Tơlơi Tơbiă 30
30
Kơƀang Pơyơr Mơnơ̆ng Ƀâu Hiam
(Tơb 37:25-28)
1“Brơi ih ăt ngă sa boh kơƀang ngă yang hăng kơyâo akasi kiăng čuh mơnơ̆ng ƀâu hiam. 2Kơƀang rup mơta thar, rĭm akiăng ñu pă pluh pă sentimet, laih anŭn boh glong năng ai sapăn pluh sapăn sentimet. Rĭm ƀĕ tơki pơklep hăng kơƀang ngă yang. 3Brơi ih ăt lom kơƀang ngă yang, pă akiăng jum dar laih anŭn rĭm ƀĕ tơki hăng mah rơgoh; jum dar kơƀang ngă gơnă hăng mah 4Gah yŭ kơ gơnă anŭn, ih ngă dua boh gơwang hăng mah ƀơi dua gah kơƀang ngă yang kiăng hro gai čơkung. 5Brơi ih ngă gai čơkung hăng kơyâo akasi laih anŭn lom hăng mah. 6Brơi ih pioh kơƀang ngă yang anŭn ƀơi anăp khăn păng dŏ jĕ hip kơnol pơgop, ƀơi anăp kơhnơ̆p tơlơi pap dŏ hăng glong hip kơnol pơgop, anih kâo či bưp ih. 7Rĭm mơguah, tơ pơkra rơmet apui kơđen, Arôn či čuh mơnơ̆ng ƀâu hiam ƀơi kơƀang ngă yang. 8Amăng klam mơmŏt, tơ čuh apui kơđen, Arôn ăt či čuh mơnơ̆ng ƀâu hiam, anŭn jing sa mơnơ̆ng ƀâu hiam khŏm pơyơr nanao ƀơi anăp Yêhôwa amăng abih rơnŭk. 9Ƀơi kơƀang ngă yang anai, ƀing gih ƀu dưi čuh sa mơnơ̆ng ƀâu hiam pơkŏn ƀôdah pơyơr ngă yang čuh ôh, mơnơ̆ng pơyơr hăng braih pơdai ƀôdah mơnơ̆ng pơyơr tuh ia tơpai ôh. 10Rĭm thŭn sa wơ̆t, Arôn či ngă yang song mă tơlơi soh ƀơi rĭm ƀĕ tơki kơƀang ngă yang, găn amăng abih rơnŭk, amăng rĭm thŭn arăng či yua drah hlô mơnơ̆ng ngă yang amăng tơlơi ngă yang song mă tơlơi soh. Anai jing sa Phĕt rơgoh hiam biă mă kơ Yêhôwa.”
Tơlơi Duh Jia kơ Sang Khăn
11Yêhôwa laĭ kơ Môis, 12“Tơ ih yap akŏ mơnuih ƀing ană plei pla Israel, rĭm čô gơñu khŏm duh jia prăk song glaĭ tơlơi hơdip ñu pô kơ Yêhôwa kiăng kơ ƀu hmâo hlơi ôh či hmâo ruă klin tơdang ih yap akŏ mơnuih. 13#Tơb 38:25-26; Mat 17:24.Anai jing tơlơi ring jia kơ rĭm čô ƀing arăng hmâo yap laih akŏ mơnuih khŏm duh jia; kơplah wah năm gram#30:13 Boh hră phŭn: ha mơkrah sêkel; sa kêkel mơdơ̆ hăng dua pluh gêra; sa gêra mơdơ̆ hăng 0,6 gram. tui hăng mrô pơkă mơ̆ng anih Rơgoh Hiam (kiăng laĭ sa sêkel boh kơtraŏ ñu pluh dua gram); năm gram anai jing gơnam pơyơr đĭ kơ Yêhôwa. 14Kơ rĭm čô ƀing arăng hmâo yap akŏ mơnuih, mơ̆ng dua pluh thŭn hăng ngŏ, leng kơ khŏm pơyơr mơnơ̆ng ngă yang anai kơ Yêhôwa. 15Tơ pơyơr mơnơ̆ng ngă yang anai kơ Yêhôwa kiăng song glaĭ tơlơi hơdip ñu pô, mơnuih pơdrŏng ăt hrup hăng mơnuih ƀun rin ƀu hmâo hlơi dưi duh jia lu hloh ƀôdah ƀiă hloh kơ năm gram ôh. 16Tui anŭn ih mă prăk song glaĭ tơlơi hơdip kơ ƀing ană plei pla Israel laih anŭn yua prăk anŭn amăng bruă sang khăn pơƀŭt. Anai jing sa tơlơi pơhơdơr kơ ană Israel ƀơi anăp Yêhôwa kiăng song mă tơlơi hơdip ƀing gơñu pô.”
