Mutendeko 35

Chiuta wakumutumbika Yakhobe pa Betele

1Chiuta wakati kwa Yakhobe, “Wuka, kwerera ku Betele ndipo ukakhare kwenekura. Ukandizengere jochero ndamwene ine nkhakuwonekera para ukachimbiranga kwa mukuru wako Esau.”#Mut 28.11-17

2Ntheura Yakhobe wakaŵaphalira ŵa mu nyumba yakhe na wose awo ŵakaŵa nayo, wakati, “Wuskanimo ŵachiuta ŵachilendo ŵeneawo muli nawo, ndipo mujitozge na kusintha vyakuvwara vyinu. 3Tiyeni tiwuke na kukwerera ku Betele, mwakuti nkhamuzengere jochero Chiuta mweneuyo wakandovwira para nkhaŵa mu visuzgo, ndipo wanguŵa nane kose uko ndendanga.” 4Ntheura ŵakapereka kwa Yakhobe ŵachiuta wose ŵachilendo awo ŵakaŵa nawo, na ndewerewe zose izo zikaŵa mu makutu ghawo. Yakhobe wakaviwundira musi mu khuni la musoro ilo likaŵa pafupi na Shekemu.

5Apo Yakhobe na ŵana ŵakhe ŵakawukanga ulendo wawo, ŵanthu ŵa mu misumba yakuŵazingirizga ŵakopa, ntheura kuti ŵakaŵarondora chara. 6Yakhobe na ŵanthu ŵakhe ŵakafika ku Luzi, (ndiko kuti Betele), mu charu cha Kanani. 7Wakazengapo jochero penepara, ndipo malo ghara wakaghathya Eli Betele, chifukwa penepara ndipo Chiuta wakajivumbula kwa iyo apo wakachimbiranga mukuru wakhe. 8Debora mulezi wa Rebeka, wakafwa, ndipo wakasungika musi mu khuni la musoro kusika kwa Betele. Ntheura malo ghara ghakathyika Aloni Bakuti.#35.8 Aloni Bakuti: Mazgu agha ghakung'anamula kuti, “musoro wakutengera”.

9Yakhobe wakati wawerako ku Padani Aramu Chiuta wakamuwonekeraso ndipo wakamutumbika. 10Chiuta wakamuphalira wakati, “Zina lako ndiwe Yakhobe. Kweni uti uchemekerengeso Yakhobe chara, kweni Israele ndilo liŵenge zina lako.” Ntheura iyo wakathyika Israele.#Mut 32.28 11Chiuta wakamuphalira wakati, “Ine ndine Chiuta Mwenenkhongono zose. Ubabe ŵana ndiposo wandane. Fuko la ŵanthu ndiposo na mpingo wa mafuko gha ŵanthu, viti vifume mwa iwe. Ŵakaronga nawo ŵati ŵafumirenge mwa iwe.#Mut 17.4-8 12Charu icho nkhapereka kwa Abrahamu na Yisake, nditi ndiperekenge kwa iwe, na ku mphapu yako pamanyuma zako.” 13Sono Chiuta wakamureka Yakhobe pa malo gheneghara wakayowoyangapo nayo na kuruta. 14Ndipo Yakhobe wakimika chikumbusko cha libwe, pa malo gheneghara Chiuta wakayowoyerangapo nayo. Wakathirapo sembe ya vyakumwa na kupungulirapo mafuta.#Mut 28.18-19 15Ntheura Yakhobe wakaghathya malo ghara Chiuta wakayowoyerangapo nayo Betele.

Nyifwa ya Rakelo

16Wose wakawuka ulendo kufuma ku Betele. Para kukakhara kamtunda kachoko waka kufika ku Efurata, Rakelo nthumbo yikawuka, ndipo wakasuzgika chomene. 17Para wakaŵa mu unonono wa kubaba, muzamba wakamuphalira wakati, “Reka kopa, pakuti sono uŵenge na mwana mwanarume munyakhe.” 18Ndipo apo Rakelo wakamarizgikanga (pakuti wakafwanga), wakamuthya mwana yura zina lakuti Beni Oni.#35.18 Beni Oni: Zina ili likung'anamula kuti, “mwana wa visuzgo vyane”. Kweni wiske wakamuthya zina la Benjamini.#35.18 Benjamini: Zina ili likung'anamula kuti, “mwana wa ku woko lane la maryero” panji “mwana wa mwaŵi”.

19Rakelo wakati wafwa, wakasungika pa nthowa yakuya ku Efurata (ndiko kuti Betelehemu). 20Yakhobe wakimikapo libwe la chikumbusko pa dindi lakhe. Chikumbusko ichi cha dindi la Rakelo chili penepara na kuno lero. 21Yakhobe wakarutilira ulendo wakhe, ndipo wakajintha hema lakhe kunthazi kujumpha chigongwe cha Edere.

Ŵana ŵa Yakhobe

(1 Mid 2.1-2)

22Apo Yakhobe wakakharanga mu charu chira, Rubeni wakagonana na Biliha, muwoli muchoko wa wiske. Yakhobe wakapulika ichi.

Ŵana ŵa Yakhobe ŵakaŵa 12.#Mut 49.4 23Ŵana ŵa Leya ŵakaŵa aŵa: Rubeni, (mwana wa uŵere wa Yakhobe), Simiyoni, Levi, Yuda, Isakara na Zebuloni. 24Ŵana ŵa Rakelo ŵakaŵa aŵa: Yosefe na Benjamini. 25Ŵana ŵa Biliha, muteŵeti-kazi wa Rakelo, ŵakaŵa aŵa: Dani na Nafutali. 26Ŵana ŵa Zilipa, muteŵeti-kazi wa Leya, ŵakaŵa aŵa: Gadi na Ashere. Ŵeneaŵa ndiwo ŵakaŵa ŵana ŵa Yakhobe awo ŵakababikira mu Padani Aramu.

Nyifwa ya Yisake

27 Yakhobe wakiza kwa wiske Yisake ku Mamure, uko kukachemekangaso kuti Kiriyati Ariba (ndiko kuti Heburoni), kweneuko Abrahamu na Yisake ŵakapanjwanga kale.#Mut 13.18 28Yisake wakakhara virimika 180. 29Iyo wakafwa ndipo wakalonda ŵasekuru ŵakhe. Yisake wakafwa ndipo ndi muchekuru chomene. Ŵana ŵakhe aŵa Esau na Yakhobe ndiwo ŵakamusunga mu dindi.

Currently Selected:

Mutendeko 35: Tumbuka

Highlight

Copy