Tơlơi Tơbiă 34
34
Khua Yang Brơi Hnal Tơlơi Juăt Phrâo
(Mơñă 10:1-5)
1Yêhôwa laĭ kơ Môis: “Trah bĕ dua pŏk hnal boh pơtâo kar hăng hnal tal hlâo; laih anŭn Kâo či čih ƀơi hnal anŭn khul tơlơi pơhiăp hmâo laih ƀơi hnal tal hlâo ih hmâo ngă pơčah hĭ laih. 2Mơguah pơgi, brơi ih prăp rơmet bĕ. Hlăk ưm mơguah brơi ih đĭ nao pơ čư̆ Sinai laih anŭn dơ̆ng ƀơi anăp Kâo ƀơi čŏng čư̆ anŭn. 3Anăm brơi hmâo hlơi đĭ nao hrŏm hăng ih ôh, kŏn brơi sa čô mơnuih rơbat hyu amăng čư̆ lơi; wơ̆t khul triu, rơmo ăt ƀu dưi ƀơ̆ng rơ̆k gah anăp čư̆ anŭn ôh.” 4Môis trah dua pŏk hnal boh pơtâo hrup hăng dua pŏk hnal tal hlâo. Ñu tơgŭ ưm mơguah djă ba dua pŏk hnal boh pơtâo đĭ nao pơ čư̆ Sinai tui hăng tơlơi Yêhôwa pơtă laih kơ ñu.
Ơi Adai Pơrơđah Hăng Môis
5Yêhôwa trŭn rai dŏ amăng kơthul, dŏ dơ̆ng hăng Môis laih anŭn pơhaih anăn Ñu jing Yêhôwa, 6#Tơb 20:5-6; Yap 14:18; Mơñă 5:9-10; 7:9-10.Yêhôwa nao ƀơi anăp ñu laih anŭn laĭ:
“Yêhôwa! Yêhôwa!
Jing Ơi Adai bă hăng tơlơi hiam laih anŭn thâo pap,
Kaih hil,
Pơdrŏng hăng tơlơi khăp laih anŭn bă hăng tơlơi sĭt.
7Ñu djă pioh tơlơi khăp kơ lu rơbâo rơnŭk mơnuih,
Pap brơi tơlơi sat ƀai, tơlơi gao tơlơi juăt, laih anŭn tơlơi soh;
Samơ̆ ƀu yap ôh mơnuih hmâo tơlơi soh jing ƀu hmâo soh ôh,
Samơ̆ yua kơ tơlơi soh ƀing ơi adon, Ñu či pơkơhmal ană tơčo truh kơ rơnŭk tal klâo laih anŭn tal pă.”
8Môis kŭp akŏ ƀơi lŏn mơtam laih anŭn kơkuh pơpŭ. 9Ñu laĭ: “Ơ Khua Yang, tơdah kâo dưi hmâo tơlơi pap ƀơi anăp Ih, rơkâo kơ Ih nao hrŏm hơbĭt hăng ƀing gơmơi, wơ̆t dah anai jing ană plei pla khăng akŏ; rơkâo Ih pap brơi kơ tơlơi sat ƀai laih anŭn tơlơi soh ƀing gơmơi, laih anŭn mă tŭ gơmơi jing kong ngăn Ih.”
