Tơlơi Tơbiă 25
25
Yêhôwa Pơtô Kơčrâo Brơi Môis Ngă Sang Khăn
(Tơb 35:4-9)
1Yêhôwa pơhiăp hăng Môis: 2“Laĭ bĕ kơ ană plei pla Israel pơyơr gơnam kơ Kâo. Brơi ƀing gih mă tŭ bĕ abih bang gơnam pơyơr mơ̆ng abih bang hlơi hmâo pran jua pơyơr. 3Anai jing gơnam pơyơr ƀing gih či tŭ mơ̆ng gơñu: mah, prăk laih anŭn kong; 4mrai mơtah, mrai mriah huč laih anŭn mrai mriah jŭ; bơnal hơbuă, blâu bơbe; 5klĭ triu tơno añrŭ ia mriah, klĭ akan hiam, kơyâo akasi; 6Ia jâu čuh apui kơđen, khul mơnơ̆ng ƀâu kiăng ngă ia klôñ laih anŭn mơnơ̆ng ƀâu mơngưi. 7Boh pơtâo ônik laih anŭn lu boh pơtâo yom pơkŏn kiăng dưm ƀơi ao êphot#25:7 êphot: jing sa blah ao kơdrưh pơpŭ hrup hăng ao pơkŏn mơ̆n, arăng ngă ñu hăng bơnal hmâo lu khôr laih anŭn ñu yom pơmă, ƀơi ao anŭn hmâo sa boh kơdŭng anĕt pioh Urim laih anŭn Thumim, jing dua mơta gơnam arăng yua ñu kiăng dưi thâo krăn tơlơi Ơi Adai kiăng. khua ngă yang prŏng laih anŭn ƀơi hnal tơda ao ñu. 8Gơñu či ngă brơi kơ Kâo sa boh Sang Yang Rơgoh Hiam kiăng kơ Kâo dŏ tơ̆ng krah gơñu. 9Brơi ƀing gih ngă sang anŭn hrup hăng rup Sang Khăn laih anŭn khul gơnam pơhrôp ñu tui hăng Kâo či črâo brơi kơ ih.”
Hip Kơnol Pơgop
(Tơb 37:1-9)
10“Tui anŭn, pơđar bĕ ƀing gơñu ngă sa boh hip hăng kơyâo akasi, yong ñu sa rơtuh pluh sentimet,#25:10 Boh hră phŭn: dua kubit ha mơkrah; sa kubit mơdơ̆ hăng 44,5 cm. da ñu năm pluh năm sentimet, dơ̆ng ñu năm pluh năm sentimet. 11Brơi ih lom ñu hăng mah rơgoh, lom abih amăng lăm wơ̆t hăng gah rơngiao, laih anŭn ngă gơnă jum dar hăng mah. 12Ih ăt tuh pă boh gơwang ngă hăng mah pioh hĭ ñu ƀơi pă akiăng hip, dua gơwang gah anai laih anŭn dua gơwang gah adih; 13Laih anŭn ngă gai čơkung hăng kơyâo akasi lom hăng mah; 14Brơi ih truă gai amăng khul gơwang dua gah kiăng kơ čơkung ñu. 15Pioh nanao gai anŭn ƀơi gơwang, ƀu dưi suă hĭ ôh. 16Brơi ih pioh amăng hip kơnol pơgop Kâo či brơi kơ ih.”
Kơhnơ̆p Tơlơi Pap
17 #
Hêb 9:5. “Brơi ih ngă sa kơhnơ̆p tơlơi pap hăng mah rơgoh, yong ñu sa rơtuh pluh sentimet, da ñu năm pluh năm sentimet. 18Giơ̆ng anŭn ngă dua rup Čêrubim hăng mah glit rơpih, dưm ñu ƀơi dua akŏ kơhnơ̆p tơlơi pap. 19Ngă bĕ sa Čêrup#25:19 čêrup: jing tơlơi čih mrô đơsĕt kơ “čêrubim”. ƀơi akŏ gah anai, sa čêrup ƀơi akŏ gah adih laih anŭn pơklep hĭ gơñu ƀơi dua gah akŏ kơhnơ̆p hip. 20Dua rup Čêrubim či blang čăng gom hĭ kơhnơ̆p tơlơi pap. Khul rup Čêrubim ñu dŏ klă anăp tơdruă, hrŏm hơbĭt lăng trŭn kơhnơ̆p tơlơi pap brơi. 21Brơi ih pioh kơhnơ̆p tơlơi pap ƀơi ngŏ hip laih anŭn dưm amăng anŭn Hnal Kơnol Pơgop Kâo či brơi kơ ih. 22Kâo či bưp ih ƀơi anŭn; Mơ̆ng ngŏ kơhnơ̆p tơlơi pap, tơ̆ng krah dua rup Čêrubim dŏ ƀơi ngŏ Hip Tơlơi Kơnol Pơgop, Kâo či brơi kơ ih abih tơlơi pơtă pơtăn kơ ană plei pla Israel.”
