Genesis 33
33
Nagkita na na Jacob duwa magꞌakaꞌ
1Paglawag ni Jacob duꞌun it uꞌnaan, nalawag ya na i bulyug na Esau ngayti, magꞌaat kat epat ngayting gatus i kaꞌibaan ni Esau. Aypaꞌ binwat ni Jacob ngayti, kanya-kanyang anak duꞌut kanyang inaꞌ. 2Duꞌut uꞌnaan manggid i duwa ngayting uripen nga mga babay, uyut i mga anak nirat kanira. Magdadasun it kanira, si Lea baw ki Lea nga mga anak. Yanay ipiyagiyaringan ya, si Raquel baw anak ya ngaytit kanya nga si Jose. 3Miyuꞌna na si Jacob it kanira, ka simnusmu nat akaꞌ ya. Pitung bisis kanya nanluud i magdadarapaꞌ duꞌun it ki Esau ngayti.
4Temed si Esau ngayti, magpapalagyu kanya nga simnusmut ki Jacob. Siyakem ni Esau i ariꞌ ya ngayti bawnga inarkan. Nagsusgaw na sirang duwa. 5Pagpatingkag ni Esau, naltegan ya nay mga babay baw mangaꞌwaꞌ ngayting mamagdadasun it ki Jacob. Pagkalteg ni Esau, maat ya, “Siyu naytuy mga maꞌiba mu ngaytu?”
“Aaꞌ,” maat ni Jacob, “mangaꞌwaꞌ ngayan, anak ku nayan nga ipiyagꞌildaw it Ampuꞌang Diyus it aken.”
6Minlep na duꞌut kana Jacob i duwa ngayting mga uripen, uyut i mangaꞌwaꞌ ngayti, ka nanluud. 7Simnunud si Lea, uyut yay kanyang mga anak ka nanluud sira gasiꞌ. Kiyaꞌpusan na na Raquel duwa it anak ya ngayti nga si Jose it nanluud.
8Miningkut siꞌ si Esau. “Ta, yan mga reet-reet ngayat ramu-ramu nga taban it mga taw ngayang nasusmu namen, unu gasiꞌ yan? Unuy pagpatengedan mu kayan?”
“Aaꞌ, iyan ngayan,” maat ni Jacob, “yanay seked yat abut ku it imu nga agalen ku, isaꞌun tanggapen mu aku it magayen i nakem.”
9“Aaꞌ,” maat ni Esau, “Ariꞌ, subuk bastanti nat amen i aken nga kusas. Ega na bayan pisiꞌen ku. Imu naga.”
10“Aaꞌ, ega atkayan, Akaꞌ,” maat ni Jacob. “In talagang ega na maraꞌe-raꞌet i nakem mut aken, tanggapen mu i abut ku ngayan. Ka pagkalteg kut rupa mu, subung aku nat nakalteg it rupa it Ampuꞌang Diyus, sabap kat imu ngaytu nga magayeng pagtanggap it aken, yay naltegan ku, ladawan it ildaw it Ampuꞌang Diyus it aken. 11Aypaꞌ tanggapen muy abut ku ngaytut imu, ka inildawan akung matuud it Ampuꞌang Diyus. Yay matuud, egay maski unu nga kakurangan ku.” Ta it iriyeges ni Jacob it akaꞌ ya, aypaꞌ ka tiyanggap na ni Esau.
12Iyan naꞌubus nay pagsugi-sugiden nira magꞌakaꞌ, maat ni Esau, “Mapanaw tami na. Ibaan ta ikaw.”
13“Barang daꞌtami kapagdenga-denganen,” maat ni Jacob, “ka magkaꞌrutan mu, agalen ku, nga may mangaꞌwaꞌ ngaytu nga marurupuk. Baw magregen akut barang matay i mga magꞌaꞌanak ngayan nga tupa baw bakaꞌ in ereg-eregen tami nga panaw nga maski seledat sang aldaw lamang i dareꞌdegan it kanira. 14Magayen siguru, agalen ku, magꞌuꞌna-uꞌna kamu nay imyu. Dumasun kami manay amen, keseg-kesegen namen nagayang panaw, kumpur lakad it mangaꞌwaꞌ ngaytu baw mga ramu-ramu ngaytu. Yanayan, yay keseg it panaw namen, seked it maꞌbutan namen naga kamu asat Seir.”
15“Ta in atkayan,” maat ni Esau, “magayen in may ituduꞌ ku nga kaꞌibaan ku ngaytu, isaꞌun may iba mi it magpanaw.”
“Maski bayan ega na,” maat ni Jacob. “Ayaw ka nat pasasaw. Unu pay maꞌaat ku it imu it subraꞌ naytuy kagayen mu ngaytut aken?”
16Aypaꞌ iti nga laging aldaw, miyuꞌna na na Esau duꞌut Seir.
17Temed ki Jacob ngayti, naꞌaduꞌun it rugar nga pagpangaranan na kayti it Sucot. Duꞌun siꞌ kanya nagbalay-balay. Binwatan ya gasiꞌ it mga ardung i mga ayep ya ngayti. Aypaꞌ ka iting rugar, piyangaranan it Sucot, nga ireg sugiden, mga ardung.
18Pagtaꞌlib it mga taꞌun, namagpanaw siꞌ na Jacob. Garing duꞌut Sucot ngayti, nanlangbus siꞌ sira duꞌut lansangan it Siquem nga sakep it Canaan. Aypaꞌ na Jacob ngayti nga gimnaring duꞌut Mesopotamia, nakaꞌuliꞌ siꞌ duꞌun it Canaan it ega makay kaꞌunuꞌan it ginawa. Nagpakabrat kanya siꞌ it mga bala-balay ya duꞌun it patuꞌ it lansangan ngaytit Siquem.
19Iti, lugtaꞌ ngayting piyakabratan yat mga bala-balay ya, inalang ya na duꞌut mga kaꞌanakan ni Hamor nga amaꞌ ngaytit pagpangaranat ki Siquem. Kantidad it sang gatus kat kanirang pirak i ipiyagꞌalang ya. 20Bawnga nagbuwat kanya duꞌun it papangantengan it ipagsamba duꞌun it Ampuꞌang Diyus. Piyangaranan yay binwat ya ngayti it El-Elohe-Israel, nga ireg sugiden, gunaan i Ampuꞌang Diyus ni Israel.
Currently Selected:
Genesis 33: TBWONT
Highlight
Share
Copy
Want to have your highlights saved across all your devices? Sign up or sign in
© 1992, Wycliffe Bible Translators, Inc. All rights reserved.
