Juan 5

Piyagayen ni Jesus i esang lalaki nga taꞌun nay kaꞌlay it siyarutan ya

1Ega siꞌ naꞌlay nga banar, pistaꞌ siꞌ it mga Judio. Naꞌaduꞌun siꞌ si Jesus it Jerusalem. 2Duꞌun it iting siyudad, adeꞌdeng duꞌun it pagpangaranan it Puwirtaꞌan it mga Tupa, may dakulaꞌ nga ipiyaldung nga danum. Pangaran it itiꞌen kat Hinebreo, Betesda. Lima i mga pagꞌaꞌatpan kat linibut ya. 3Magkatingped duꞌun i kadakel it mga sasarutun, mga beleg, mga pilay, baw mga may patay nga bagit bilug. Pagꞌelaten nira, rimimen i danum ngayti. 4Sabap katuturanan nira, magpanlampud sumang kaꞌanu i esang anghil it Ampuꞌang Diyus baw pagkawkawun yay danum ngayti. Siyu-siyuy makauꞌna it lumampud baw temegday it danum ngayti in makawkaw na, maski unu nga sarut i sarut ya, gumayen na.

5May duꞌun nga sang kataawan nga lalaki, nga tulung puluꞌ may walu nang taꞌun i kaꞌlay it siyarutan ya. 6Naltegan kanya ni Jesus. Urut ya nga naꞌlay na nga siyarutan it iting taw. Inlep ni Jesus baw iningkut ya, “Unu, ireg mu nga medek i sarut mu ngaytu?”

7“Agalen, abaa, in ireg lamang,” katubag kanya, “takaꞌ ega bay magpalampud it aken in rimimen nay danum ngaytu. Magpaꞌere-eres aku nayan it manlampud temed it magkauꞌnaan aku.”

8Maat siꞌ ni Jesus it kanya, “Timindeg ka baw pirisiꞌnen mu i pagliliꞌtidan mu ngaytu ka mapanaw ka na.” 9Sakaliꞌ nga gimnayen na i lalaki ngayti. Pinirisiꞌen ya nang matuud baw napanaw na.

Iting aldaw, Aldaw it Kapaꞌnaan. 10Aypaꞌ ka inaat it mga pagbayaꞌen it mga Judio i lalaki ngayti nga piyagayen ni Jesus i sarut ya, “Unuka pagpiri-pirisiꞌnen mu i pagliliꞌtidan mu ngayan? Daꞌga basaꞌan pagliꞌyan i atkayan in Aldaw ngaytut Kapaꞌnaan ka kuntraꞌ it urdin?”

11Temed katubag kanya, maat ya, “Aat baytut aken it nagpagayen ngaytit sarut ku nga pirisiꞌnen ku i pagliliꞌtidan ku ngaytu baw mapanaw aku.”

12“Siyuyti, nagꞌaat ngaytit imu,” maat siꞌ it mga Judio ngayti, “nga pirisiꞌnen mu baw mapanaw ka?” 13Temed ega magkakilalaan it lalaki ngayti i nagpagayen ngaytit sarut ya, sabap it nakalaꞌuk-laꞌuk siꞌ si Jesus duꞌut kadaklan it taw.

14Ega naꞌlay, naltegan ni Jesus i piyagayen ya ngayti duꞌun it Templo nga papagsambaan. Pagkalteg ya, inaat ya, “Ta, magayen ka na kayti. Iyan indiꞌan mu nay kasalaꞌan. Ka in kayliyan mu paꞌ, subraꞌ payan sikayan i mabetangan mu nga kakuriꞌan.”

15Nanliꞌwan i lalaki ngayti ka nanugid duꞌut mga Judio ngayting mamagꞌingkut nga palan si Jesus i nagpagayen ngaytit kanya.

Paribasay Anak it Ampuꞌang Diyus si Jesus, dakulaꞌ talagay pudir ya, temed pagsunudun ya nagang pirmi i kaꞌirgan it Amaꞌ

16Ta paribasay binwat ni Jesus i atkayti kat Aldaw it Kapaꞌnaan, timnalaluꞌ nay kupakuriꞌ it mga pagbayaꞌen it mga Judio it ki Jesus ngayti. 17Ta it atkayti, inaat sira ni Jesus, “Iyan Amaꞌ ku, sigi nga buwat nga pangildaw. Ta atkayan naga i aken.” 18Pagkagneg it mga Judio ngayti, miyereꞌeret nay iseg nira. Kuꞌimatayen nira nang banar si Jesus, sabap ega lamang riyanggaꞌ yay urdin nira pasar it Aldaw it Kapaꞌnaan, in daꞌga pagꞌaaten ya paꞌ nga Amaꞌ yay Ampuꞌang Diyus, intuntis nga magpasbung kanya it Ampuꞌang Diyus.

