Luk 14
14
Yêsu Pơsuaih Sa Čô Mơnuih Ruă Pơôr
1Sa hrơi saƀat Yêsu nao ƀơ̆ng huă pơ sang sa čô khua ƀing Pharisi, laih anŭn arăng krăp lăng sŭ Ñu. 2Hlăk anŭn hmâo sa čô mơnuih ruă pơôr dŏ ƀơi anăp Ñu. 3Yêsu tơña ƀing nai pơtô tơlơi juăt laih anŭn ƀing Pharisi, laĭ: “Phiăn mơ̆ pơsuaih tơlơi ruă amăng hrơi saƀat?”
4Samơ̆ gơñu dŏ rơiăt. Yêsu rŭ pô ruă hăng pơsuaih gơ̆, laih anŭn brơi gơ̆ glaĭ. 5Giơ̆ng anŭn Yêsu laĭ kơ gơñu: “Hlơi amăng ƀing gih hmâo sa čô ană đah rơkơi ƀôdah sa drơi rơmo lĕ amăng ia dơmun amăng hrơi saƀat ñu ƀu tañ dui đĭ mơtam ôh hă?”#Mat 12:11.
6Gơñu ƀu dui laĭ glaĭ dơ̆ng ôh kơ tơlơi anŭn.
Tơlơi Luă Gŭ Laih Anŭn Tơlơi Jum Arăng
7Tơ Yêsu ƀuh ƀing mơnuih arăng jak ƀơ̆ng huă hrŏm hơbĭt leng kơ ruah mă anih dŏ pơpŭ yom, Ñu pơhiăp sa tơlơi bơhmutu, hăng laĭ kơ ƀing gơ̆, 8“Tơdah arăng jak ih kơ tơlơi ƀơ̆ng huă dŏ rơkơi bơnai, anăm dŏ ber ôh ƀơi anih arăng pơpŭ yom, hwĭ kơ amăng ƀing ñu jak anŭn hmâo sa čô pơpŭ yom hloh kơ ih.#Bơrt 25:6-7. 9Laih anŭn pô jak dua gih či laĭ kơ ih: ‘Brơi anih anai kơ pô anai bĕ,’ hlăk anŭn ih či mlâo hañ yua kơ ih khŏm nao dŏ pơ anih rơnuč hloh. 10Samơ̆ tơdah arăng jak ih, nao dŏ bĕ pơ anih rơnuč hloh. Tui anŭn kah tơdah pô jak ih truh, ñu dưi laĭ kơ ih: ‘Ơ giăng, đĭ nao dŏ pơ anih pơpŭ hloh.’ Tui anŭn ih či hmâo tơlơi pơpŭ ƀơi anăp abih bang ƀing dŏ ber ƀơ̆ng huă hrŏm hơbĭt hăng ih. 11Yua kơ hlơi pô pơđĭ ñu pô, arăng či pơtrŭn ñu, laih anŭn hlơi pô pơtrŭn ñu pô arăng či pŭ đĭ ñu.”#Mat 23:12; Luk 18:14.
12Yêsu ăt laĭ hăng pô jak Ñu: “Tơ ih pơkra tơlơi ƀơ̆ng huă yang hrơi dơ̆ng ƀôdah klam, anăm jak ôh ƀing gơyut gơyâo ih, ƀing adơi ayŏng, ƀing kơnŭng djuai ih, ƀôdah ƀing jum dar ih pơdrŏng sah, hwĭ kơ gơñu či jak glaĭ ih dơ̆ng laih anŭn ba glaĭ kơ ih kar kaĭ mơ̆n. 13Samơ̆ tơ ih pơkra tơlơi ƀơ̆ng mơñum jak bĕ ƀing ƀun rin, ƀing rơwen, ƀing đŭt tơkai tơngan laih anŭn ƀing bum mơta. 14Tui anŭn kah ih či hmâo tơlơi mơyun hiam, yua kơ gơñu ƀu dưi kla glaĭ kơ ih dơ̆ng ôh. Ih či hmâo tơlơi apah ƀơi hrơi ƀing tơpă klă hơdip glaĭ dơ̆ng.”
Bơhmutu Kơ Hrơi Ƀơ̆ng Huă Prŏng
(Mat 22:1-10)
15Sa čô amăng ƀing dŏ ber ƀơ̆ng huă hrŏm hăng Yêsu hmư̆ tơlơi anai, ñu laĭ kơ Yêsu: “Mơyun hiam yơh kơ hlơi pô či dưi ƀơ̆ng huă amăng dêh čar pơtao Ơi Adai!”
