Luk 12

Răng Bĕ Kơ Ƀing Plơ̆m Ƀlor

(Mat 10:26-27)

1Hlăk anŭn, hmâo lu rơbâo čô mơnuih pơƀŭt glaĭ hrŏm hơbĭt tơl pơjuă tơdruă, blŭng hlâo Yêsu čơdơ̆ng pơhiăp kơ ƀing ding kơna Ñu: “Răng bĕ kơ tơpơi ƀing Pharisi, jing tơlơi plơ̆m ƀlor.#Mat 16:6; Mar 8:15. 2Ƀu hmâo tơlơi hơgĕt arăng pơdŏp tơl ƀu či pŏk hĭ laih anŭn ƀu hmâo tơlơi hơgĕt hơgơ̆m tơl ƀu či pơrơđah brơi.#Mar 4:22; Luk 8:17. 3Yua anŭn yơh, hơgĕt tơlơi ƀing gih pơhiăp laih amăng anih mơmŏt arăng či hmư̆ amăng anih bơngač; laih anŭn hơgĕt tơlơi ƀing gih pơhiăp phač amăng anih hơgơ̆m arăng či pơhaih ƀơi hăng ngŏ bơbŭng sang.”

Pô Năng Lăp Kơ Ta Khŏm Hwĭ

(Mat 10:28-31)

4“Kâo laĭ kơ ƀing gih, ơ ƀing gơyut Kâo, Anăm hwĭ ôh kơ ƀing pơdjai drơi jan, samơ̆ giơ̆ng anŭn gơñu ƀu dưi ngă hơgĕt dơ̆ng ôh. 5Samơ̆ Kâo či pơhaih brơi kơ ƀing gih kơ hlơi pô ƀing gih khŏm hwĭ: Hwĭ bĕ Ơi Adai yua kơ giơ̆ng Ñu hmâo pơdjai ƀing gih, Ñu hmâo tơlơi dưi glŏm hĭ ƀing gih amăng war apui; Djơ̆ yơh, Kâo laĭ kơ ƀing gih, hwĭ bĕ kơ Ñu!

6Ƀu djơ̆ ôh hă rơma drơi čĭm gač arăng sĭ dua kak đôč? Samơ̆ Ơi Adai ƀu wơr bĭt ôh sa drơi amăng ƀing gơñu. 7Wơ̆t ƀuk ƀơi akŏ ƀing gih Ơi Adai yap abih laih. Anăm hwĭ ôh, ƀing gih jing yom hloh kơ lu drơi čĭm gač.”

Pơhaih Ƀôdah Hơngah Yêsu Krist

(Mat 10:32-33; 12:32; 10:19-20)

8“Kâo laĭ kơ ƀing gih, hlơi pô pơhaih Kâo ƀơi anăp arăng, Ană Mơnuih ăt či pơhaih ñu ƀơi anăp ƀing ling jang Ơi Adai. 9Samơ̆ hlơi pô hơngah Kâo ƀơi anăp mơnuih, Kâo či hơngah ñu ƀơi anăp ƀing ling jang Ơi Adai.

10Hlơi pô pơhiăp pơkơdơ̆ng hăng Ană Mơnuih, či hmâo tơlơi pap brơi; samơ̆ hlơi pô pơhiăp pơgao hmiah hăng Yang Bơngăt Hiam ƀu či hmâo tơlơi pap brơi ôh.#Mat 12:32; Mar 3:29.

11Tơ arăng dui ba ƀing gih ƀơi anăp sang bơjơnum, ƀing khua wai lăng, laih anŭn ƀing djă tơlơi dưi, anăm rŭng răng ôh kơ hyư̆m tơlơi ƀing gih či pơhiăp pơgang ƀing gih pô, ƀôdah hơgĕt tơlơi ƀing gih či laĭ glaĭ.#Mat 10:19-20; Mar 13:11; Luk 21:14-15. 12Yua kơ ƀơi mông anŭn mơtam Yang Bơngăt Hiam či pơtô ƀing gih hơgĕt tơlơi djơ̆ ƀing gih či pơhiăp.”

Bơhmutu Pô Pơdrŏng Mlŭk

13Sa čô amăng ƀing mơnuih lu laĭ kơ Yêsu: “Ơ nai, laĭ brơi kơ ayŏng kâo pơpha kong ngăn hăng kâo.”

14Samơ̆ Yêsu laĭ kơ ñu: “Ơ gơyut, hlơi brơi kâo jing khua phat kơđi ƀôdah pô pơpha kong ngăn kơ ƀing gih?” 15Laih anŭn Yêsu laĭ kơ gơñu: “Răng bĕ, anăm hưp ham kơ dram gơnam ôh, yua kơ tơlơi hơdip sa čô mơnuih ƀu djơ̆ yua mơ̆ng ñu hmâo kong ngăn rơbeh rơbai ôh.”

