Genesis 37
37
In unuka pagꞌisgan na si Jose it mga akaꞌ ya
1Si Jacob ngayti, timnakenaꞌ na duꞌut Canaan ngayti nga tiyaꞌidan it amaꞌ ya. 2Mga ipagtuturan ngaytu, pasar nagat ki Jacob ngayti.
Ta, si Jose ngayti nga anak ya, nga magꞌidad nat sang puluꞌ may pitung taꞌun, magꞌeper naga kanya it mga ayep nira, nga kaꞌibaan it mga sulsug ya ngayting anak it amaꞌ ya duꞌut duwa ngayting kababayan nga si Bilha baw si Zilpa. Kaꞌsa may namuyaan ya nga ega magayen nga pagbuwaten nira. Pagkaꞌuliꞌ ya, isiyugid ya duꞌut amaꞌ nira ngayti.
3Si Jose ngayti, pagdiyu-diyuun nga banar ni Israel ngayti nga amaꞌ nira, subraꞌ paꞌ it beken ngayting mga anak ya, ka anak ya mana it gurang na kanya. Piyabwatan ya si Jose it subrang magayen nga gulamen nga pakayan nga mabatek. 4Iyan namuyaan it mga sulsug ya nga subrang pagmaꞌalen kanyat amaꞌ nira, subraꞌ paꞌ it kanira, inisgan na nira baw ega nay magaye-gayen nga paniniklaꞌan nirat kanya.
5Kaꞌsa nanagaynep si Jose ngayti. Temed unupat pagtuturan yat tagaynep ya ngayti, miyereꞌeret nay binsir it mga sulsug ya ngaytit kanya. 6Maat i itiyuturan ya it kanira, “Atkayti-atkayti bay tiyagaynep ku. 7Maat duꞌun tamit uma, magbegkes-begkes it tagasang kemkem nga tirigu. Letganan ku maat timnindeg it pagayen-gayen i aken ngayting begkes bawnga imyu ngaytu, namagpanluud duꞌut linibut ya.”
8“Ta unuy ireg sugiden kayti?” maat i mga sulsug ya ngayti. “Unu, magꞌadiꞌ ka it amen? Unuy tanud mu? Mabwat mu kami nga sakepan?” Aypaꞌ sabap it tagaynep ya ngayting isiyugid ya, nagdungag nang banar i iseg nirat ki Jose ngayti.
9Daꞌga, nanagaynep naga si Jose it sumaꞌup bawnga itiyuturan ya naga duꞌut mga sulsug ya. “Pagnegan mi siꞌ ka nanagaynep aku sit sumaꞌup,” maat ya. “Magpaꞌa-paꞌaat bay tiyagaynep ku siꞌ, naltegan ku maat nga nanluud i aldaw, bulan baw sang puluꞌ may esang bituꞌun. Nanluud sirang muꞌsa it aken.”
10Pati duꞌut amaꞌ ya, tiyuturanan ya gasiꞌ it iting tiyagaynep ya. Ta talagang diyalaꞌan na kanya it amaꞌ ya. Maat i amaꞌ ya ngayti, “Unuy ireg mu nga sugiden kat tiyagaynep mu ngayan? Adimaat magmatuud nga duwa kamit inaꞌ mu baw mga sulsug mu, manluud kat adapan mu!” 11Unupat miyereꞌeret nang banar i inggit it mga sulsug ya ngaytit kanya. Temed kat amaꞌ nira, pirmi ya nga pagdedemdemen i itiꞌen ngayti.
Binwat si Jose it ega magayen it mga sulsug ya ngayti
12May esang timpu nga naꞌaduꞌut adeꞌdeng it Siquem i mga sulsug ni Jose ngayti, ka duꞌun siꞌ i daranan nira nga pakaꞌnan it pagꞌeperan nira ngayting mga ayep it amaꞌ nira. 13Inaat ni Israel si Jose, “Daꞌga adeꞌdeng nat Siquem i mga sulsug mu nga magꞌeper it mga ayep ta? Ta napikir ku, papanawun ta ikaw nga manundug it kanira.”
“Eeꞌ,” maat ni Jose.
14“Tundugun mu sira,” maat ni Israel ngayti, “ka baꞌnawun mu. Ayaw kat pagꞌatrasu duꞌun. Muliꞌ ka nga lagi isaꞌun maꞌrutan ku in ega makay kaꞌunuꞌan nira.” Aypaꞌ piyapanaw ya na si Jose ngayti, gimnaring duꞌun it pagtataꞌidan nira ngayting Mintang it Hebron, nagpaSiquem na.
Pagꞌabut ya duꞌun it Siquem, yay binwat yay panaw-panaw, magtulus it mga sulsug ya ngayti. 15Nasusmu si Jose it esang taw duꞌut pagpanawan ya ngayting pagpasturan nga rugar. Iningkut kanya it taw ngayti in unuy pagtulusun ya.
16“Ega,” maat ni Jose, “magtulus akut mga sulsug ku. Barang magkaꞌrutan mu in ariyen na sira magpakaꞌen it mga ayep namen.”
17“Aaꞌ,” maat it taw ngayti, “ega na bayan situ sira. Namagpanaw siꞌ. Nagnegan ku nga pagrundingen nira, paꞌugad duꞌut Dotan.”
Egay beken, naꞌaduꞌun sit Dotan si Jose. Abutan ya, duꞌun sira nga matuud. 18Temed ta, magdarapaꞌ paꞌ kanya, nalawag nat mga sulsug ya ngayti. Pagkalawag, nagꞌupa-upakaten sira nga imatayen nira si Jose ngayti.
