Lucas 7
7
Piyagayen ni Jesus i taraꞌgen it esang kapitan nga Romano
[Mateo 8:5-13]
1Pagkatupus ni Jesus it muꞌsa ngayting ipagpangadal yat mga taw, limnangbus kanya duꞌun it Capernaum. 2May esang Romano duꞌun nga kapitan it sundaluꞌ. May taraꞌgen ya nga talagang pagrarasan ya, nga magsarut it daꞌnay pasubrang eget. 3Pagkabaritaꞌ it kapitan ngayti it duꞌun si Jesus, may piyapaꞌaduꞌun ya nga mga Judio nga ginuꞌu ka mamisiꞌ it ki Jesus ka ipagꞌabang yay taraꞌgen ya ngayti. 4Pagꞌabut it mga tiyaꞌeg ngayti duꞌut ki Jesus, magpasanguꞌ-sanguꞌ sira na nga magpangabang. Maat nira, “Bagay it kapitan ngayti i tabangen mu, ka talagang magayen i adat ya. 5Sabap pagrarasan ya i bangsa ta ngaytu baw piyabwatan ya paꞌ kita it papagsambaan tami.”
6Egay beken, miyayaꞌ si Jesus it kanira. Iyan adeꞌdeng na sirat balay, ipiyasusmu it kapitan ngayti it mga iba-iba ya si Jesus, sugidan it ampang ya nga magꞌaat, “Agalen, pagsisiguruun ku nga maski daꞌka na lumangbus sinit balay ku. Ka ega talaga mapakay nga tuyuꞌun mu aku sinit balay ku sabap subraꞌ ka nga mataꞌas. 7Baw ta, ega gasiꞌ mapakay nga madap aku it imu ka landaw ka paꞌ talaga it aken. Pagsisiguruun ku nga, ampang mu lamang, gumayen talagay taraꞌgen ku ngayni. 8Ka naꞌubas akut ampang nga ipagsekat, sabap may pagbayaꞌen ku nga magsekat it aken, baw may mga sundaluꞌ nga pagsekaten ku gasit aken. In aaten ku i sang kataawan, ‘Mapanaw ka,’ talagang mapanaw kanya. Ta in esa siꞌ, aaten ku, ‘Paꞌasini ka,’ magꞌaduꞌun kanya nga matuud it aken. Atkayan naga i taraꞌgen ku, in sekaten ku nga, ‘Buwaten muy ituꞌun,’ buwaten ya nga matuud.”
9Naliluꞌ si Jesus, pagkagneg ya kayti. Siyarunga ya i bulyug nga mamagbaya-bayaꞌ it kanya baw miyampang, nga magꞌaat, “Yay matuud, talagang egay namuyaan ku nga maski siyu situt mga Judio, nga mga tungtung-inapuꞌ ni Israel, nga atkaytuy kadakulaꞌ it pamayaꞌ yat aken.” 10Pagꞌuliꞌ it mga piyasusmu ngayti, abutan nira mindek nay sarut it taraꞌgen ngayti.
Inggen ni Jesus i anak it esang babay nga balu
11Garing it iting aldaw, ega naꞌlay naꞌaduꞌun si Jesus it esang lansangan nga pagpangaranat Nain. Miyayaꞌ nagat kanya i mga alagad ya baw dakel gasing mga taw. 12Iyan magꞌadeꞌdeng na sira duꞌut puwirtaꞌan it lansangan ngayti, nasusmu nira i mamagpanlebeng it miyatay nga lalaki, kamumugtungun nga anak it esang babay nga balu. Dakel na nga pagtaw i magbabayaꞌ it magpanlebeng ngayti.
13Siyanguꞌan nga banar it Ampuꞌan nga si Jesus, pagkalteg yat inaꞌ it miyatay ngayti. Inaat ya, “Ayaw ka nat sugaw.” 14Minlep kanya baw tiyapal ya i lungun baw timnindeg i mamagpipirisiꞌen ngayti. Miyampang si Jesus nga magꞌaat, “Dunguꞌ, sigi! Magbangun ka!” 15Egay beken, nagbangun i piyakisugidan ngayti baw miyampang ka nagꞌegen nga matuud. “Ta, wayni nay anak mu,” maat ni Jesus it babay ngayti. “Nagꞌegen naga.”
