Luk 15
15
Triu Rơngiă
(Mat 18:12-14)
1Hlăk anŭn abih bang ƀing ring jia laih anŭn ƀing mơnuih soh nao giăm Yêsu kiăng hmư̆ tơlơi Ñu pơtô.#Luk 5:29-30. 2Ƀing Pharisi laih anŭn ƀing nai pơtô tơlơi juăt pơhiăp brŏk hăng laĭ: “Pô anai tŭ jum ƀing mơnuih soh laih anŭn ƀơ̆ng huă hrŏm hơbĭt hăng gơñu!”
3Yua kơ anŭn, Yêsu pơhiăp tơlơi bơhmutu anai kơ gơñu: 4“Hmâo hlơi mơ̆ amăng ƀing gih hmâo sa rơtuh drơi triu, tơdah rơngiă hĭ sa drơi, ñu ƀu lui hĭ ôh dua rơpăn pluh dua rơpăn drơi pơkŏn amăng tơdrŏn tač kiăng kơ nao sem sa drơi rơngiă laih tơl ƀuh ñu? 5Tơ gơ̆ ƀuh ñu laih, gơ̆ glăm ñu ƀơi bra hăng tơlơi hơ̆k mơak. 6Laih anŭn tơ ñu truh pơ sang, ñu iâu pơƀŭt ƀing giăng mah laih anŭn ƀing jum dar ñu hăng laĭ kơ gơñu: ‘Hơ̆k mơak bĕ hrŏm hơbĭt hăng kâo yua kơ kâo ƀuh glaĭ laih triu rơngiă anŭn.’ 7Ăt tui anŭn mơ̆n, Kâo laĭ kơ ƀing gih amăng adai či hmâo tơlơi hơ̆k mơak kơ sa čô mơnuih soh kơhmal tơlơi soh hloh kơ dua rơpăn pluh dua rơpăn čô mơnuih tơpă ƀu kiăng khŏm kơhmal tơlơi soh ôh.”
Asar Prăk Kak Rơngiă
8“Ƀôdah hmâo mơ̆ sa čô đah kơmơi hmâo pluh sar prăk kak, tơdah rơngiă hĭ sa asar, ñu ƀu čuh apui kơđen, kih sang laih anŭn sem hăng abih pran jua tơl ñu ƀuh? 9Laih anŭn tơ ñu ƀuh glaĭ prăk anŭn, ñu iâu pơƀŭt ƀing giăng mah laih anŭn ƀing jum dar hăng laĭ: ‘Hơ̆k mơak bĕ hrŏm hăng kâo, yua kơ kâo ƀuh glaĭ laih prăk kak rơngiă anŭn.’ 10Kar kaĭ mơ̆n, Kâo laĭ kơ ƀing gih thâo, ƀing ling jang hiam Ơi Adai mơak biă mă yua kơ sa čô mơnuih soh kơhmal tơlơi soh ñu.”
Ană Đah Rơkơi Rơngiă
11Giơ̆ng anŭn Yêsu ruai dơ̆ng: “Sa čô mơnuih hmâo dua čô ană đah rơkơi. 12Pô adơi laĭ hăng ama ñu: ‘Ơ ama, rơkâo ih pơpha brơi kâo črăn kong ngăn lơ̆m kơ kâo.’ Laih anŭn ama gơñu pơpha brơi kong ngăn kơ dua gơñu. 13Ƀu sui ôh mơ̆ng anŭn, adơi ñu mă abih gơnam ñu hmâo laih anŭn nao pơ sa boh čar ataih. Pơ anŭn ñu pơprŏt pơrai kong ngăn ñu hăng tơlơi hơdip ngui ngơr tă tăn. 14Tơ ñu pơplai hĭ abih gơnam laih, tơlơi ư̆ rơpa prŏng truh amăng čar anŭn, laih anŭn ñu čơdơ̆ng kơƀah kơƀap. 15Tui anŭn ñu khŏm nao mă bruă kơ sa čô mơnuih amăng čar anŭn. Pô anŭn pơkiaŏ ñu nao wai bơbui pơ tơdrŏn glai. 16Ñu kiăng biă mă ƀơ̆ng kơđuh rơtak arăng čem bơbui, samơ̆ arăng ƀu brơi ñu ƀơ̆ng sa mơta mơnơ̆ng hơgĕt ôh. 17Hlăk anŭn ñu hơdơr glaĭ, ñu laĭ amăng pran jua ñu: ‘Hmâo lu ƀing mơnuih mă bruă apah amăng sang ama kâo, gơñu hmâo djŏp ƀañ tơpŭng ƀơ̆ng laih anŭn rơbeh rơbai, samơ̆ kâo pơ anai či djai rơwet. 18Kâo či tơgŭ hăng glaĭ pơ ama kâo, laih anŭn kâo či laĭ hăng ñu: “Ơ Ama, kâo hmâo ngă soh laih hăng adai laih anŭn hăng ih. 19Kâo ƀu lăp ôh ih iâu kâo ană ih dơ̆ng. Yap bĕ kâo kar hăng mơnuih mă bruă apah amăng sang ih.”’
