Kufuma 9

Chilengo chakufwa kwa viŵeto

1Ntheura Fumu yikati kwa Mozesi, “Ruta kwa Faro ndipo ukati kwa iyo: Fumu, Chiuta wa ŵaHebere wakuti, ‘Zomerezga ŵanthu ŵane kuti ŵarute mwakuti ŵakandilambire.’ ” 2Pakuti usange ukukana kuŵazomerezga kuti ŵarute ndipo uchali kuŵakorerera, 3wona, nkhongono ya Fumu yiti yize na chilengo chakofya pa viŵeto vyako ivyo vili ku uliska, pa ŵakavalo, pa mbunda, pa ngamila, pa ng'ombe ndiposo na pa mberere na mbuzi. 4Kweni Fumu yiti yipatule vyakuŵeta vya ŵaIsraele ku vya ŵa Eguputo mwakuti vyakuŵeta vya ŵaIsraele kuti viti vifwenge chara. 5Ndipo Fumu yikimika nyengo yikati, “Na machero nditi ndichite chinthu ichi mu charu.”

6Ntheura zuŵa la machero ghakhe Fumu yikachita chinthu ichi, vyakuŵeta vya ŵaEguputo vyose vikafwa kweni vya ŵaIsraele pakaŵavye nanga nchimoza icho chikafwa. 7Faro wakatuma ŵanthu kuya kafumbiska ndipo wakasanga kuti palije chakuŵeta icho chikafwapo. Ndipouli mtima wakhe ukanonofyeka ndipo kuti wakaŵazomerezga ŵanthu kuti ŵarute chara.

Chilengo cha mapumba

8Ntheura Fumu yikati kwa Mozesi na Aroni, “Torani vyoto vyakuzura mawoko kufuma mu ng'anjo ya moto ndipo Mozesi wavichupulire muchanya panthazi pa Faro. 9Vyoto ivyo viti vizgoke kuŵa fuvu lakunyiririka na kutandazgika mu charu chose cha Eguputo ndipo viti vizgoke kuŵa mapumba agho ghati ghaphumuke kuŵa vilonda mu ŵanthu na mu vinyama, mu charu chose cha Eguputo.” 10Ntheura ŵakatora vyoto kufuma mu ng'anjo ya moto na kuya kimilira panthazi pa Faro. Mozesi wakavichupulira muchanya ndipo pa ŵanthu na pa vyakuŵeta pakabuka mapumba gheneagho ghakaphumuka kuŵa vilonda.#Uvu 16.2 11Ŵamayere ŵakatondeka kwima panthazi pa Mozesi pakuti mapumba ghakabuka pa iwo na pa ŵaEguputo wose. 12Kweni Fumu yikanonofya mtima wa Faro, ndipo wakaŵapulikira chara nga ndi umo Fumu yikayowoyera kwa Mozesi na Aroni.

Chilengo cha matalala

13Penepapo Fumu yikati kwa Mozesi, “Uwuke na mulenjelenje ndipo ukimilira panthazi pa Faro na kuti kwa iyo: Fumu, Chiuta wa ŵaHebere wakuti, ‘Zomerezga ŵanthu ŵane kuti ŵarute mwakuti ŵakandilambire. 14Pakuti pa nyengo iyi nditi nditume vilengo vyane vyose na pa iwe wuwo, pa ŵateŵeti ŵako, na pa ŵanthu ŵako, mwakuti umanye kuti palije munyakhe wakuyana na ine mu charu chose. 15Pakuti kufika kwa sono mphanyi ndanyoroskera kale woko lane na kutimba na nthenda iwe na ŵanthu ŵako, ndipo iwe mphanyi wawuskikako kale mu charu. 16Kweni pa chifukwa ichi, ndamurekani ŵamoyo kuti ndirongore nkhongono yane mwakuti zina lane lithuwuskike mu charu chose.#Rom 9.17 17Ndipouli uchali kujitukumura pa ŵanthu ŵane na kukana kuzomera kuti ŵarute. 18Ntheura na machero na nyengo yeneiyi ndamkurokweska matalala ghakuru gheneagho kuti ghakaŵako na kale chara mu charu chose cha Eguputo kufuma pa zuŵa ilo chikambira mpaka sono. 19Ntheura sono tuma ŵanthu kuya kawezga vyakuŵeta vyako na vyose ivyo uli navyo kufuma ku thondo, kwiza navyo mu vitupa. Pakuti matalala ghati gharokwe kufuma kuchanya kuwira pa munthu yose, pa vyakuŵeta ivyo vindajalirike vyeneivyo vichali ku thondo ndipo viti vifwenge.’ ”