19Ta it atkayti, inaat ni Jesus i mga Judio ngayti, “Kamatuudan tuy pagꞌaaten ku ngaytut imyu, nga egay magkabwat it Anak in kat sadili ya na lamang, in daꞌga iyan i pagbuwaten ya, iyan nga magkaltegan ya nga pagbuwaten it Amaꞌ. Iyan pagbuwaten it Amaꞌ ya, simpri iyan naga i buwaten ya. 20Sabap talagang pagmaꞌalen it Amaꞌ i Anak. Aypaꞌ ipagpalteg yat kanya i muꞌsa nga pagbuwaten ya. May mataꞌas paꞌ sikayan nga mga pagbuwaten nga ipalteg it Amaꞌ nga buwaten nat Anak isaꞌun maliluꞌ kamu. 21Ka in magꞌuꞌunu pagꞌegnen it Amaꞌ i mga miyatay, atkayan naga egnen naga it Anak i kumpur ireg ya nga egnen. 22Talagang ega mukuman it maski siyu i Amaꞌ. Ibinggay ya it Anak ya i pudir nga yay mangukuman, 23isaꞌun nga galangen it muꞌsang katataawan i Anak, subung nagat paggalang nira it Amaꞌ ya. Ka yay matuud, in siyu nga egay paggalang it Anak, ega gasiꞌ paggalangen yay Amaꞌ nga timnaꞌeg it Anak nga paꞌasitu.

24Talagang matuud tuy itu nga ipagꞌaat kut imyu. Iyan magpagneg it mga pagꞌampangen ku baw magpamayaꞌ it nagtaꞌeg ngaytit aken, iyan i may kaꞌgenan nga egay kaskedan. Ega na ukumanan kanya it mabeꞌgat. Imbis nga panriga nga kamataynen, siguradung may magꞌaꞌareg nat kanya nga kaꞌgenan nga egay kaskedan. 25Ituy kamatuudan, mabut i timpu, kayti na ngaytu, nga magnegan it mga sakep it kamataynen i gaꞌmaran it Anak it Ampuꞌang Diyus, baw iyan nga pagneg baw sumunud, magꞌegen. 26Iyan Amaꞌ, egay piyanggaringan it kaꞌgenan ya ka kanyay puꞌun it kaꞌgenan. Baw ipiyabetang-betang ya nga atkayan gasiꞌ i kaꞌgenan it Anak ya. 27Binggayan ya gasiꞌ i Anak ya ngaytu it pudir nga mukuman sabap kanya i Taga Langit nga Ipiyanganak it Taw.

28Ega maliluꞌan mi tu, sabap mabut talagay timpu nga magnegan it mga miyatay, nga maglelbeng na, i gaꞌmaran ya. 29Ta sira, maꞌgen it paꞌuliꞌ baw manliꞌwan duꞌun it mga lebeng nira. Muꞌsa nga magayen i buwat it egen paꞌ sira, begayan it kaꞌgenan nga egay kaskedan. Temed iyan muꞌsa nga maraꞌe-raꞌet i buwat, ukumanan nga panrigaen sira. 30Talagang ega mapakay nga may pagbuwaten ku nga pagsadiliyen ku lamang. Magꞌukuman aku uyun nga pirmi kat ipagꞌaat nagat aken it Amaꞌ. Aypaꞌ ka magayen i pangukuman ku, ka ega maat sadili ku nga kaꞌirgan i pagsunudun ku, in daꞌga iyan i pagsunudun ku, iyan nga kaꞌirgan it nagtaꞌeg it aken it paꞌasitu.”

