Tơlơi Tơbiă 23
23
Tơlơi Juăt Pơpŭ Pơyom kơ Bruă Djơ̆ Gal
1 #
Tơb 20:16; Lêwi 19:11-12; Mơñă 5:20. “Ih anăm ruai pơhing ôh tơlơi ƀu hmâo sĭt. Ih ăt anăm pơgop ôh hăng ƀing sat ƀai kiăng kơ ngă gơ̆ng jơlan ƀlor. 2Ih anăm đuaĭ tui mơnuih lu amăng bruă ngă tơlơi sat ôh. Tơdang ngă gơ̆ng jơlan amăng tơlơi kơđi, ih anăm dŏ gah ƀing mơnuih lu ôh kiăng kơ pơsoh hĭ tơlơi djơ̆ gal. 3#Lêwi 19:15.Ih ăt kŏn dưi dŏ gah ƀing mơnuih ƀun rin lơi amăng bruă tơlơi pơphong.
4 #
Mơñă 22:1-4. Tơdah ih bưp rơmo ƀôdah aseh kle ƀing ayăt ih wơr glai, brơi ih ba glaĭ kơ pô ñu. 5Tơdah ih ƀuh aseh kle ƀing bơrơmŭt kơ ih rơbuh yua kơ pơdiăng kơtraŏ đơi, anăm lui gơ̆ ôh, samơ̆ brơi ih djru gơ̆ rŭ tơgŭ aseh ñu.
6 #
Lêwi 19:15; Mơñă 16:19. Ih anăm pơsoh hĭ ôh tơlơi djơ̆ gal amăng khul bruă pơphong kơ ƀing ƀun rin. 7Brơi ih đuaĭ ataih mơ̆ng khul boh pơhiăp ƀlor laih anŭn anăm pơdjai ôh ƀing ƀu hmâo tơlơi soh ƀôdah ƀing mơnuih tơpă hơnơ̆ng, yua kơ Kâo ƀu či yap tơpă ôh ƀing mơnuih sat ƀai. 8Ih anăm mă ôh gơnam arăng jek brơi yua kơ gơnam arăng jek brơi ngă pơbum hĭ mơta ƀing rơgơi laih anŭn pơsoh hĭ boh pơhiăp ƀing mơnuih tơpă.
9 #
Tơb 22:21; Lêwi 19:33-34; Mơñă 24:17-18; 27:19. Ih anăm kơtư̆ juă ƀing mơnuih tuai ôh, ƀing gih pô thâo hluh laih hyư̆m pran jua ƀing mơnuih tuai, yua kơ ƀing gih hmâo jing laih ƀing mơnuih tuai amăng čar Êjip.”
Tơlơi Juăt kơ Thŭn Saƀat
10 #
Lêwi 25:1-7. “Amăng năm thŭn brơi ih sai pla bĕ laih anŭn pĕ hơpuă mơ̆ng hmua ih. 11Samơ̆ truh thŭn tal tơjuh brơi bĕ lŏn hmua ih pơdơi, anăm jŭ pla ôh, kiăng kơ ƀing ƀun rin amăng ană plei pla ih dưi hmâo mơnơ̆ng ƀơ̆ng huă mơ̆ng hmua anŭn; hơdôm mơnơ̆ng dŏ glaĭ, hlô mơnơ̆ng pơ hmua či ƀơ̆ng. Brơi ih ngă kar kaĭ mơ̆n hăng đang boh kơƀâu ih laih anŭn đang ôliwơ ih.
12 #
Tơb 20:9-11; 31:15; 34:21; 35:2; Lêwi 23:3; Mơñă 5:13-14. Brơi ih mă bruă amăng năm hrơi, truh hrơi tal tơjuh brơi ih pơdơi kiăng kơ rơmo laih anŭn aseh kle ih dưi pơdơi, ană đah rơkơi kơ ding kơna đah kơmơi ih laih anŭn ƀing tuai dưi hmâo glaĭ pran kơtang.
13Brơi ih thâo răng kơ abih tơlơi pơhiăp Kâo hmâo pơhiăp hăng ih. Anăm pơhiăp djơ̆ ôh anăn ƀing yang pơkŏn, kŏn anăm brơi arăng hmư̆ ƀing anăn anŭn tơbiă mơ̆ng amăng bah ih lơi.”
Tơlơi juăt brơi kơ khul hrơi phĕt prŏng amăng thŭn
(Tơb 34:18-26; Mơñă 16:1-17)
14“Rĭm thŭn klâo wơ̆t ih khŏm djă pioh phĕt pơpŭ kơ kâo. 15#Tơb 12:14-20; Lêwi 23:6-8; Yap 28:17-25.Brơi ih djă pioh phĕt Ƀañ Tơpŭng Ƀu Hmâo Tơpơi. Amăng tơjuh hrơi, brơi ƀơ̆ng ƀañ ƀu hmâo tơpơi jing hrơi hmâo pơkă pioh laih amăng blan pă, kar hăng hmâo pơtă laih kơ ih, yua kơ amăng blan anŭn ih hmâo tơbiă mơ̆ng čar Êjip. Anăm brơi hlơi nao ƀơi anăp Kâo hăng tơngan soh đôč ôh.
