Tơlơi Tơbiă 24
24
Môis Đĭ Pơ Čư̆ Sinai
1Ơi Adai pơhiăp hăng Môis: “Ih laih anŭn Arôn, Nadap laih anŭn Abihu hrŏm hơbĭt hăng tơjuh pluh čô ƀing kong tha Israel đĭ nao bĕ pơ Yêhôwa, laih anŭn ƀing gih kơkuh pơpŭ mơ̆ng ataih. 2Kơnơ̆ng hơjăn ih jing Môis dưi nao jĕ Yêhôwa; Samơ̆ ƀing pơkŏn ƀu dưi nao jĕ ôh. Ƀing ană plei pla ƀu dưi tui ih đĭ nao pơ čư̆ ôh.”
3Tơ Môis nao laih anŭn ruai glaĭ kơ ană plei pla abih tơlơi pơhiăp laih anŭn khul tơlơi juăt Yêhôwa, ană plei pla hơdrăm laĭ glaĭ: “Gơmơi či ngă abih tơlơi Yêhôwa hmâo pơtă pơtăn laih” 4Môis čih glaĭ abih boh pơhiăp Yêhôwa. Ñu tơgŭ ưm mơguah, pơdơ̆ng sa boh kơƀang ngă yang ƀơi tơkai čư̆ laih anŭn pơdơ̆ng pluh dua tơmeh boh pơtâo pơhmu kơ pluh dua kơnŭng djuai Israel. 5Ñu pơđar ƀing hlăk ai Israel nao pơyơr mơnơ̆ng ngă yang čuh laih anŭn hlô mơnơ̆ng ngă yang hăng rơmo tơdăm, jing mơnơ̆ng ngă yang rơnŭk rơnua pơyơr đĭ kơ Yêhôwa. 6Môis mă sa mơkrah drah pioh gơ̆ amăng čơlŭ prŏng laih anŭn sa mơkrah dŏ glaĭ ñu tuh ƀơi kơƀang ngă yang. 7Ñu djă hơdrôm hră kơnol pơgop laih anŭn pơđok brơi kơ ană plei pla hmư̆. Gơñu laĭ: “Ƀing gơmơi či ngă tui laih anŭn tui gưt abih boh pơhiăp Yêhôwa hmâo pơhiăp laih.” 8#Mat 26:28; Mar 14:24; Luk 22:20; I Kôr 11:25; Hêb 9:19-20; 10:29.Môis mă drah prăh ƀơi ană plei pla laih anŭn laĭ: “Anai jing drah kơ tơlơi kơnol pơgop Yêhôwa hmâo pơdơ̆ng laih hăng ƀing gih tui hăng abih boh pơhiăp anai.”
9Giơ̆ng anŭn, Môis hăng Arôn, Nadap hăng Abihu hrŏm hơbĭt hăng tơjuh pluh čô ƀing kong tha Israel đĭ nao pơ čư̆. 10Gơñu ƀuh Ơi Adai Israel. Gah tơkai Ñu hmâo sa mơnơ̆ng hơgĕt hrup hăng atur dăp hăng pơtâo saphir, jơngeh bơngač kar adai rơngit. 11Ñu ƀu yơr tơngan ngă sat ƀing khua gĭt gai ană plei pla Israel ôh, gơñu hmâo ƀuh laih Ơi Adai, giơ̆ng anŭn gơñu huă ƀơ̆ng.
12Yêhôwa pơhiăp hăng Môis: “Đĭ bĕ pơ čư̆, rai pơ Kâo laih anŭn dŏ tơguan Kâo ƀơi anŭn. Kâo či brơi kơ ih khul hnal boh pơtâo ƀơi anŭn Kâo hmâo čih laih tơlơi juăt laih anŭn tơlơi pơtă pơtăn kiăng kơ pơtô ană plei pla.” 13Môis#24:13 Sa sŏp hră so hơđăp pơblang: gơñu. hrŏm hơbĭt hăng Yôsuê, pô djru ñu, tơgŭ dơ̆ng giơ̆ng anŭn Môis đĭ nao pơ čư̆ Ơi Adai. 14Ñu laĭ hăng ƀing kong tha: “Brơi ƀing gih dŏ tơguan gơmơi pơ anai tơl gơmơi wơ̆t glaĭ. Anai nê, Arôn hăng Hur či dŏ glaĭ hăng ƀing gih; Hlơi hmâo bruă hơgĕt kiăng, nao bĕ pơ gơñu.”
15Môis đĭ ƀơi glong čư̆, laih anŭn kơthul gom čư̆. 16Tơlơi ang yang Yêhôwa dŏ ƀơi čư̆ Sinai. Amăng năm hrơi, kơthul gom čư̆, truh hrơi tal tơjuh Yêhôwa mơ̆ng tơ̆ng krah kơthul iâu Môis. 17Tơlơi ang yang Yêhôwa bơrơđah rai kar hăng jơlah apui dŏ ƀơ̆ng ƀơi čŏng čư̆ gah anăp ană plei pla Israel. 18#Mơñă 9:9.Môis yak mŭt nao tơ̆ng krah gơnam kơthul laih anŭn đĭ nao pơ čư̆. Môis dŏ ƀơi ngŏ čư̆ pă pluh hrơi pă pluh mlam.
Currently Selected:
Tơlơi Tơbiă 24: JRA2016
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.
