GENESIS 24
24
Isak Nupi Rua Ding
1Abraham chu thungâi a tar rawh le, thil a ti mikip LALPA nih mal a sâwm piak. 2A to-aw upachem mi, a neih zawzawng lakah thu a neihtir mi sinah chun, “Na kut kha ka êl karah siah le, siat a sirh. 3LALPA Pathian tual leh vân siamtu min hen siat an sirhtir ding ka duh, hi Kanaan ram mi tla lakah hin ka fapa nupi rangah na thîm lo ding hen. 4Ka suaknâk ram leiah na va kal hen, keimah rualsia lakah mi ka fapa Isak nupi rangah na hâwl piak ding asi,” a ti.
5Sikhawmsele, to-aw nih chun, “Chu nunau nih a mun kaltâk siang lo hen hi ram leiah hawng ka zûl duh lo chun teh? Na hawng suaknâk ram leiah na fapa chu ka kîrtir nawlh ding ma asi lai?” a ti.
6Abraham nih a sâng le, “Chunah chun ka fapa kîrtir nawlh lo ding hen a thiamthih rawh! 7LALPA, vân Pathian nih chun, ka unau umnâk ram ah mi, ka pa in thawk hen a hawng ka lâk mi asi. Hi ram hi ka thlâk tla pêk ding hen thu bir tak hen hawng ka tiamh rawh. Churuangah chunah mi chu ka fapa nupi rangah na tawng piak kho ding hen, anih nih chun a vânmifial na mâi leiah a fial lai. 8Chu nunau nih an zûl ding a duh lo asi chun, hi thu ka nan pêk mi lakah na lît asi. Sikhawmsele zei harsatnâk ruang khawm ah ka fapa chu na kîrtir ding asi lo,” a ti. 9Churawhchun, to-aw nih a pu Abraham, êl karah a kut a siah le, Abraham nih a simh mi zawzawng ti ding hen thu a tiam#24.9 Juda dân hen râwk kho lo ding hen kut êl karah siah hen siat anna sirh tâwn asi. rawh.
10Abraham to-aw, a neih lakah hotu si mi pa chu, a pu sangâwngsâu parâ a put le, Mesopotamia marlei kângah Nahor umnâk khuapi ah a kal rawh. 11A va tlung rawh chun, khuapi lêngah chawh mi tikhur ah chun a sangâwngsâu tla a bawktir na. Sûnnilei ah nunau tî than kal tik asi. 12Thla a cham le, “LALPA, ka pu Abraham Pathian, ka pu sinah na thutiam chu theihkumza le, tusûn ni ah dingchangnâk hawng ka pêk rawh. 13Hinah khuapi mi nungâk tla nih tî an thannâk tikhurchawh kiangah ka um asi. 14An lakah minung pakhat sinah, ‘Zângfahtê hen na tibêl kha ṭhumh le, hawng ka dintir me,’ ka ti lai le, ‘Din ma a, na sangâwngsâu tla rang khawm ka than lai,’ titu chu na to-aw Isak nupi rangah na thîm mi si seh, a ti. Hi hâwi asi chun, ka pu sinah thu na tiamh mi ziatê asi ti ka theih kho lai,” a ti.
15A thlacham a lîm lântê ah Rebek chu a liangah tibêl put bû hen a hawng tleng. Anih chu Bethuel fanu asi le, chu chu Abraham unaupa Nahor nupi Milkah fapa asi. 16Anih chu nungâk mêlṭha tak, nungâk thenhlimh asi. Tikhurchawh leiah a ṭum le, tibêl chu a than le, a hawng kîr nawlh. 17To-awpa chu amah leiah a tek le, “Na tibêl mi tî zângfahtê hen hawng ka dintir,” a ti.
18Rebek nih, “Din ma a pu,” a ti le, a liang mi tibêl chu a ṭhumh sawm le, tleih bû hen a dintir. 19A dintir thluh rawh chun, na sangâwngsâu rang khawm ka than lai le, an duh tâwk hen din na seh,” a ti.
20Ran tla chu duh tâwk hen a dintir na le, tibêl chu lâwng tleng hen, tikhur leiah a tek le, a va than fâwn le, a sangâwngsâu tla chu a tinh hep na tiang hen. 21To-awpa nih chun, ‘LALPA nih dingchangnâk hawng ka pêk mi mawh asi rawh aw,’ ti hen dâisip hen a zauh ko. 22Nunau nih a ti thluh rawh chun, to-awpa nih chun ngûn kual man tam tak chu a lâk le, a nâr lakah a thlaih piak, chun a bân ah ngûn zaksiar panih lianpi a ruktir. 23“Zângfahtê hen na pa âu me asi hawng ka simh. A in ah ka mi tla leh kei rangah riaknâk a um lai ma?” a ti.
