Kufuma 30

Kapangikiro ka jochero la vyakununkhira

(Kuf 37.25-28)

1“Upange jochero la kocherapo vyakununkhira, ndipo liŵe la mathabwa gha khuni la akesha. 2Liŵe lakuyana waka mu utali na mu usani wakhe. Mu utali liŵe masentimita 45, ndipo mu usani namo ntheura pera masentimita 45. Mukukwera liŵe masentimita 90. Masengwe ghakhe ghabatikane na jochero lira. 3Uliphake jochero lose na golide mwenecho, pachanya pakhe na mu mphepete mwakhe zingirizge na mu masengwe ghakhe. Uliroŵe na kamuzere ka golide zingirizge. 4Upange mphete ziŵiri za golide na kuzibatika ku jochero musi mu kamuzere kakuroŵeka na golide ku malwegha ghakuthyana waka kuti zikorenge michiko yakuyeghera. 5Upange michiko ya khuni la akesha na kuyiphaka golide. 6Jochero ili uliŵike panthazi pa chisalu chakuchinga icho chili panthazi pa Bokosi la Phangano kuthyana na chibenekerero chakuphepiskirapo icho chili pachanya pa Bokosi la Phangano apo ndamkukumana nawe. 7Aroni wakwenera kocha vyakununkhira vya sungu liweme pa jochero lenelira mulenje uliwose para wakukozga nyali. 8Para Aroni wakukozga nyali ku na mise napo wakwenera kocha vyakununkhira mwakuti vyakununkhira vyochekenge nyengo na nyengo panthazi pa Fumu mu miwiro yinu yose. 9Pa jochero ili, ureke kuya kaperekerapo vyakununkhira vyambula kupatulika, nanga ndi sembe yakocha, sembe ya ufu. Ndipo kuti mwamkupungulirapo sembe ya vyakumwa chara. 10Aroni watozgenge jochero pakumija ndopa za sembe yakuphepiskira kwananga pa masengwe gha jochero ili kamoza pa chirimika. Kamoza pa chirimika, wakwenera kuphepiska kwananga pa jochero ili pa miwiro yose. Jochero ili ndakupatulika nkhanira kwa Fumu.”

Ndarama ya kuwombolera umoyo

11 Fumu yikati kwa Mozesi, 12“Para wamkupenda ŵaIsraele, munthu waliyose wakapereke chakuwombolera umoyo wakhe kwa Fumu, mwakuti chilengo chilichose chireke kuŵamo pa nyengo iyo ŵakupendekera. 13Munthu yose uyo wapendeka, wapereke ndarama za siliva zakukwana magiramu ghankhonde na limoza izo ndi ndarama zakupimikira ku Chihema Chakupatulika. Yeneiyi ndiyo yiŵenge yakuperekeka kwa Fumu.#Kuf 38.25-26; Mat 17.24 14Yose uyo wapendekenge waŵenge wa virimika 20 na kujumphirapo ndipo ndiyo waperekenge ndarama iyi kwa Fumu. 15Para mukupereka vyawanangwa kwa Fumu kuŵa vyakujiphepiskira mwekha, musambazi wareke kupereka vinandi kuruska hafu wa ndarama ya siliva ndipo mukavu wareke kupereka yichoko kuruska ndarama iyi. 16Ndarama yakuwombolera iyi ukayipoke ku ŵaIsraele ndipo ukayipatuliskire mlimo wa mu Chihema Chakukumaniranamo. Iyi ndiyo yiti yiŵenge chikumbusko cha ŵaIsraele panthazi pa Fumu kuti ŵachitenge mphepiska ya umoyo wawo.”

Kapangikiro ka beseni lakugezeramo la mkuŵa

17Ntheura Fumu yikati kwa Mozesi, 18“Upange beseni lakugezeramo la mkuŵa, ndipo chikongera chakhe nacho chiŵe cha mkuŵa. Uchiŵike pakati pa Chihema Chakukumaniranamo na jochero na kuthiramo maji.#Kuf 38.8 19Ndipo Aroni na ŵana ŵakhe ŵagezerengemo mawoko na malundi ghawo kufuma mu cheneichi. 20Para ŵakunjira mu Chihema Chakukumaniranamo, panji para ŵakwiza kuti ŵateŵetere pa jochero na sembe yakocha kwa Fumu, ŵagezenge maji kuti ŵareke kufwa. 21Ŵagezenge mawoko na malundi ghawo kuti ŵareke kufwa. Ili liŵenge dango la muyirayira kwa Aroni na ku ŵa mphapu yakhe mu miwiro yawo yose.”

