Juan 6

Subrat limang ribu i kadakel it napakaꞌen ni Jesus kat keseg it guna ya

[Mateo 14:13-21; Marcos 6:30-44; Lucas 9:10-17]

1Nagtaꞌlib i pirang bulan, naꞌaduꞌun si Jesus it sang dipag it Lapnaw it Galilea, nga pagpangaranan gasiꞌ it Lapnaw it Tiberias. 2Tiyundug kanya it dakel na nga mga taw sabap it magkaltegan nira ngayti nga mga tandaꞌanan nga kalililuꞌang bagay nga pagbuwaten ya, nga pagpagayenen ya i mga magsarut. 3Timnungu-tungul si Jesus duꞌun it mungsuꞌ, sang siraan nagat mga alagad ya ngayti, bawnga namagꞌadung sira. 4Magꞌadeꞌdeng siꞌ i ipagpistaꞌ it mga Judio it Pistaꞌ it Tiyaꞌliban.

5Paglawag ni Jesus, nalawag ya nga dakel nang mga taw i mamagꞌaꞌabut. Iningkut ya si Felipe, “Ariyen tuy maꞌalangan tami it pangaꞌen isaꞌun may makaꞌen it mga taw ngayan?” 6Inampang ni Jesus i atkayti sabap pagsukda-sukdanan ya si Felipe, ka magkaꞌrutan na ni Jesus i buwaten ya.

7Katubag si Felipe, maat ya, “Bilaꞌ, maski beteꞌ tagdedekeyeꞌ lamang i ipamgay it kanira, tinapay nga maꞌalang it tangdan it balit walung bulan i binwatan, ega talaga manepay-tepay it yanayan ngayang kadakel it taw.”

8Maat i sang kataawan nga alagad ya nga si Andres, nga sulsug ni Simon Pedro, 9“May situ bayan nga waꞌwaꞌ nga laa-lalaki nga may balun, takaꞌ unuꞌun i limang batu bay tina-tinapay baw duwang batuy seda-sedaꞌ? Talagang ega manepay-tepay it yanang kadakel it taw.”

10“Paꞌdungun mi i mga taw ngayan,” maat ni Jesus. Malayaw nga kaꞌeyag-eyagan i duꞌun kayti. Namagꞌadung nay mga taw ngayti, nga kadakel nira mga limang ribu in mga lalaki lamang i bilangen. 11Inangut ni Jesus i tina-tinapay ngayti. Pagkatupus yat nagpasalamat duꞌut Ampuꞌang Diyus, biyagiꞌ-bagiꞌ yay tina-tinapay baw seda-sedaꞌ ngayti. Piyamgayan i muꞌsang mga taw ngayti. Binggayan sirat kumpur ireg nira.

12Iyan namagkaꞌgen nay kadakel ngayti, maat ni Jesus it mga alagad ya, “Rinutun mi nagay mga naꞌpedan ngayan, isaꞌun ega maꞌaduꞌadut.” 13Egay beken, rininut it mga alagad i mga naꞌpedan nga tinapay ngayti. Narinut nira, sang puluꞌ may duwang kabaꞌayan i napnuꞌ.

14Pagkalteg it kadakel it tandaꞌanan ngayting kalililuꞌan nga binwat ni Jesus, maamaatan sira, “Siguru itu nay Prupitaꞌ ngayan nga mabut situt banwa.”#6:14 Deuteronomio 18:15-18. 15Iyan namuyaan ni Jesus nga may kubwaten nat kadakel ngayti, nga regesen na kanya ka ipaꞌdung na kat pagkaꞌadiꞌ, tiyananan ya na sira, nanungul nat esa-esa ya.

Napanaw si Jesus duꞌut sagpaw it danum

[Mateo 14:22-33; Marcos 6:45-52]

16Iyan marisemsem na, nanꞌun na duꞌut lapnaw ngayti i mga alagad ya. 17Pagꞌabut nira, namagsakay sirat sakayan ka mandipag duꞌun it Capernaum. Seked timindag nay delem, ega pay magꞌabut nga si Jesus. 18Sakaling nanenbegan i deres, unupat dimnadakulaꞌ nay bakat. 19Iyan naꞌlay na sirat begsay, lima u enem nang kilumitru i kaꞌalaid it nasakayan nira, naltegan nira si Jesus nga magpanaw duꞌut sagpaw it danum nga magꞌelep duꞌut sakayan. Namagꞌiꞌlam sirang banar. 20Temed maat yat kanira, “Ayaw kamut iꞌlam. Si Jesus aku naga bayni.” 21Simnagya na sira. Piyasakay na nira si Jesus. Pagkasakay ya, sakaling nakadungguꞌ na sira duꞌun it pagꞌabutun nira.

