Milimo ya Ŵakutumika 3
3
Chiti chikuchizgika
1Zuŵa limoza Petrosi na Yohane ŵakakwereranga ku Nyumba ya Chiuta pa nyengo ya kusopa, pa 3 koloko ku mise. 2Ŵanthu ŵanji ŵakanyamura munthu mweneuyo wakaŵa chiti kufuma pakubabika kwakhe. Munthu yura zuŵa na zuŵa ŵakamuŵikanga pa muryango wa Nyumba ya Chiuta uwo ukachemekanga “Muryango Wakutowa,” mwakuti wapemphenge vyawanangwa ku ŵanthu awo ŵakanjiranga mu Nyumba ya Chiuta. 3Iyo wakati wawona Petrosi na Yohane apo ŵakanjiranga waka mu Nyumba ya Chiuta, wakaŵapempha kuti ŵamupeko vyawanangwa. 4Petrosi na Yohane ŵakamudodoliska, ndipo Petrosi wakamuphalira wakati, “Laŵiska kwa ise!” 5Munthu yura wakaŵalaŵisiska na kugomezga kuti wapokengeko kanthu. 6Kweni Petrosi wakamuphalira kuti, “Ndarama za siliva na golide ndilije, kweni icho ndili nacho ndicho nkhukupa: mu zina la Yesu Khristu wa ku Nazarete, ‘Endanga.’ ” 7Ntheura Petrosi wakamukora pa woko la maryero na kumuwuska. Penepapo malundi ghakhe na tusinginini twakhe vikakhomeskeka. 8Wakadukira muchanya na kwimilira ndipo wakamba kwenda. Wakanjira mu Nyumba ya Chiuta pamoza nawo uku wakwenda na kudukaduka na kuchindika Chiuta. 9Ŵanthu wose ŵakamuwona wakwenda na kurumba Chiuta, 10ndipo ŵakamupanikizga kuti ndiyo yura nadi mweneuyo wakakharanga pa Muryango Wakutowa wa Nyumba ya Chiuta na kupempha vyawanangwa. Ŵanthu wose ŵakazizwa chomene na kuzukuma na icho chikamuchitikira.
Mazgu gha Petrosi mu Nyumba ya Chiuta
11Apo wa chiti yura wakademereranga Petrosi na Yohane, ŵanthu wose wakazukuma, ndipo ŵakachimbilira pamoza kwiza kwa iwo mu khonde ilo likachemekanga khonde la Solomoni.#3.11 khonde la Solomoni: Likaŵa khonde la Nyumba ya Chiuta ilo likaŵa ku mafumiro gha dazi gha Nyumba ya Chiuta (muwone Yoh 10.23). Pamanyuma ŵakhristu ŵakakumananga pa malo agha (muwone Mil 5.12). 12Para Petrosi wakawona ichi, wakaŵaphalira ŵanthu wakati, Mwa madoda gha Israele, chifukwa uli mukuzukuma na ichi? Kasi mukutidodoliskirachi nga ndi para tamwendeska munthu uyu na nkhongono zithu panji na urunji withu? 13Ndi Chiuta wa Abrahamu, na wa Yisake, na wa Yakhobe, Chiuta wa ŵasekuru ŵithu, uyo wachindika muteŵeti wakhe Yesu, mweneuyo imwe mukamupereka na kumukana panthazi pa Pilato, nangauli iyo wakadumula kuti wamusutule.#Kuf 3.15 14Mukakana Mutuŵa na Murunji Yura, kweni mukaromba chigeŵenga kuti ndicho chisutulike.#Mat 27.15-23; Mrk 15.6-14; Luk 23.13-23; Yoh 19.12-15 15Imwe mukakoma mweneuyo nchitopoko cha umoyo, kweni Chiuta wakamuwuska ku ŵakufwa. Ise tili ŵakaboni ŵa cheneichi. 16Ndipo zina lakhe, na chipulikano mu zina lakhe, vyapereka nkhongono ku munthu uyu mukumuwona na kumumanya. Ndipo chipulikano icho ncha mwa Yesu chapereka umoyo wakufikapo ku munthu uyu pa maso pa imwe mose.
17“Kweni sono mwa ŵabali, nkhumanya kuti mukachita ichi mu ulemwa, nga ndi umo ŵakachitira ŵarongozgi ŵinu. 18Kweni Chiuta wakayowoyera kale mu nchimi zose kuti, Mesiya wakhe wakwenera kukomwa ndipo ndicho wali kufiska ntheura. 19Ipo ng'anamukani na kuwereraso kuti zakwananga zinu zigowokereke, 20mwakuti nyengo ya kuwezgeramo nkhongono yize kufuma kwa Fumu, na kuti yitume Mesiya uyo wali kwimikikira imwe. 21Ndiyo Yesu mweneuyo wakwenera kupokerereka kuchanya yisuke yize nyengo ya kukhazikiskira vyose, ivyo Chiuta wakayowoya na milomo ya nchimi zakhe zakupatulika kufuma papo kale. 22Mozesi wakati, ‘Fumu Chiuta wati wamwimikirani nchimi kufuma mu ŵabali ŵinu nga ndi umo wakandimikira ine. Mwizakamupulikire mu vyose ivyo wizamkumuphalirani.#Mar 18.15, 18 (LXX) 23Kwizamkuŵa ntheura kuti yose uyo wakureka kuyipulikira nchimi yeneiyo, wizamkuwuskikamo mu ŵanthu na kukomeka.’#Mar 18.19 24Nchimi zose kufuma pa Samuele na wose awo ŵakiza kunyuma zakhe, zikapharazga vya mazuŵa ghano. 25Mapangano agho Chiuta wakachita mu nchimi nga imwe, ndipo imwe mukusangana mu phangano ilo Chiuta wakachita na ŵasekuru ŵinu, pakuyowoya kwa Abrahamu kuti, ‘Mu mphapu yako mafuko ghose gha pano pa charu ghizamkutumbikika.’#Mut 22.18 26Chiuta wakati wawuska muteŵeti wakhe, wakadanga kumutuma kwa imwe kuti wamutumbikani, pakuwezga yose wa imwe kufuma ku nthowa zakhe ziheni.”
Currently Selected:
Milimo ya Ŵakutumika 3: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
