LUK 9
9
Ṭhiruai Leinih Fialnâk
(Mat 10.5-15; Mark 6.7-13)
1Chun, Jisu nih leinih tla chu a pumh na le, khuri zawzawng tlûnah thiltikhonâk leh thuneihnâk leh nganfâk tla damh khonâk a pêk. 2Chun, Pathian Ram thu sim ding leh damlo tla damh ding hen a fial na rawh. 3Chun, an sinah, “Nan khual tlâwngnâk ah ṭhianṭhunh mawh zâl mawh, sang mawh tangka mawh zeikhawm put lah u; kawrdawh panih khawm put lah u. 4Chun, nan tlungnâk in zawng ah tlung kumza u, chu in thawk hen chun suak u. 5Chun, an lawmh lo natu zawng chu, chu khua thawk hen nan suak tikah chun anmah theihtirnâk ding hen nan kezaphah ah valeidip chu khâwng u,” a ti.
6Chun, an kal le, khua an ṭawl vima le, ram kip ah Thâwngthâng Ṭha an sim le, mi an damh vima.
Herod Lawksawngnâk
(Mat 14.1-12; Mark 6.14-29)
7Chun, lal Herod nih a thilti zawzawng chu a theih le, a zeimaw mi nih, “Johan kha a nung nawlh mahi,” an ti le, 8a zeimaw mi nih, “Elija a hawng a langh rawh asi hi,” an ti le, a zeimaw mi nih, “Tuan liau mi khuavâng âumawh a thawknawlh asi hi,” an ti ruangah a lawksawng rawh. 9Chun, Herod nih, “Johan chu a lû ka tan rawh mi; sikhawmsele, hi tluk rak hen a thâwng ka theih mi hi âu mesi?” a ti. Chun, amah chu muh a tum rawh.
Jisu Nih Mipi Sângnga A Khimtirnâk
(Mat 14.13-21; Mark 6.30-44; Johan 6.1-14)
10Chun, mifial tla chu an hawng tleng rawh chun an thilti tla a sinah an ruah. Chun, anih chu anmah tla put hen Betsaida an ti mi khua ah chun a dang hen a kal rawh. 11Sikhawmsele, mi zapi tla nih chun an theih le, an zûl vima; chun anih nih chun annih chu a lawmh na le, Pathian Ram thu a sîntir na le, damh ding a herh mi vial a damh na.
12Chun, zânleibâi zau asi rawh chun leinih tla chu an hawng le, a sinah, “Kan kiangkam khua tla ah leh lo tla ah kal hen, tlungnâk leh ei ding an tawng khonâk ding hen mi zapi hi kaltir na; ramkaro mun ah um kan si mi,” an ti.
13Anih nih chun an sinah, “Nanmah nih ei ding pêk na u,” a ti.
Chun, annih nih chun, “Hi bang minung zawzawng rangah hin ei ding kan va châwk piak na lo chun sangtlêp panga leh ngâ panih cho lo chu zeikhawm, kan nei lo,” an ti. 14(Upa vial khawm sângnga ding an si.)
Chun, a ṭhiruai tla sinah, “A murui hen totir na u, sâwmnga ding vima hen,” a ti.
15Chu hâwi hen an totir na. 16Chun, sangtlêp panga leh ngâ panih chu a lâk le, vân lei zauh hen mal a sâwm le, a phel le, mi zapi mâika ah hunh ding hen a ṭhiruai tla sinah chun a pêk. 17Chun, an ei le, an khawp ver le, an ei bang neknâwi tla chu an rût le, khobung leinih a khat.
Peter Nih Jisu Chu Mesia Asi Ti A Phuangnâk
(Mat 16.13-19; Mark 8.27-29)
18Chun, Jisu amah lâwng hen thla a cham liauah a ṭhiruai tla chu a sinah an um. Anih nih chun an sinah, “Mi zapi tla nih âu asi an ka ti?” ti hen, a deih na.
19Chun, annih nih chun, “Baptistu Johan asi,” an ti; sikhawmsele, zeimaw mi nih, “Elija asi,” an ti, zeimaw mi nih, “Tuan liauah mi khuavâng âu dauh mawh a thawknawlh rawh asi, an ti,” ti hen, an sâng.
20Chun, anih nih chun an sinah, “Asi chun, nannih nih âu asi nan ka ti?” a ti.
