Exodo 24
24
May binwat ni Moises nga panalisi nga magpapaꞌgen it pakiꞌupakat
1Maat siꞌ it AMPUꞌANG DIYUS it ki Moises, “Tumungul ka siꞌ ka madap siꞌ it aken. Pabayaꞌen mu si Aaron baw mga anak ya nga si Nadab baw si Abiu, baw pitung puluꞌ i mga ginuꞌu it mga Israelita. Sira ngaytu, sumamba it aken, temed asan sirat ala-alaid. 2Temed ikaw, melep ka sinit aken it esa-esa mu. Iyan mga kaꞌibaan mu ngayan, baw kadakel it mga Israelita, talagang ega mapakay nga tumungul sira.”
3Pagkatupus it muꞌsa nga kusugiden ngayti it AMPUꞌANG DIYUS duꞌut ki Moises, miyuliꞌ na si Moises ngayti ka nanugid duꞌun it mga Israelita it kumpur ipiyagꞌurdin ngayti it AMPUꞌANG DIYUS. Timnubag sira nga lagi, nga maat nira nga muꞌsa, “Talagang sunudun namen i muꞌsang ipiyagꞌurdin ngaytu it AMPUꞌANG DIYUS.” 4Bawnga isiyurat ni Moises i muꞌsa ngayti nga inaat it AMPUꞌANG DIYUS.
Pagꞌeyag siꞌ it aldaw nga kadedelman pang banar, nagbuwat si Moises it papangantengan duꞌut siyangkedan it bukid ngayti. Bawnga nagpatindeg kanya it sang puluꞌ may duwang batu i batu. Piyapatu-patuꞌan ya, sang puluꞌ may duwang kuyunan nga mga tungtung-inapuꞌ ni Jacob. 5Pagkaꞌman ya, may mga singkat ya nga mangaꞌwaꞌen nga lalaki nga Israelita nga muwat it pagꞌantengen nga ipagsamba duꞌun it AMPUꞌANG DIYUS. May isiyalisi nira gasiꞌ nga mga tudu nga bakaꞌ nga ipagsamba nga keseg it pakiꞌupakat it AMPUꞌANG DIYUS duꞌun it kanira baw sanggup it mga taw duꞌun it kanya. 6Binwat ni Moises, biyagiꞌ yay duguꞌ it inimatay ngayti nga ramu-ramu. Sang bagiꞌ, ibintang ya duꞌut karung. Sang bagiꞌ, ibiyuꞌbuꞌ ya na duꞌun it papangantengan ngayti. 7Bawnga pinsiꞌ ya i siyuratan ya it pakiꞌupakat it AMPUꞌANG DIYUS it kanira bawnga biyasa ya na duꞌun it mga taw. Maamaatan sira, “Talagang sunudun namen i muꞌsa ngaytu nga ipiyagꞌurdin it AMPUꞌANG DIYUS.”
8Aypaꞌ pinsiꞌ na ni Moises i duguꞌ ngayti duꞌut karung, ka ipiniꞌtik ya na nga ayun duꞌut mga taw ngayti. Maat ya, “Itu, duguꞌ ngaytu, i magpapaꞌgen it pakiꞌupakat ngaytu it AMPUꞌANG DIYUS it imyu, pagbegay ya it mga urdin ya ngaytu.”
Nanungul siꞌ si Moises duꞌut Bukid it Sinai
12Inaat siꞌ it AMPUꞌANG DIYUS it ki Moises, “Tumungul ka siꞌ situt bukid ngaytu, kakaꞌla-kaꞌlay ka yan sinit aken. Ibgay ku it imu i daku-dakulang dapiꞌpis nga batu nga siyuratan ku it mga urdin ku nga itulduꞌ mu it mga taw.”
13Aypaꞌ napanaw siꞌ si Moises, duwa ni Josue nga katabang ya, naꞌaduꞌun siꞌ it bukid ngaytit Ampuꞌang Diyus ka tumungul siꞌ si Moises. 14Inaat yay mga ginuꞌu, “Melat kamu lamang situ seked it kaꞌuliꞌ kami. Si Aaron baw si Hur ngaytu, sira nay baalaꞌ nga manigꞌayus mi, in beteꞌ may kaꞌilangan nga ayusun.”
15Timnungul na si Moises duꞌut Bukid it Sinai nga pagbubuꞌtungun siꞌ it kunum i siyagpawan ya. 16Bawnga nagpasalu duꞌut Bukid ngaytit Sinai i magsingkar nga kabantugan it AMPUꞌANG DIYUS, nga masyadung maꞌyag. Seledat enem nga aldaw pagbubuꞌtungan it kunum i bukid ngayti. Ikapitu na nga aldaw, bawnga tiyaꞌwagan it AMPUꞌANG DIYUS si Moises, nga duꞌun nat kunum ngayti i pagseraꞌan. 17Kat panleteg it mga taw, subung it magdidigalang nga apuy duꞌut siyagpawan ngayti i magsingkar ngayti nga kabantugan it AMPUꞌANG DIYUS. 18Pagtungul ni Moises, siyakep na kanya it kunum ngayti. Epat nga pulung aldaw baw delem i kaꞌlay ya duꞌun.
Currently Selected:
Exodo 24: TBWONT
Highlight
Share
Copy
Want to have your highlights saved across all your devices? Sign up or sign in
© 1992, Wycliffe Bible Translators, Inc. All rights reserved.