19Maamaatan sira, “Aaꞌ, wayan i matiyagaynepen ngayan! 20Esa-esa ga, imatayen tami bawnga iꞌlug duꞌut esa it mga kali ngaytung sasaradan it danum. Panugid tami duꞌut balay, aaten tami, siyamay-samay nat kumakaꞌen nga ramu-ramu duꞌut piyanawan ya. Letganan tami in unu paꞌ sadaw i lapusan it piyamagtagaynep ya ngayan.”
21Temed pagkagneg ni Ruben, ireg ya nga iribri si Jose kat pagkubwaten it mga beken ngayting sulsug ya. Maat ya, “Ega! Ega bayan magayen nga buwaten. Unuka imatayen tami kanya? 22Ega ipaturuꞌ tami i duguꞌ ya. Tutal situ tat rugar ngaytung kapupuyangtan, iꞌlug tami na lamang kanya duꞌut kali ngayti. Temed ega patdagan tamit alima tami.” Atkayti i inampang ya ka kat nakem ya nga iribri ya naga kat kamataynen i ariꞌ ya ngayti, ka iꞌuliꞌ duꞌut amaꞌ ya.
23Aypaꞌ pagꞌabut ni Jose duꞌut kanira, sinikep nirang lagi ka limbasan it magayen ngayting gulamen ya nga mabatek. 24Bawnga iꞌinlug na nira duꞌut kali ngayti. Iting kali, egay kadanum-danum. Napra na.
Nataban si Jose duꞌun it Egipto ka ipiyaꞌalang kanya
25Desang mamagkaraꞌnen na sira, may nalawag nira nga bulyug it mga Ismaelita, nga manigdagang nga garing duꞌut Galaad. Dakulang pamiri-pirisiꞌen it mga kamelyo nira, mga pagbuwateng babangluun, balsamo, mga mira, nga muꞌsa ngayti, idagang nira duꞌun it Egipto.
26Maat ni Juda it mga sulsug ya ngayti, “Subuk egay mapulus tami it sulsug tami ngayan in imatayen tami kanya nga subung nat pagpikiren tami ngayan kagayna. 27Daliꞌ kamu na ka ipaꞌalang tami na lamang duꞌut mga Ismaelita ngayti. Magayen payat tedagan kanyat alima tami, ka kanya sulsug ta, esa-esay duguꞌ tami nga muꞌsa.” Napakay i beken ngaytit inaat ngayti ni Juda.
28Aypaꞌ egay beken, pagtaꞌlib it mga manigdagang ngayting mga Madianita, nga iyan gasiꞌ i esang panaꞌwag it mga Ismaelita ngayti, inabat nira siꞌ si Jose duꞌut kali ngayti nga inlugan nira ka ipiyaꞌalang na. Ipiyaꞌalang nirat kantidad it duwang puluꞌ kat kanirang pirak. Pagkabayad, piyabayaꞌ nat piyaꞌalangan ngayti si Jose duꞌut Egipto. Temed ki Ruben, ega duꞌun kanya it iting binwat nira, aypaꞌ ka egay uru-urut ya.
29Ta, pagbaꞌnaw ni Ruben it kali ngayti nga inlugan, unupat ega nay duꞌun nga si Jose. Kat kadakulat kasmek yat ki Jose ngayti, piyanrarasik yay pakayan ya. 30Minlep si Ruben duꞌut mga sulsug ya ngayti. “In yayning kabetang nga matuud,” maat ya, “unu nay buwaten ku kayan it ega nay si Jose duꞌut inlugan tami ngayti nga kali?”
31Aypaꞌ binwat nira, namagꞌimatay sirat kambing. Bawnga itiyaꞌen-taꞌen duꞌut duguꞌ i mabatek ngayting gulamen ni Jose nga limbas nira. 32Pagkabwat nira it atkayti, tiyaban na nirat miyuliꞌ duꞌun it amaꞌ nira. Maat nira, “Amaꞌ, naparagan namen bay itung pakayan duꞌut dalan. Lilingen mu, ka subung bat pakayan na ngayan ni Jose.”
33Pagliling it amaꞌ nira ngayti, nakilalaan ya. “Egaytuy beken,” maat ya, “gulamen tu ni Jose! Siguru inimatay na kanya it kumakaꞌen nga ramu-ramu. Siguradu yan, siyamay-samay nayan i bilug ni Jose.”
34Baw kat kadakulat kasmek ya, riyasik ni Jacob i pakayan ya, bawnga nagsambut it rambay nga maꞌerep ka yay adat nira in may dakulang magkasmekan. Naꞌlay talaga nga singgawan ya sabap it anak ya ngayting si Jose. 35Pagbanga-bangayen naga kanya it beken ngayting mga anak ya, babay, lalaki. Temed ega nagpabangay kanyat kanira. “Ega bayan mabangay mi aku,” maat ni Jacob. “Isugid kut imyu, patayan ku lamang i kademdem ku ngaytu. Sugawan kuytuy anak ku ngaytu seked it makitaan ku siꞌ kanya duꞌun it abutan it mga miyatay.” Siminggaw kanya nga matuud sabap it anak ya ngayti.
36Temed si Jose ngayti, pagꞌabut duꞌut Egipto it mga Madianita ngayting piyaꞌalangan, ipiyaꞌalang nira siꞌ. Miyalang it kanya, esang taw nga pagpangaranat ki Potifar, nga esang katimbang it adiꞌ it Egipto ngayti baw kapitan paꞌ it mga guwardiya ya.
Napirisu si Jose ka piyamuwat-buwatan it asawa ni Potifar
[Mga 1700 B.C.]
Currently Selected:
Genesis 37: TBWONT
Highlight
Share
Copy
Want to have your highlights saved across all your devices? Sign up or sign in
© 1992, Wycliffe Bible Translators, Inc. All rights reserved.