Chun, Peter nih, “Pathian Mesia chu,” ti hen a sâng.
Jisu Nih A Thihnâk Leh
Tuarnâk Simkannâk
(Mat 16.20-28; Mark 8.30—9.1)
21Chun, chu thu chu âukhawm simh lo ding hen a khap le, thu a pêk; 22“Minung Fapa nih hin thil tam tak a tuar ding asi, upa tla, bâwlpu lalchem tla leh Dân sîntirtu tla duh lo hen a um ding asi; thah hen a um ding asi, chun ni thum ni ah thawh hen a um ding asi,” a ti.
23Chun, amah ber nih mi zawzawng sinah, “Âuzawng nih hawng ka zûl a duh chun, mah a pheh hen, nisiar a kraws put hen hawng ka zûl seh. 24Âuzawng a nungnâk hum duhtu zawng nih a thlâu lai le; âuzawng keimah ruangah a nungnâk thlâutu zawng nih, chu nih chun a hum lai. 25Mi nih laikulh hi a pum hen a ting sele, mah a veih hen mawh a râwk sele a rangah zei me ṭhavak lai? 26Âuzawng keimah leh ka thu zahpitu zawng, Minung Fapa nih hin, amah rokualnâk hen leh a Pa rokualnâk hen vânmifial thenhlimh tla rokualnâk hen a hawng kal tikah chun, chu minung chu a zahpi lai. 27Dik tak hen ka nan simh na, hinah dîr mi a zeimaw mi tla hi Pathian Ram an muh lânlo chu thihnâk tem lo thlo ding an um,” a ti.
Jisu Mêl Umzia Dangnâk
(Mat 17.1-8; Mark 9.2-8)
28Chun, chubang thusim thawk hen ni riat ding ah mawh, Jisu nih Peter, Johan leh Jem chu a kalpi na le, thlacham ding hen tlâng ah an kal. 29Chun, thla an cham liauah a mêl umzia chu a hawng a dang le, a nipuan chu a hawng vâr le, mit ser rê hen a hawng um rawh. 30Chun, mi panih amah hen anna sâwn le, chu tla chu Mosi leh Elija an si. 31Rokualnâk hen an hawng a langh le, Jerusalem ah a thihnâk ding thu an sim. 32Peter leh a hâwi tla lam chu an ngû le; chun an fîm kâ hen a rokualnâk leh a sinah mi panih dîr mi chu an muh rawh. 33Chun, Mosi leh Elija nih Jisu an ṭhen awt liauah Peter nih Jisu sinah, “Sîntirtu, kan rangah hinah um hi a ṭha; basâ pathum kan khuar lai le, nang rangah pakhat, Mosi rangah pakhat, Elija rangah pakhat,” a ti le, (A thusim khawm theih lo hen.)
34Chun, chubang thu chu a sim liauah sûm a hawng zîng le, a liah na rawh; sûm ah an lût liauah an ṭih. 35Chun, sûm ah chun aw-hâu a hawng suak le, “Hi hi ka Fapa, ka thîm mi chu asi, amah thu ngâi u,” a ti.
36Chun, aw-hâu chu a reh kâ hen Jisu chu amah lâwng hen an muh rawh. Chun, an dâisip le, an thil muh chu chu liauah âukhawm an ruah lo.
Jisu Nih Khuri Vuanh A Damtirnâk
(Mat 17.14-18; Mark 9.14-27)
37Chun, a thâituan ah tlâng ah mi chu an ṭum nûnah mi zapi cherkhet nih amah chu an hawng dawng. 38Chun, mipi lakah chun minung pakhat a âu le, “Sîntirtu, ka fapa zauh ding hen ka nan ngiar, ka fa neihlem asi. 39Chun, khuri nih a tleih tâwn le, a dêng khuai rê lânlo chu a kaltâk duh lo. 40Chun, na ṭhiruai tla sinah nar ding hen ka ngiar na le, an ti kho lo,” a ti.
41Chun, Jisu nih, “Tu san minung lungnâk nei lo leh lungkhung le tla, zei tiang me nan sinah ka um lai le, ka nan sang kho na lai? Na fapa chu hinah hawng put,” a ti le, a sâng.
42Chun, a hawng kal liauah khuri nih chun a thlûk chiam le, cherkhet hamh a pêk. Sikhawmsele, khuri nâwmtâm chu a fâi le, ngâksia chu a damh le, a pa sinah chun a kaltir nawlh rawh. 43Chun, mi zawzawng nih Pathian rokual zia chu thungâi chê an ti.
