LUK 8

Jisu Zûltu Nunau Chu

1Chun, a nehnûn dauh ah chun Jisu thusim leh Pathian Ram Thâwngthâng Ṭha tlungtir hen khua lian leh khuatê tla a ṭawl vima le, a sinah leinih tla chu an um. 2Chun, nunau zeimaw mi tla khuri vuanh dam mi tla leh nganfâk dam mi tla hen: Chubang nunau tla chu Mari, a paw sungah mi khuri pasarih an suak mi Magdala mi Mari an ti mi, 3Herod sum kiltu Chuza nupi Joana, Susana leh midang tam tak tla hen an si. Chubang tla nih chun mah neih hen an eibâr an timhtuah piak tâwn.

Chi Vawrhtu Tahṭhimh Thu

(Mat 13.1-9; Mark 4.1-9)

4Chun, mi zapi cherkhet an hawng a pûm le, khua kip mi a sinah an hawng kal le, tahṭhimh thu hen thu a sim:

5“Fachî vawrhtu chu a fachî vawrh hen a kal le; chun, a vawrh liauah a zeimaw mi lam vâu ah a tlâ le, mi nih an lamh le, chung zuang va tla nih an tlanh hep. 6Chun, a zeimaw mi lungpher tlûnah a tlâ le, chun a keuh kâ hen a dâm lo ruangah a uai ver. 7Chun, a zeimaw mi bualingnei lakah a tlâ le, bua hen rual cho hen an keuh le, a dawrh nek. 8Chun, a zeimaw mi tual ṭha lakah a tlâ le, a hawng keuh le, a let zâ hen a rah rawh,” a ti.

Chun, chubang thu a sim liauah a âu le, “Âuzawng theihnâk ding hen nâ nei nih chun theih seh,” a ti.

Tahṭhimhnâk Thiltum

(Mat 13.10-17; Mark 4.10-12)

9Chun, a ṭhiruai tla nih chun a sinah, “Hi tahṭhimh hi zei tinâk mesi?” ti hen, an deih. 10Chun, anih nih chun, “Pathian Ram thu thup tla chu nannih theih lam chu siang asi le, midang sinah lam chun tahṭhimh thu cho hen sim asi; ‘muh khawmsele, muhlo an si khonâk ding hen, nâ hen theih khawmsele, a ngaihtawnh dân an theih lonâk ding hen.’ ”

Jisu Nih Tahṭhimh Thu A Simhfiangnâk

(Mat 13.18-23; Mark 4.13-20)

11“Tahṭhimh thu kha hi hi asi: Fachî chu Pathian thu asi. 12Chun, lam vâu ah chî a tlâ mi chu, thu theih rawh mi tla hi an si; chun Diabol chu a hawng kal le, an lung lo ding hen ruangsuah an si kho lonâk ding hen an thinlung ah mi thu a lâk piak na tâwn. 13Chun, lungpher tlûnah chî a tlâ mi chu an theih kâ hen thu chu lâwm tak hen tleih mi tla an si; sikhawmsele, ram an nei lo; sâwtlotê chu an lung le, lêmnâk tawng tikah an bângtâk nawlh tâwn. 14Chun, bualingnei lakah chî a tlâ mi tla chu hi bang minung tla hi an si; an theih nûnah an kal le, taksa lei lungkhamnâk tla, neihsiahnâk tla, damsung nuamchênnâk tla nih chun a dawrh le, an rah a min dahlo. 15Tual ṭha lakah chî a tlâ mi lam chu hi bang tla hi an si; thinlung rep leh ṭha hen thu an theih le, an chîng thlir le, felfê tak hen an rah tâwn.”

Khâwnvâr Thawk Hen Sin Ding Mi Chu

(Mark 4.21-25)

16“Âukhawm khâwnvâr kâih hen mâihûm hen an khuh dahlo, ihkhun tang khawm ah an siah lo; a lût mi zawng nih a chêu an muh kho ding hen a siahnâk ah an siah tâwn asi.”

