Tơlơi Tơbiă 12
12
Pơjing Phĕt Tơlơi Găn
1 #
Lêwi 23:5; Yap 9:1-5; 28:16; Mơñă 16:1-2. Amăng čar Êjip, Yêhôwa pơhiăp hăng Môis laih anŭn Arôn tui anai, 2“Blan anai či jing blan tal blŭng kơ ƀing gih, jing blan tal sa amăng thŭn. 3Laĭ bĕ kơ abih bang ană plei pla Israel thâo amăng hrơi tal pluh blan anai, brơi rĭm čô đah rơkơi akŏ sang kơ rĭm sang anŏ khŏm mă sa drơi ană triu, rĭm boh sang anŏ sa drơi. 4Tơdah sang pă ƀiă đơi mơnuih, ƀu ƀơ̆ng abih ôh sa drơi, laih anŭn tui hăng mrô mơnuih brơi ngă hrŏm hơbĭt hăng mơnuih jum dar jĕ giăm hloh, laih anŭn ƀing gih či tĭng triu tui hăng rĭm čô dưi ƀơ̆ng. 5Mă bĕ mơ̆ng tơpul triu ƀôdah mơ̆ng tơpul bơbe ƀing gih, sa drơi triu tơno ƀôdah bơbe tơno sa thŭn đôč, ƀu hmâo rơka rơkeñ ôh. 6Djă pioh ñu tơl hrơi tal pluh pă blan anai, anŭn jing hrơi abih bang ană plei pla Israel bơjơnum či pơdjai ană triu gơñu amăng klam mơmŏt. 7Gơñu či mă drah pik ƀơi dua bơnah kơsong dơ̆ng laih anŭn kơsong găn kơ bah amăng phŭn sang pă ƀơ̆ng ană triu anŭn. 8Mlam anŭn gơñu či ƀơ̆ng añăm mơnơ̆ng ŏm ƀơi apui hăng ƀañ ƀu hmâo tơpơi laih anŭn hăng añăm rơ̆k phĭ. 9Ƀing gih anăm ƀơ̆ng añăm mơnơ̆ng dŏ mơtah ƀôdah añăm hơtuk samơ̆ khŏm ŏm ƀơi apui wơ̆t akŏ, čôp laih anŭn mơnơ̆ng amăng lăm hlŭng ñu. 10Anăm ƀing gih pioh glaĭ sa mơta mơnơ̆ng hơgĕt truh kơ mơguah ôh, tơdah sa mơta mơnơ̆ng hơgĕt ăt dŏ glaĭ brơi ƀing gih čuh lui hĭ ñu amăng apui. 11Brơi ƀing gih ƀơ̆ng ñu kar hăng anai: Hruă hơdrăng kơiăng, tơkai čŭt čơkhŏ, tơngan djă gai jra, ƀơ̆ng jač mač. Anŭn jing phĕt Tơlơi Găn Yêhôwa.
12Mlam anŭn Kâo či găn djŏp čar Êjip pơdjai abih bang ƀing ană kơčoa čar Êjip, wơ̆t mơnuih hăng hlô mơnơ̆ng. Kâo či phat kơđi abih bang ƀing yang Êjip yua kơ Kâo jing Yêhôwa. 13Drah pik ƀơi sang ƀing gih hlăk dŏ či jing gru kơnăl brơi kơ ƀing gih. Tơ Kâo găn pơdjai ƀing Êjip, ƀuh drah anŭn laih anŭn kâo či gao lui hĭ, laih anŭn ƀu či hmâo tơlơi răm ruă hơgĕt ôh pơluč ƀing gih.
14 #
Tơb 23:15; 34:18; Lêwi 23:6-8; Yap 28:17-25; Mơñă 16:3-8. Hrơi anŭn či jing sa phĕt pơhơdơr kơ ƀing gih. Amăng abih bang rơnŭk ƀing gih brơi djă pioh ñu kar hăng sa hrơi phĕt kơ Yêhôwa, jing sa tơlơi juăt khŏm djă pioh hlŏng lar. 15Amăng tơjuh hrơi ƀing gih khŏm ƀơ̆ng ƀañ ƀu hmâo tơpơi. Amăng hrơi tal sa ƀing gih khŏm mă lui hĭ tơpơi mơ̆ng sang ƀing gih, yua kơ hlơi pô ƀơ̆ng ƀañ hmâo tơpơi mơ̆ng hrơi tal blŭng truh pơ hrơi tal tơjuh, arăng či pơdjai hĭ pô anŭn mơ̆ng ƀing ană Israel. 16Hrơi tal blŭng, ƀing gih či hmâo tơlơi bơjơnum rơgoh hiam, truh hrơi tal tơjuh ƀing gih ăt či hmâo tơlơi bơjơnum rơgoh hiam mơ̆n. Amăng khul hrơi anŭn ƀing gih ƀu dưi ngă bruă hơgĕt get ôh, kơnơ̆ng prăp rơmet mơnơ̆ng ƀơ̆ng brơi kơ rĭm čô đôč. 17Tui anŭn, ƀing gih djă pioh bĕ phĕt Ƀañ Tơpŭng Ƀu Hmâo Tơpơi yua kơ amăng hrơi anŭn yơh Kâo hmâo ba tơhan ƀing gih tơbiă laih mơ̆ng čar Êjip. Yua kơ anŭn, găn abih rơnŭk ƀing gih khŏm djă pioh hrơi anai kar hăng sa tơlơi juăt hlŏng lar. 18Mơ̆ng klam hrơi tal pluh pă blan sa ƀing gih či ƀơ̆ng ƀañ ƀu hmâo tơpơi truh pơ klam hrơi tal dua pluh sa blan anŭn. 19Amăng tơjuh hrơi, anăm pioh tơpơi amăng sang ôh. Yua kơ wơ̆t dah mơnuih tuai ƀôdah mơnuih amăng čar, tơdah hlơi pô ƀơ̆ng ƀañ hmâo tơpơi arăng či pơdjai hĭ ñu mơ̆ng tơpul ƀing ană Israel. 20Anăm ƀơ̆ng mơnơ̆ng hơgĕt hmâo tơpơi ôh. Wơ̆t dah pơpă anih ƀing gih dŏ, ƀing gih ăt khŏm ƀơ̆ng ƀañ ƀu hmâo tơpơi ôh.”