Ega pagpamayaꞌnen it mga Judio i mga pamatuud pasar it ki Jesus, maski pamatuud nagat Diyus Amaꞌ

31Maat paꞌ ni Jesus it kanira, “Siguru in beteꞌ aku lamang i magpamatuud it sadili ku, ipabetang mi nga ega matuud. 32Temed may beken nga magpamatuud it aken baw magkaꞌrutan ku nga talagang matuud i ipagpamatuud ya.

33May piyapaꞌaduꞌun mit ki Juan ngayti nga magpamawtis bawnga ipiyagpamatuud yay sabap it kamatuudan pasar it aken. 34Ega maat kaꞌilangan kuy pamatuud it in siyung taw. Pagsangpiten ku lamang i pamatuud ni Juan isaꞌun maribri kamu in pamayaꞌnen mi. 35Si Juan ngayti katꞌesa, kaꞌalimbawaan ya, subuk magsusgu nga tidaw sabap, mga ipiyanulduꞌ ya, minggay it eyag kat pikiran it mga taw. Nasagyaan mit sang dekeyeꞌ i eyag ya ngaytu.

36Temed may pamatuud pasar it aken nga subraꞌ paꞌ it pamatuud ngaytu ni Juan. Iyan mga pagbuwaten ku nga ipagpabwat it aken it Amaꞌ ku, iyan i magpamatuud nga aku, tiyaꞌeg it Amaꞌ it paꞌasitu. 37Baw iyan Amaꞌ nga nagtaꞌeg it aken, kanya mismu i nagpamatuud naga pasar it aken, temed it tagnaꞌ paꞌ seked it maski kayti na ngaytu, ega pagpagnegan mi i gaꞌmaran ya baw ega pagkilalaen mi i pagkinataw ya.#5:37 Atkaytu i inaat ni Jesus ka ega lamang kaꞌsa nagpakikita i Ampuꞌang Diyus it taw, nga ipiyagladawan ya i pagkinataw ya (Genesis 18:1-33, Genesis 32:24-30, Mga Bilang 9:15-17, Mga Bilang 12:8). Subrat muꞌsa, si Jesus ngaytu, nga duꞌut kanya magkaltegan talaga i pagkinataw it Ampuꞌang Diyus (2 Corinto 4:4, Colosas 1:15). 38Talagang ega ipagdawaꞌ mi asat ulu mi i ampang ya sabap daꞌkamu magpamayaꞌ it aken nga tiyaꞌeg yang paꞌasitu. 39Talagang ubus suliꞌen, suliꞌen mi i ampang it Ampuꞌang Diyus kat mga kasuratan mi, ka pagsisiguruun mi nga maparagan mi duꞌun in magꞌuꞌunu maꞌimyu i kaꞌgenan nga egay kaskedan. Takaꞌ mga itu ngaytu, magpamatuud lamang tu pasar it aken. 40Temed ta, it ega naga ireg mi nga sumunud it aken isaꞌun mabgayan ku kamu it kaꞌgenan nga egay kaskedan.

41Ega maat iyan i pagꞌabaten ku, pagbantug it mga taw. 42Temed it kilala ku na kamu, in maꞌunuy mga adat mi. Urut ku na nga egay pagmaꞌal mit Ampuꞌang Diyus. 43Naꞌasitu aku ka siyarigan aku it Amaꞌ ku, temed ega pagtanggapen mi aku. Lamang yan atkayan, in may beken nga paꞌasitu kat sadili yang kaꞌirgan, tanggapen mi yan. 44Ka iyan i pagꞌabaten mi, pagbantug it esa may esa, ega pagbantug nga garing duꞌun it matuud nga Ampuꞌang Diyus. Ta magꞌuꞌunu kamu yan makapamayaꞌ it aken?

45Ega pikiren mi nga akuy dimimanda it imyu duꞌun it Amaꞌ. In daꞌga iyan si Moises, nga mga kasuratan yay pagpanggaringan it pagꞌiꞌinawaren mi, kanya i dimimanda it imyu. 46In maat pagpamayaꞌnen mi si Moises, kaꞌilangan sana aku, pamayaꞌnen mi naga gasiꞌ, sabap mga isiyurat ya, aku talagay pagpaꞌiguꞌan. 47Temed ta, it ega pagpakimatuudun mi i mga isiyurat ya, magꞌuꞌunu mi pakimatuudun i mga pagꞌaaten ku ngaytu?”

Currently Selected:

Juan 5: TBWONT

Highlight

Copy