17“Puang lo ding hen pheh zeikhawm a um lo, theih lo ding hen leh lang lo ding hen thuh zeikhawm a um lo. 18“Chuvachun, zei hâwi hen se nan theih a thiamthih u; âuzawng a nei mi vial sinah an pêk sap lai le, âuzawng a nei lo mi vial nei hen anna ruat lem mi khawm an suh lai,” a ti.

Jisu Nu Leh Unau Tla

(Mat 12.46-50; Mark 3.31-35)

19Chun, a nu leh a unau tla nih chun Jisu lei an hawng fûk le, sikhawmsele mi zapi ruangah chun a kiangah an tleng kho lo. 20Chun, “Na nu leh na unau tla nih nangmah muh ding duh hen lênglei ah khin an dîr ko,” ti hen, an simh.

21Chun, anih nih chun an sinah, “Hi bang Pathian thu theih hen zâwttu tla hi ka nu leh ka unau tla an si,” a ti le, a sâng.

Jisu Nih Thli râng A Bângtirnâk

(Mat 8.23-27; Mark 4.35-41)

22Chun, ni khat chu a ṭhiruai tla hen lawng ah â chuan le, chun an sinah, “Rilî varâl leiah khin kan kal lai,” a ti, Chun, lawng chu an sût le, an kal rawh, 23Chun, an kal liauah Jisu chu a it thlit le, chun rilî ah chun thli a hawng râng le, an lawng chu tî hen a khat awt le, ṭihnungkâi tak hen an um rawh. 24Chun, a sinah an va kal le, an thawh le, “Sîntirtu, Sîntirtu, kan vei awt hi!” an ti.

Chun, Jisu chu â ṭhang le, thli leh titlingtlawk chu a fâi le; chun a bâng le, a reh rawh. 25Chun, an sinah, “Zeiah me nan lungnâk?” a ti.

Chun, an ṭih le, thungâi chê an ti, “Hi hi âu me si le? Thli leh tî tiang khawm thu a pêk le, anna âwi e!” anna ti.

Jisu Nih Khuri Vuanh A Damtirnâk

(Mat 8.28-34; Mark 5.1-20)

26Chun, Galili ram zâwn ah Gerasin mi tla ram chu an tlung. 27Chun, tlâng a kâi rawh chun khua mi khuri vuanh âunih mawh a tawng le; chu minung chu sâwt tak puan aih lo hen a um le, in khawm ah a um lo, thlân tla ah a um dauh tâwn. 28Chun, Jisu a muh kâ hen a âu le, a mâika ah a bawkbukhup le, hâu fâk tak hen, “Jisu, Pathian Chungnung chem Fapa, kei leh nang zei me kanna tlâinâk um? Hawng ka rêp rîlmâl lah, ka nan ngiar,” a ti. 29Jisu nih khuri nâwmtâm chu, chu minung paw sungah mi chu suak ding hen thu a pêk rawh ruangah. Chu minung chu vei tam tak khuri nih a tleih tâwn asi, mi nih thîr chikchîn leh rêng an khimh le, an vêng kumza tâwn; sikhawmsele, a phuarnâk tla a sah le, khuri nih ramkaro leiah a khalh tâwn.

30Chun, Jisu nih, “Na min zei mesi?” ti hen a deih.

Chun, anih nih chun, “Zapi,”#8.30 Hinah ‘Zapi’ ti mi hi Rom kawrsen murui min asi. NEB lakah ‘Zapi’ ti hen leh asi: chu kawrsen zapi murui khat lakah mi 6,000 ri an um asi. a ti le, a paw sungah khuri tam tak an lût ruangah. 31Chun, khur dawng nei lo ah kal ding thu pêk lo ding hen Jisu sinah an ngiar.

32Chun, chunah chun tlâng ah vawk rual tam tak an tlawng le, chun a sinah vawk paw sungah lût khonâk an ngiar. Chun, anih nih chun thu a pêk. 33Chun, khuri tla chu minung paw sungah mi an suak le, vawk paw sungah an lût le, chun vawk rual chu kham ah anna khâwk chiam le, rilî ah an tek le, an tlâ le, tî thalh hen an thi rawh.