24“Ka pa chu Bethuel, Nahor leh Milkah fapa asi,” ti hen a sâng. 25“Kan in ah fabû tam tak leh ran râwl a um, nan riaknâk ding hen mun khawm a um” ti hen a sâng.
26Churawhchun, to-awpa chu a siksidîr le, LALPA a sawnh, 27“LALPA, ka pu Abraham Pathian chu sawr hen um seh, ka pu sinah zumhkâi tak hen thutiamtu chu. LALPA nih ka pu chik-le-ngerh sinah tluang tak hen hawng ka tlengtir rawh,” a ti.
28Nungâk chu a nu in leiah a tek phêt le, thâwngthâng zawzawng a va sim rawh. 29Rebek nih ṭapa Laban a nei le, Abraham to-awpa umnâk tikhurchawh leiah a va tek rawh. 30Laban nih a farnu nâr ah a bunh mi leh a bân ah a ruk mi a muh le, to-awpa nih a sinah thu a sim mi tla khawm a theih. Abraham to-awpa sangâwngsâu kiangah a dîr ko mi leiah tikhurchawh kiangah a va kal le, 31“In leiah hawng ka zûl. Nang hi LALPA nih mal an sâwm mi minung na si. Zei rangah lênglei ah hinah na dîr ko! Ka in ah na rangah mun timhtuah zet hen a um, na sangâwngsâu tla rang khawm mun a um” a ti.
32Chun, to-awpa chu in sungah a va lût le, chun Laban nih sangâwngsâu thil phurh tla chu a lît piak le, fapawn leh ran râwl tla a pêk na. Chun, Abraham to-aw leh a hâwi tla rangah an kê ṭâwlnâk ding tî a pêk na. 33Buh an hawng pêk na rawh chun to-awpa nih chun, “Ka thusim ding mi ka sim lânlo chu buh ka ei awtlo” a ti.
Laban nih, “Sim ko me,” a ti.
34“Kei chu Abraham to-aw kasi,” ti hen thusim a dawmh. 35“LALPA nih ka pu nei tak hen mal a sâwm. Dawrâ rual tla, kêl tla, ranrual tla, ngûn tla, tangka tla, salnu leh salpa tla, sangâwngsâu leh sanatung tla a pêk. 36Sari ka pu nupi nih a tar nûnah fapa a ring piak le, ka pu nih a fapa rangah a neih zawzawng a ap hep. 37Ka pu nih a thupêk zûl ding hen siat hawng ka sirhtir. ‘Kanaan ram mi nunau hi ka fapa rangah na thîm piak ding asi loh, a ti. 38Chu ngâk chun, ka pa mi le, ka unau tla lakah mi a nupi rangah na thîm piak ding asi,’ a ti. 39Kei nih ka thawh le, ‘Nunau nih hawng ka zûl duh lo chun teh?’ ka ti.
40‘LALPA, a thu ka ngâi kumza mi nih chun, a vânmifial nangmah sul-le-lam tluangtir ding hen a hawng fial lai. Ka pa unau, keimah mi tak lakah mi ka fapa nupi rangah na tawng piak ding asi. 41Na thutiam lakah na lît ding mi chu kâng khat cho a um: Ka unau tla sinah na va kal hen, na thu an êl asi lam chun na lît asi,’ a ti.
42“Tusûn ah tikhurchawh ka hawng tleng liauah thla ka cham le, ‘LALPA, ka pu Abraham Pathian, thil ka ti mi lakah hin hawng ka dingchangtir rawh. 43Tu hin hi tikhurchawh ah hin ka um. Nungâk tî than ding a hawng kal mi rangah an tibêl mi tî, ‘din ding hawng ka pêk’ ka ti lai le, 44a âwi hen, sangâwngsâu rangah tî pêktu chu, ka pu fapa nupi rangah na thîm mi si seh, ti hen.’
45A thuptê hen thla ka cham mi dawngh lântê ah, Rebek chu a tibêl a liang tlûnah toh hen tikhurchawh ah tî than ding hen a hawng ṭum. Keinih a sinah, ‘Din ding hawng ka pêk ma ne,’ ka ti.