16Laih anŭn Yêsu pơhiăp sa tơlơi bơhmutu kơ gơñu tui anai: “Đang hmua sa čô mơnuih pơdrŏng anŭn mơboh lu biă mă, 17laih anŭn ñu pơmĭn amăng pran jua ñu: ‘Hơgĕt kâo či ngă, yua kơ kâo ƀu hmâo dơ̆ng tah anih pioh pơdai kâo?’ 18Ñu laĭ: ‘Tui anai kâo či ngă: kâo či ruh hĭ abih atông kâo laih anŭn pơdơ̆ng đĭ lu boh atông prŏng hloh dơ̆ng; laih anŭn ƀơi anŭn kâo či pơƀŭt pioh abih pơdai kâo laih anŭn dram gơnam kâo. 19Laih anŭn kâo či laĭ kơ bơngăt kâo pô: “Ơ bơngăt kâo, ih hmâo lu dram gơnam pioh brơi kơ lu thŭn. Ih pơdơi bĕ, ƀơ̆ng huă, mơñum laih anŭn dŏ hơ̆k mơak bĕ.”’ 20Samơ̆ Ơi Adai laĭ kơ ñu: ‘Ơ mơnuih mlŭk! Mlam anai Ơi Adai či mă glaĭ bơngăt ih. Laih anŭn dram gơnam ih prăp rơmet laih, hlơi pô či mă tŭ?’

21Hlơi pô răk pioh lu dram gơnam kơ ñu pô, samơ̆ ƀu pơdrŏng amăng Ơi Adai ôh ăt jing kar hăng anŭn mơ̆n.”

Anăm Ƀlơ̆ng Bơngơ̆t

(Mat 6:25-34)

22Laih anŭn Yêsu laĭ kơ ƀing ding kơna Ñu: “Yua kơ anŭn yơh Kâo laĭ kơ ƀing gih, anăm ƀlơ̆ng bơngơ̆t ôh kơ tơlơi hơdip ƀing gih, kơ hơgĕt mơnơ̆ng ƀing gih či ƀơ̆ng huă, kŏn ƀlơ̆ng bơngơ̆t lơi kơ drơi jan ƀing gih kơ hơgĕt mơnơ̆ng ƀing gih či čŭt buh. 23Yua kơ tơlơi hơdip jing yom hloh kơ mơnơ̆ng ƀơ̆ng huă, laih anŭn drơi jan jing yom hloh kơ sum ao. 24Lăng bĕ čĭm ă; gơñu ƀu sai, kŏn hơpuă lơi. Gơñu ƀu hmâo pưk kŏn hmâo atông lơi; samơ̆ Ơi Adai ăt čem rong gơñu. Sĭt yơh ƀing gih jing yom hloh kơ khul čĭm anŭn! 25Hlơi amăng ƀing gih yua kơ tơlơi ñu ƀlơ̆ng bơngơ̆t đơi dưi thim dơ̆ng ƀiă hrơi kơ tơlơi hơdip#12:25 thim dơ̆ng ƀiă hrơi; ƀôdah glong awan ƀiă dơ̆ng ñu? 26Tui anŭn tơdah ƀing gih ƀu dưi ngă ôh bruă anĕt kar hăng anŭn, hyư̆m ƀing gih ƀlơ̆ng bơngơ̆t kơ tơlơi pơkŏn lĕ? 27Lăng bĕ kơ bơnga pông yang, hyư̆m gơ̆ čăt. Ñu ƀu hmâo mă bruă kŏn mơñam lơi, samơ̆ Kâo laĭ kơ ƀing gih wơ̆t kơ pơtao Salômôn amăng abih tơlơi drưh kơang ñu ƀu hmâo čŭt buh ôh sum ao hiam kar hăng sa amăng khul bơnga anŭn.#I Pơtao 10:4-7; II Čih 9:3-6. 28Ơ ƀing mơnuih hmâo tơlơi đaŏ đơsĕt, tơdah khul rơ̆k hrơi anai ñu dŏ hơdip amăng tơdrŏn glai laih anŭn pơgi arăng glŏm hĭ ñu amăng tơpur apui, samơ̆ Ơi Adai ăt buh brơi ƀing gơñu hiam kar hăng anŭn mơ̆n, ƀai jai kơ ƀing gih dơ̆ng! 29Tui anŭn anăm čăng hơduah hơgĕt mơnơ̆ng ƀing gih či ƀơ̆ng huă ƀôdah mơñum ôh, kŏn anăm hmâo tơlơi bơngơ̆t đơi lơi. 30Yua kơ abih bang kơnŭng djuai mơnuih ƀơi lŏn tơnah juăt čăng hơduah abih mơnơ̆ng anŭn, laih anŭn Ama ƀing gih thâo laih abih tơlơi ƀing gih kiăng. 31Samơ̆ čăng hơduah bĕ dêh čar pơtao Ơi Adai, laih anŭn Ñu či brơi thim kơ ƀing gih abih bang mơnơ̆ng anŭn dơ̆ng.”

