Tơlơi Tơbiă 31
31
Yêhôwa Ruah Bêsalel laih anŭn Ôhôliap
(Tơb 35:30 – 36:1)
1Yêhôwa laĭ kơ Môis, 2“Anai nê, kâo iâu Bêsalel ană đah rơkơi Uri, tơčo Hur, mơ̆ng kơnŭng djuai Yuđa. 3Kâo hmâo brơi laih kơ ñu bă blai hăng Bơngăt Mơyang#31:3 Dưi pơblang dơ̆ng mơ̆n: tơlơi dưi mơyang. Ơi Adai, hăng tơlơi kơhnâo, tơlơi thâo hluh, tơlơi thâo mĭn, amăng mơneč bruă kơhnâo hiam 4kiăng pơčeh pơjing laih anŭn ngă bruă hăng mah, prăk, laih anŭn hăng kong, 5kơčar boh pơtâo yom, ngă bruă trah kơyâo, laih anŭn amăng mơneč bruă kơhnâo hiam. 6Anai nê, Kâo hmâo ruah sa čô pô djru ñu anăn gơ̆ Ôhôliap ană đah rơkơi Ahisamak mơ̆ng kơnŭng djuai Đan. Kâo hmâo brơi laih tơlơi thâo mĭn kơ abih bang ƀing kơhnâo bruă, kiăng kơ gơñu dưi ngă abih tơlơi kâo pơtă laih kơ ih: 7hrup hăng ngă sang khăn pơƀŭt, hip kơnol pơgop, kơhnơ̆p tơlơi pap dŏ ƀơi ngŏ hip kơnol pơgop, laih anŭn abih bang mơnơ̆ng yua pơkŏn amăng sang khăn pơƀŭt; 8kơƀang ngă yang wơ̆t hăng mơnơ̆ng yua amăng ñu, gơ̆ng apui kơđen mah rơgoh wơ̆t hăng abih bang mơnơ̆ng yua amăng ñu, kơƀang ngă yang čuh mơnơ̆ng ƀâu hiam, 9kơƀang ngă yang pơyơr mơnơ̆ng ngă yang čuh wơ̆t hăng abih bang mơnơ̆ng yua amăng ñu, kơthŭng ia wơ̆t hăng tơkai ñu, 10sum ao hăng bruă sĭt mơñam, sum ao rơgoh hiam kơ khua ngă yang Arôn laih anŭn sum ao kơ ƀing ană đah rơkơi ñu yua amăng bruă jing khua ngă yang, 11ia jâu ƀâu hiam, laih anŭn mơnơ̆ng ƀâu hiam pioh kơ anih rơgoh hiam. Gơñu khŏm ngă djơ̆ kar hăng abih bang khul tơlơi kâo hmâo pơtă laih kơ ih.”
Tơlơi Juăt Hrơi Saƀat
12Yêhôwa laĭ kơ Môis, 13“Brơi ih pơhiăp bĕ kơ ƀing ană plei pla Israel tui anai: ‘Brơi ƀing gih khŏm djă pioh hrơi saƀat Kâo yua kơ anai jing gru bơkơnăl tơ̆ng krah Kâo hăng ƀing gih amăng abih bang rơnŭk, kiăng kơ ƀing gih thâo Kâo jing Yêhôwa, Pô pơrơgoh ƀing gih. 14Tui anŭn, ƀing gih khŏm djă pioh hrơi saƀat, yua kơ anŭn jing hrơi rơgoh hiam kơ ƀing gih. Hlơi pô ngă pơgrĭ hrơi saƀat, khŏm tŭ tơlơi arăng pơdjai; laih anŭn hlơi pô ngă sa mơta bruă hơgĕt amăng hrơi anŭn, arăng či puh pơđuaĭ hĭ ñu mơ̆ng ƀing ană Israel. 15#Tơb 20:8-11; 23:12; 34:21; 35:2; Lêwi 23:3; Mơñă 5:12-14.Arăng či mă bruă amăng năm hrơi, hrơi tal tơjuh jing hrơi saƀat, jing hrơi pơdơi laih anŭn rơgoh hiam kơ Yêhôwa. Hlơi pô ngă sa mơta bruă hơgĕt amăng hrơi saƀat či tŭ tơlơi arăng pơdjai. 16Tui anŭn yơh, brơi kơ ƀing ană plei pla Israel khŏm djă pioh hrơi saƀat amăng abih bang rơnŭk kar hăng sa kơnol pơgop hlŏng lar. 17#Tơb 20:11.Anŭn jing sa gru bơkơnăl hlŏng lar tơ̆ng krah Kâo hăng ƀing ană plei pla Israel, yua kơ Yêhôwa hmâo hrih adai laih anŭn lŏn tơnah amăng năm hrơi, găn hrơi tal tơjuh Ñu pơdơi abih bang bruă laih anŭn pơdơi.’”
18Giơ̆ng kơ Ơi Adai pơhiăp laih hăng Môis ƀơi čư̆ Sinai, Yêhôwa brơi kơ ñu dua pŏk hnal kơnol pơgop, hnal hăng boh pơtâo mơ̆ng tơngan Ơi Adai Pô hmâo čih.
Currently Selected:
Tơlơi Tơbiă 31: JRA2016
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.
