Milimo ya Ŵakutumika 5
5
Vya Hananiya na Safira
1Kweni munthu munyakhe zina lakhe Hananiya pamoza na muwoli wakhe Safira ŵakaguliska munda wawo, 2ndipo wakati wazomerezgana na muwoli wakhe, wakatorapo ndarama zinyakhe kuti ziŵe zakhe ndipo ndarama zakukharako wakiza nazo ku ŵakutumika. 3Petrosi wakamufumba wakati, “Iwe Hananiya, chifukwa nchichi wazomerezgana na Satana kuti upusike Mzimu Mutuŵa pakutorapo ndarama zinyakhe za munda uwo ukaguliska? 4Uchali undawuguliske munda wako, asi ukaŵa wako na wako? Ndipo ukati wawuguliska, asi ndarama zikaŵa mu nkhongono zako? Kasi wazomerezga uli kuti ichi chiŵe mu mtima wako? Kuti wapusika ŵanthu chara, kweni wapusika Chiuta.” 5Hananiya wakati wapulika mazgu agha, wakawa pasi ndipo penepapo wakafwa. Ŵanthu wose awo ŵakapulika ichi ŵakaŵa na wofi ukuru chomene. 6Ntheura ŵanyamata ŵakiza na kuvungirizga thupi lakhe mu salu, ndipo ŵakamuyeghera kuwaro kuya kamusunga mu dindi.
7Ghakati ghajumphapo panji maora ghatatu, muwoli wakhe wakanjira, kwambula kumanya icho chachitika. 8Petrosi wakamufumba mwanakazi wakati, “Undiphalire, kasi ndarama izo mwaguliska munda winu, iwe na mufumu wako, nzenezizi?”
Muwoli wakhe wakazgora wakati, “Inya tikaguliska pa mtengo weneuwu.”
9Petrosi wakamuzgora wakati, “Chifukwa uli mukazomerezgana kuyezga Mzimu wa Fumu? Wona ŵanyamata awo ŵasunganga mufumu wako ŵali pa muryango, ŵati ŵakuyeghere kuwaro na iwe wuwo!” 10Penepapo mwanakazi yura wakawa pasi panthazi pa Petrosi na kufwa. Para ŵanyamata ŵakanjira, ŵakasanga kuti wafwa kale. Ŵakamuyeghera kuwaro na kuya kamusunga pamoza na mufumu wakhe. 11Ndipo mpingo na wose awo ŵakapulika makani agha, ŵakaŵa na wofi ukuru.
Ŵakutumika ŵakuchita vimanyikwiro na minthondwe
12Ŵakutumika ŵakachitanga vimanyikwiro na minthondwe yinandi mukati mu ŵanthu. Ndipo wose ŵakupulikana ŵakakumananga pamoza mu khonde la Solomoni. 13Pakaŵavye na yumoza uyo wakajikangarizga kubatikana nawo, ndipouli ŵanthu wose ŵakaŵachindikanga. 14Ndipo unandi wa awo ŵakapulikana na Fumu, ŵanarume na ŵanakazi ukakuranga chomene. 15Ntheura ŵarwari ŵakayeghekera mu misewu ya mu misumba, na kuŵagoneka pa vitara na pa mphasa, mwakuti para Petrosi wakujumphapo muzgezge wakhe pera ukhwaske ŵanji ŵa iwo. 16Ndipo ŵanthu ŵanandi ŵakiza kufuma mu mizi yakuzingirizga Yerusalemu. Ŵakayeghanga ŵarwari na awo ŵakasuzgikanga na mizimu yiheni ndipo wose ŵakachizgikanga.
Ŵakutumika ŵakuzikizgika
17Ntheura Musofi Mukuru na awo ŵakaŵa pamoza nayo, awo mba chipani cha Ŵasaduki, ŵakazura na sanje. 18Ŵakakora ŵakutumika na kuŵaŵika mu gadi. 19Kweni na usiku pakati mungelo wa Fumu wakajula miryango ya gadi na kuŵarongozgera kuwaro ŵakutumika ŵara, 20ndipo wakati, “Rutaninge, mukimilire mu Nyumba ya Chiuta na kuŵaphalira ŵanthu mazgu ghose gha umoyo uwu.” 21Ŵakati ŵapulika ichi, ŵakaya kanjira mu Nyumba ya Chiuta ku matandakucha, ndipo ŵakamba kusambizga.
