Luk 13
13
Kơhmal Tơlơi Soh Ƀôdah Răm Rai
1Ăt hlăk anŭn mơ̆n, hmâo đơđa mơnuih pơ anŭn ră ruai kơ Yêsu tơlơi truh laih kơ ƀing mơnuih Galilê, kơ tơlơi Pilat pơdjai ƀing gơ̆, laih anŭn gơñu pơlŭk hăng drah hlô mơnơ̆ng ngă yang ƀing gơ̆ hlăk dŏ pơyơr. 2Yêsu laĭ glaĭ kơ gơñu: “Ƀing gih pơmĭn mơ̆ ƀing mơnuih Galilê anŭn jing ƀing soh sat hloh kơ abih bang ƀing Galilê pơkŏn, yua kơ gơñu tŭ tơlơi tơnap tap kar hăng anŭn? 3Kâo laĭ kơ ƀing gih, ư ưh, samơ̆ tơdah ƀing gih ƀu kơhmal ôh kơ tơlơi soh ƀing gih, abih bang ƀing gih či răm rai kar kaĭ mơ̆n. 4Ƀôdah bơ ƀing pluh sapăn čô sang rơñan Silôê glưh kơtĭt djai hĭ ƀing gơ̆, ƀing gih pơmĭn mơ̆ ƀing gơ̆ jing ƀing soh sat hloh kơ abih bang ƀing pơkŏn dŏ amăng plei Yêrusalem? 5Kâo laĭ kơ ƀing gih, ư ưh, samơ̆ tơdah ƀing gih ƀu kơhmal ôh tơlơi soh ƀing gih, abih bang ƀing gih či răm rai kar kaĭ mơ̆n.”
Tơlơi Bơhmutu Kơ Phŭn Hra Ƀu Mơboh
6Giơ̆ng anŭn Ñu pơhiăp tơlơi bơhmutu anai: “Sa čô mơnuih pla sa phŭn hra amăng đang boh kơƀâu ñu. Ñu nao hơduah boh pơ anŭn, samơ̆ ƀu ƀuh ôh. 7Ñu laĭ kơ pô pla phŭn boh kơƀâu: ‘Lăng bĕ, klâo thŭn laih Kâo rai hơduah boh mơ̆ng phŭn hra anai, samơ̆ Kâo ƀu ƀuh boh ôh. Drom hĭ ñu bĕ, yua hơgĕt pioh lui ñu ngă gơniă lŏn đôč đač?’ 8Pô wai đang laĭ glaĭ: ‘Ơ khua, pioh ñu sa thŭn dơ̆ng, kâo či klơi jum dar phŭn ñu laih anŭn pioh djah. 9Tơdah thŭn tơdơi ñu mơboh, hiam yơh. Samơ̆ tơdah ñu ƀu mơboh ôh, ih či drom hĭ ñu.’”
Yêsu Pơsuaih Sa Čô Đah Kơmơi Amăng Hrơi Saƀat
10Amăng hrơi saƀat Yêsu dŏ pơtô amăng sang bơjơnum. 11Pơ anŭn hmâo sa čô đah kơmơi yang sat ngă kơ gơ̆ rơwen amăng pluh sapăn thŭn laih. Rŏng gơ̆ gô trŭn, laih anŭn drơi jan ƀu dưi dŏ dơ̆ng tơpă dơ̆ng ôh. 12Tơ Yêsu ƀuh ñu, Ñu iâu laih anŭn laĭ kơ gơ̆: “Ơ đah kơmơi, ih klaih laih mơ̆ng ruă ih.” 13Tơ Yêsu ah tơngan ƀơi gơ̆. Tañ mơtam gơ̆ dơ̆ng tơpă glaĭ laih anŭn pơpŭ bơni hơơč kơ Ơi Adai.
14Samơ̆ khua wai sang bơjơnum hil yua kơ Yêsu pơsuaih amăng hrơi saƀat, laih anŭn ñu laĭ kơ ƀing ană plei: “Hmâo năm hrơi pioh mă bruă; rai bĕ amăng khul hrơi anŭn kiăng hmâo tơlơi pơsuaih, samơ̆ anăm rai ôh amăng hrơi saƀat.”#Tơb 20:9-10; Mơñă 5:13-14.
15Khua Yang laĭ glaĭ kơ ñu: “Ơ ƀing plơ̆m ƀlor, amăng hrơi saƀat, ƀu djơ̆ ôh hă rĭm čô amăng ƀing gih leng kơ kleh rơmo ƀôdah aseh kle ƀing gih mơ̆ng war laih anŭn ba ñu nao mơñum ia? 16Đah kơmơi anai jing ană Abraham, yang sat hmâo čaŏ ñu pluh sapăn thŭn laih, hyư̆m ngă ƀu dưi ôh hă yaih brơi ñu amăng hrơi Saƀat?” 17Tơ Yêsu pơhiăp tơlơi anŭn, abih bang ƀing ayăt Ñu mlâo hañ soh sel; laih anŭn abih bang ƀing ană plei pla hơ̆k mơak yua kơ abih bruă yom pơphan guh kơang Ñu hmâo ngă laih.