16Pagkamuya it mga taw ngayti, inabut sirat iꞌlam baw biyantug nira i Ampuꞌang Diyus. “Miyabut situt aten i esang bantug nga prupitaꞌ. Talagang kita nga mga taawan it Ampuꞌang Diyus, inildawan ya na nga banar!” 17Limingkep i baritaꞌ pasar it ki Jesus baw binwat ya ngayti duꞌun it muꞌsang banwa it mga Judio baw duꞌun it linibut ya nga mga rugar.
Ingkut ni Juan baw tubag ni Jesus
[Mateo 11:2-19]
18Ta, si Juan nga uꞌna-uꞌnang namawtis nga pagpipirisuun na, ibiyaritaꞌ duꞌun it kanya it mga alagad ya i muꞌsa ngayti. 19Pagkabaritaꞌ ni Juan kayti, tiyaꞌeg yay duwa nga alagad ya nga paꞌaduꞌun it Ampuꞌan ngayti nga si Jesus ka ingkutun, nga magꞌaat, “Unu baꞌ, ikaw na i isiyanggup ngayan nga papaꞌasituun u melat kami paꞌ it beken?”
20Pagꞌabut it mga tiyaꞌeg ngayti duꞌun it ki Jesus, itiyuturan nira na nga magꞌaat, “Piyapaꞌasitu kami baytu ni Juan ngayti nga magpamawtis, ka mangingkut it imu in unu kunuꞌ, ikaw na i isiyanggup ngayan nga papaꞌasituun u melat kami paꞌ it beken?”
21Nadnganan kayti, dakel i mga magsarut nga piyagayen ni Jesus baw inimugawan yat mga maraꞌe-raꞌet nga magpapulpug. Talagang pagꞌildawan ya i mga beleg nga makalteg sira. 22Aypaꞌ tiyubag ni Jesus i mga tiyaꞌeg ngayti, nga magꞌaat, “Muliꞌ kamu na duꞌun it ki Juan baw isugid mi duꞌut kanya i naltegan baw nagnegan mi, nga magkalteg nay mga beleg, mamagkapanaw na i mga pilay, mindek nay bangbang it mga babangbangen, mamagkagneg nay mga bengel, mamagꞌegen it paꞌuliꞌ i maski patay na, baw ipagpangadal duꞌun it mga raꞌyat i Magayen ngaytu nga Baritaꞌ. 23Talagang magkasagyang banar i taw nga ega magduwa-duway pikir sabap it aken.”
24Pagkagaring it mga tiyaꞌeg ngayti ni Juan, may inaat ni Jesus it kadaklan ngaytit mga taw duꞌun pasar it ki Juan. Maat ya, “Iyan namagpaꞌaduꞌun kamu it ki Juan duꞌun it kapupuyangtan nga rugar, unuy pagtulusun mi duꞌun? Taw nga alang-alang, nga subuk rabung nga magduyug-duyug ka pagpesagen it deres? Simpri ega. 25Unu baꞌ talagay kultegan mi duꞌun? Esang taw nga piyakamagayen i pakayan ya? Simpri ega gasiꞌ, sabap iyan magpapakay it mabakas nga pakayan baw iyan magpasamunsayaꞌ it magayen nga pangaꞌen, simpri duꞌun lamang it pamalay-balay it mga adiꞌ. 26Ta, unu baꞌ nga talaga i ireg mi nga maltegan duꞌun? Unu, esang prupitaꞌ? Eeꞌ baꞌ, temed ega desang prupitaꞌ kanya. 27Sabap si Juan na ngaytu i pagpaꞌiguꞌan it ampang it Ampuꞌang Diyus nga isiyurat, nga magꞌaat,
‘Yay matuud, may taꞌgen ku nga makauꞌna it imu, ka asikasuun ya i panawan mu.’#7:27 Malakias 3:1.