46Anih nih khulrang tak hen a tibêl chu a hawng ṭhumh le, ‘Din ma a, na sangâwngsâu khawm tî ka dintir na lai,’ a ti. Churawhchun, ka din le, sangâwngsâu tla khawm tî a dintir na.
47‘Na pa âu me si,’ ti hen ka deih, ‘Ka pa chu Nahor leh Milkah fapa Bethuel asi,’ ti hen hawng ka sâng. Churawhchun, a nâr ah ngûn kual ka thlaih le, a bân ah zaksiar ka ruk. 48Ka siksidîr le, LALPA chu ka sawnh rawh. LALPA, ka pu Abraham Pathian, ka pu unau tla sinah hawng ka ruitu chu, an fanu ka pu fapa rangah hawng ka tawngtirtu rangah ka sawr rawh. 49Tuhin, ka pu thusim ziatê hen nan ti ding mi chu nan mawhphurhnâk asi ruangah ṭhadek hen ti piak ule, chu hâwi hen nan ti piak awt leh awtlo zângfahtê hen hawng ka simh u; chu tikah ti ding mi chu ka sim bâk lai,” a ti.
50Laban leh Bethuel nih, “Hi thu hi LALPA thawk hen mi asi, kannih ruat mi zât asi loh. 51Rebek chu a um ko ma kha; lâk le, kalpi ko me. LALPA nih a sim hâwi hen na pu fapa nupi si ko seh,” an ti.
52Chu thu chu Abraham to-awpa nih a theih kâ hen, a kûn le, LALPA chu a sawnh rawh. 53Churawhchun, puan tla, tangka tla, ngûn hen thuamh mi lungmantam tla a thuak le, Rebek rangah a pêk rawh. Thilpêk man tam tatak tla, a unaupa leh a nu rangah a pêk na bâk. 54Abraham to-aw leh a hâwi tla nih an din hen an ei le, zân khat an riak. Zîng ah an thawk le, “ka pu leiah hawng ka kîrtir u rawh,” a ti.
55Sikhawmsele, Rebek unau leh a nu nih chun, “Nungâk nu hi kan sinah zarhkar khat mawh ni râ mawh um rih sele a kal kho lai,” an ti.
56To-awpa nih, “Hawng kan thloh lah râu u, LALPA nih ka khualtlâwng dingchang tak hen a siam le; ka pu sinah hawng ka kîrtir ko u,” a ti.
57Annih nih an thawh le, “A nunau kan kawh lai le, zei a ti lai kan deih nik lai ma kha a,” an ti.
58Rebek chu an kawh le, an deih, “Hi minung sinah kal ding na duh ma?” an ti. Anih nih a thawh le, “Duh ta a,” ti hen a sâng.
59Churawhchun, Rebek leh an in sungah mi to-aw upa dauh tla chu Abraham to-aw leh a hâwi leh sinah an kaltir na rawh. 60Hi hâwi hen Rebek chu mal an sâwm:
Ka farnu, nang hi, nuai tam tak nu hawng si rawh;
na thlâk tla nih an mêlma tla khuapi chu neh na seh!” ti hen!
61Rebek leh a to-aw nungâk tla chu sangâwngsâu tlûnah anna chuan le, Abraham to-awpa sinah an ektê hen an suak rawh.
62Isak chu ramkaro ah a hawng le, “Beer-lahai-roi’’ (A hawng ka Muhtu a Nung mi Tikhurchawh) ti mi Kanaan simlei kiangah â dîn. 63Zânleibâi ah phâisen leiah a va kal le, sangâwngsâu an hawng mi a muh na. 64Rebek nih Isak a muh rawh chun sangâwngsâu tlûnah mi chu a ṭum le, 65Abraham to-awpa rangah, “Phâisen ah a hawng kal mi pa khi âu mesi?” ti hen a deih.
To-awpa nih, “Ka pu asi,” ti hen a sâng. Churawhchun, a puan a lâk le, a mêl a khuh.
66To-awpa nih chun thil a ti mi zawzawng chu Isak rangah a simh. 67A nu Sari umnâk puanin ah chun Isak nih Rebek a kalpi rawh le, a nupi a hawng si rawh. Isak nih Rebek chu thungâi a dâwt le, a nu a thi rawh mi lakah thungâi a thla a ngamh.
Currently Selected:
GENESIS 24: BCLBV
Highlight
Share
Copy
Want to have your highlights saved across all your devices? Sign up or sign in
Bawm Common Language Bible © Bangladesh Bible Society, 2004. All rights reserved.
