Luk 11

Yêsu Pơtô Kơ Tơlơi Iâu Laĭ

(Mat 6:9-13; 7:7-11)

1Sa hrơi Yêsu dŏ iâu laĭ ƀơi sa anih. Tơ iâu laĭ giơ̆ng hmâo sa čô amăng ding kơna Ñu rơkâo kơ Ñu: “Ơ Khua Yang, rơkâo kơ Ih pơtô gơmơi iâu laĭ kar hăng Yôhan hmâo pơtô laih ƀing ding kơna ñu.” 2Yêsu laĭ kơ gơñu: “Tơdang ƀing gih iâu laĭ, laĭ bĕ tui anai:

‘Ơ Ama, brơi kơ Anăn Ih hmâo tơlơi pơpŭ rơgoh hiam.

Brơi kơ dêh čar pơtao Ih dưi truh.

3Brơi kơ gơmơi mơnơ̆ng ƀơ̆ng huă djŏp kơ rĭm hrơi.

4Pap brơi tơlơi soh gơmơi,

Yua kơ gơmơi pô ăt pap brơi mơ̆n kơ rĭm čô hmâo ngă soh kơ gơmơi laih;

Laih anŭn anăm atăt ba gơmơi amăng tơlơi plư ôh.’”

Brơi Gir Amăng Tơlơi Iâu Laĭ

5Yêsu laĭ kơ gơñu: “Hlơi pô amăng ƀing gih nao pơ sang gơyut ñu krah mlam hăng rơkâo kơ ñu, hăng laĭ: ‘Ơ gơyut, brơi kâo čan klâo klŏ ƀañ tơpŭng ih, 6yua kơ sa čô gơyut kâo hyu truh laih pơ sang kâo, kâo ƀu hmâo mơnơ̆ng hơgĕt brơi kơ ñu ƀơ̆ng huă ôh.’ 7Laih anŭn ñu laĭ glaĭ mơ̆ng lăm sang: ‘Anăm pơrŭng kâo ôh, bah amăng kơđơ̆l laih, ƀing ană bă kâo hăng kâo dŏ đih pĭt laih. Kâo ƀu dưi tơgŭ brơi mơnơ̆ng kơ ih ôh.’ 8Kâo laĭ kơ ƀing gih, wơ̆t dah ñu ƀu či tơgŭ brơi mơnơ̆ng kơ gơ̆ ôh yua kơ gơ̆ jing gơyut ñu, samơ̆ yua kơ gơ̆ ƀu mlâo ôh ăt dŏ ƀel rơkâo nanao, ñu či tơgŭ laih anŭn brơi kơ gơ̆ abih mơnơ̆ng gơ̆ kiăng.

9Tui anŭn Kâo laĭ kơ ƀing gih, rơkâo bĕ, laih anŭn Ơi Adai či brơi kơ ƀing gih; sem bĕ, laih anŭn ƀing gih či ƀuh; khŏk bĕ laih anŭn Ơi Adai či pŏk brơi kơ ƀing gih. 10Yua kơ rĭm čô hlơi pô rơkâo či hmâo; hlơi pô sem či ƀuh laih anŭn Ơi Adai či pŏk brơi kơ hlơi pô khŏk. 11Hlơi amăng ƀing gih jing ama, tơdah ană ñu rơkâo ƀañ tơpŭng ñu brơi boh pơtâo kơ gơ̆ mơ̆? Ƀôdah gơ̆ rơkâo akan, ñu či brơi kơ gơ̆ ala pơala kơ akan mơ̆? 12Ƀôdah gơ̆ rơkâo boh mơnŭ, ñu brơi aguăt mơ̆? 13Tui anŭn, tơdah ƀing gih jing ƀing sat thâo brơi mơnơ̆ng hiam kơ ană ƀing gih, hloh kơ anŭn dơ̆ng Ama amăng adai ƀu či brơi Yang Bơngăt Hiam kơ hlơi pô rơkâo kơ Ñu ôh hă!”

Yêsu Laih Anŭn Bêlsebul

(Mat 12:22-30; Mar 3:20-27)

14Yêsu pơpuh đuaĭ sa čô yang sat kơmlô. Tơ yang sat tơbiă đuaĭ laih mơnuih kơmlô thâo pơhiăp mơtam, laih anŭn ƀing ană plei hling hlang. 15Samơ̆ đơđa laĭ: “Ñu puh pơđuaĭ yang sat hăng Bêlsebul, khua kơ ƀing yang sat.”#Mat 9:34; 10:25.