16Samơ̆ Yêsu laĭ kơ ñu: “Hmâo sa čô mơnuih pơkra tơlơi ƀơ̆ng huă mơñum prŏng laih anŭn jak lu mơnuih. 17Truh mông ƀơ̆ng huă, ñu pơkiaŏ nao ƀing ding kơna ñu laĭ kơ ƀing ñu jak laih: ‘Rai bĕ, yua kơ abih bang mơnơ̆ng pơkra laih.’ 18Samơ̆ abih bang ƀing gơñu leng kơ hơngah soh sel. Pô tal hlâo laĭ: ‘Kâo hmâo blơi sa blah hmua laih anŭn kâo kiăng nao lăng ñu. Kâo rơkâo tơlơi pap mơñai.’ 19Sa čô pơkŏn laĭ: ‘Kâo hmâo blơi rơma grop rơmo, laih anŭn kâo kiăng nao lăng gơñu. Kâo rơkâo tơlơi pap mơñai.’ 20Laih anŭn pô pơkŏn dơ̆ng laĭ: ‘Kâo phrâo pơdŏ bơnai, tui anŭn kâo ƀu dưi nao ôh.’ 21Ding kơna anŭn wơ̆t glaĭ laih anŭn laĭ kơ khua ñu. Pô sang anŭn hil laih anŭn laĭ kơ ding kơna ñu: ‘Nao tañ bĕ amăng jơlan prŏng laih anŭn jơlan anĕt amăng plei anai laih anŭn jak ba ƀing ƀun rin, ƀing rơwen, ƀing bum mơta, laih anŭn ƀing đŭt tơkai tơngan.’ 22Ding kơna laĭ: ‘Ơ khua kâo hmâo ngă laih tơlơi ih pơtă, samơ̆ ăt dŏ hmâo anih rơhông.’ 23Khua sang laĭ kơ ding kơna ñu: ‘Nao bĕ pơ jơlan prŏng laih anŭn jơlan anĕt gah rơngiao plei, laih anŭn pơgŏ ƀing ană plei rai mŭt kiăng kơ bă sang kâo. 24Yua kơ kâo laĭ kơ ƀing gih, ƀu hmâo ôh sa čô amăng ƀing mơnuih kâo jak hlâo anŭn či ƀơ̆ng mơnơ̆ng kâo.’”
Mơta Bruă Khŏm Ngă Kiăng Dưi Jing Ding Kơna Yêsu
(Mat 10:37-38)
25Ƀing mơnuih lu nao hrŏm hơbĭt hăng Yêsu. Ñu wir glaĭ lăng hăng laĭ kơ ƀing gơñu: 26“Tơdah hlơi pô đuaĭ tui Kâo samơ̆ ƀu bơrơmŭt ôh kơ amĭ ama, kơ ană bơnai, kơ ƀing ayŏng amai adơi, laih anŭn wơ̆t kơ tơlơi hơdip ñu pô, ñu ƀu dưi jing ding kơna Kâo ôh.#Mat 10:37. 27Hlơi pô ƀu glăm kơyâo bơrơkal ñu pô laih anŭn đuaĭ tui Kâo, ăt ƀu dưi jing ding kơna Kâo ôh.#Mat 10:38; 16:24; Mar 8:34; Luk 9:23.
28Tơdah hlơi pô amăng ƀing gih kiăng ngă sang rơñan, blŭng hlâo ƀu dŏ ber kiăng tĭng lăng nua ñu kiăng kơ thâo ñu dưi ngă pơgiơ̆ng mơ̆ sang rơñan anŭn? 29Hwĭ kơ giơ̆ng kơ ñu pơkra atur laih, samơ̆ ñu ƀu dưi ngă pơgiơ̆ng hĭ ôh, laih anŭn abih bang ƀing ƀuh tơlơi anŭn čơdơ̆ng mưč kơ ñu hăng laĭ, 30‘Mơnuih anai čơdơ̆ng ngă sang, samơ̆ ñu ƀu dưi ngă pơgiơ̆ng ôh.’ 31Ƀôdah hmâo mơ̆ pơtao tơdang ñu nao pơblah hăng sa čô pơtao pơkŏn, samơ̆ ƀu dŏ ber črŏng sai hlâo ôh kiăng thâo ñu djă ba pluh rơbâo tơhan dưi mơ̆ pơblah hăng pơtao hmâo dua pluh rơbâo tơhan? 32Tơdah ƀu dưi ôh, tơdang pô ayăt ăt dŏ pơ ataih, ñu či pơkiaŏ nao sa tơpul ƀing pơala kiăng rơkâo tơlơi rơnŭk rơnua. 33Tui anŭn mơ̆n hlơi pô amăng ƀing gih ƀu lui hĭ ôh abih bang tơlơi ñu hmâo, ñu ƀu dưi jing ding kơna Kâo ôh.”
Hra Rơngiă Ia Mơsĭn
(Mat 5:13; Mar 9:50)
34“Hra jing mơnơ̆ng hiam, samơ̆ tơdah ñu rơngiă hĭ mơnâo mơsĭn ñu, hăng hơgĕt arăng či ngă ñu mơsĭn glaĭ dơ̆ng? 35Hra anŭn ƀu tŭ yua kơ lŏn hmua dơ̆ng ôh, kŏn tŭ yua kơ pơlŭk hăng kơmơ̆k lơi. Arăng tuh hĭ ñu pơ gah rơngiao. Hlơi pô hmâo tơngia dưi hmư̆, brơi ñu hmư̆ bĕ.”
Currently Selected:
Luk 14: JRA2016
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.