21Tui anŭn, Môis iâu abih bang ƀing kong tha Israel rai laih anŭn laĭ: “Nao mă bĕ sa drơi triu tui hluai sang anŏ ƀing gih pô laih anŭn pơdjai ñu ngă phĕt Tơlơi Găn. 22Laih anŭn mă sa čơnăp Hisôp trăm ñu amăng drah arăng pioh ƀơi čơlŭ prŏng laih anŭn pik drah anŭn ƀơi kơsong găn, ƀơi dua gah kơsong dơ̆ng bah amăng phŭn. Mơ̆ng anŭn truh kơ mơguah, anăm hmâo hlơi amăng ƀing gih tơbiă đuaĭ mơ̆ng sang ƀing gih ôh. 23#Hêb 11:28.Yêhôwa či găn nao kiăng pơdjai ƀing Êjip tơdah ƀuh drah ƀơi bah amăng, Ñu či gao lui hĭ laih anŭn ƀu brơi ling jang adai mŭt pơrai laih anŭn pơdjai sang ƀing gih ôh. 24Djă pioh bĕ phĕt anai kar hăng sa tơlơi juăt hlŏng lar kơ ƀing gih laih anŭn ană tơčo ƀing gih. 25Tơ ƀing gih mŭt laih amăng čar Yêhôwa či pha brơi, kar hăng Ñu hmâo ƀuăn laih, brơi ƀing gih djă pioh bĕ phĕt anai. 26Tơ ană tơčo ƀing gih tơña: ‘Phĕt anai hơgĕt tơlơi kiăng laĭ?’ 27Brơi ƀing gih laĭ glaĭ: ‘Anŭn jing phĕt pơyơr hlô mơnơ̆ng ngă yang Tơlơi Găn kơ Yêhôwa, yua kơ tơdang Ñu pơrai ƀing Êjip Ñu hmâo gao lui hĭ ƀing sang ană plei pla Israel laih anŭn Ñu pap brơi sang ƀing ta.’”
28Giơ̆ng kơ hmư̆, ană plei pla Israel kŭp akŏ kơkuh pơpŭ, giơ̆ng anŭn gơñu nao laih anŭn ngă djơ̆ kar hăng boh pơhiăp Yêhôwa hmâo pơtă pơtăn kơ Môis hăng Arôn.
Tơlơi Răm Ruă Tal Pluh: Tơlơi Pơdjai Ană Kơčoa
29 #
Tơb 4:22-23. Amăng tơ̆ng krah mlam, Yêhôwa pơdjai abih bang ƀing ană kơčoa amăng čar Êjip čơdơ̆ng mơ̆ng ană pơtao Pharaôn hlăk dŏ ƀơi gre pơtao ñu truh kơ ană kơčoa ƀing mơnă hlăk dŏ amăng sang mơnă, laih anŭn kơ abih bang ană blŭng hlâo hlô mơnơ̆ng. 30Tơdang mlam, Pharaôn hăng ƀing ding kơna ñu wơ̆t kơ abih bang ƀing Êjip leng kơ dŏ mơdưh. Yua kơ hmâo dơnai ur ia rơông rơang amăng čar Êjip, yua kơ ƀu hmâo sang pă ôh ƀu hmâo mơnuih djai. 31Amăng mlam anŭn, Pharaôn iâu Môis hăng Arôn laih anŭn laĭ: “Dua gih laih anŭn ană plei pla Israel tơgŭ bĕ, tơbiă mơ̆ng ană plei pla kâo laih anŭn nao mă bruă kơ Yêhôwa kar hăng ƀing gih hmâo laĭ laih. 32Brơi kơ ƀing gih ăt atăt ba khul triu laih anŭn khul hlô mơnơ̆ng tơbiă nao kar hăng tơlơi pơhiăp ƀing gih hmâo laĭ laih, laih anŭn hơơč tơlơi mơyun hiam kơ kâo dơ̆ng mơ̆n.”
