Genesis 35
35
Duꞌun sit Betel, nagpakikita i Ampuꞌang Diyus it ki Jacob
1Miyabut nga inaat it Ampuꞌang Diyus si Jacob, “Magliꞌid ka naga situt itung rugar. Paꞌugad ka naga duꞌut Betel. Duꞌun siꞌ i taꞌidan mu baw buwatan mu it papangantengan it ipagsamba duꞌut Ampuꞌang Diyus nga nagpakikita it imu, pagpalagyu mu ngayan it akaꞌ mu nga si Esau.”
2Aypaꞌ inaat ni Jacob i muꞌsa nga kat seled it pamalay-balay ya baw beken nga mga kaꞌibaan ya. Maat ya, “Ipamuntal mi na nga muꞌsa i mga tiyaw-taw nga pamagsambaen mi. Manlimpiyuꞌ kamu it bilug mi baw mangganti kamu it pakayan mi.#35:2 Panlimpiyuꞌ ngaytu, tandaꞌ it baꞌguun nira i adat nira baw ipagpasiguru i sadili nira nga kat Ampuꞌang Diyus na. 3Ka magpapanaw tami siꞌ nga paꞌugad duꞌun it Betel. Pagꞌabut ta duꞌun, magbuwat aku it papangantengan it ipagsamba duꞌun it Ampuꞌang Diyus. Ka tagnaꞌ ngayting dakulay kakuriꞌan ku, piyagnegan ya i panalangin ku. Baw yay matuud, kanya naga ngaytu i magtatarima it aken kat paꞌari-aring rugar nga piyanawan ku.” 4Ta binwat it inaat ngayti ni Jacob nga mga kaꞌibaan ya, ipiyarada na nira duꞌut kanya i pamagsambaen nira ngayti baw mga subuk mutyaꞌ nga aritis nira. Muꞌsa ngayti, ilimbeng ni Jacob duꞌut siꞌrung it esang kayu nga roble, nga duꞌun nagat Siquem. 5Bawnga napanaw na sira. Kat pabetang-betang it Ampuꞌang Diyus, nga magtatarima it ki Jacob ngayti, mga taw nga duꞌut katepad nira nga rugar, masyaduy iꞌlam nira it kana Jacob. Aypaꞌ daꞌgay nakaꞌurum tumundug nga muwat it ega magayen it kana Jacob ngayting nagliꞌid.
6Nakaꞌbut na si Jacob baw muꞌsang kaꞌibaan ya duꞌut lansangan it Luz, nga piyangaranan ni Jacob it Betel, nga sakep naga it Canaan. 7Pagꞌabut nira duꞌun, nagbuwat si Jacob it papangantengan it ipagsamba duꞌut Ampuꞌang Diyus, baw piyangaranan yay rugar ngaytit El Betel, sabap sikayti nagpakikita it kanya i Ampuꞌang Diyus, pagpalagyu ya ngaytit akaꞌ ya.
8Ta yan babay nga manigꞌasikasu it ki Rebeca it tagnaꞌ nga si Debora, miyatay na kanya duꞌun. Pagpatay ya, duꞌun nay limbengan it siꞌrung it sang puꞌun naga nga roble, nga kat segnad manggid it Betel. Aypaꞌ pangaran duꞌun kayti, Roble nga Naturuꞌan it Luwaꞌ.
9Ta saꞌup siꞌ nga nagpakikita i Ampuꞌang Diyus it ki Jacob nga nakaꞌuliꞌ na ngaytit garing duꞌut Mesopotamia. Baw piyatdekan ya i bilug ni Jacob it ampang nga may guna, 10nga magꞌaat, “Si Jacob i ipiyangaran it imu it mga giyaringan mu, temed garing kayti ega na si Jacob i ngaran mu. Si Israel na.” Aypaꞌ Ampuꞌang Diyus naga i nagpangaran it kanya it ki Israel ngayti.
11Maat siꞌ i beken nga ipiyagꞌaat yat kanya, “Aku i Ampuꞌang Diyus nga landaw nga gunaan. Dumakel ka nga taw, anak-inapuꞌ mu, magdadaklan sira nga mga taw. Manggaring-garing kat mga tungtung-inapuꞌ mu i subuk dakel na nga bangsa, lamang esa-esay puꞌun nira. Baw limiꞌwan kat mga inapuꞌ mu i mga magꞌadiꞌ. 12Baw itung banwa ngaytu nga isiyanggup ku it apuꞌ mu nga si Abraham baw amaꞌ mu nga si Isaac nga ibgay ku it kanira, ibgay ku nagaytu it imu, subliyen it anak-inapuꞌ mu.” 13Pagkatupus it inaat ngaytit Ampuꞌang Diyus it ki Jacob, gimnaring na kanya.