16 #
Lêwi 23:15-21,39-43; Yap 28:26-31. Brơi ih djă pioh phĕt Bơyan Hơpuă jing phĕt pơyơr boh hlâo hlang mơ̆ng bruă ih hmâo jŭ pla pơ hmua. Brơi ih ăt djă pioh mơ̆n phĕt Hơpuă ƀơi bơyan luč thŭn, giơ̆ng kơ ih hmâo ba laih abih boh than kơ bruă ih mơ̆ng hmua pơ sang. 17Rĭm thŭn klâo wơ̆t, abih bang ƀing đah rơkơi khŏm nao ƀơi anăp Khua Yang, jing Yêhôwa.
18Ih anăm pơyơr kơ Kâo drah hlô mơnơ̆ng ngă yang hrŏm hơbĭt hăng ƀañ hmâo tơpơi ôh, kŏn anăm pioh rơmuă hlô mơnơ̆ng ngă yang pơyơr amăng hrơi phĕt pơpŭ kơ kâo tơl truh kơ mơguah tơdơi.
19 #
Mơñă 26:2; Tơb 34:26; Mơñă 14:21. Brơi ih djă ba khul boh hlâo hlang hiam hloh mơ̆ng lŏn hmua ih mŭt pơ sang kơkuh pơpŭ Yêhôwa Ơi Adai.
Ih anăm tŭk ană bơbe amăng ia tơsâo amĭ ñu ôh.”
Tơlơi Ƀuăn Pioh Brơi kơ Ƀing Ană Plei Pla Israel
20“Anai nê, Kâo pơkiaŏ nao sa čô ling jang nao hlâo kơ ih kiăng kơ wai lăng ih ƀơi jơlan ih nao laih anŭn ba ih mŭt pơ anih Kâo hmâo prăp rơmet laih 21Ƀơi anăp ling jang adai, brơi ih thâo răng laih anŭn tui gưt ñu, anăm ngă pơrŭng pơkơdơ̆ng glaĭ hăng ñu ôh, yua kơ ñu ƀu či pap brơi ôh kơ tơlơi ƀing gih pơblư̆ kơ ñu, yua kơ anăn Kâo dŏ amăng ñu.
22Samơ̆ tơdah ih kơčăng gưt asăp ñu laih anŭn ngă tui abih boh pơhiăp Kâo hmâo pơtă tăn, Kâo či jing ayăt kơ ƀing ayăt kơ ih, pô pơkơdơ̆ng glaĭ hăng ƀing pơkơdơ̆ng hăng ih. 23Yua kơ ling jang Kâo či nao hlâo kơ ih, ba ih mŭt amăng čar ƀing Amôrit, Hitit, Pêrisit, Kanaan, Hiwit, Jêbusit; laih anŭn Kâo či pơrai abih gơñu.
24Ih anăm bon kơkuh laih anŭn mă bruă ƀing yang gơñu ôh; kŏn anăm hla tui bruă gơñu ngă lơi. Brơi ih pơrai lui hĭ abih bang ƀing yang laih anŭn taih pơphač hĭ khul tơmeh gơñu kơkuh pơpŭ. 25Brơi ƀing gih kơkuh pơpŭ kơ Yêhôwa Ơi Adai ƀing gih; Ñu či tuh tơlơi mơyun hiam ƀơi ƀañ gih ƀơ̆ng, ƀơi ia gih mơñum laih anŭn ba pơđuaĭ tơlơi duăm ruă ataih mơ̆ng ƀing gih. 26Ƀu či hmâo đah kơmơi plao ƀôdah đah kơmơi hroh ană amăng čar gih ôh. Kâo či pha brơi gih dưi hơdip sui. 27Kâo či ngă brơi abih bang kơnŭng djuai ih či truh anŭn hmâo tơlơi hwĭ bral laih anŭn rŭng răng. Kâo či ngă brơi ƀing ayăt ih wir rŏng đuaĭ hĭ mơ̆ng ih. 28Kâo či pơkiaŏ nao hong akŏ rơmông nao hlâo kơ ih, gơñu či puh pơđuaĭ hĭ ƀing Hiwit, ƀing Kanaan, ƀing Hitit, ƀơi anăp ih. 29Kâo ƀu či puh pơđuaĭ abih gơñu amăng sa thŭn ôh, yua kơ tơdah ngă tui anŭn čar či jing hĭ rơngol, laih anŭn hlô glai či čeh lar lu, ngă răm kơ ih. 30Samơ̆ Kâo či puh pơđuaĭ gơñu ƀrư̆ ƀrư̆ mơ̆ng ih, tơl ih jing hĭ lu lĭn laih anŭn dưi mă tŭ lŏn čar anai.
31Kâo či pơkă brơi guai lŏn ih jing mơ̆ng Ia Rơsĭ Mriah truh pơ ia rơsĭ Philistin,#23:31 jing Ia Rơsĭ Prŏng. mơ̆ng tơdrŏn har truh pơ Ia Krong Ơphrat, yua kơ Kâo či jao ƀing ană plei pla dŏ amăng čar anŭn amăng tơngan ih laih anŭn ih či puh pơđuaĭ gơñu mơ̆ng ih. 32Ih anăm pơgop hăng gơñu ƀôdah hăng ƀing yang gơñu ôh. 33Gơñu ƀu či dŏ amăng čar ih ôh, yua kơ gơñu či jing ngă brơi ih lĕ amăng tơlơi soh hăng Kâo laih anŭn mă bruă kơ ƀing yang gơñu; Sĭt yơh tơlơi anŭn jing čơđong ƀơč ih.”
Currently Selected:
Tơlơi Tơbiă 23: JRA2016
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.
