Genesis 39
39
1Si Jose ngayti nga ipiyaꞌalang it mga sulsug ya duꞌun it mga manigdagang ngayti nga mga Ismaelita, nataban na duꞌun it Egipto. Pagꞌabut siꞌ duꞌun, ipiyaꞌalang siꞌ it piyaꞌalangan ngayti duꞌut ki Potifar, esang taga Egipto nga katimbang it adiꞌ, baw kapitan paꞌ it mga guwardiya ya.
2Temed talagang pagtatarimaen nga matuud it AMPUꞌANG DIYUS si Jose ngayti, aypaꞌ nanggayen i kabetangan ya. Ministar kanya duꞌun it balay it agalen ya ngayti nga taga Egipto. 3Namuyaan it agalen ya ngayti nga pagtatarimaen it AMPUꞌANG DIYUS si Jose baw, muꞌsang pagbuwaten ya, purus pagtabangen kanya it ildaw it AMPUꞌANG DIYUS, isaꞌun magmagayen. 4Ta it atkayti, siyagyaan kanya ni Potifar ngayti. Ipiyatindeg ya nga sarig-sarigan ya. Bawnga ipiyaꞌalima ya it ki Jose ngayti i muꞌsa nga kat seled it pamalay-balay ya, pati mga kusas, ipiyabaalaꞌ nat kanya. 5Egay beken, garing it ipiyabaalaꞌ na ngaytit ki Jose i muꞌsa duꞌut pamalay-balay ngayti ni Potifar, talagang pagꞌildawan nat AMPUꞌANG DIYUS i pamalay-balay it taga Egipto ngayti sabap it ki Jose. Baw ega lamang kat pamalay-balay ni Potifar, in daꞌga pati duꞌut pagpasturan ya ngayti, talagang nagmagayen i muꞌsa kat ildaw it AMPUꞌANG DIYUS. 6Aypaꞌ ipiyabaalaꞌ ya talaga it ki Jose i muꞌsa ya. Ega na magpasilabet kanya. Si Jose nay baalaꞌ. Yamanay kat ulu ya, in unuy magayen ya nga kaꞌnen.
Si Jose ngayti, talagang kanaꞌkan nga lalaki. 7Aypaꞌ ka liyangkaan kanya it agalen ya nga babay nga asawa ngayti ni Potifar. Kaꞌsa inaat ya si Jose, “Uliden mu aku!”
8“Aa bilaꞌ,” maat ni Jose, “ayaw kat ampang it atkayan. Iyan agalen ku, ega nay pagpasasawan ya nga maski unu ka ipiyabaalaꞌ ya nat aken i muꞌsa ya. 9Subung nat nagsubung nay kataꞌas namen. Ega nay ipagꞌimet ya it aken, puyrat imu ngaytu nga asawa ya. Ta unuka buwaten kuy pagleltegan ku nang maraꞌway baw kasalaꞌan na kat Ampuꞌang Diyus?” 10Aldaw-aldaw, atnakayting-atnakayti i buwat it agalen ngayti ni Jose nga babay it kanya. Temed unu-unuꞌun ya si Jose ngaytit runding it uliden kanya u magꞌiba-iba sira, atgat bengel nga tapilak si Jose.
11Ta may esang aldaw nga siminled siꞌ si Jose duꞌut balay ka muwat siꞌ it buwaten ya, baw egay beken nga maꞌiba ya nga taraꞌgen duꞌut balay ngayti. 12Egay beken, piyuꞌgunan it asawa ngayti ni Potifar si Jose, singkel na i badyu-badyuꞌ ya, sigi nang aat nga, “Sigi na, uliden mu na aku!” Temed binwat ni Jose it atkayti na, limbas ya nay badyuꞌ ya ngayting pagseskelen bawnga miyalagyu nat nanliꞌwan.
13Pagkamuya it babay ngaytit atkayti i binwat ni Jose, paribasay pagseskelen yay badyuꞌ ngayting limbas, timnaꞌwag-taꞌwag na kanya. 14Maat yat mga taraꞌgen nira, “Letganan mi tuy buwat it asawa ku ngaytu, nga miyanu-anu nagpasled it Hebreo ngayan. Daꞌga magpanliꞌwan nay adat ya nga ega magayen, ka ungaytu ga, nakatingeg-tingeg aku ka sinled ya na aku ka kuꞌulid. 15Pagkamuya yat timningeg-tingeg aku na ngaytu, miyalagyu na kanyat nanliꞌwan. Ta ungaytu, natutuduꞌ i badyuꞌ ya ngaytu.”
16Ta binwat it babay ngayti, itiyaguꞌ ya nay badyuꞌ ngayti ni Jose, iꞌinlat yat nakaꞌuliꞌ i asawa ya nga agalen ni Jose. 17Pagꞌabut it asawa ya ngayti, maat ya, “Ta letganan muy buwat mu ngayan nga nagpataꞌid ka it Hebreo situt aten. Daꞌga sinled ya na aku ka kubwaten ya na akut maraꞌe-raꞌet? 18Temed yan timningeg-tingeg aku, miyalagyu na kanyat nanliꞌwan, natutuduꞌ i badyuꞌ ya ngaytu.”
19Pagkagneg it lalaki ngayti nga agalen ni Jose it tuturan ngaytit asawa ya, simnikrab i iseg ya. 20Pinirisu ya nga lagi si Jose ngayti. Piyasledan it ki Jose nga pirisuwan, may mga beken gasiꞌ nga pirisu duꞌun nga pinirisu it adiꞌ.
21Temed talagang pagtatarimaen nga pirmi it AMPUꞌANG DIYUS si Jose ngayti, baw sabap it ildaw it AMPUꞌANG DIYUS, magayen nagay pabetang it magpamaalaꞌ it pirisuwan it ki Jose. 22Aypaꞌ ibinggay siꞌ it magpamaalaꞌ ngaytit pirisuwan duꞌut ki Jose i pangarigra. Si Jose siꞌ ngayti i manigꞌarigra duꞌun it pirisuwan. Muꞌsang pagbuwaten duꞌun baw mga pirisu nga beken, kanya na i baalaꞌ. 23Ega na pagpasilabtan it magpamaalaꞌ ngaytit pirisuwan i kumpur nakapakarguꞌ ya nat ki Jose nga buwaten duꞌut pirisuwan ngayti, ka namuyaan ya nga pagtabangen it AMPUꞌANG DIYUS si Jose ngayti kat muꞌsang buwaten ya, ka magmagayen i muꞌsa.
Currently Selected:
Genesis 39: TBWONT
Highlight
Share
Copy
Want to have your highlights saved across all your devices? Sign up or sign in
© 1992, Wycliffe Bible Translators, Inc. All rights reserved.