22Pagꞌeyag it aldaw, duꞌut sang dipag ngayti nga giyaringan na Jesus, duꞌun nagay kadaklan ngayti. Magꞌelat sirat ki Jesus ka namuyaan nira nga ega simnakay nga kaꞌibaan it mga alagad ya ngayti it nandipag, baw egay duꞌun nga beken nga masakayan ya. 23Bawnga may nagpadungguꞌ nga mga sakayan nga garing duꞌun it Tiberias. Duꞌun i piyadungguꞌan nirat adeꞌdeng it rugar ngayting kiyaꞌnan it mga katataawan ngaytit pangaꞌen nga piyasalamatan it Ampuꞌan nga si Jesus duꞌun it Diyus Amaꞌ. 24Aypaꞌ iyan namuyaan it mga taw nga ega na duꞌun si Jesus baw mga alagad ya ngayti, binwat nira, namagsakay nga nandipag duꞌun it Capernaum, ka tulusun nira si Jesus.

Si Jesus i matuud nga pangaꞌen nga garing duꞌut langit

25Naparagan nira si Jesus duꞌun it sang dipag it lapnaw ngayti. Pagkaparag nira, iningkut nira nga magꞌaat, “Manigtulduꞌ, kaꞌnuy pagꞌabut mu situ?”

26Pagtubag ni Jesus, maat ya, “Matuud tuy iꞌaat ku ngaytut imyu, nga pagtulusun mi aku, ega sabap duꞌun it naltegan mi ngayti nga mga tandaꞌanan nga kalililuꞌan, in daꞌga sabap it nakakaꞌen kamu baw namagkaꞌgen. 27Kaꞌilangan paꞌres kamu, ega sabap duꞌun it pangaꞌen nga magranggaꞌ, in daꞌga yay paꞌresan mi, pangaꞌen nga ega magranggaꞌ baw magkabgay it kaꞌgenan nga egay kaskedan. Ibgay tu it imyu it kanya nga Taga Langit nga Ipiyanganak it Taw, sabap kanya i binggayan it Diyus Amaꞌ it pudir.”

28Pagkagneg it kadakel ngayti, miningkut sira. Maat nira, “Ta unu bayan i magayen nga paꞌresan namen nga buwaten, isaꞌun nga masunud namen i kaꞌirgan it Ampuꞌang Diyus?”

29“Ta itu bay ipagpabwat it Ampuꞌang Diyus, kaꞌilangan nga mamayaꞌ kamu it tiyaꞌeg ya nga paꞌasitu,” maat i tubag ni Jesus it kanira.

30Maat siꞌ it mga taw ngayti, “Ay unuy makapaliꞌwan mu nga tandaꞌanan nga kalililuꞌang bagay isaꞌun makapamayaꞌ kami it imu? Ta unu yan i mabwat mu nga subraꞌ paꞌ it pagpakaꞌnen i katataawan? 31Sabap si Moises, nabwat ya gasiꞌ i atkayan, iyan pagpanguꞌnaan yay mga kagiyaringanan tami duꞌun it rugar nga kapupuyangtan, ka may nakaꞌen nira nga pagpangaranat manna. Ka maat i duꞌun it kasuratan, nga magsusurat, ‘Pangaꞌen nga garing duꞌut langit i ibinggay yat kanira,’”#6:31 Exodo 16:4. maat pay paꞌugdun nira.

32Katubag si Jesus, maat ya, “Kamatuudan i iꞌaat ku ngaytut imyu nga ega si Moises i nagbegay it kagiyaringanan mi it pangaꞌen ngaytu nga garing duꞌut langit, in daꞌga kanya nga Amaꞌ ku. Kanya i magbegay it matuud nga pangaꞌen nga garing duꞌut langit. 33Sabap yay paꞌaaten nga pangaꞌen nga begay it Ampuꞌang Diyus, kanya nga limnampud nga gimnaring duꞌut langit baw magbegay it kaꞌgenan nga egay kaskedan kat muꞌsang katataawan.”

34“Agalen,” maat nira, “sana begayan mu kaming pirmi it iyan ngayan nga pangaꞌen.”

