THEU NAI 17
17
Lengseaung mang tui theu hai nai
(Kati 20.1–13)
1Israela cheng bawibawichi ly Areng i leu pei nai kamta, Sin daichi ka-vym i dengdairei meingtym takhra mang y asyh bi, asyh u bi nai ne; naibaly nichi Rephidim y tym i, hu y tai u bo; na i py huni meingtym y ly tui by y.#Kati 20.2–13 2Huna nai khala nichi ly Mosi teng y, “Kaichi ai tui nei ai nai pei,” nanai josei u bo.
Mosi my, “Ati mana nai josei u lawh mo? Ati mana nai Areng ai cham u lawh mo?” napi.
3Na i py khumi mipuichi ly khri pa-rei tui ahai nai deaungkho y, Mosi ai josei u veangveang i ni teng y, “Ati mana nai kaichi ai Aikupta pri i nai theu hai mo? Kaichi hawi kaichi i cho chanauchi hawi tawnbawichi raurei tui kanghai y padei ai tau nai a?” napi u.
4Mosi ly Areng teng y chiu sa praw i, “Hini khumichi i vui kai mana kasa pi pajau ai mo? Nichi ly kai ai lengseaung hawi aphi ka ai nai tau u dudu bo,” napi.
5 Areng my Mosi teng y, “Nang hawi Israela chengchi theung i lu sa nai phyreichi ai nang teng palau ly khumi mipuichi ai pahawi iy mo mang y tako u man; Naing tavo tui y pakhau nai cheaungvawi py syn. 6Kai ly Sinai mawi i lengseaung saleung nang i mo y angdo ai. Nang ly lengseaung y pakhau; huni lengseaung mang khumichi nei ai nai tui theu ai,” napi. Naibaly Mosi ly Israela chengchi i luchi mo y leu pei nai kamta huni lengseaung y pakhau bo.
7Israela chengchi my, “Areng ly achi hawi vanrei awm a?” nanai deng naimy Mosi ai josei iy Areng ai cham u nai deaungkho y, huni meingtym ai,” Massah” nanai py, “Meriba” #17.7 Massah… meriba: Hebrai leu y “cham nai” hawi “josei nai” nanai sai ne. nanai py pathi u nai ne.
Amalek chengchi hawi tavai atiu nai
8Amalek chengchi ly Rephidim meingtym y chei iy Israela chengchi ai tiu u nai ne. 9Mosi my Josua teng y, “Nang ly khawndam Amalek chengchi ai tavai tiu ai nai khumi phyreichi ai vawi takhra; kai ly Tameuh my syn hai nai cheaungvawi hawi mawi saleung y angdo ai,” napi. 10Josua ly Mosi my leu pei nai kamta sa i, Amalek chengchi ai tavai tiu ai nai amsa bo. Hunai thym khala Mosi, Aron hawi Hurachi ly mawi saleung y lyn u kalau. 11Mosi i kiuban pheu nai khala Israela chengchi my pajau; na i py ni i kiuban pala vui baly, Amalek chengchi my pajau nai ne. 12Mosi ly kiuban khohai nai deaungkho y Aron nini Hura my lengseaung pali pi i, Mosi ai ateh hai; nini ly Mosi i kiuban y kani dym pa-rei dawmkhawn pi bo. 13Hunai kamta sa nai deaungkho y Josua ly Amalek chengchi tavai sum pa-rei tiu pajau nai ne.
14Naibaly Areng my Mosi teng y, “Hini eaung nai ly pany jo ai nai tajiu typ; kaimy Amalek chengchi ai tavai kasum hai ai nai Josua teng y thui pi,” napi.#Leu 25.17–19; 1 Sam 15.2–9 15Mosi ly maicham sa i, “Areng ly kai i tamkhawn ne,” nanai amyn pathi bo. 16Naibaly Mosi ly “Areng i tamkhawn theaung u! Areng ly Amalek chengchi ai tavai tiu jojo ai!” nanai aeu bo.
Currently Selected:
THEU NAI 17: KCL02
Highlight
Share
Copy
Want to have your highlights saved across all your devices? Sign up or sign in
Khumi Common Language Bible © Bible Society of Myanmar, 2005.
