Tơlơi Tơbiă 13
13
Tơlơi Pơhơdơr kơ hrơi tơbiă mơ̆ng čar Êjip
1Yêhôwa pơhiăp hăng Môis, 2#Yap 3:13; Luk 2:23.“Pơyơr bĕ kơ kâo abih bang ƀing ană kơčoa hmâo tơkeng laih amăng ană plei pla Israel, wơ̆t mơnuih hăng hlô mơnơ̆ng, yua kơ abih bang ană kơčoa leng kơ lơ̆m kơ kâo soh sel.”
3Môis laĭ hăng ană plei pla: “Brơi ƀing gih hơdơr pioh hrơi anai bĕ, yua kơ anai jing hrơi Yêhôwa yua tơngan dưi Mơyang Ñu ba ƀing gih tơbiă mơ̆ng čar Êjip, jing tơbiă mơ̆ng sang ngă hlŭn, anăm ƀơ̆ng ƀañ tơpŭng hmâo tơpơi ôh. 4Hrơi anai, ƀing gih tơbiă đuaĭ djơ̆ amăng blan Abip.#13:4 blan Abip: jing blan sa tui hăng blan ƀing Yuđa, kiăng laĭ jing kơplah wah blan klâo hăng blan pă tui hăng blan yang hrơi. 5Tui anŭn, tơ Yêhôwa ba ƀing gih mŭt amăng čar ƀing Kanaan, ƀing Hitit, ƀing Amôrit, ƀing Hiwit laih anŭn ƀing Jêbusit, jing lŏn čar bă hăng ia tơsâo laih anŭn ia hơni, Ñu hmâo ƀuăn rơ̆ng laih hăng ơi adon jing Ñu či pha brơi kơ ƀing gih, tui anŭn rĭm wơ̆t truh blan anai brơi ƀing gih khŏm hơdơr pioh ngă phĕt anŭn. 6Amăng tơjuh hrơi, ƀing gih či ƀơ̆ng ƀañ tơpŭng ƀu hmâo tơpơi, truh hrơi tal tơjuh, khŏm akŏ pơjing hrơi phĕt kơ Yêhôwa. 7Khŏm ƀơ̆ng ƀañ tơpŭng ƀu hmâo tơpơi ôh amăng tơjuh hrơi; anăm brơi hmâo ôh ƀañ tơpŭng hmâo tơpơi ƀôdah tơpơi amăng djŏp čar ih. 8Amăng hrơi anŭn, pơblang brơi bĕ kơ ană đah rơkơi ƀing gih: ‘Kâo ngă tơlơi anai, yua kơ Yêhôwa ngă hiam laih kơ kâo tơdang kâo tơbiă mơ̆ng čar Êjip.’ 9Laih anŭn gah kơ ƀing gih, anŭn či kar hăng sa gru kơđŏm amăng tơngan, sa tơlơi hơdơr pioh tơ̆ng krah dua gah mơta ƀing gih, kiăng kơ tơlơi juăt Yêhôwa dŏ ƀơi amăng bah ƀing gih; yua kơ Yêhôwa hmâo yua tơngan dưi mơyang Ñu ba ƀing gih tơbiă mơ̆ng čar Êjip. 10Tui anŭn, rĭm thŭn brơi ƀing gih khŏm hơdơr pioh phĕt anai djơ̆ bơyan hmâo pơkă laih”.
