THEU NAI 16
16
Manna hawi thengmynchi pei nai
1Israela chang bawibawichi ly Elim dengdairei tako u bi i, Aikupta pri i theu nai bo y lo nyhrei kani holai pangrei khala Sinai mawi hawi Elim sala i Sin daichi ka-vym y tym u bo. 2Huni daichi ka-vym y, nichi ly Mosi nini Aron teng y, 3“Areng ly kaichi ai Aikupta pri y dei hai khyly hawi keh alam ai; kaichi ly huni pri y mawi hawi tako kajeu kawi pa-rei cha ai nai nga; vai ly kaichi ai kajeu ka-lam y dei hai ai nai, hini daichi ka-vym y ang pahawi nai na a hi ly” nanai josei u lengleang bo.
4Huna nai khala Areng my Mosi teng y, “Vai kai ly nangchi bawibawi i vui kani mang dengdairei tako pala pi ai. Nichi ly kani tleirei theu iy kanirei ka-cho pakym u ai nai tla; hunai kamta kai i leu pei naichi tangai mo, tangai y mo, kapany ai.#Jh 6.31 5Tariu kani y ly kani tleirei pakym nai kamta ny y naimy, kani nyhrei i ka-cho pakym u ai nai tla,” napi.
6Naibaly Mosi nini Aron my Israela cheng bawibawichi teng y, “Vaidym ly nangchi ai Aikupta pri i theu hai nai keung Areng ne, nanai pany u ai. 7Khawn khutawi baly Areng i nang parai nai sangso kangvang ly angvang teaung nai nangchi niu u ai. Mymy ly nangchi i josei nai thai bo, achi ly mymy i leu pei naichi naini sa ai nai tla khyh,” napi. 8Mosi my thui pi bi nai ly “Areng ly nangchi i josei nai raawi thai nai deaungkho y, nangchi dym mang cha ai nai mawi hawi khawn mang cha ai nai ngai nai ryrei tako ang pei ai. Nangchi ly kaini ai josei u nai ly Areng ai josei tatang nai ne,” napi.
9Mosi my Aron teng y, “Khumi mipuichi ly Areng i mo y jeu u ai nai leu pei; ati mana nai mo na baly mymy ly nichi i josei naichi thai bo,” napi. 10Naibaly Aron ly mipui bawibawichi teng y Mosi my leu taviu nai kamta thui pi nai thym y, nichi ly daichi ka-vym mang y khen tapai nai i, tlenrei khyhmy tamai dengdairei Areng i kangvang sangso ly alaukau nanai niu u bo. 11Areng my Mosi teng y, 12“Kai ly Israela chengchi i josei nai kathai bo. Nichi ly dym mang y mawi cha u ai; khawndam mang y ly nichi i ngai nai ryrei tako cha ai nai nga u ai; huna nai khala Kai, Areng ly nichi i Tameuh ne, nanai pany u ai tapi,” napi.
13Huni kani dym y thengmyn kanghu akheang hai i, tai nai meingtym verei y kawi hai mang bo; khawn mang y ly tai ka-ki kadam tla hai. 14Kadam aheang nai khala y daichi verei, khaileaung y angporyp nai phichychi awm ma mang bo; huni phichychi ly kadam tanrei naudyp tlai nai ne. 15Israela chengchi ly huni ai niu nai khala, nichi ly pany vai y, niu py niu vai y i, “Hini ly ati kha?” nanai adeng u leungtang. #1 Kor 10.3
Naibaly Mosi my nichi teng y, “Hini ly nangchi cha ai nai Areng my pei nai tako ne. 16Areng my khumi leaung leaungrei ly amy i dengtheung kanirei cha ai nai ka-leu khyp sie nyhrei akhui khyh sy, ang napi,” napi.
