Kufuma 24

Kukhozgeka kwa Phangano

1 Fumu yikati kwa Mozesi, “Kwerera kuno kwa ine ku phiri, iwe na Aroni, Nadabu, Abihu na ŵarara ŵa ŵaIsraele 70, ndipo mundilambire ine apo muli chapatali. 2Kweni Mozesi pera, ndiyo wasenderere kufupi na Fumu. Ŵanyakhe ŵareke kusenderera kufupi, nanga ndi ŵanthu nawo ŵareke kukwera nayo pamoza.”

3Ntheura Mozesi wakaruta kuya kaŵaphalira ŵanthu mazgu ghose na maweruzgo ghose gha Fumu. Ndipo ŵanthu wose ŵakazgora na lizgu limoza, ŵakati, “Vyose ivyo Fumu yalangula, titi tichitenge.” 4Ntheura Mozesi wakalemba marango ghose agho Fumu yikayowoya. Wakawuka machero ghakhe na mulenje chomene na kuzenga jochero musi mu phiri na mizati ya mawe 12 kwakuyana na mafuko 12 gha ŵaIsraele. 5Ntheura wakatuma ŵanyamata kufuma mu ŵaIsraele kuya kapereka sembe zakocha na sembe za wenenawene za nkhambako kwa Fumu. 6Ndipo Mozesi wakatora hafu wa ndopa na kuziŵika mu bakule ndipo zinyakhe hafu wakamijira ku jochero. 7Penepapo wakatora buku la phangano na kuŵazga panthazi pa ŵanthu. Ŵanthu ŵakazgora kuti, “Titi tichite vyose ivyo Fumu yalangula. Ndipo titi timupulikire iyo.”

8Ntheura Mozesi wakatora ndopa zira na kumijira ŵanthu ndipo wakati, “Izi ndi ndopa za phangano ilo Fumu yikapangana namwe kwakuyana na mazgu ghose agha.”#Mat 26.28; Mrk 14.24; Luk 22.20; 1 Kor 11.25; Heb 9.19-20, 10.29

9Penepapo Mozesi, Aroni, Nadabu, Abihu, na ŵararaŵarara 70 ŵara ŵakakwera phiri, 10ndipo wakamuwona Chiuta wa Israele. Kusi ku malundi ghakhe kukaŵa nga ndi para kuli mawe ghakwalikika gha safire gha bululu nga ndi mtambo. 11Kweni Chiuta kuti wakawuska woko lakhe kuŵatimba ŵarongozgi ŵa ŵaIsraele chara. Iwo ŵakamuwona Chiuta ndipo ŵakarya na kumwa.

Mozesi pa Phiri la Sinayi

12 Fumu yikati kwa Mozesi, “Kwerera kuno kwa ine ku phiri ndipo mundilindizgenge kwenekuno. Ndipo ndizamkukupa mawe ghapapati agho ghali na marango na malangulo gheneagho ndalemba kuti ndiŵasambizge.” 13Ntheura Mozesi na muteŵeti wakhe Yoshuwa wakawuka, ndipo Mozesi wakakwera ku phiri la Chiuta. 14Mozesi wakati ku ŵararaŵarara ŵa ŵaIsraele, “Kharani pano mutilindililenge tisuke tikawere. Aroni na Huru muli nawo papano. Yose uyo wali na mrandu, warutenge kwa iwo.”

15Para Mozesi wakakwera Phiri la Sinayi, bingu likabenekerera phiri lira. 16Uchindami wa Fumu, ukakhazikika pa Phiri la Sinayi. Pa mazuŵa ghankhonde na limoza, bingu likabenekerera phiri lira ndipo zuŵa la chinkhonde na chiŵiri, Fumu yikachema Mozesi kufuma mukati mwa bingu. 17Sono uchindami wa Fumu ukawoneka ku ŵaIsraele nga ndi moto wakulilima pachanya pa phiri. 18Mozesi wakanjira mu bingu lira ndipo wakaya kafika pachanya pa phiri. Ndipo wakakhara pa phiri mazuŵa 40 muhanya na usiku.#Mar 9.9

Currently Selected:

Kufuma 24: Tumbuka

Highlight

Copy