Tơlơi Tơbiă 35
35
Tơlơi Juăt kơ Hrơi Saƀat
1Môis iâu abih bang ƀing ană Israel, laih anŭn laĭ: “Anai jing khul bruă Yêhôwa pơtă brơi kơ ƀing gih khŏm ngă tui.
2 #
Tơb 20:8-11; 23:12; 31:15; 34:21; Lêwi 23:3; Mơñă 5:12-14. Arăng či mă bruă amăng năm hrơi, samơ̆ brơi ƀing gih khŏm djă pioh hrơi tal tơjuh či jing rơgoh hiam jing hrơi saƀat jing hrơi pơdơi pioh kơ Yêhôwa. Hlơi pô ngă sa mơta bruă hơgĕt amăng hrơi anŭn, arăng či pơdjai ñu. 3Amăng hrơi saƀat ƀing gih ƀu dưi pơtŏ apui amăng anih ƀing gih dŏ ôh.”
Khul Mơnơ̆ng Yua Kiăng kơ Pơdơ̆ng Sang Khăn
(Tơb 25:1-9)
4Môis laĭ kơ abih bang ƀing ană Israel: “Anai boh pơhiăp Yêhôwa hmâo pơtă: 5Mă bĕ mơ̆ng abih bang mơnơ̆ng ƀing gih hmâo pơyơr kơ Yêhôwa. Hlơi pô hmâo pran jua čơmah, brơi ñu ba mơnơ̆ng pơyơr kơ Yêhôwa hrup hăng mah, prăk laih anŭn kong; 6mrai mơtah, mrai mriah jŭ, mrai mriah huč, mơnal mrai hơbuă, blâu bơbe, 7klĭ triu tơno añrŭ ia mriah, klĭ akan hiam; kơyâo akasi, 8ia jâu apui kơđen, khul mơnơ̆ng ƀâu hiam kiăng kơ pơhram ia ƀâu hiam laih anŭn mơnơ̆ng ƀâu mơngưi; 9boh pơtâo ônik laih anŭn lu boh pơtâo yom pơkŏn kiăng ƀlit dưm ƀơi êphot laih anŭn ƀơi hnal băk ƀơi tơda.
Khul Mơnơ̆ng Amăng Sang Khăn
(Tơb 39:32-43)
10Amăng ƀing gih hlơi jing mơnuih kơhnâo bruă rai bĕ ngă abih bang khul bruă Yêhôwa hmâo pơtă brơi: 11sang jưh laih anŭn khăn păng, kơnuĕ, hnap, kơyâo găn, tơmeh, laih anŭn bluh tơmeh; 12hip kơnol pơgop wơ̆t hăng gai čơkung ñu, kơhnơ̆p tơlơi pap, laih anŭn khăn păng; 13kơƀang wơ̆t hăng gai čơkung ñu, laih anŭn abih bang mơnơ̆ng yua hrŏm hăng ƀañ tơpŭng pơyơr kơ Ơi Adai; 14gơ̆ng apui kơđen, gơnam mơnơ̆ng yua, apui kơđen laih anŭn ia jâu apui kơđen; 15kơƀang ngă yang čuh mơnơ̆ng ƀâu hiam wơ̆t hăng gai čơkung ñu, ia ƀâu hiam, mơnơ̆ng ƀâu hiam; laih anŭn khăn păng ƀơi bah amăng mŭt sang khăn; 16kơƀang ngă yang mơnơ̆ng pơyơr čuh hăng grang kong, gai čơkung, laih anŭn abih bang mơnơ̆ng yua amăng kơƀang ngă yang, kơthŭng ia wơ̆t hăng tơkai ñu; 17mơnal păng ƀơi wăl sang, tơmeh, bluh tơmeh laih anŭn khăn păng ƀơi amăng mŭt wăl sang; 18rĭm gai pơ̆ng sang khăn, rĭm gai pơ̆ng laih anŭn hrĕ akă wăl sang; 19sum ao ngă hăng mrai kiăng pioh kơ bruă amăng Anih Rơgoh Hiam, sum ao rơgoh hiam kơ khua ngă yang Arôn, laih anŭn sum ao kơ ƀing ană đah rơkơi ñu yua amăng bruă jing khua ngă yang.”