Jisu Nih A Thihnâk Simkannâk Veinihnâk (Mat 17.22-23; Mark 9.30-32)
Chuvachun, mi zawzawng nih chun a thilti zawzawng chu chê an ti liauah Jisu nih a ṭhiruai tla sinah, 44“Chubang thu chu nan nâ ah lût seh: Minung Fapa hi minung tla kut ah tleihtir hen a um awt ruangah,” a ti. 45Sikhawmsele, a thusim chu a ngaihtawnh dân an thiam lo le, a thu umzia an theih lonâk ding hen an sinah thawk hen â thup asi; chu thusim thâwngthâng chu amah tâ nih an deih ngam lo.
Âu Me A Lian Chem
(Mat 18.1-5; Mark 9.33-37)
46Chun, “Kan lakah âu me rokual chem lai?” ti hen anna êl. 47Chun, Jisu nih an thinlung ah anna ruah mi chu a theih le, ngâksiatê a kawh le, a sîrah a dîrtir. 48Anih nih chun an sinah, “Âuzawng ka min ruangah hi ngâksiatê hi lawmhtu zawng chu keimah an ka lawmh asi; âuzawng kei an ka lawmhtu vial chu hawng ka fialtu lawmh an si; nan ektê lakah a mê chem mi hi asi rokual chem mi chu,” a ti.
Hawng Kan Do Lotu Chu
Mah Ṭângṭawm Asi Zia
(Mark 9.38-40)
49Chun, Johan nih chun, “Sîntirtu, âumawh na min hen khuri tla a nar mi kan muh le, kan nan zûlnâk ah â tel bâk lo ruangah kan khap asi,” a ti le, a sâng. 50Jisu nih a sinah, “Khap lah u rawh, âuzawng nanmah do lotu chu nanmah lei ṭângṭawm an si,” a ti.
Jisu Jerusalem Leiah A Kalnâk
51Chun, vân ah a kâi ding tik a tlung awt liauah Jerusalem ah kal ding hen â hawi thlir le, a lânkhân hen thu thanhtu tla a fial na le; 52chun an kal le, amah rangah timhtuah piak ding hen Samaria mi tla khua pakhat ah an lût. 53Chun, zauhnâk ah Jerusalem leiah kal ding hen a lang ruangah amah an lawmh lo. 54Chun, ṭhiruai Jem leh Johan nih chun an muh kâ hen, “Lalpa, hi bang tla kâng vernâk ding hen vân ah mi mei thlâktir sele rem na ti ma?” an ti.
55Anih chu â hawi le, a châk na. 56“Nan thusim umzia nan theih lo asi. Minung Fapa hi minung nun tlautir ding silo hen, sanhim ding hen hawng kal asi dauh,” a ti. Chun khua dang ah an kal rawh.
Minung Fapa Nih Lû Ngauhnâk
A Nei Lo Zia
(Mat 8.19-22)
57Chun, lampi ah an kal liauah, âunih mawh a sinah, “Na kalnâk zawng ah ka nan zûl lai,” a ti.
58Chun, Jisu nih a sinah, “Kâwlui tla nih kua an nei le, chungzuang va tla nih bû an nei le, Minung Fapa lam nih chun a lû ngauhnâk a nei lo,” a ti.
59Chun, midang sinah, “Hawng ka zûl rawh,” a ti. Sikhawmsele, anih nih chun, “Lalpa, ka pa hawng ka vûitir tâ rih,” a ti.
60Anih nih chun a sinah, “Mithi nih anmah mithi chu vûi seh; nangnih chun Pathian Ram thu sim le, zanh rawh,” a ti.
61Chun, midang khawm nih, “Lalpa, ka nan zûl lai; sikhawmsele, ka in ah mi tla aw-kâ nêm hen hawng ka thlahtir tâ rih,” a ti.
62Chun, Jisu nih a sinah, “Âuzawng tual nâwnnâk tleih hen dung leiah zauh mi chu Pathian Ram rangah a tlâk loh,” a ti.
Currently Selected:
LUK 9: BCLBV
Highlight
Share
Copy
Want to have your highlights saved across all your devices? Sign up or sign in
Bawm Common Language Bible © Bangladesh Bible Society, 2004. All rights reserved.