Kơthŭng Ia ngă hăng Kong
17Yêhôwa laĭ dơ̆ng kơ Môis, 18#Tơb 38:8.“Brơi ih ngă sa boh kơthŭng ia hăng kong pioh kơ rao, rĭm tơkai kơthŭng ia ăt ngă hăng kong mơ̆n. Brơi ih pioh kơthŭng anŭn kơplah wah sang khăn pơƀŭt hăng kơƀang ngă yang, laih anŭn brơi ih tuh ia amăng kơthŭng anŭn. 19Arôn hăng ƀing ană đah rơkơi ñu či yua ia anŭn rao tơkai tơngan. 20Tơ mŭt amăng sang khăn pơƀŭt, ƀôdah tơdah nao jĕ kơƀang ngă yang kiăng ngă yang hrup hăng pơyơr mơnơ̆ng ngă yang čuh kơ Yêhôwa, gơñu či mă ia anŭn rao pơrơgoh gơñu pô kiăng klaih kơ tơlơi djai. 21Gơñu khŏm rao tơkai tơngan, tơdah ƀu rao ôh, gơñu khŏm či djai. Anŭn jing tơlơi juăt hlŏng lar kơ Arôn laih anŭn kơ ƀing ană tơčo ñu găn amăng abih bang rơnŭk.”
Ia Jâu Rơgoh Hiam
22 #
Tơb 37:29. Yêhôwa laĭ dơ̆ng kơ Môis, 23“Brơi ih mă bĕ rĭm mơnơ̆ng ƀâu hiam hloh amăng anŭn hmâo: năm kilôgram ia jrao phĭ, kơđuh hol ƀâu phu jing ha mơkrah kơ mrô hlâo anŭn, kiăng laĭ klâo kilôgram, laih anŭn klâo kilôgram mơbô ƀâu hiam, 24năm kilôgram kơyâo hol, abih bang leng kơ tui hăng mrô pơkă mơ̆ng anih Rơgoh Hiam, laih anŭn lit ia jâu ôliwơ. 25Brơi ih mă yua bĕ khul mơnơ̆ng anŭn, pơhram ñu tui hăng bruă pơkra ia ƀâu hiam kiăng kơ ñu jing hĭ ia jâu rơgoh hiam. Anŭn jing ia jâu rơgoh hiam yơh. 26Giơ̆ng anŭn ih mă ia jâu anŭn pik ƀơi sang khăn pơƀŭt laih anŭn ƀơi hip kơnol pơgop, 27Kơƀang ngă yang wơ̆t hăng abih bang mơnơ̆ng yua amăng ñu, gơ̆ng apui kơđen wơ̆t hăng abih bang mơnơ̆ng yua amăng ñu, laih anŭn kơƀang ngă yang čuh mơnơ̆ng ƀâu hiam, 28kơƀang ngă yang pơyơr čuh wơ̆t hăng abih bang mơnơ̆ng yua amăng ñu, laih anŭn kơthŭng ia wơ̆t hăng tơkai ñu. 29Brơi ih djă pioh rĭm mơnơ̆ng anai amăng tơlơi rơgoh hiam kiăng kơ gơñu jing hĭ rơgoh hiam biă mă; Abih bang mơnơ̆ng hơgĕt bơ̆t djơ̆ gơñu či dưi jing rơgoh hiam. 30Brơi ih ăt truač ia ƀâu hiam kơ Arôn laih anŭn kơ ƀing ană đah rơkơi ñu mơ̆n, laih anŭn pơyơr gơñu, kiăng kơ gơñu dưi mă bruă kơ kâo amăng bruă jing khua ngă yang. 31Brơi ih laĭ mơ̆n kơ ƀing ană plei pla Israel: ‘Hăng Kâo, anai jing ia jâu rơgoh hiam amăng abih bang rơnŭk ƀing gih. 32Ƀu dưi ôh tuh ia jâu anai ƀơi drơi jan mơnuih laih anŭn ăt ƀu dưi pơhram ôh sa mơta ia jâu pơkŏn tui hăng hơdră pơhram anai. Ia jâu anai jing rơgoh hiam, laih anŭn ăt či jing rơgoh hiam mơ̆n hăng ih. 33Hlơi pô ngă bruă pơkra pơhram ia jâu hrup hăng anŭn ƀôdah mă ia jâu anŭn truač kơ mơnuih pơkŏn, arăng či puh pơđuaĭ hĭ ñu mơ̆ng kơnŭng djuai ană Israel.’”
Mơnơ̆ng Ƀâu Hiam
34Yêhôwa laĭ dơ̆ng kơ Môis: “Mă bĕ mơnơ̆ng ƀâu hiam hrup hăng stakê, ônika, galbanum, mơnơ̆ng ƀâu hiam mơmih laih anŭn rơgoh (rĭm mơta či pơkă hơnơ̆ng kar kaĭ). 35Tui hăng mơneč bruă pơlŭk ia ƀâu hiam, pơhram jing hĭ sa mơta ia ƀâu hiam čuh hmâo mơnâo mơsĭn, jơngeh laih anŭn rơgoh hiam. 36Brơi ih mă sa črăn, glit pơphač, laih anŭn pioh sa črăn ƀơi anăp hip Kơnol Pơgop amăng sang khăn pơƀŭt anŭn jing anih kâo či pơ bưp ih. Ia ƀâu hiam anai či jing rơgoh hiam kơ ƀing gih. 37Ƀu dưi pơkra ia ƀâu hiam tui hăng bruă pơkra pơhram anai kơ ƀing gih pô ôh; brơi yap anai jing mơnơ̆ng rơgoh hiam pioh kơ Yêhôwa. 38Hlơi pô pơkra pơhram hrup hăng anŭn kiăng yua mă ñu pô, arăng či puh pơđuaĭ hĭ ñu mơ̆ng ană plei pla Israel.”
Currently Selected:
Tơlơi Tơbiă 30: JRA2016
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.