Kơnol Pơgop
(Tơb 23:14-19; Mơñă 7:1-5; 16:1-17)
10Yêhôwa laĭ: “Anai nê, Kâo pơdơ̆ng sa kơnol pơgop: Ƀơi anăp abih bang ană plei pla ih, Kâo či ngă khul bruă yom pơphan, khul bruă arăng aka ngă djơ̆ ôh amăng lŏn tơnah ƀôdah amăng sa boh lŏn čar; Abih bang djuai mơnuih jum dar ih či ƀuh bruă Yêhôwa; yua kơ bruă Kâo či ngă anai kơ ih jing sa bruă năng kơ hwĭ. 11Răng kơđiăng bĕ kơ khul tơlơi Kâo pơtă kơ ih hrơi anai: Anai nê kâo či puh pơđuaĭ ƀing Amôrit, ƀing Kanaan, ƀing Hitit, ƀing Pêrisit, ƀing Hiwit laih anŭn ƀing Jêbusit mơ̆ng anăp ih. 12Răng bĕ, anăm ngă tơlơi pơgop hăng ƀing mơnuih dŏ amăng čar ih či mŭt dŏ ôh hwĭ kơ gơñu či jing čơđong ƀơč ih. 13#Mơñă 16:21.Samơ̆ brơi ƀing gih pơrai hĭ khul kơƀang ngă yang, taih pơčah hĭ tơmeh gơñu kơkuh pơpŭ, laih anŭn pơtơglưh hĭ khul rup yang gơñu. 14Anăm kơkuh pơpŭ kơ yang pơkŏn ôh, yua kơ Yêhôwa anăn Ñu jing Pô Thâo Gar; sĭt Ñu jing Ơi Adai Thâo Gar. 15Anăm ngă tơlơi pơgop hăng mơnuih dŏ amăng čar anŭn ôh, yua kơ tơdang gơñu ngă tơlơi rih răm hăng ƀing yang pơkŏn laih anŭn pơyơr mơnơ̆ng ngă yang kơ yang gơñu, gơñu či jak iâu ƀing gih laih anŭn ƀing gih či ƀơ̆ng hĭ mơnơ̆ng pơyơr kơ rup yang. 16Ăt anăm ih mă brơi ƀing ană đah kơmơi gơñu kơ ƀing ană đah rơkơi ƀing gih dŏ ôh, hwĭ kơ ƀing ană đah kơmơi gơñu ngă tơlơi rih răm hăng ƀing yang pơkŏn laih anŭn plư ƀing ană đah rơkơi ƀing gih ngă tơlơi rih răm hăng yang ƀing gơñu.
17Anăm ngă rup trah kơ ih pô ôh.”#Tơb 20:4; Lêwi 19:4; Mơñă 5:8; 27:15.
Khul Hrơi Phĕt Prŏng Amăng Sa Thŭn
(Tơb 23:14-19; Mơñă 16:1-17)
18 #
Tơb 12:14-20; Lêwi 23:6-8; Yap 28:16-25. “Brơi ih djă pioh phĕt Ƀañ Tơpŭng Ƀu Hmâo Tơpơi. Hrup hăng kâo pơtă laih, brơi ƀing gih ƀơ̆ng ƀañ tơpŭng ƀu hmâo tơpơi amăng tơjuh hrơi ƀơi bơyan hmâo pơkơčah laih amăng blan Abip; yua kơ amăng blan Abip ƀing gih hmâo tơbiă laih mơ̆ng čar Êjip.
19 #
Tơb 13:2. Abih bang ană kơčoa jing lơ̆m kơ Kâo; abih bang khul hlô mơnơ̆ng tơno amăng hlô mơnơ̆ng ƀing gih, khul rơmo ƀôdah khul triu tuh blŭng hlâo, ăt kar kaĭ mơ̆n. 20Brơi ih song glaĭ ană aseh kle tuh blŭng hlâo hăng sa drơi ană triu ƀôdah ană bơbe. Tơdah ih ƀu song glaĭ ñu ôh, brơi ih joh hĭ bĕ tơkuai ñu. Khŏm song glaĭ bĕ abih bang ƀing ană đah rơkơi kơčoa ih.#Tơb 13:13.
Ƀu hmâo hlơi dưi nao ƀơi anăp Kâo hăng tơngan đôč đač ôh.
21 #
Tơb 20:9-10; 23:12; 31:15; 35:2; Lêwi 23:3; Mơñă 5:13-14. Brơi ih mă bruă amăng năm hrơi, samơ̆ hrơi tal tơjuh brơi ih pơdơi, wơ̆t dah hlăk jing bơyan tơjŭ pla ƀôdah bơyan hơpuă ih ăt khŏm pơdơi mơ̆n.
22Brơi ih djă pioh bĕ Phĕt kơ Khul Hrơi Kŏm, hăng boh troh hlâo hlang amăng bơyan yuă pơdai tơpŭng, laih anŭn Phĕt Hơpuă ƀơi đŭt thŭn.#Lêwi 23:15-21,39-43; Yap 28:26-31.