34Chun, a vulhtu tla nih chun thil umzia chu an muh le, an tek phêt le, khua ah leh ram ah chun an sim. 35Chun, “Zeise asi rawh ne?” ti hen zauh ding hen an suak. Chun, Jisu sinah an tlung le, khuri nih a suaktâk mi chu puan aih hen, thinlung kêl put hen Jisu kebul ah to mi an va muh; chun an ṭih rawh. 36Chun, a theihtu tla nih chun khuri vuanh a damh zia thu chu, chubang tla sinah chun an simh na rawh. 37Chun, Gerasin ram kiangkam mi tla zawzawng nih chun thungâi an ṭih ruangah anih chu an sinah mi kal ving ding hen an ngiar le; chun lawng ah â chuan le, a kîr nawlh rawh. 38Chun, khuri nih a suaktâk mi lam nih chun Jisu sinah um kumza ding a ngiar.

Sikhawmsele, Jisu nih, 39“Na in ah tlung le, Pathian nih na rangah thil a nan ti piak mi hi va sim rawh,” ti hen a kaltir rawh.

Chun, a kal le, khuapi sung zawzawng ah chun Jisu nih a rangah thil a ti piak zia chu a phuang.

Jaira Fanu Thawhnâk Leh Nunau Thipût Damhnâk

(Mat 9.18-26; Mark 5.21-43)

40Chun, Jisu a hawng kîr nawlh rawh chun mi zapi nih amah an lawmh le, an ektê hen amah chu an ngâk ruangah. 41Chun, mi pakhat Jaira, pumhnâk in hotu chu a hawng kal le, Jisu kebul ah a bawkbukhup le, a in ah kal ding hen a ngiar. 42Fanu pakhat cho kum leinih ding mi a nei le, chu chu thi awt tetem hen a rîl ko ruangah.

Chun, Jisu a kal liauah mi zapi nih an eng dûlmâl. 43Chun, nunau pakhat, kum leinih thî hat kho lo mi a um le, a sum neih zawzawng chu dâktawr tla lakah a veih hep rawh le, âukhawm nih an damh kho lo rawh le; 44chu minung chu a dung leiah a hawng kal le, a puan sâr a tawngh le; zeikarlo ah a thî suak chu a hat sawm rawh. 45Chun, Jisu nih, “Hawng ka tawnghtu kha âu me?” a ti.

Chun, “Kei kasi lo,” an ti chiau. Peter leh a hâwi tla nih, “Sîntirtu, mi zapi nih an eng chukmak mi, an chîl chukmak khateh,” an ti.

46Sikhawmsele, Jisu nih, “Mi âunih mawh hawng ka tawngh asi, thiltikhonâk ka sungah mi a suak ti ka theih asi,” a ti. 47Chun, nunau nih chun â thup kho lo ti a theih le, thir bû hen a hawng kal le, a mâika ah a bawkbukhup le, a tawngh sawm le, zeikarlo ah a dam zia chu mi zawzawng mâika ah a sim rawh. 48Chun, anih nih chun a sinah, “Ka fanu, na lungnâk hi na dam phah asi, lungngam tak hen kal rawh,” a ti.

49A hawlh liau chirah pumhnâk in hotu in ah mi chu minung pakhat a hawng kal le, “Na fanu a thi rawh, Sîntirtu hi nawktir lah,” a ti.

50Jisu nih chun chu thu chu a theih rawh chun, “Lâu lah lung ko, chun a dam nawlh lai,” a ti le, a sâng.

51Chun, in chu a va tlung rawh chun Peter, Johan leh Jem leh ngâksia nu leh pa cho lo chu âukhawm lût a siang lo. 52Chun, an ektê hen an ṭap chur le, an ir anna chumh le; chun anih nih chun, “Ṭap lah u, a thi lo, a it mi asi,” a ti.

53A thi rawh ti an theih ko dangâiah an nihsanh ko. 54Jisu nih chun a kut a tleih le, “Kuihtê, thawk rawh,” a ti le, a kawh. 55Chun, a thlarau chu a hawng kîr nawlh le, a thawk sawm le; chun, zeilo ei ding thu a pêk. 56Chun a nu leh a pa nih chun thungâi chê an ti. Sikhawmsele anih nih chun a thilti chu âukhawm nih theih lo ding hen a khap.

Currently Selected:

LUK 8: BCLBV

Highlight

Copy