Para Musofi Mukuru wakiza pamoza na awo ŵakaŵa nayo, wakawunganya ŵa mu mphara yikuruya ŵaIsraele, ndipo ŵakalangula kuti ŵakutumika ŵize nawo kufuma ku gadi. 22Kweni ŵalinda ŵa Nyumba ya Chiuta ŵakati ŵafika, kuti ŵakaŵasangamo chara mu gadi. Ŵakawerera kunyuma kuya kaphara, ŵakati, 23“Gadi, tangusanga kuti ndakujarika makora ghene, ndipo ŵalinda ŵa gadi tanguŵasanga ŵakwimilira waka pa muryango. Kweni para tangujula vijaro kuti tangusangamo munthu chara.” 24Pakupulika mazgu agha, murongozgi wa Nyumba ya Chiuta, na ŵasofi ŵarara ŵakazizikika na icho chikachitika ku ŵakutumika ŵara. 25Penepapo munthu yumoza wakiza uyo wakaŵaphalira kuti, “Ŵanthu awo mukaŵika mu gadi ŵali mu Nyumba ya Chiuta ŵakusambizga ŵanthu.” 26Ntheura murongozgi wa mu Nyumba ya Chiuta pamoza na ŵanthu ŵakhe ŵakaruta kuya kaŵatora, kwambula kulimbana nawo, na kwiza nawo ŵakutumika ŵara, chifukwa ŵakopanga kuti ŵanthu ŵangaŵadina na mawe.
27Ŵakati ŵafika nawo, ŵakaŵimika panthazi pa mphara yikuruyira. Musofi Mukuru wakaŵaphalira wakati, 28“Tikamuchinyinthizgani chomene kuti mureke kusambizgaso mu zina ili, kweni sono mwazuzga Yerusalemu na kusambizga kwinu, ndipo mukukhumba kuti mrandu wa ndopa za munthu uyu uŵe pa ise.”#Mat 27.25
29Kweni Petrosi na ŵakutumika ŵanyakhe ŵakazgora ŵakati, “Tikwenera kupulikira Chiuta kuruska ŵanthu! 30Chiuta wa ŵa sekuru ŵithu wakamuwuska Yesu mweneuyo imwe mukamukoma pakumupayika pa mphinjika. 31Chiuta wali kumukwezga ku woko lakhe la maryero kuti waŵe Murongozgi na Muponoski, mwakuti wapereke mwaŵi ku ŵaIsraele kuti ŵang'anamuke mu mtima na kutiso zakwananga zawo zigowokereke. 32Ise tili ŵakaboni ŵa vyeneivi pamoza na Mzimu Mutuŵa mweneuyo Chiuta wali kuŵapa awo ŵakumupulikira.”
33Para ŵakati ŵapulika ichi, ŵakakaripa, ndipo ŵakakhumba kukoma ŵakutumika. 34Kweni muFarisi yumoza wa mu mphara ya ŵaYuda zina lakhe Gamaliyele, mumanyi-marango, mweneuyo wakaŵa wakurumbika na ŵanthu wose, wakimilira. Wakalangula kuti ŵakutumika ŵafumiskikire kuwaro pa kanyengo kachoko waka. 35Ntheura wakaŵaphalira ŵa mphara wakati, “Mwa madoda gha Israele, chenjerani na icho mukukhumba kuŵachitira ŵanthu aŵa. 36Pakuti kale, kukawuka Teyudasi uyo wakajiyowoya kuti ndi munthu wakuzirwa, ndipo ŵanarume pafupi 40, ŵakamurondezga. Kweni wakakomeka, ndipo wose awo ŵakamurondezga ŵakaparanyika na kumara waka. 37Pamanyuma pakhe, Yudasi wa ku Galileya, wakawuka pa nyengo yira yakupenda ŵanthu, ndipo nayo, mzinda wa ŵanthu ukamurondezga. Kweni nayo wakakomeka, ndipo wose awo ŵakamurondezganga ŵakaparanyika waka. 38Sono pa mrandu uwu nkhumuphalirani kuti ŵanthu aŵa mungachitanga nawo kanthu chara, muŵareke waka. Usange icho ŵakughanaghana na kuchita chikufumira ku ŵanthu, chiti chimarenge chekha. 39Kweni usange nchakufumira kwa Chiuta, kuti muti muŵatondenge chara, musangike kuti mukulimbana na Chiuta.”
Mphara yose yikazomerezga fundo ya Gamaliyele 40Ndipo wakaŵachema ŵakutumika na kuŵanjizga mu mphara, ŵakaŵathyapula na kuŵaphalira kuti ŵareke kupharazgaso mu zina la Yesu. Ndipo ŵakaŵareka kuti ŵarutenge. 41Ŵakutumika ŵara ŵakafuma mu mphara na chimwemwe chikuru, pakuwona kuti Chiuta wakaŵapima kuŵa ŵakwenerera kulengeskeka chifukwa cha zina la Yesu. 42Ndipo zuŵa na zuŵa mu Nyumba ya Chiuta, na mu nyumba za ŵanthu, ŵakutumika ŵakarutilira kusambizga na kupharazga Uthenga Uweme kuti Yesu ndi Mesiya.
Currently Selected:
Milimo ya Ŵakutumika 5: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