33Ƀing Êjip pơtrŭt ană plei pla Israel tañ tơbiă mơ̆ng čar gơñu yua kơ gơñu laĭ. “Ƀing ta či djai abih yơh” 34Tui anŭn ană plei pla Israel djă ba tơpŭng ƀu hmâo tơpơi laih anŭn kă hrŏm hăng khul kơthŭng tơpŭng amăng sum ao gơñu, giơ̆ng anŭn glăm ƀơi bra. 35#Tơb 3:21-22.Ană plei pla Israel ăt hmâo ngă tui laih tơlơi Môis pơtă, gơñu rơkâo mơ̆ng ƀing Êjip khul gơnam yom ngă hăng prăk, ngă hăng mah laih anŭn sum ao. 36Yêhôwa ngă brơi ană plei pla Israel hmâo tơlơi pap ƀơi anăp ƀing Êjip, anŭn yơh gơñu mơak pran jua brơi hơgĕt mơnơ̆ng ană plei pla Israel rơkâo. Kar hăng anŭn, ană plei pla Israel hmâo plah sua mă laih dram gơnam ƀing Êjip.
37Ƀing ană plei pla Israel tơbiă mơ̆ng plei Ramse nao pơ Sukôt, hmâo kơplah wah năm rơtuh rơbâo đah rơkơi rơbat tơkai, ƀu yap ôh ƀing đah kơmơi laih anŭn ƀing čơđai. 38Ăt hmâo lu ƀing mơnuih tuai nao hrŏm mơ̆n. Gơñu djă ba lu biă mă khul triu laih anŭn hlô mơnơ̆ng rong. 39Gơñu ŏm ƀañ ƀu hmâo tơpơi hăng tơpŭng gơñu hmâo djă ba mơ̆ng čar Êjip. Tơpŭng ƀu hmâo tơpơi yua kơ arăng puh pơđuaĭ gơñu mơ̆ng čar Êjip hăng tơlơi jač biă mă, anŭn yơh gơñu ƀu hơmao prăp rơmet mơnơ̆ng ƀơ̆ng huă kơ gơñu pô ôh.
40 #
Čơd 15:13; Gal 3:17. Thŭn blan ană plei pla Israel dŏ amăng čar Êjip jing pă rơtuh klâo pluh thŭn. 41Djơ̆ amăng hrơi hnal tuč amăng pă rơtuh klâo pluh thŭn anŭn, abih bang ƀing tơhan Yêhôwa tơbiă mơ̆ng čar Êjip. 42Anŭn jing mlam Yêhôwa gak wai, yua kơ amăng anŭn Ñu hmâo ba ană plei pla Israel tơbiă mơ̆ng čar Êjip. Tui anŭn, amăng abih bang rơnŭk, ană plei pla Israel khŏm djă pioh mlam anŭn kiăng pơpŭ pơyom kơ Yêhôwa.
43Yêhôwa pơhiăp hăng Môis laih anŭn Arôn: “Anai jing tơlơi juăt kơ phĕt Tơlơi Găn: Ƀing mơnuih tuai ƀu dưi ƀơ̆ng phĕt anŭn ôh. 44Bơ kơ ƀing hlŭn arăng hmâo blơi laih hăng prăk, khŏm gơñu tŭ tơlơi khăt klĭ kah, gơñu mơ dưi ƀơ̆ng. 45Tuai dŏ jưh laih anŭn ƀing mă bruă apah ăt kŏn dưi ƀơ̆ng lơi. 46#Yap 9:12; Yô 19:36.Phĕt anŭn kơnơ̆ng dưi ƀơ̆ng amăng sang đôč, anăm ba añăm mơnơ̆ng pơ rơngiao laih anŭn anăm ngă joh sa ƀĕ klang ôh. 47Abih bang ană plei pla Israel khŏm djă pioh phĕt Tơlơi Găn. 48Tơdah hmâo ƀing tuai dŏ jưh amăng sang ƀing gih kiăng hơdơr pioh phĕt Tơlơi Găn Yêhôwa, brơi abih bang đah rơkơi gơñu khŏm tŭ khăt klĭ giơ̆ng anŭn dưi nao jĕ laih anŭn djă pioh phĕt anai, pô anŭn arăng dưi yap ñu kar hăng mơnuih amăng čar anŭn. Samơ̆ hlơi pô ƀu tŭ tơlơi khăt klĭ, ñu anŭn ƀu dưi ƀơ̆ng ôh. 49Anŭn jing sa tơlơi juăt brơi kơ abih bang mơnuih kơ čar anŭn, laih anŭn kơ ƀing tuai dŏ tơ̆ng krah ƀing gih.”
50Abih bang ană plei pla Israel leng kơ ngă tui tơlơi pơhiăp Yêhôwa hmâo pơtă laih kơ Môis hăng Arôn. 51Amăng hrơi anŭn mơtam Yêhôwa ba ană plei pla Israel tơbiă mơ̆ng čar Êjip tui hăng rĭm khul gơñu.
Currently Selected:
Tơlơi Tơbiă 12: JRA2016
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.
