Luk 10
10
Yêsu Pơkiaŏ Tơjuh Pluh Čô Ƀing Ding Kơna Nao Hyu Pơtô
1Tơdơi kơ anŭn Khua Yang ruah tơjuh pluh#10:1 tơjuh pluh; đơđa Hră Ơi Adai Pơhiăp so đưm čih tơjuh pluh dua. čô ding kơna pơkŏn laih anŭn pơkiaŏ ƀing gơñu tơdua čô nao hlâo kơ Ñu amăng abih bang plei laih anŭn anih Ñu pô či nao. 2Yêsu laĭ kơ gơñu: “Lu biă mă pơdai tơsă, samơ̆ mơnuih hơpuă ƀiă đôč. Tui anŭn, rơkâo bĕ kơ Khua pô hmua pơkiaŏ nao ƀing mă bruă nao hơpuă pơdai Ñu.#Mat 9:37-38. 3Nao bĕ, anai nê Kâo pơkiaŏ nao ƀing gih kar hăng ană triu tŏng krah khul asâo tan.#Mat 10:16. 4Anăm djă ba kơdŭng prăk, kơƀao, klĭ juă, laih anŭn anăm kơkuh kơ arăng rŏk jơlan ôh.#Mat 10:7-14; Mar 6:8-11; Luk 9:3-5. 5Hlơi sang ƀing gih mŭt, blŭng hlâo laĭ bĕ: ‘Rơkâo tơlơi rơnŭk rơnua dŏ amăng sang anai!’ 6Tơdah pơ anŭn hmâo mơnuih lăp tơlơi rơnŭk rơnua, tơlơi rơnŭk rơnua ƀing gih či dŏ ƀơi ñu. Samơ̆ tơdah ƀu hmâo tui anŭn ôh tơlơi rơnŭk rơnua či glaĭ kơ ƀing gih pô. 7Dŏ bĕ amăng sang anŭn, ƀơ̆ng huă laih anŭn mơñum hơgĕt mơnơ̆ng arăng či brơi kơ ƀing gih, yua kơ mơnuih mă bruă năng lăp kơ tơlơi apah. Anăm đuaĭ mơ̆ng sang anai nao pơ sang pơkŏn ôh.#I Kôr 9:14; I Tim 5:18. 8Tơdah ƀing gih mŭt amăng sa boh plei pă arăng tŭ jum ƀing gih, brơi ƀing gih ƀơ̆ng huă hơgĕt mơnơ̆ng arăng pŭ brơi kơ ƀing gih. 9Pơsuaih bĕ ƀing duăm ruă amăng plei anŭn laih anŭn laĭ kơ gơñu: ‘Dêh Čar Pơtao Ơi Adai truh giăm kơ ƀing gih laih.’ 10Samơ̆ tơdah ƀing gih mŭt amăng sa boh plei pă arăng ƀu tŭ jum ƀing gih ôh, nao bĕ pơ jơlan laih anŭn laĭ,#Bruă 13:51. 11‘Wơ̆t ƀruih lŏn plei ƀing gih đom ƀơi tơkai gơmơi, gơmơi ăt tơtuh hĭ mơ̆n kiăng pơkơdơ̆ng hăng ƀing gih. Samơ̆ brơi ƀing gih thâo kơ Dêh Čar Pơtao Ơi Adai giăm truh laih.’ 12Kâo laĭ hăng ƀing gih, amăng hrơi phat kơđi plei Sôđôm či hmâo tơlơi phat kơđi plai ƀiă hăng plei anŭn.”#Čơd 19:24-28; Mat 11:24; 10:15.