16Hmâo ƀing pơkŏn kiăng lông lăng Ñu, rơkâo kơ Ñu ngă sa gru kơnăl mơ̆ng adai.#Mat 12:38; 16:1; Mar 8:11. 17Samơ̆ Yêsu thâo tơlơi pơmĭn ƀing anŭn, laih anŭn laĭ kơ gơñu: “Dêh čar pơtao pă pơkah pơpha pơkơdơ̆ng glaĭ tơdruă gơñu pô či pơrai ñu pô, laih anŭn sang anŏ hlơi pơkah pơpha ñu pô či pơrai ñu pô. 18Kar kaĭ mơ̆n tơdah satan pơkah pơpha ñu pô, hyư̆m dêh čar pơtao ñu dưi dŏ kơjăp? Yua kơ ƀing gih laĭ Kâo pơpuh đuaĭ ƀing yang sat hăng Bêlsebul. 19Tơdah Kâo puh pơđuaĭ ƀing yang sat hăng Bêlsebul, bơ ană bă ƀing gih kơnang kơ hlơi gơñu puh pơđuaĭ yang sat lĕ? Yua kơ anŭn yơh, ƀing ană bă ƀing gih pô či jing pô phat kơđi kơ ƀing gih. 20Samơ̆ tơdah hăng čơđeng Ơi Adai Kâo puh pơđuaĭ ƀing yang sat, tui anŭn dêh čar pơtao Ơi Adai truh laih yơh kơ ƀing gih.

21Tơ sa čô mơnuih kơtang, hmâo djŏp gơnam pơblah, wai lăng sang gơñu pô, dram gơnam ñu dŏ rơnŭk hơ-ĭn yơh. 22Samơ̆ tơ hmâo mơnuih kơtang hloh kơ ñu rai kơsung blah laih anŭn dưi hĭ hăng ñu, pô anŭn mă hĭ gơnam pơblah ñu kơnang, laih anŭn pơpha hĭ dram gơnam ñu plah sua.

23Hlơi pô ƀu dŏ hrŏm hăng Kâo, ñu pơkơdơ̆ng hăng Kâo, laih anŭn hlơi pô ƀu pơgop hăng Kâo, ñu čơlah đuaĭ čơlah čơlap.”#Mar 9:40.

Yang Sat Mŭt Glaĭ Dơ̆ng

(Mat 12:43-45)

24“Tơ yang bơngăt grĭ hơƀak tơbiă laih mơ̆ng sa čô mơnuih, ñu găn nao amăng anih thu kro sem anih pơdơi; samơ̆ ƀu ƀuh anih ôh, ñu laĭ: ‘Kâo či wơ̆t glaĭ pơ sang kâo, jing anih kâo hmâo tơbiă đuaĭ laih.’ 25Tơ ñu truh, ñu ƀuh sang anŭn arăng kih laih anŭn prăp rơmet dưm dăp hiam laih. 26Tui anŭn ñu nao laih anŭn jak ba tơjuh čô yang sat pơkŏn sat hloh kơ ñu. Gơñu mŭt dŏ amăng sang anŭn. Hnŭn yơh, tơlơi hơdip pô anŭn jing sat hloh kơ hlâo.”

Tơlơi Mơyun Hiam Sĭt

27Tơdang Yêsu pơhiăp tơlơi anŭn, hmâo sa čô đah kơmơi mơ̆ng tơ̆ng krah mơnuih lu ur laĭ kơ Yêsu: “Mơyun hiam yơh kơ kian hmâo pi laih Ih, laih anŭn tơsâo hmâo pơmĕm Ih laih!”

28Samơ̆ Yêsu laĭ: “Ƀing hlơi hmư̆ hăng gưt boh pơhiăp Ơi Adai hmâo tơlơi mơyun hiam hloh dơ̆ng!”