20Giơ̆ng kơ hmư̆ tơlơi anŭn, abih bang ană plei pla Israel tơbiă đuaĭ mơ̆ng Môis. 21Abih bang ƀing hmâo pran jua pơtrŭt laih anŭn hmâo tơlơi kiăng hiam rai hăng djă ba mơnơ̆ng pơyơr kơ Yêhôwa, kiăng yua amăng bruă pơdơ̆ng Sang Khăn, prăp pioh kơ khul gơnam yua amăng sang khăn laih anŭn tơčoh khul sum ao rơgoh. 22Tui anŭn ƀing ană đah rơkơi wơ̆t hăng ƀing ană đah kơmơi, abih bang hlơi pô hmâo pran jua čŏng čiăng rai mơ̆n. Gơñu djă ba buai, rơbưn, kong buh ƀơi tơngan, djŏp mơta mơnơ̆ng pơhrôp ngă hăng mah, laih anŭn pơyơr gơnam ngă hăng mah kơ Yêhôwa. 23Hlơi pô hmâo mrai mơtah, mrai mriah huč, mrai jŭ, bơnal hơbuă, blâu bơbe, klĭ triu tơno añrŭ ia mriah, laih anŭn klĭ akan hiam ăt hmâo ba rai mơ̆n. 24Hlơi pô hmâo mơnơ̆ng hơgĕt hăng prăk ƀôdah hăng kong leng kơ dưi ngă mơnơ̆ng pơyơr kơ Yêhôwa. Hlơi pô hmâo kơyâo akasi dưi yua kơ bruă hơgĕt ăt ba pơyơr mơ̆n. 25Abih bang ƀing đah kơmơi kơhnâo bruă leng kơ ba nao khul mơnơ̆ng ñu pô hmâo ngă laih hrup hăng rơwai mơñam bơnal hơbuă, mrai mơtah, mrai mriah huč, mriah jŭ; 26Ƀing đah kơmơi hmâo pran jua pơtrŭt laih anŭn kơhnâo bruă gơñu rơwai mơñam hăng blâu bơbe. 27Ƀing kơnơ̆ng bruă gĭt gai djă ba boh pơtâo ônik laih anŭn boh pơtâo yom pioh kơčar ƀơi êphot laih anŭn ƀơi hơnal băk ƀơi tơda; 28Gơñu ăt djă ba ia jâu čuh apui kơđen, khul mơnơ̆ng ƀâu hiam kiăng kơ pơkra pơhram ia ƀâu hiam laih anŭn mơnơ̆ng ƀâu hiam. 29Abih bang ană plei pla Israel, đah rơkơi wơ̆t hăng đah kơmơi hlơi dưi hmâo pran jua pơtrŭt kiăng pơyơr abih bang mơnơ̆ng hơgĕt amăng bruă Yêhôwa hmâo pơtă laih găn mơ̆ng Môis, leng djă ba mơnơ̆ng pơyơr kơ Yêhôwa tui hăng ñu pô kiăng.
Bêsalel hăng Ôhôliap
(Tơb 31:1-11)
30Môis laĭ kơ ƀing ană plei pla Israel: “Anai nê, Yêhôwa hmâo iâu laih Bêsalel ană đah rơkơi Uri, tơčo Hur, mơ̆ng kơnŭng djuai Yuđa. 31Ñu hmâo pha brơi gơ̆ bă blai Bơngăt Mơyang#35:31 Dưi pơblang dơ̆ng mơ̆n: tơlơi dưi mơyang. Ơi Adai, hrŏm hăng tơlơi kơhnâo, tơlơi thâo hluh, tơlơi thâo mĭn, laih anŭn tơlơi kơhnâo bruă amăng abih bang bruă hăng tơngan 32kiăng kơ pơčeh pơjing, ngă bruă hăng mah, hăng prăk laih anŭn hăng kong, 33kơčar boh pơtâo, ngă bruă trah kơyâo, laih anŭn djŏp mơta tơlơi bruă hăng tơngan. 34Ñu ăt brơi mơ̆n kơ gơ̆ tơlơi dưi pơhrăm arăng, laih anŭn pha brơi mơ̆n Ôhôliap ană đah rơkơi Ahisamak mơ̆ng kơnŭng djuai Đan. 35Ñu brơi kơ ƀing gơñu hăng tơlơi kơhnâo rơgơi, dưi ngă djŏp mơta bruă arăng ngă: bruă trah, bruă pơčeh pơjing, bruă kơteh laih anŭn bruă sĭt mơñam hrup hăng ia mơtah, mriah jŭ, mriah huč laih anŭn bơnal hơbuă ăt kar hăng djŏp mơta bruă kơ sa čô mơnuih kơhnâo bruă ƀôdah mơnuih hmâo tơlơi kơhnâo pơčeh pơjing bruă pơkŏn.”
Currently Selected:
Tơlơi Tơbiă 35: JRA2016
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.