23Rĭm thŭn klâo wơ̆t, abih bang ƀing đah rơkơi khŏm pơrơđah ƀơi anăp Yêhôwa Ơi Adai, jing Ơi Adai kơ ƀing Israel. 24Yua kơ Kâo či puh pơđuaĭ ƀing ană plei pla mơ̆ng ƀô̆ mơta ih laih anŭn Kâo či pŏk lar guai lŏn ih; ƀu či hmâo hlơi hưp kơ lŏn ih tơdang ih nao pơrơđah ih pô ƀơi anăp Yêhôwa Ơi Adai ih klâo wơ̆t rĭm thŭn.
25 #
Tơb 12:10. Ih ƀu dưi pơyơr kơ Kâo drah hlô mơnơ̆ng ngă yang hrŏm hơbĭt hăng ƀañ hmâo tơpơi ôh; ăt ƀu dưi djă pioh ôh hlô mơnơ̆ng ngă yang Phĕt Tơlơi Găn truh kơ mơguah hrơi tơdơi.
26Ih khŏm pơyơr boh troh hlâo hlang hiam hloh mơ̆ng lŏn hmua ba pơ sang Yêhôwa Ơi Adai ih.#Mơñă 26:2; 14:21.
Ih anăm hơtuk ôh ană bơbe amăng ia tơsâo amĭ gơ̆.”
27Yêhôwa ăt laĭ hăng Môis: “Čih bĕ khul boh pơhiăp anai, yua kơ kiaŏ tui hăng tơlơi pơhiăp anai yơh Kâo pơdơ̆ng laih kơnol pơgop hăng ih laih anŭn hăng ƀing Israel.” 28Môis dŏ pơ anŭn hrŏm hơbĭt hăng Yêhôwa pă pluh hrơi laih anŭn pă pluh mlam; ƀu ƀơ̆ng huă, kŏn mơñum ia lơi. Yêhôwa čih ƀơi dua pŏk hnal boh pơtâo khul boh pơhiăp kơnol pơgop, anŭn jing pluh mơta tơlơi juăt.
Môis Djă Trŭn Dua Pŏk Hnal Kơnol Pơgop
29 #
II Kôr 3:7-16. Hlăk djă trŭn dua pŏk hnal kơnol pơgop mơ̆ng čư̆ Sinai. Môis ƀu thâo ôh kơ klĭ ƀô̆ mơta ñu bơngač rơđah yua kơ ñu hmâo pơhiăp hrŏm hơbĭt hăng Yêhôwa. 30Arôn wơ̆t hăng abih bang ƀing ană plei pla Israel ƀuh Môis, ƀuh klĭ ƀô̆ mơta ñu bơngač rơđah laih anŭn gơñu hwĭ ƀu khĭn nao jĕ ñu ôh. 31Samơ̆ Môis iâu ƀing gơ̆. Arôn hăng abih bang ƀing khua kơnơ̆ng bruă amăng ƀing ană plei pla Israel leng kơ wir glaĭ, Môis pơhiăp hăng ƀing gơñu. 32Tơdơi kơ anŭn, abih bang ƀing ană plei pla Israel leng kơ nao jĕ, ñu brơi kơ ƀing gơ̆ hơdôm tơlơi pơđar Yêhôwa hmâo pơtă laih kơ ñu ƀơi ngŏ čư̆ Sinai. 33Tơ Môis pơdơi pơhiăp kơ ƀing gơ̆, Môis mă khăn gom ƀô̆ mơta ñu. 34Samơ̆ rĭm wơ̆t Môis nao ƀơi anăp Yêhôwa kiăng pơhiăp hăng Ñu, gơ̆ mă lui hĭ khăn gom hlŏng truh tơ gơ̆ tơbiă; laih anŭn ruai glaĭ hăng ană plei pla Israel khul tơlơi hơgĕt Yêhôwa hmâo pơtă laih kơ ñu. 35Hlăk anŭn ƀing ană plei pla Israel ƀuh ƀô̆ mơta Môis bơngač rơđah, tui anŭn yơh Môis khŏm mă khăn gom hĭ ƀô̆ mơta ñu tơl ñu mŭt nao pơhiăp hăng Yêhôwa.
Currently Selected:
Tơlơi Tơbiă 34: JRA2016
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.