20Hnŭn yơh ñu tơgŭ mơtam glaĭ pơ ama ñu. Samơ̆ tơdang ñu ăt dŏ pơ ataih, ama ñu ƀuh ñu, glưh pran jua pap drap, đuaĭ nao kuar mă hăng čŭm ñu. 21Laih anŭn ană đah rơkơi ñu laĭ hăng ñu: ‘Ơ Ama, kâo hmâo ngă soh glaĭ laih hăng adai laih anŭn hăng ih. Kâo ƀu lăp ôh ih iâu kâo ană ih dơ̆ng.’ 22Samơ̆ ama ñu laĭ kơ ƀing ding kơna ñu: ‘Mă rai tañ bĕ ao phyung hiam hloh buh brơi ñu, čŭt rơbưn ƀơi čơđeng ñu, laih anŭn čŭt brơi čơkhŏ ƀơi tơkai ñu. 23Mă bĕ ană rơmo rơmŏng laih anŭn čuh. Brơi ƀing ta ƀơ̆ng huă laih anŭn hơ̆k mơak, 24Yua kơ ană kâo anai djai laih, samơ̆ ră anai ñu hơdip glaĭ laih. Ñu rơngiă laih, samơ̆ ră anai kâo ƀuh glaĭ dơ̆ng.’ Laih anŭn gơñu čơdơ̆ng ƀơ̆ng huă hơ̆k mơak.”
25“Hlăk anŭn ană kơčoa ñu dŏ pơ hmua. Tơ ñu glaĭ giăm truh pơ sang, ñu hmư̆ asăp gong, adoh laih anŭn tơlơi yŭn suang. 26Ñu iâu sa čô amăng ding kơna laih anŭn tơña hơgĕt tơlơi anŭn. 27Ding kơna anŭn laĭ kơ ñu: ‘Adơi ih hmâo glaĭ laih, laih anŭn ama ih hmâo čuh ană rơmo rơmŏng, yua kơ ƀuh gơ̆ glaĭ hiam drơi jan suaih prăl.’ 28Ană kơčoa ñu hil mơtam laih anŭn hơngah ƀu kiăng mŭt amăng sang ôh. Ama ñu tơbiă nao hăng pơđur alum ñu. 29Samơ̆ ñu laĭ hăng ama ñu: ‘Ơ ama lăng bĕ, sui thŭn laih kâo mă bruă kơ ih, kâo aka rơgao djơ̆ ôh asăp ih pơđar, samơ̆ ih ƀu brơi amơĭ kơ kâo sa drơi ană bơbe kiăng kơ kâo ngă tơlơi hơ̆k mơak hăng ƀing giăng mah kâo. 30Samơ̆ tơ ană ih anŭn, jing pô hmâo pơprŏt pơrai abih kong ngăn ih hăng ƀing đah kơmơi rih răm laih anŭn wơ̆t glaĭ, samơ̆ ih čuh kơ ñu ană rơmo rơmŏng ƀơ̆ng huă hơ̆k mơak.’ 31Ama ñu laĭ kơ ñu: ‘Ơ dăm, ih dŏ hrŏm hơbĭt hăng kâo nanao, laih anŭn abih bang gơnam kâo hmâo jing gơnam ih. 32Samơ̆ lăp yơh ngă tơlơi ƀơ̆ng huă laih anŭn hơ̆k mơak, yua kơ adơi ih anai djai laih, samơ̆ ră anai ñu hơdip glaĭ dơ̆ng; ñu rơngiă laih, samơ̆ ră anai ƀuh glaĭ dơ̆ng.’”
Currently Selected:
Luk 15: JRA2016
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.