Kơƀang Pioh Ƀañ Tơpŭng Pơyơr kơ Ơi Adai
(Tơb 37:10-16)
23“Brơi ih ngă sa boh kơƀang hăng kơyâo akasi, yong ñu sapăn pluh sapăn sentimet, da ñu pă pluh pă sentimet laih anŭn dơ̆ng ñu năm pluh năm sentimet, 24lom ñu hăng mah rơgoh, laih anŭn ngă gơnă ñu jum dar hăng mah. 25Brơi ih ăt ngă mơ̆n sa gơnă jum dar kơƀang, glong ñu kơplah wah pă sŭn, laih anŭn ngă sa gơnă jum dar gơwang anŭn hăng mah. 26Laih anŭn tuh pă gơwang mah pơklep hĭ ñu ƀơi pă akiăng, anih hmâo pă ƀĕ tơkai ñu. 27Gơwang či pơklep jĕ gơnă kiăng kơ truă khul gai čơkung. 28Brơi ih ăt ngă rĭm gai čơkung hăng kơyâo akasi, lom hăng mah kiăng kơ čơkung kơƀang anŭn. 29Brơi ih ăt ngă jam hăng mah rơgoh, sĕr pơyơr mơnơ̆ng ƀâu mơngưi, laih anŭn bơlŏ, mŏng pioh ngă phĕt tuh ia tơpai. 30#Lêwi 24:5-8.Ƀơi ngŏ kơƀang brơi ih pioh nanao ƀañ tơpŭng pơyơr ƀơi anăp Kâo.”
Gơ̆ng Apui Kơđen
(Tơb 37:17-24)
31“Brơi ih ngă sa ƀĕ gơ̆ng apui kơđen hăng mah rơgoh, plă laih anŭn drơi gơ̆ng apui kơđen ngă hăng mah glit rơpih; get ñu, tơƀuai ñu laih anŭn bơnga ñu leng kơ pơklep hăng gơ̆ng apui kơđen. 32Hmâo năm ƀĕ than tơbiă rai dua gah gơ̆ng apui kơđen, klâo ƀĕ than gah anai, klâo ƀĕ than gah adih. 33Amăng năm ƀĕ than tơbiă rai mơ̆ng gơ̆ng apui kơđen, ƀơi hăng ngŏ rĭm than leng kơ hmâo klâo boh get apui kơđen pơjing rai rup bơnga mơdưh hrŏm hăng tơƀuai apui kơđen laih anŭn bơnga apui kơđen. 34Ƀơi gơ̆ng apui kơđen ăt hmâo mơ̆n pă boh get apui kơđen rup ñu hrup hăng bơnga mơdưh hrŏm hơbĭt hăng tơƀuai apui kơđen laih anŭn bơnga apui kơđen. 35Amăng năm than mơ̆ng gơ̆ng apui kơđen tơbiă rai, gah yŭ kơ rĭm dua than arăng pơklep ñu sa tơƀuai apui kơđen. 36Khul tơƀuai apui kơđen laih anŭn khul than kơ gơ̆ng apui kơđen arăng pơklep gơñu hăng gơ̆ng apui kơđen; abih bang leng kơ ngă hăng mah rơgoh glit rơpih. 37Brơi ih ăt ngă mơ̆n tơjuh ƀĕ apui kơđen brơi kơ gơ̆ng apui kơđen; dưm khul apui kơđen anŭn hyư̆m pă kiăng kơ gơñu črang rơđah nao gah anăp gơ̆ng apui kơđen tơ arăng tuč gơñu. 38Thong trơĭ grua apui kơđen laih anŭn jam pioh hnop ñu ăt či ngă hăng mah rơgoh mơ̆n. 39Arăng yua sa tơlăng#25:39 Sa tơlăng mơdơ̆ hăng 3.000 sêkel, mơdơ̆ hăng 34,3 kg. mah rơgoh kiăng ngă rai gơ̆ng apui kơđen laih anŭn khul gơnam yua pơkŏn. 40#Bruă 7:44; Hêb 8:5.Tui anŭn, brơi ih kơsem lăng laih anŭn ngă djơ̆ kar hăng rup Kâo hmâo kơčrâo brơi laih kơ ih ƀơi čư̆.”
Currently Selected:
Tơlơi Tơbiă 25: JRA2016
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.
