GENESIS 23
23
Sari a Thi le, Abraham Nih a Vûinâk
Mun a Châwk
1Sari chu kum zâ leh kul pasarih tiang upa hen a dam. 2Kanaan ram Hebron ah a thi le, Abraham nih a thihnâk chu a ulh. 3A nupi ruak umnâk mun chu a mâk thlap le, Hit mi tla sinah a va kal le, 4“Ramdang minung nan sinah um mi kasi le, ka nupi ka vûi khonâk ding hen mun hawng ka zuarh u,” a ti na.
5Annih nih, 6“Pu, kan thu ngâi rawh. Ruitu chak tak hâwi hen kan ruat; kan nei mi thlân ṭha chem mi lakah na nupi chu vûi ko. Kan lakah âuzawng nih thlân pêk ding chu an siang lai, amah na vûi khonâk ding hen,” an ti.
7Abraham chu an mâika ah a kûn le, 8“Ka nupi hinah vûi ding hen nan siang tak mi asi chun Zohar fapa Ephron sinah 9Makpela Pûk hawng ka deih piak ule, chu chu a phâisen kiang tek asi. A man lîm tlak hen pêk hen nan um liauah ka sinah zuar ding hen hawng ka deih piak ule, chu tikah vûinâk mun chu ka ting kho lai,” a ti.
10Chu khuapi kulh kawtkâ ah chun Ephron khawm chu Hit mi tla hen tohâwngnâk mun ah a to ko; chunah an um mi zawzawng tla nâ theih hen chun a hawng sâng le, 11“Pu, ngâinik, a pûk hen, a lo hen, a ektê hen kan pêk lai. Hi ka mi tla mâika ah hin kan pêk lai; na nupi chu na vûi khonâk ding hen,” ti hen a sâng.
12Abraham chu Hit mi tla mâika ah a kûn le, 13Ephron sinah mikip nih theih ding hen, “Hawng ka ngâi piak ding hen ka nan ngiar; lo pumpi chu ka châwk lai. A man hi hawng ka lâk piak le, churawhchun ka nupi chu chunah ka vûi lai,” a ti.
14Ephron nih, 15“Pu, mun man vial chu tangka zali asi; chu lo hen nang leh kei karah zeikhawm a um lo rawh; chunah chun na nupi chu vûi ko,” ti hen, a sâng.
16Abraham nih rem a ti le, zapi theih ah Ephron nih a sim mi hâwi hen silver zali chu a khingh le, sâwlehtu tla nih an mang mi dân hen. 17Chu chu Makpela mi Ephron thil neih Mamre saklei mi Abraham nih â ting dân chu asi; a kiangkam mi phâisen tla, pûk, thing zawzawng â ting sih hep. 18Hit mi tla tohâwngnâk ah um mi zawzawng nih Abraham tâ asi ti an theihpi rawh. 19Churawhchun, Abraham nih a nupi Sari chu Kanaan ram pûk ah a vûi rawh.
20Churawhchun, Hit mi tla tâ phâisen leh pûk chu vûinâk thlân mun ding hen Abraham tâ asi rawh.
Currently Selected:
GENESIS 23: BCLBV
Highlight
Share
Copy
Want to have your highlights saved across all your devices? Sign up or sign in
Bawm Common Language Bible © Bangladesh Bible Society, 2004. All rights reserved.