17Israela chengchi ly leu pei nai kamta pakym u i, phyrei ly nawi pakym, phyrei ly maidenrei pakym u khyh. 18Nichi neh cham nai khala, nawi pakym naichi py nawime y, di pakym naichi py dime y; khumi luteng ngai nai ryrei nga u bawibawi nai ne. #2 Kor 8.15 19Mosi my nichi teng y, “Ami py ne sy, khawndam i vui pakhaw mai moh sy,” napi. 20Na i py phyrei khumichi ly leu tangai y, pasyh u lawh; khawn mang y ly huni takochi ly ui i mui eung na; naibaly Mosi ly khri pa-rei kado theu bo. 21Khawn tleirei leaung leaungrei ka-leu pakym u i, kani bi ango nai khala khaileaung y awm nai takochi ly tlawn pan veng nai ne.
22Tariu kani y ly leaungrei y kani nyhrei ka-cho sie palyhrei pakym u bo. Mipuichi ai lu sa nai keungchi ly Mosi teng y huni satang amti pi nai khala, 23Mosi ly nichi teng y, “Areng my leu pei nai ly vaini ly nangchi i ngai nai kamta tako paawp py paawp pajau, byh py byh pajau, kamlaichi ly khawn mang i vui khai u; khawndam ly Areng teng y aau patyp ai nai anawn nai kani kachai ne,” napi. #Theu 20.8–11 24Nichi ly Mosi i leu pei nai kamta khawn mang i kavui kamlai khai u i, takochi ly phra py phra y, ui py ui y nai ne. 25Mosi my ly “Vaini ly nangchi kalop anawn nai kani, Areng i vui khai takhra nai Anawn Kani ne i, jangdyh i teicha kamlai cho u; tai angam mang y ly teicha teinei avum ai ny y. 26Nangchi ly kani tariurei sala y kani tleirei tako pakym u ai nai tla; na i py Saryh kani ly Anawn kani ne i, huni kani y ly ati sai py nga ai ny y,” napi.
27Saryh kani y phyrei khumichi ly tako pakym ai nai theu u, na i py ati sai py niu u y bo. 28Huna nai khala Areng my Mosi teng y, “Nang i khumichi ly kai i leu tangai y ai nai mana tanrei awm u jo rai na mo? 29Kai Areng ly nangchi ai anawn ai nai kani kang pei bo; Huna nai y tariu kani y ly tako kani nyhrei ka-cho nangchi ai kang pei ai. Saryh kani y ly khumi luteng amy i awm naira y awm ai nai tla; ami py yhm angam mang y theu ai nai tlo y,” napi. 30Hunaibaly khumichi ly saryh kani y kalop so y i, anawn u nai ne. 31Israela chengchi my huni teicha teinei ai, “Manna tako,” #16.31 Manna: Hebrai leu y “hini ly ati mo?” nanai sai ne. nanai palau u bo; huni tako ly maheu hm ka-tawm abawi nai tako ne. Huni ly kaleung iy khawi hang katlen nai tako kamta cha nai hawi parai. #Kati 11.7–8, 16.33; Heb 9.4 32Mosi my, “Areng ly achi ai Aikupta pri i dengdairei pahawi iy, daichi ka-vymra y achi ai pacho nai manna tako ai, achi i deung kangthauchi my niu ai nai manna tako maidenrei reume ai nai tla, nanai Areng my leu pei nai ne,” napi. 33Mosi ly Aron teng y, “Laawm harei lo ly Manna tako sie nyhrei khai, achi i deung kangthauchi i vui reume ai nai Areng i mo y khai ai nai tla,” napi. 34Areng my Mosi teng y leu pei nai kamta, Aron ly manna tako khai nai laawm ai ly Areng i Leu Maikawm Pawm mo y khai bo. 35Israela chengchi ly nichi khuteng sa u ai nai Kanan pri y tym nai ryrei, manna tako ai saneng vui palyhrei cha u nai ne.#Josua 5.12 36(Huni neng khala teaung nai sie 20 rei nai ly avang teaung hawi ahyh nai ne.)
Currently Selected:
THEU NAI 16: KCL02
Highlight
Share
Copy
Want to have your highlights saved across all your devices? Sign up or sign in
Khumi Common Language Bible © Bible Society of Myanmar, 2005.