Tơlơi Bơhmutu Kơ Asar Añăm Bơi
(Mat 13:33)
18Yua kơ anŭn Yêsu laĭ: “Dêh čar pơtao Ơi Adai jing kar hăng hơgĕt? Laih anŭn hăng hơgĕt Kâo či bơkơnar ñu? 19Dêh čar pơtao anŭn jing kar hăng sa asar pơjeh añăm bơi sa čô mơnuih sai amăng đang. Ñu čăt laih anŭn jing sa ƀĕ phŭn kơyâo laih anŭn čĭm amăng adai ngă hruh amăng than ñu.”
20Laih anŭn Yêsu laĭ dơ̆ng: “Hăng hơgĕt kâo či bơkơnar kơ dêh čar pơtao Ơi Adai? 21Dêh čar pơtao anŭn jing kar hăng tơpơi sa čô đah kơmơi pơlŭk hăng klâo hơnơ̆ng tơpŭng tơl abih tơpŭng anŭn bô̆ đĭ.”
Bah Amăng Gơniă
(Mat 7:13-14,21-23)
22Yêsu găn nao plei prŏng laih anŭn plei anĕt tơdang Ñu nao Ñu pơtô rah hlŏng truh pơ plei Yêrusalem. 23Hmâo sa čô tơña kơ Ñu: “Ơ Khua Yang, djơ̆ mơ̆ kơnơ̆ng ƀiă mơnuih dưi klaih?”
24Yêsu laĭ kơ gơñu: “Brơi ƀing gih gir kơtir mŭt bah amăng gơniă; yua kơ Kâo laĭ kơ ƀing gih, lu mơnuih hơduah kiăng mŭt, samơ̆ ƀu dưi ôh. 25Tơ pô sang tơgŭ laih anŭn krư̆ hĭ bah amăng, ƀing gih či dŏ pơ gah rơngiao laih anŭn khŏk bah amăng hăng laĭ: ‘Ơ Khua, pŏk brơi bah amăng kơ gơmơi đa.’ Ñu či laĭ glaĭ kơ ƀing gih: ‘Kâo ƀu thâo ôh mơ̆ng pă ƀing gih rai.’ 26Hlăk anŭn ƀing gih či laĭ: ‘Gơmơi hmâo ƀơ̆ng huă mơñum laih ƀơi anăp Ih, laih anŭn Ih hmâo pơtô laih amăng plei pla gơmơi.’ 27Samơ̆ ñu či laĭ: ‘Kâo laĭ kơ ƀing gih, kâo ƀu thâo ôh mơ̆ng pă ƀing gih rai; đuaĭ bĕ mơ̆ng kâo, ơ abih bang ƀing ngă bruă soh sat!’#Adoh 6:8. 28Hlăk anŭn ƀing gih či ƀuh Abraham, Isak, Yakôp, laih anŭn abih bang ƀing pô laĭ lui hlâo amăng dêh čar pơtao Ơi Adai, bơ ƀing gih pô arăng či glŏm hĭ pơ gah rơngiao, anih hmâo tơlơi čŏk hia laih anŭn kĕ tơgơi.#Mat 22:13; 25:30.#Mat 8:11-12. 29Laih anŭn či hmâo ƀing rai mơ̆ng ngŏ, mơ̆ng yŭ, mơ̆ng kơdư laih anŭn mơ̆ng dơnŭng, dŏ ber ƀơ̆ng huă amăng dêh čar pơtao Ơi Adai. 30Sĭt yơh, ƀing tơdơi či jing hlâo, laih anŭn ƀing hlâo či jing tơdơi.”#Mat 19:30; 20:16; Mar 10:31.
Yêsu Rơngot Kơ Plei Yêrusalem
(Mat 23:37-39)
31Ƀơi mông anŭn hmâo ƀing Pharisi rai laĭ kơ Ñu: “Đuaĭ bĕ mơ̆ng anih anai, yua kơ Hêrôt kiăng pơdjai Ih.”
32Ñu laĭ kơ ƀing anŭn: “Nao laĭ bĕ kơ asâo tan anŭn: ‘Hrơi anai, hrơi pơgi, Kâo puh pơđuaĭ yang sat laih anŭn pơsuaih tơlơi duăm ruă, truh hrơi tal klâo Kâo či pơgiơ̆ng hĭ bruă Kâo. 33Wơ̆t dah tui anŭn hrơi anai, hrơi pơgi, hrơi kơdih Kâo ăt khŏm či rơbat nao; yua kơ sa čô pô laĭ lui hlâo ƀu dưi djai gah rơngiao kơ plei Yêrusalem ôh.’
34Ơ Yêrusalem, Yêrusalem! Ih hmâo pơdjai laih ƀing pô laĭ lui hlâo laih anŭn glŏm boh pơtâo kơ ƀing mơnuih Ơi Adai hmâo pơkiaŏ rai pơ ih. Hmâo lu wơ̆t laih Kâo kiăng pơƀŭt glaĭ ƀing ană bă ih kar hăng mơnŭ ania kruk ană ñu kiăng kơ krôp gah yŭ čăng, samơ̆ ih ƀu kiăng ôh! 35Anai nê, sang ƀing gih či jing hĭ rơngol. Laih anŭn Kâo laĭ kơ ƀing gih, ƀing gih ƀu či ƀuh Kâo dơ̆ng ôh tơl ƀing gih či laĭ: ‘Mơyun hiam yơh kơ Pô rai amăng anăn Khua Yang!’”#Adoh 118:26; Yêr 22:5.
Currently Selected:
Luk 13: JRA2016
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.