28Matuud talagay iꞌaat ku ngaytut imyu, nga kat muꞌsa nga piyapagtaw situt banwa, egay kasubraꞌ it kataꞌasan ni Juan ngaytu nga uꞌna-uꞌnang namawtis. Temed kayti, maski raꞌyat, basta pasakep kanyat kaꞌadiꞌan it Ampuꞌang Diyus, talagang kasubraꞌ paꞌ kanya it ki Juan ngaytu.”
29Kadakel ngaytit mga taw nga mamagpagneg it ki Jesus, nga maski mga manigpabayad it barayadan duꞌut gubirnu, piyakimatuud nira i ipiyasugid it Ampuꞌang Diyus it ki Juan, iyan timpu nga magpangadal paꞌ kanya, aypaꞌ ka nagpabawtis sira duꞌun it ki Juan ngayti. 30Temed kadaklan it mga Pariseo baw manigpaꞌyag it urdin, diyaꞌga nira i pabetang-betang it Ampuꞌang Diyus sabap it kanira, nga daꞌsira nagpabawtis it ki Juan.
31Ipiyasigi ni Jesus i pagꞌampangen ya, nga magꞌaat, “Ta, unu bay pasbungan ku it mga taw kayti? Unu talaga i kasubu-subung nira? 32Subung sira it mangaꞌwaꞌ nga mamagꞌaꞌdung duꞌun it kakalabtaꞌan baw paggaꞌuyan niray mga iba-iba nirat mamagkalabtaꞌ. Pagꞌaaten nira, ‘Maski unuy buwaten namen, ega bayan mapakay mi. Pagtugtugan namen kamu temed daꞌkamu mamagbayliꞌ. Magkantaꞌ kami it pagkantaꞌen in magpanlebeng temed daꞌkamu mamagsugaw.’ 33Subung kamuy imyu it kanira, ka ega gasiꞌ magkapakay mi i maski unu. Sabap si Juan nga magpamawtis, magpuwasa kanya baw ega magꞌinum it irimnun nga kalalangu. Ta, pagꞌaaten mi nga pagpapulpugun kanyat maraꞌe-raꞌet. 34Bawnga aku, nga Taga Langit nga Ipiyanganak it Taw, magpakikaraꞌnen baw magꞌinum it pagꞌimnun ta. Ta, pagꞌaaten mi, ‘Letganan mi bay iyang taw, saꞌbangan baw makuꞌinum, iba-iba kanya it malulupig nga manigpabayad it barayadan baw beken nga makasalaꞌan.’ 35Temed lamang atkayan, matanyag nga tamaꞌ naga i ipagpanulduꞌ namen ni Juan sabap it tanaꞌan ya kat pangaꞌgenan it mga magpamayaꞌ.”
Mga biyaraꞌan iyan nangaꞌen si Jesus duꞌut balay it esang Pariseo nga si Simon i ngaran
36May esang aldaw nga inimbitar it esang Pariseo si Jesus, nga duꞌun it kanyay pangaꞌnan. Egay beken, miyayaꞌ si Jesus ka nangaꞌen duꞌun. 37Ta, duꞌun it iting lansangan may esang babay nga magkaꞌrutan it kadakel nga makasalaꞌan. Nabaritaꞌan ya nga duꞌun si Jesus it balay it Pariseo ngayti, nangaꞌen duꞌun. Pagkaꞌrut yat duꞌun si Jesus, naꞌaduꞌun kanya, magtataban it ega basta-bastang berebtangan nga punuꞌ it babangluun. 38Pagꞌabut ya duꞌun, nagpatpad kanya duꞌut talikudan ni Jesus. Ta it magsugaw kanya, naꞌemeg nat magturuꞌ nga luwaꞌ ya i mga aꞌay ni Jesus. Ta, binwat it babay ngayti, tiyarapuwan yat buꞌuk ya baw sigi nga pamalek yat mga aꞌay ngayti ni Jesus. Bawnga biyuꞌbuꞌan yat babangluun ngayting taban ya.