Arăng Rơkâo Gru Kơnăl Mơyang

(Mar 9:41)

29Tơ hmâo mơnuih lu pơƀŭt glaĭ jai lu hloh dơ̆ng, Yêsu čơdơ̆ng laĭ: “Rơnŭk anai jing rơnŭk sat ƀai; gơñu hơduah sem sa gru kơnăl mơyang, samơ̆ Ơi Adai ƀu či brơi kơ gơñu sa gru kơnăl mơyang ôh, rơngiao kơ gru kơnăl mơyang Yônas.#Mat 16:4; Mar 8:12. 30Yua kơ kar hăng Yônas jing sa gru kơnăl mơyang kơ ƀing mơnuih Niniwơ, kar hăng tui anŭn mơ̆n Ană Mơnuih či jing sa gru kơnăl mơyang kơ ƀing rơnŭk anai.#Yô 3:4. 31Pơtao đah kơmơi čar dơnŭng či tơgŭ ƀơi hrơi phat kơđi, hrŏm hăng ƀing mơnuih rơnŭk anai laih anŭn klă kơđi kơ gơñu, yua kơ ñu rai mơ̆ng rơnuč lŏn tơnah kiăng hmư̆ tơlơi kơhnâo Salômôn. Laih anŭn anai nê, pơ anai hmâo Pô prŏng hloh kơ Salômôn.#I Pơtao 10:1-10; II Čih 9:1-12. 32Amăng hrơi phat kơđi ƀing ană plei Niniwơ či tơgŭ hrŏm hơbĭt hăng ƀing rơnŭk anai laih anŭn klă kơđi kơ gơñu, yua kơ ƀing gơñu kơhmal tơlơi soh laih hmư̆ tơlơi Yônas pơtô. Laih anŭn anai nê pơ anai hmâo Pô prŏng hloh kơ Yônas.”#Yô 3:5.

Tơlơi Bơngač Kơ Drơi Jan

(Mat 5:15 – 6:22-23)

33“Ƀu hmâo ôh hlơi tuč apui kơđen pioh hĭ ƀơi anih hơgơ̆m ƀôdah pioh gah yŭ kơthŭng,#11:33 Đơđa hră Ơi Adai Pơhiăp so đưm ƀu hmâo: ƀôdah gah yŭ kơthŭng. samơ̆ arăng pioh ñu ƀơi gơ̆ng apui kơđen kiăng kơ hlơi pô mŭt dưi ƀuh tơlơi bơngač.#Mat 5:15; Mar 4:21; Luk 8:16. 34Mơta ih jing apui kơđen kơ drơi jan; tơdah mơta ih hiam, abih drơi jan ih bă hăng tơlơi bơngač. Samơ̆ tơdah mơta ih răm, abih drơi jan ih bă hăng tơlơi kơnăm mơmŏt. 35Tui anŭn răng bĕ hwĭ kơ tơlơi bơngač amăng ƀing gih jing hĭ kơnăm mơmŏt. 36Tơdah abih drơi jan ih bă hăng tơlơi bơngač, ƀu hmâo sa črăn tơlơi kơnăm mơmŏt ôh, ñu či hmâo tơlơi bơngač abih bang kar hăng apui kơđen pơčrang tơlơi bơngač kơ ih.”

Yêsu Ƀuah Kơ Ƀing Pharisi

(Mat 23:1-36; Mar 12:38-40)

37Tơ Yêsu pơhiăp giơ̆ng laih, hmâo sa čô Pharisi jak Ñu ƀơ̆ng huă hrŏm hăng ñu; Ñu mŭt laih anŭn dŏ ber ƀơ̆ng huă. 38Pô Pharisi anŭn hling hlang kơ Ñu ƀu rao tơngan ôh hlâo kơ huă. 39Hnŭn yơh, Khua Yang laĭ kơ ñu: “Ƀing Pharisi gih, pơrơgoh gah rơngiao kơčok laih anŭn jam, samơ̆ amăng lăm ƀing gih bă hăng tơlơi hưp ham laih anŭn tơlơi sat ƀai. 40Ơ ƀing mlŭk! Pô hmâo pơjing laih mơnơ̆ng gah rơngiao, Ñu ƀu pơjing ôh hă mơnơ̆ng amăng lăm? 41Samơ̆ ƀing gih brơi bĕ mơnơ̆ng pap kơ ƀing ƀun rin hăng pran jua čơmah hơgĕt mơnơ̆ng gih hmâo, tui anŭn abih bang mơnơ̆ng či rơgoh kơ ƀing gih yơh.

