tabuk ngayti duꞌun it bukid. Timnitindeg na lamang sira duꞌut pagtitindegan nira ngayti nga duꞌut ala-alaid. 19Baw inupakat nira si Moises, nga maat nira, “Ikaw na i mampang, pagneg kami yan. Ega na Ampuꞌang Diyus ngayan, ka barang matay kami!”

20“Aaꞌ,” maat ni Moises it kanira, “ayaw kamut aliꞌ. Sukda-sukdan ya lamang bayan it imyu. Ireg ya lamang nga galangen mi kanya it may iꞌlam isaꞌun ega na muwat kamu it kasalaꞌan.”

21Temed magꞌaliꞌ paꞌ i mga taw ngayti, duꞌun na lamang sira it ala-alaid ngayti. Si Moises na lamang ngayti i nagpatpad duꞌut kunum ngayti nga maꞌpal nga duꞌun i Ampuꞌang Diyus.

Currently Selected:

Exodo 20: TBWONT

Highlight

Copy