Exodo 25
25
Pagpabgayen it AMPUꞌANG DIYUS i mga Israelita
1Inaat siꞌ it AMPUꞌANG DIYUS si Moises. 2Maat ya, “Itu siꞌ i iꞌaat mu it mga Israelita. Aaten mu sira nga megay sira it kumpur kat nakem nira nga ireg nira nga ibgay it aken. Ikaw naga i tumanggap. 3Itu may itu i mga ibgay nira, bulawan, pirak, tumbaga, 4benang nga maluꞌnaw, indilibelen baw madarag, pirmira nga abel, bulbul it kambing nga pagbubwaten na, 5anit it lalaki nga tupa nga liyuuꞌ it madarag, baw iyan pirmirang kulit it ramu-ramu kat dagat, baw tablaꞌ it akasya, 6lana nga magkatidaw, babangluun nga ipagragiꞌ it lana nga ipagpaꞌid baw iyan mabanglu nga ipagragiꞌ duꞌun it kamangyan. 7Beken paꞌ nga ibgay nira, mga marerga nga pagminaꞌen nga batu nga subung it kornalina baw mga beken, nga ipagtakin asat mga piyakabadyuꞌ it sasirduti nga pagpangaranat efod baw pektoral.
8Pabwaten mu sira it magkapuru-purun nga balay. Balay ngaytu, talagang ega basta-basta, ka subuk iyan nay taꞌidan ku isaꞌun kaꞌiba-iba mi na aku nga pirmi. 9Kaꞌilangan, pamwat mi it balay ngayan baw muꞌsang kagamitan nga iduꞌun, isunud mu it pabetang-betang nga iꞌaat ku na it imu kayti.”
Kaban it Pakiꞌupakat nga ipagpabwat
10“Muwat kamu it esang kaban nga akasya i buwaten. Duwang parasikwan baw tengaꞌ i kaꞌabwat ya, sang parasikwan baw tengaꞌ i kalayaw, atnaga i katagbaw ya. 11Paliꞌwan, paseled ya, lulupan mi it pirmirang bulawan, bawnga pakeꞌpelan mi it bulawan naga i ayun kat baꞌbaꞌ ya nga bilang panggagal it kaban ngaytu. 12Maglekeg kamu it epat nga batu nga bulawan nagay lekgen. Bawnga pabali-bali, nga kada kantu ya nga ayun kat salu, takinan mi nga piyakatalinga ya. 13Muwat kamu gasiꞌ it lampung nga papasaꞌnan mi it kaban ngaytu, akasya i buwaten mi baw lulupan mi naga it bulawan i pararampus. 14Bawnga in maꞌman mi na i papasaꞌnan ngaytu, iruꞌuk mi na asan it piyakatalinga nga pabali-bali it kaban ngaytu, nga kat kada kantu ya. 15Ega na awa-awaꞌen mi i papasaꞌnan ngaytu, iꞌunay mi na. 16Bawnga iyan duwang dapiꞌpis nga batu nga ibgay ku it imu nga pagsusuratan it mga urdin, ibtang mu asat kaban ngaytu ka katandaꞌ it pakiꞌupakat ku ngaytu it imyu.
17Buwatan mi it saꞌeb i kaban ngaytu, nga duwang parasikwan baw tengaꞌ i kaꞌabwat ya, sang parasikwan baw tengaꞌ i kalayaw. Pirmirang bulawan i buwaten. Itu ngaytu i pagpangaranan it Magkaꞌangutan it Ildaw nga Kapasinsiyaan. 18Maglimbang it kiyaꞌpusan it saꞌeb ngaytu may kerubin. Bulawan nagay buwaten. 19Pamwat mi, randunun mi na i mga kerubin ngaytu baw saꞌeb nga Magkaꞌangutan it Ildaw nga Kapasinsiyaan isaꞌun esa-esa lamang sira. 20Nagsarunga i pamwat mu it kerubin ngaytu, surubung nga magꞌuꞌungaw duꞌut Magkaꞌangutan it Ildaw nga Kapasinsiyaan. Iyan mga elad nira, magkekrab, temed nagtumu nga pagꞌuꞌlungan i Magkaꞌangutan it Ildaw nga Kapasinsiyaan. 21In naꞌman na, iꞌasan mu it sagpaw it kaban ngaytu nga betangan mu nat ibgay ku it imu nga duwa ngayan nga dapiꞌpis nga batu nga pagsusuratan it mga urdin ku. 22Ta, duꞌun ku ikaw kitaen it Magkaꞌangutan ngaytut Ildaw nga Kapasinsiyaan kat piyagtengaꞌan it duwa ngaytung kerubin. Duꞌun ku ibgay it imu i muꞌsang mga urdin ku it mga Israelita.”
Currently Selected:
Exodo 25: TBWONT
Highlight
Share
Copy
Want to have your highlights saved across all your devices? Sign up or sign in
© 1992, Wycliffe Bible Translators, Inc. All rights reserved.