Tơlơi Pơdrŏng Amăng Adai

(Mat 6:19-21)

32“Anăm hwĭ ôh, ơ khul triu anĕt, yua kơ Ama ƀing gih khăp mơak brơi kơ ƀing gih dêh čar pơtao Ñu. 33Sĭ bĕ dram gơnam ƀing gih, laih anŭn ngă bruă hiam kơ arăng. Pơkra pioh bĕ kơ ƀing gih pô kơdŭng prăk ƀu thâo so, dram gơnam yom amăng adai ƀu thâo abih ôh. Ƀơi anŭn mơnuih klĕ ƀu thâo nao jĕ, laih anŭn moa ƀu thâo reh ôh. 34Yua kơ pơpă dram gơnam yom ƀing gih dŏ, pran jua ƀing gih dŏ pơ anŭn mơ̆n.”

Tơlơi Dŏ Kơčăng

35“Hruă hơdrăng kơiăng kơjăp bĕ, brơi apui kơđen ƀing gih dŏ jă nanao.#Mat 25:1-13. 36Ƀing gih khŏm ngă kar hăng ƀing mơnuih dŏ tơguan khua gơñu glaĭ mơ̆ng tơlơi ƀơ̆ng huă pơkol rơkơi bơnai, dŏ krăp, tơdah ñu truh laih anŭn khŏk, pŏk brơi bah amăng kơ ñu mơtam.#Mar 13:34-36. 37Mơyun hiam yơh kơ ƀing ding kơna anŭn tơ khua gơñu truh laih anŭn ƀuh gơñu dŏ răng. Sĭt biă mă Kâo laĭ kơ ƀing gih, khua anŭn či hruă hơdrăng kơiăng ñu, brơi kơ gơñu dŏ ber laih anŭn ba mơnơ̆ng ƀơ̆ng huă kơ gơñu. 38Tơdah ñu truh ƀơi tơ̆ng krah mlam ƀôdah jĕ mơguah laih anŭn ƀuh gơñu dŏ răng, mơyun hiam yơh kơ ƀing ding kơna anŭn! 39Brơi ƀing gih thâo tơlơi anai, tơdah pô sang thâo hlâo mông pă pô klĕ či truh, ñu či dŏ răng ƀu brơi ôh arăng ƀoh mŭt amăng sang ñu.#Mat 24:43-44. 40Ƀing gih kar kaĭ mơ̆n, khŏm dŏ răng bĕ, yua kơ Ană Mơnuih či rai ƀơi mông ƀing gih ƀu ăng rơmăng.”

Ding Kơna Tŏng Ten Ƀôdah Ƀu Tŏng Ten

(Mat 24:45-51)

41Pêtrôs laĭ: “Ơ khua Yang, Ih pơhiăp tơlơi bơhmutu anai kơ gơmơi hă ƀôdah kơ abih bang?”

42Khua Yang laĭ glaĭ: “Tui anŭn hlơi pô jing ding kơna wai lăng dram gơnam tŏng ten laih anŭn kơhnâo? Kơ pô anŭn yơh khua ñu či brơi ñu wai lăng abih ƀing amăng sang gơ̆, kiăng kơ ñu pơpha brơi mơnơ̆ng ƀơ̆ng huă kơ ƀing anŭn djơ̆ mông. 43Mơyun hiam yơh kơ ding kơna anŭn tơdah khua ñu truh ƀuh ñu ngă tui anŭn. 44Sĭt biă mă Kâo laĭ kơ ƀing gih, khua ñu či brơi kơ ñu wai lăng abih bang dram gơnam gơ̆. 45Samơ̆ tơdah ding kơna anŭn laĭ amăng pran jua ñu: ‘Khua kâo aka glaĭ mơtam ôh’, laih anŭn ñu čơdơ̆ng taih ding kơna đah rơkơi, ding kơna đah kơmơi, laih anŭn ƀơ̆ng mơñum hăng măt tơpai. 46Khua ding kơna anŭn či rai ƀơi hrơi ñu ƀu ăng rơmăng laih anŭn ƀơi mông ñu ƀu thâo ôh. Ñu či taih pơrai#12:46 taih pơrai; ƀôdah čơ̆ng pơrai ding kơna anŭn laih anŭn yap ñu hrŏm hăng ƀing ƀu hmâo tơlơi đaŏ ôh.