Bruă Pơyơr Ană Kơčoa
11“Tơ Yêhôwa ba ƀing gih mŭt amăng čar Kanaan laih, kar hăng Ñu hmâo ƀuăn rơ̆ng laih hăng ƀing gih laih anŭn ơi adon ƀing gih, laih anŭn tơdah Ñu pha brơi laih čar anŭn kơ ƀing gih, 12#Tơb 34:19-20; Luk 2:23.brơi kơ ƀing gih pơyơr bĕ kơ Yêhôwa ană kơčoa đah rơkơi wơ̆t hăng abih bang hlô mơnơ̆ng tơno tuh blŭng hlâo, yua kơ gơñu lơ̆m kơ Yêhôwa. 13Samơ̆ kơ aseh kle tuh blŭng hlâo, ƀing gih khŏm yua triu ƀôdah bơbe kiăng song mă ñu, tơdah ƀu song glaĭ brơi ƀing gih joh hĭ tơkuai ñu, ƀing gih ăt khŏm song mă abih bang ană kơčoa amăng mrô ƀing ană đah rơkơi ƀing gih pô mơ̆n. 14Sa hrơi tơdơi adih ană đah rơkơi ƀing gih či tơña: ‘Tơlơi anai hơgĕt kiăng laĭ?’ Brơi ƀing gih laĭ glaĭ: ‘Yua kơ Yêhôwa hmâo yua tơngan dưi mơyang Ñu ba ƀing gih tơbiă mơ̆ng čar Êjip, pơklaih mơ̆ng sang ngă hlŭn. 15Tơdang Pharaôn khăng pran jua ƀu brơi ƀing ta đuaĭ nao ôh, Ñu hmâo pơdjai abih bang ƀing ană kơčoa amăng čar Êjip, mơ̆ng ană kơčoa mơnuih truh kơ ană hlô mơnơ̆ng tuh blŭng hlâo. Yua kơ anŭn kâo pơyơr kơ Yêhôwa abih bang ană hlô mơnơ̆ng tơno tuh blŭng hlâo jing mơnơ̆ng ngă yang, laih anŭn song mă ană kơčoa đah rơkơi amăng ƀing ană đah rơkơi kâo.’ 16Anŭn či jing sa gru bơkơnăl ƀơi tơngan laih anŭn rup pơhmu ƀơi athơi tơ̆ng krah dua gah mơta ƀing gih, kiăng pơhơdơr kơ ƀing gih Yêhôwa hmâo yua tơngan dưi mơyang Ñu ba ƀing ta tơbiă mơ̆ng čar Êjip”.
Ană plei Israel rơbat nao amăng tơdrŏn har
17Tơ Pharaôn brơi ană plei pla Israel tơbiă đuaĭ. Ơi Adai ƀu atăt ôh gơñu rơbat găn čar Philistin, wơ̆t dah jơlan anŭn jĕ hloh, yua kơ Ñu laĭ: “Hwĭ dah gơñu ƀuh tơlơi pơblah, gơñu či pơplih tơlơi pơmĭn laih anŭn wơ̆t glaĭ pơ čar Êjip.” 18Anŭn yơh Ơi Adai brơi gơñu nao wir tui jơlan amăng tơdrŏn tač anăp nao pơ Ia Rơsĭ Mriah.#13:18 Ia Rơsĭ Mriah: (Boh hră phŭn: “Ia Rơsĭ Trang Bô”), kiăng laĭ nao: (1) Sa pruĕ dơnao ia laih anŭn anih trâp ƀơi tơ̆ng krah gah anăp kơ hŏk ia Suez laih anŭn Ia Rơsĭ Prŏng; anai jing kwal lŏn arăng hmâo laĭ nao amăng khul tơlơi truh hmâo čih pơya laih amăng hră Tơbiă 13. (2) Hŏk ia Suez laih anŭn hŏk ia Aqaba. Tơ gơñu tơbiă mơ̆ng čar Êjip, ană plei pla Israel hmâo prăp rơmet gơnam pơblah kiăng pơblah. 19#Čơd 50:25; Yôs 24:32.Môis djă ba klang Yôsep, yua kơ hlâo adih Yôsep brơi ană plei pla Israel ƀuăn rơ̆ng laih tơdang ñu laĭ: “Sĭt biă mă Ơi Adai či čuă ngui ƀing gih; brơi ƀing gih djă ba bĕ klang kâo tui ƀing gih tơbiă mơ̆ng anai.”
Tơmeh gơnăm hăng tơmeh apui
20Giơ̆ng gơñu đuaĭ mơ̆ng Sukôt, gơñu jưh amăng Êtham jĕ hăng tơdrŏn har. 21Yêhôwa nao hlâo kơ ană plei pla; tơhrơi Ñu dŏ amăng sa ƀĕ tơmeh gơnăm kiăng kơ ba jơlan, tơdang mlam Ñu dŏ amăng sa ƀĕ tơmeh apui kiăng kơ pơčrang jơlan gơñu. Yua mơ̆ng anŭn gơñu dưi rơbat amăng tơhrơi wơ̆t amăng mlam. 22Tơmeh gơnăm amăng tơhrơi, tơmeh apui amăng mlam ƀu ataih ôh mơ̆ng ană plei pla.
Currently Selected:
Tơlơi Tơbiă 13: JRA2016
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.