20Ŵateŵeti ŵanji ŵa Faro awo ŵakopanga mazgu gha Fumu ŵakanjizga ŵazga ŵawo mu zinyumba na vyakuŵeta vyawo mu vitupa. 21Kweni ŵateŵeti awo kuti ŵakapwererako chara mazgu gha Fumu, ŵakareka ŵazga ŵawo na vyakuŵeta vyawo ku thondo.

22Ntheura Fumu yikati kwa Mozesi, “Nyoroskera woko lako kuchanya mwakuti matalala gharokwe mu charu chose cha Eguputo, pa ŵanthu, pa vyakuŵeta, na pa vyakumera vyose mu charu chose cha Eguputo.” 23Penepapo Mozesi wakanyoroskera ndodo yakhe kuchanya ndipo Fumu yikatuma kududumira na matalala ndiposo leza wakamwetukira pasi. Mwa ntheura ndimo Fumu yikaropokweska matalala pa charu chose cha Eguputo. 24Pakaŵa matalala ndipo ŵaleza ŵakamwetukanga mukati mwakhe. Ghakaŵa matalala ghakofya gheneagho kuti ghakaŵako na kale chara mu charu chose cha Eguputo kufuma apo likambira fuko lawo.#Uvu 8.7, 16.21 25Mu charu chose cha Eguputo matalala ghakatimba chose icho chikaŵa ku thondo ŵanthu na vyakuŵeta wuwo. Ghakatimbaso vyakumera vyose vya mu munda na kupurura makuni ghose gha mu thondo. 26Kweni mu chigaŵa cha Gosheni umo mukakharanga ŵaIsraele, ndimo pera mukaŵavye matalala.

27Penepapo Faro wakatuma ŵanthu, kuya kachema Mozesi na Aroni ndipo wakati kwa iwo, “Sono ndananga, Fumu ndiyo njirunji. Ine na ŵanthu ŵane ndise ŵaheni. 28Tiŵeyererani kwa Fumu pakuti vidudumira na matalala agha vyatikwana. Nditi ndimuzomerezgani kuti murute ndipo muti mukhareso chara.”

29Mozesi wakati kwa iyo, “Para ndafumamo mu msumba ndamkukwezga mawoko ghane na kuŵeya kwa Fumu. Vidudumira viti vireke ndipo matalala ghati ghaŵengekoso chara, mwakuti umanye kuti charu ncha Fumu. 30Kweni nkhumanya kuti imwe na ŵateŵeti ŵinu kuti mukopa Fumu Chiuta chara.”

31Thonje na nyauti vikanangika pakuti nyauti wakamba kuŵa na visasuni ndipo thonje likamba kufuma maluŵa. 32Kweni tirigu na chitowe kuti vikanangika chara, chifukwa vikuchedwa kufuma.

33Ntheura Mozesi wakamureka Faro na kufumamo mu msumba, ndipo wakakwezga mawoko ghakhe na kuŵeya kwa Fumu. Vidudumira na matalala vikareka ndipo vura yikarikwaso chara pa charu. 34Para Faro wakawona kuti vura, matalala, na vidudumira vikareka, wakanangaso. Iyo na ŵateŵeti ŵakhe ŵakanonofya mitima yawo. 35Ntheura mtima wa Faro ukati wanonofyeka, kuti wakazomerezga kuti ŵaIsraele ŵarute chara nga ndi umo Fumu yikayowoyera mwa Mozesi.

Currently Selected:

Kufuma 9: Tumbuka

Highlight

Copy