35“Aku i paꞌaateng pangaꞌen ngayan nga magkabgay it kaꞌgenan,” maat ni Jesus. “Iyan pasakep it aken, ega na maat getmanan paꞌ, baw iyan nga mamayaꞌ nat aken, seked kaꞌnu-kaꞌnu ega na kumuꞌinum. 36Temed daꞌga baꞌ inaat ku na it imyu, unu pay daꞌawa mi it naltegan mi na aku, temed it ega magpamayaꞌ kamut aken? 37Pasakep it aken i kumpur ipagbegay it Amaꞌ it aken. Talagang egay imugawun ku nga maski siyu nga magpasakep it aken. 38Sabap nanlampud aku nga garing duꞌut langit, ega enged ku, buwaten ku i sadili ku nga kaꞌirgan, in daꞌga iyan kaꞌirgan it nagtaꞌeg it aken. 39Ka ituytu i kaꞌirgan ya, ega pataꞌnan ku na lamang nga maꞌilang i maski esa nga ibinggay ya it aken, in daꞌga egnen sirang muꞌsa asan it umur nat banwa. 40Sabap talagang itu i kaꞌirgan it Amaꞌ ku, iyan muꞌsa nga mamayaꞌ it aken nga Anak ya, baw sumarig it aken, begayan sira it kaꞌgenan nga egay kaskedan. Baw egnen ku sirang muꞌsa asan it umur nat banwa.”

41Pagkagneg it mga Judio kayti, remeteng-retengan sira sabap it iti nga inaat ni Jesus ngayti nga magꞌaat, “Aku i pangaꞌen nga limnampud nga garing duꞌut langit.” 42Maat nira siꞌ, “Daꞌga baꞌ itu na, si Jesus ngayan nga anak na Jose? Kilala tami nagay amaꞌ baw inaꞌ ya. Ta unuka magkaꞌaat ya kayti nga limnampud kanya nga garing duꞌut langit?”

43Ta it atkayti, inaat sira ni Jesus, “Ayaw kamut yeꞌye-yeꞌyepen nga remeteng-retengan kamu. 44Ka egay makapasakep it aken magpuyra it panakman kanya it Amaꞌ, nga kanyay nagtaꞌeg it aken. Baw iyan nga pasakep it aken, egnen ku kanyat paꞌuliꞌ asan it umur nat banwa. 45Sabap magsusurat duꞌun it mga kasuratan it mga prupitaꞌ, nga magꞌaat, ‘Sirang muꞌsa, tulduꞌan sira it Ampuꞌang Diyus.’#6:45 Isaias 54:13. Iyan nga magpagneg it Amaꞌ baw ipagdawaꞌ ya kat ulu ya i itiyulduꞌ it kanya, ega na magꞌaliꞌ nga pasakep it aken. 46Egaytu ireg sugiden may nakalteg na it Amaꞌ, ka iyan lamang gimnaring duꞌun it Ampuꞌang Diyus i nakalteg it Amaꞌ ngaytu. 47Kamatuudan tuy iꞌaat ku ngaytut imyu. Iyan nga mamayaꞌ baw pasakep it aken, may kaꞌgenan ya nga egay kaskedan. 48Aku i pangaꞌen nga magbegay it kaꞌgenan. 49Nakakaꞌen it manna i mga kagiyaringanan mi, iyan duꞌun sirat rugar nga kapupuyangtan, temed namagpatay naga sira. 50Temed may pangaꞌen siꞌ nga garing duꞌut langit baw in siyu-siyuy kumaꞌen it itu ngaytung pangaꞌen, ega na matay kanya. 51Aku i pangaꞌen ngaytu nga magbegay it kaꞌgenan, nga limnampud nga garing duꞌut langit. May kaꞌgenan nga egay kaskedan it in siyu-siyuy kumaꞌen kaytu. Iyan pangaꞌen ngaytu nga ibgay ku, nga megay it kaꞌgenan nga egay kaskedan kat muꞌsang katataawan, sadili kung bilug.”

52Sabap siꞌ it iti nga inampang ni Jesus nagdaꞌe-daꞌegen siꞌ i mga Judio, ka maamaatan sira, “Magꞌuꞌunu ibgay it itung taw i bilug ya nga kaꞌnen tami?”