Kapangikiro ka mafuta ghakuphakazgira

22Ntheura Fumu yikati kwa Mozesi,#Kuf 37.29 23“Utore vyakununkhira viweme chomene ivi: Makilogiramu ghankhonde na limoza gha mure wa majimaji, makilogiramu ghatatu gha vyakununkhira makora vya kinamoni, makilogiramu gha vyakununkhira makora vya zinde, 24makilogiramu ghankhonde na limoza gha kasiya (kwakuyana na ndarama za kapimikiro ka mu Chihema Chakupatulika). Ndipo usazgeko mafuta ghakukwana malita ghatatu gha olive, 25ndipo na vyeneivi wengeko mafuta ghakuphakazgira. Uzakaghasazge makora nga ndi gha mwengi wa vyakununkhira. Gheneagha ghati ghaŵenge mafuta ghakupatulika ghakuphakazgira. 26Na mafuta gheneagho uphakazge Chihema Chakukumaniranamo na Bokosi la Phangano, 27thebulu na viteŵetero vyakhe vyose, chakuŵikapo nyali na viteŵetero vyakhe, na jochero la sembe ya vyakununkhira, 28jochero la sembe yakocha na viteŵetero vyakhe vyose, beseni lakugezeramo, pamoza na chikongera chakhe. 29Vyose uvipatule kuti viŵe vyakupatulika nkhanira, ndipo chose icho chamkukhwaska vyeneivi chamkuŵa chakupatulika. 30Ukamuphakazge Aroni na ŵana ŵakhe ndipo ukaŵapatule kuti wanditeŵetere ine pa mlimo wa usofi. 31Ndipo uŵaphalire ŵaIsraele kuti, ‘Agha ndigho ghati ghaŵenge mafuta ghane ghakupatulika, gheneagho ghaŵenge ghakuphakazgira mu miwiro yinu yose. 32Mafuta agha ghareke kupungulirika pa ŵanthu bweka, nesi kwengekaso ghanyakhe ghakuŵa nga ndi agha. Mafuta agha ngakupatulika ndipo ghati ghaŵenge ghakupatulika na kwa imwe uwo. 33Yose uyo wakwenga mafuta ghakuŵa nga ndi agha, panji uyo wakupungulira pa munthu bweka kwambula kuti mpha musofi, wati wawuskikengeko mukati mu ŵabali ŵakhe.’ ”

Vyakununkhira

34Ntheura Fumu yikati kwa Mozesi, “Tora vyakununkhira vya sungu liweme ivi: sitakite, onika, galibanumu na lubani ndipo vyose viŵe mweso wakuyanayana waka. 35Ndipo usazge pamoza kuti upange sungu liweme la vyakununkhira nga ndi gha mwengi wa vyakununkhira. Viŵe vyakurungika na muchere, viŵenge viweme chomene na vyakupatulika. 36Usire vinyakhe vya ivyo kuti viŵe ufu, ndipo ukaviŵike panthazi pa Bokosi la Phangano mukati mu Chihema Chakukumaniranamo mwenemumo ndamkukumana nawe. Vyakununkhira ivi viŵenge vyakupatulika nkhanira kwa imwe. 37Ndipo vyakununkhira ivyo upange kwakuyana na umo mwasazgira. Mureke kuya kajichitira kuŵa vya mlimo winu, chifukwa ndi vyakupatulikira Fumu. 38Yose uyo wati wapange mafuta ghakuŵa nga ndi agha, mu kanunkhiro kakhe, wamkuwuskikako mukati mu ŵabali ŵakhe.”

Currently Selected:

Kufuma 30: Tumbuka

Highlight

Copy