47Ding kơna pă thâo laih tơlơi khua ñu kiăng, samơ̆ ƀu prăp rơmet laih anŭn ƀu ngă ôh tui hăng khua ñu kiăng, ñu či tŭ tơlơi taih kơtang. 48Bơ kơ pô ƀu thâo ôh tơlơi khua ñu kiăng, samơ̆ ngă tơlơi lăp arăng taih, ñu či tŭ tơlơi taih tơdu ƀiă. Yua kơ hlơi arăng hmâo pha brơi lu; arăng či tơña glaĭ lu, laih anŭn hlơi pô arăng hmâo jao brơi lu hloh, arăng či rơkâo glaĭ lu hloh mơ̆n.”

Arăng Pơčơlah Yua Kơ Yêsu

(Mat 10:34-36)

49“Kâo rai kiăng kơ glŏm trŭn apui ƀơi lŏn tơnah. Tơdah apui anŭn jă laih, hơgĕt Kâo dŏ kiăng dơ̆ng. 50Hmâo sa mơta tơlơi ƀatem Kâo khŏm tŭ, laih anŭn Kâo hmâo tơlơi gleh ruă dŏ tơguan tơl tơlơi anŭn truh hĭ!#Mar 10:38. 51Ƀing gih pơmĭn Kâo rai ba tơlơi rơnŭk rơnua ƀơi lŏn tơnah hă? Ư ưh, Kâo laĭ kơ ƀing gih, Kâo rai ba tơlơi pơčơlah pơpha. 52Yua kơ mơ̆ng anai pơ anăp amăng sa boh sang rơma čô či hmâo tơlơi čơlah pơpha, klâo čô pơkơdơ̆ng hăng dua čô, laih anŭn dua čô pơkơdơ̆ng hăng klâo čô. 53Gơñu či pơkah pơpha tơdruă, ama či pơkơdơ̆ng hăng ană đah rơkơi, laih anŭn ană đah rơkơi či pơkơdơ̆ng hăng ama; amĭ či pơkơdơ̆ng hăng ană đah kơmơi, laih anŭn ană đah kơmơi či pơkơdơ̆ng hăng amĭ ñu; tơhmua đah kơmơi či pơkơdơ̆ng hăng ană pơtâo đah kơmơi ñu, laih anŭn ană pơtâo đah kơmơi či pơkơdơ̆ng hăng tơhmua đah kơmơi ñu.”#Mika 7:6.

Thâo Bơkơnăl Kơ Rơnŭk

(Mat 16:2-3)

54Kar kaĭ mơ̆n Ñu laĭ kơ phung mơnuih lu: “Tơ ƀing gih ƀuh ƀŭt gơnăm tơbiă mơ̆ng gah yŭ, ƀing gih laĭ mơtam: ‘Adai či hơjan,’ laih anŭn sĭt truh tui anŭn yơh. 55Laih anŭn tơ ƀing gih ƀuh angĭn thut mơ̆ng dơnŭng, ƀing gih laĭ: ‘Či hmâo pơ-iă hang,’ laih anŭn sĭt truh tui anŭn yơh. 56Ơ ƀing mơnuih plơ̆m ƀlor! Ƀing gih thâo pơblang tơlơi bơkơnăl tơlơi truh kơ lŏn adai, samơ̆ hyư̆m ƀing gih ƀu thâo pơblang ôh tơlơi bơkơnăl kơ rơnŭk anai?”

Pơsir Hĭ Hăng Pô Phong Ih

(Mat 5:25-26)

57“Laih anŭn hyư̆m ƀing gih ƀu thâo kơsem kơ ƀing gih pô tơlơi hơgĕt jing djơ̆? 58Tui anŭn, tơdang ih rơbat nao ƀơi anăp khua phat kơđi hrŏm hăng pô phong ih, ƀơi rŏk jơlan brơi ih hơduah tơlơi pơsir glaĭ hăng ñu bĕ, hwĭ kơ ñu ba ih pơ khua phat kơđi, laih anŭn khua phat kơđi jao ih kơ khua wai mơnă, laih anŭn khua wai mơnă krư̆ ih. 59Kâo laĭ kơ ih, ih ƀu dưi tơbiă ôh mơ̆ng sang mơnă tơl ih kla abih hĭ nua prăk hnal tuč.”

Currently Selected:

Luk 12: JRA2016

Highlight

Copy