14Binwat ni Jacob, nagpatindeg siꞌ it batu nga arandeman ya it piyakisugi-sugidan ngaytit Ampuꞌang Diyus it kanya. Batu ngayti, biyuꞌbuꞌan yat lana baw pagꞌimnun nga, iti, pasalamat ya duꞌut Ampuꞌang Diyus. 15Betel i ipiyangaran ni Jacob sikaytit iting rugar.
Nanganak naga si Raquel it ikadwa takaꞌ timnaban nat ginawa ya
16Ega naga nagtinir sira duꞌun it Betel ngayti. Namagpanaw naga. Temed ega paꞌ nakaꞌbut sira duꞌut Efrata, pagbusgan na si Raquel. Magkakuriꞌan kanya nga banar it iting panganak ya. 17Iyan ereꞌeret na nga sakit i pabsug, maat it magpamanday, “Ayaw kat iꞌlam. Lalaki nagaytuy anak mu ngaytu.” 18Temed ababaꞌ nay ginawa ni Raquel. Yapaꞌ mugtuꞌ i ginawa ya, napangaranan ya nagay madaragen ngayti it ki Benoni. Temed iyan si Jacob mana, ipiyaBenjamin ya na.
19Pagpatay ni Raquel ngayti, ilimbeng na kanya duꞌun it adeꞌdeng it dalan ngayti nga magpaꞌaduꞌut Efrata, nga kayti Betlehem na. 20May dakulang batu nga ipiyatindeg ni Jacob duꞌun it limbengan ngaytit ki Raquel nga piyakaꞌarandeman ya. Seked kayti magkatandaꞌan pay lebeng ni Raquel sabap it batu ngayti.
21Bawnga napanaw siꞌ na Jacob, paggetaꞌan na ngaytit ki Israel. Duꞌun i piyaꞌabutan nira it rugar nga pagpangaranat Migdal-eder. Nagbalay-balay siꞌ sira duꞌun.
22Iyan duꞌun nat iting rugar si Israel, may maraꞌe-raꞌet nga binwat ni Ruben ngayting anak ya nga panganay, ka inulid ya si Bilha ngayting asa-asawa it amaꞌ ya. Ega naga nataguꞌ it ki Israel i iting binwat.
Sang puluꞌ may duwa nga muꞌsa i lalaki nga anak ni Jacob. 23Anak ni Jacob duꞌut ki Lea, si Ruben i panganay. Sumunud it ki Ruben, si Simeon bawnga si Levi, si Juda, si Isacar baw si Zabulon. 24Anak ni Jacob duꞌut ki Raquel, duwa-duwa lamang, si Jose baw si Benjamin na ngayti. 25Ki Bilha, uripen ngayti ni Raquel nga inasa-asawa ni Jacob, anak ya si Dan baw si Neftali. 26Ki Lea ngayting uripen nga si Zilpa nga inasa-asawa gasiꞌ ni Jacob, manganak it kanya, si Gad baw si Aser.
Iting muꞌsa i mga anak ni Jacob nga lalaki. Duꞌun nagay siyakitan nira it Mesopotamia.
Pagpatay ni Isaac
27Bawnga limnangbus si Jacob duꞌut amaꞌ ya nga si Isaac duꞌut Mamre, nga sakep it Kiryat-arba, (nga kayti Hebron na). Duꞌun i tagnang pagtataꞌidan ni Abraham baw ni Isaac. 28Tanan-tanan nga idad ni Isaac, sang gatus baw walung pulung taꞌun. 29Naꞌbut nay kanyang umur aypaꞌ miyatay na kanya, nakatiꞌmes na duꞌun it mga giyaringan ya. Talagang piyaꞌlay kanya, ka pagpatay ya ngayti, gurang na nga talaga. Baw duwa naga ngayti nga mga anak ya nga si Esau baw si Jacob i miyasikasu it panlebeng it kanya.
Currently Selected:
Genesis 35: TBWONT
Highlight
Share
Copy
Want to have your highlights saved across all your devices? Sign up or sign in
© 1992, Wycliffe Bible Translators, Inc. All rights reserved.