42Samơ̆ răm ƀăm yơh kơ ƀing gih, Ơ ƀing Pharisi! Yua kơ ƀing gih pơyơr sa črăn amăng pluh eč, gruač laih anŭn djŏp mơta añăm pơtăm, samơ̆ lui hĭ tơlơi tơpă laih anŭn tơlơi thâo khăp kơ Ơi Adai. Ƀing gih khŏm ngă khul tơlơi anai, samơ̆ ăt kŏn wơr lơi khul tơlơi anŭn.#Lêwi 27:30.

43Răm ƀăm yơh kơ ƀing gih, Ơ ƀing Pharisi! Yua kơ ƀing gih khăp kơ anih dŏ hiam hloh amăng sang bơjơnum laih anŭn tơlơi arăng kơkuh kơ ƀing gih amăng sang sĭ mia. 44Răm ƀăm yơh kơ ƀing gih! Yua kơ ƀing gih kar hăng pơsat ƀu hmâo gru ôh, laih anŭn arăng rơbat ƀơi ngŏ pơsat anŭn, samơ̆ ƀu thâo ôh.”

45Sa čô amăng ƀing nai tơlơi juăt laĭ kơ Ñu: “Ơ nai, tơdang Ih pơhiăp tui anŭn Ih ƀuah wơ̆t kơ gơmơi yơh.”

46Laih anŭn Yêsu laĭ: “Răm ƀăm yơh wơ̆t kơ ƀing gih mơ̆n, ơ ƀing nai tơlơi juăt! Yua kơ ƀing gih brơi arăng mơnơ̆ng kơtraŏ tơnap glăm, samơ̆ ƀing gih pô hăng sa ƀĕ čơđeng ƀu ruaih djơ̆ amơĭ. 47Răm ƀăm yơh kơ ƀing gih, yua kơ ƀing gih man pơsat ƀing pô laĭ lui hlâo ƀing ơi adon ƀing gih hmâo pơdjai laih. 48Tui anŭn, ƀing gih jing mơnuih ngă gơ̆ng jơlan kơ bruă ƀing ơi adon ƀing gih laih anŭn tŭ ư tơlơi gơñu ngă; yua kơ gơñu hmâo pơdjai laih ƀing pô laĭ lui hlâo laih anŭn ƀing gih man pơsat ƀing gơ̆. 49Yua anŭn mơ̆n tơlơi kơhnâo Ơi Adai hmâo laĭ laih: ‘Kâo či pơkiaŏ ƀing pô laĭ lui hlâo laih anŭn ƀing khua ding kơna nao pơ gơñu. Đơđa amăng ƀing anŭn gơñu či pơdjai laih anŭn ngă sat,’ 50hnŭn yơh, nua drah ƀing pô laĭ lui hlâo arăng hmâo pơdjai laih mơ̆ng phŭn hrih lŏn tơnah či tuh ƀơi rơnŭk anai, 51čơdơ̆ng mơ̆ng drah Abel truh pơ drah Sakari, pô arăng hmâo pơdjai laih kơplah wah kơƀang ngă yang laih anŭn anih rơgoh hiam. Sĭt yơh, Kâo laĭ kơ ƀing gih, arăng či tuh drah anŭn kơ ƀing rơnŭk anai.#Čơd 4:8; II Čih 24:20-21.

52Răm ƀăm yơh kơ ƀing gih, ơ ƀing nai tơlơi juăt! Yua kơ ƀing gih djă pioh laih kơmla kăl tơlơi thâo mĭn; ƀing gih pô ƀu mŭt ôh, laih anŭn ƀing gih khă ƀing kiăng mŭt.”

53Tơ Yêsu đuaĭ mơ̆ng anih anŭn, ƀing nai pơtô tơlơi juăt hăng ƀing Pharisi čơdơ̆ng pơkơdơ̆ng hăng Ñu kơtang tĭt laih anŭn tơña Ñu lu mơta tơlơi, 54gơñu dưm mơneč kiăng mă tơlơi soh rĭm boh pơhiăp tơbiă mơ̆ng amăng bah Ñu.

Currently Selected:

Luk 11: JRA2016

Highlight

Copy