53Aypaꞌ ka inaat sira ni Jesus, “Kamatuudan tuy iꞌaat ku ngaytut imyu. Magpuyrat makaꞌen mi i isi it Taga Langit nga Ipiyanganak it Taw baw maꞌinum mi i duguꞌ ya, talagang ega maꞌimyu i matuud nga kaꞌgenan. 54Iyan magkaꞌen it isi ku baw magꞌinum it duguꞌ ku, may kaꞌgenan ya nga egay kaskedan, baw talagang egnen ku kanya it paꞌuliꞌ asan it umur nat banwa. 55Sabap iyan isi ku, pangaꞌen nga matuud, baw iyan duguꞌ ku, pagꞌimnun nga matuud. 56Iyan magkaꞌen it isi ku baw magꞌinum it duguꞌ ku, kabilangan ya, sang kabilu-bilugan kami na. 57Egen talagay Amaꞌ nga timnaꞌeg it aken it paꞌasitu baw aku, egen gasiꞌ sabap it kanya. Atkayan nagay in siyu-siyu nga kumaꞌen it aken. Egen kanya sabap it aken. 58Sabap aku na ngaytu i matuud nga pangaꞌen nga garing duꞌut langit. Kayti, in siyu-siyuy kumaꞌen it itu nga pangaꞌen, may kaꞌgenan ya nga egay kaskedan. Ega matay nga subung it mga kagiyaringanan mi, maski maat nakakaꞌen na sira it manna ngayting pangaꞌen nga gimnaring duꞌut langit.” 59Inampang tu ni Jesus i mga itu ngaytu iyan magpanulduꞌ kanya duꞌun it papagsambaan nga duꞌut Capernaum.

Dakel i nangindiꞌ it ki Jesus temed iyan beken, naneꞌteꞌ naga

60Pagkagneg it mga pagtulduꞌan ngayti ni Jesus, dakel na sirang miyaat, “Mabeꞌgat naytu nga mga sugi-sugid i ituꞌun. Siyuy makatangeꞌ kaytu?”

61Urut ni Jesus nga ega magkabaraꞌan sira sabap it iti nga mga inampang ya. Aypaꞌ ka maat yat kanira, “Subuk nakakleb kamu it nagnegan mi nga mga inampang ku. 62Magꞌuꞌunu yan in maltegan mi nga patibung siꞌ i Taga Langit nga Ipiyanganak it Taw ka muliꞌ na duꞌun it giyaringan ya? 63Mga ipagtulduꞌ ku ngaytu, egay beken nga uliꞌan, mga bagay pasar it kiyarurwa baw kaꞌgenan nga egay kaskedan. Yay matuud, mga bagay nga pagpaꞌiguꞌan it panulduꞌ ku ngaytu, iyan i mapisiꞌan it kaꞌgenan ngaytu. Egaytu makabgay it isi nga pagkaꞌnen.#6:63 Mapisiꞌ gasiꞌ kat Ginirego i atkaytu ngaytu, “Egaytu mapisiꞌ it taw kat sadiling kakayaan.” 64Temed ta, may mga situ nga ega kamatuudan i pamayaꞌ nirat aken.” Miyampang si Jesus it atkayti ka, garing paꞌ it tagnaꞌ, urut ya na in siyu may siyu i ega matuud i pamayaꞌ it kanya, baw in siyu i subuk dumagang it kanya. 65Paꞌugdun ya paꞌ nga inaat, “Ta it may ega naga magpamayaꞌ it aken, aypaꞌ ka ipiyagꞌaat kut imyu nga egay makapasakep it aken magpuyra it ildawan kanya it Amaꞌ.”

66Gimnaring duꞌun kayti, dakel na nga mga pagtulduꞌan ya ngayti i nangindiꞌ. Ega na mamagbaya-bayaꞌ it kanya.

67Ta it atkayti, iningkut ni Jesus i sang puluꞌ may duwa ngayting mga piniliꞌ yang mga alagad ya. “Unu,” maat ya, “kulꞌid kamu na gasiꞌ situt aken?”

68Katubag si Simon Pedro ngayti, “Ampuꞌan,” maat ya, “ay ari aduꞌunan namen it panulduꞌ mu gay magkabgay it kaꞌgenan nga egay kaskedan? 69Pagpamayaꞌnen baw pagsisiguruun namen nga ikaw talaga i ega basta-basta ngayan nga siyarigan it Ampuꞌang Diyus.”

70“Daꞌga baꞌ,” maat ni Jesus, “sang puluꞌ may duwa kamung kataawan i piniliꞌ ku? Takaꞌ yay matuud, may esa nagat imyu nga magnanakem pat nakem it maraꞌe-raꞌet!” 71Iting inampang ni Jesus, iyan i pagpaꞌiguꞌan ya, si Judas ngayti nga anak ni Simon Iscariote, sabap si Judas ngayti, maski kaꞌuyutan it sang puluꞌ may duwa ngayting piniliꞌ ni Jesus, temed ta, it iti i dumagang it kanya.

Currently Selected:

Juan 6: TBWONT

Highlight

Copy