39Pagkalteg it Pariseo ngayti nga minimbitar it ki Jesus, maat i kat nakem ya, “In talagang prupitaꞌ i itung taw, simpri magkaꞌrutan ya in unu nga kalasit babay i magtapa-tapal ngaytut kanya, ka babay tu nga makasalaꞌan.”
40Naꞌrutan ni Jesus i kat nakem it Pariseo ngayti. Aypaꞌ miyampang kanya nga magꞌaat, “Simon, may sugi-sugid ku, pagnegan mu.”
“Eeꞌ,” maat ni Simon, “unuy sugi-sugid mu ngayan, Manigtulduꞌ?”
41Ta, nagpapuꞌun na si Jesus it tumuturan nga magꞌaat, “May duwang kataawan nga nangutang duꞌun it magkaꞌutangan. Inutang it sang kataawan, kantidad it limang gatus. Kat sang kataawan ngayti, limang puluꞌ lamang. 42Iyan egay magkaparagan it duwa ngayti nga ibayad, binwat it kinaꞌutangan nira, pinwas ya na lamang. Ta, kayti, siyu manggid it kanira nga duwa i subrang magmaꞌal it kanya?”
43Katubag si Simon, “Kat aken lamang, siguru iti, dakulaꞌ ngayting utang nga pinwas ya.”
“Matuud mu yan,” maat ni Jesus, “i inaat mu ngayan.”
44Bawnga liningaw ni Jesus i babay ngayti baw maat ya siꞌ it ki Simon, “Siguru naltegan mu i binwat it babay ngaytu. Pagꞌabut ku situt balay mu, daꞌku binggayan mut danum nga iꞌugas kut aꞌay ku.#7:44 Ugaliꞌ it mga Judio kat iting timpu, yay magayeng istimar it paꞌapyaten duꞌut balay, begayan kanyat danum nga iꞌugas it kapu-kapu kat aꞌay ya, baw lana nga idaprus kat buꞌuk baw rupa ya sabap it masgaꞌ nga init it aldaw. Baw beken, mamalek kat rupa ya. Temed kanya, luwaꞌ ya nay ipiyagꞌugas yat mga aꞌay ku baw buꞌuk ya nay itiyarapu ya. 45Daꞌka gasiꞌ namalek it aken, temed kanya, pagkasled yang lagi, sigi na nga pamalek ya sinit aꞌay ku. 46Daꞌga gasiꞌ binggayan mu akut idaprus it ulu ku nga maski iyan lana nga garamiten it aldaw-aldaw. Temed kanya, babangluun i idiyaprus yat mga aꞌay ku. 47Aypaꞌ matuud i iꞌaat kut imu, kat kadakulaꞌ it pagmaꞌal ngaytu nga ipiyalteg ya, magpamatuud tu nga ipiyasinsiya nat kanya i muꞌsang kasalaꞌan ya, maski dakulaꞌ na nga talaga. Temed dekeyeꞌ i pagmaꞌal it taw nga dekeyeꞌ naga i piyasinsiya it kanya.”
48Bawnga inaat ni Jesus i babay ngayti, “Ipiyasinsiya na talaga it imu i mga kasalaꞌan mu.”
49Pagkagneg it beken nga kaꞌibaan yat magkaꞌen, maat i kat nakem nira, “Siyu baytung taw i magpasinsiya paꞌ ngaytu it kasalaꞌan?”
50Maat siꞌ ni Jesus it babay ngayti, “Talagang naribri ka kat kadakulat pamayaꞌ baw pagsarig mut aken. Masagya ka nayang muliꞌ.”
Currently Selected:
Lucas 7: TBWONT
Highlight
Share
Copy
Want to have your highlights saved across all your devices? Sign up or sign in
© 1992, Wycliffe Bible Translators, Inc. All rights reserved.