Ană Plei Pla Ƀu Đaŏ Ôh
(Mat 11:20-24)
13“Răm ƀăm yơh kơ ih, Ơ Plei Kôrasin! Răm ƀăm yơh kơ ih, Ơ Plei Bêtsaida! Yua kơ tơdah tơlơi mơsêh mơyang hmâo ngă tơ̆ng krah ƀing gih, hmâo ngă hĭ laih amăng plei Tir hăng plei Sidôn, ƀing gơñu kơhmal tơlơi soh ƀing gơñu mơ̆ng sui laih, buh ao kơƀao laih anŭn pruai pur ƀơi drơi jan gơñu.#Êsai 23:1-18; Êsê 26:1–28:26; Yôel 3:4-8; Amôs 1:9-10; Sak 9:2-4. 14Samơ̆ ƀơi hrơi phat kơđi, plei Tir hăng plei Sidôn či hmâo tơlơi pơkơhmal plai ƀiă hăng ƀing gih. 15Laih anŭn bơ ih, ơ plei Kapernum, Ơi Adai či yŏng pơđĭ ih truh pơ adai mơ̆? Ư ưh, Ơi Adai či plĕ trŭn ih truh pơ plei ƀing djai!#Êsai 14:13-15.
16Hlơi pô dŏ hmư̆ ƀing gih ñu dŏ hmư̆ Kâo yơh; laih anŭn hlơi pô hơngah ƀing gih ñu hơngah Kâo mơ̆n; laih anŭn hlơi pô hơngah Kâo ñu hơngah kơ Pô pơkiaŏ rai Kâo mơ̆n.”#Mat 10:40; Mar 9:37; Luk 9:48; Yô 13:20.
Ƀing Tơjuh Pluh Čô Wơ̆t Glaĭ
17Tơjuh pluh#10:17 tơjuh pluh; đơđa Hră Ơi Adai Pơhiăp so đưm čih tơjuh pluh dua (lăng jơlan 1). čô ƀing ding kơna wơ̆t glaĭ hăng tơlơi hơ̆k mơak gơñu laĭ: “Ơ Khua Yang, amăng anăn Ih wơ̆t kơ ƀing yang sat ăt gưt kơ gơmơi mơ̆n!”
18Yêsu laĭ gơñu: “Kâo ƀuh laih satan lĕ trŭn mơ̆ng adai kar hăng kơmlă. 19Anai nê, Kâo hmâo pha brơi laih kơ ƀing gih tơlơi dưi kiăng kơ juă hĭ ala, aguăt, laih anŭn abih tơlơi dưi kơtang pô ayăt gah yŭ tơkai ƀing gih; ƀu hmâo sa tơlơi hơgĕt dưi ngă sat kơ ƀing gih ôh.#Adoh 91:13. 20Wơ̆t tui anŭn, anăm hơ̆k mơak ôh yua kơ ƀing yang sat gưt kơ ƀing gih, samơ̆ hơ̆k mơak bĕ yua kơ anăn ƀing gih hmâo čih laih amăng adai.”
Yêsu Hơ̆k Mơak
(Mat 11:25-27; 13:16-17)
21Hlăk mông anŭn, Yêsu hmâo tơlơi hơ̆k mơak mơ̆ng Yang Bơngăt Hiam#10:21 mơ̆ng Yang Bơngăt Hiam; đơđa Hră Ơi Adai Pơhiăp so đưm čih mơ̆ng Bơngăt Mơyang; đơđa čih amăng bơngăt Ñu. laih anŭn laĭ: “Ơ Ama, Khua kơ adai laih anŭn lŏn tơnah, kâo bơni hơơč kơ Ih yua kơ Ih hmâo pơdŏp laih khul tơlơi anai kơ ƀing mơnuih kơhnâo, ƀing mơnuih rơgơi, samơ̆ Ih hmâo bơrơđah laih tơlơi anai kơ ƀing čơđai anĕt. Sĭt yơh, Ơ Ama yua kơ tơlơi anŭn bơmơak kơ Ih.
22Abih bang mơnơ̆ng Ama hmâo jao laih kơ Kâo. Ƀu hmâo hlơi thâo krăn Ană ôh, kơnơ̆ng hơjăn Ama thâo; kŏn hmâo hlơi thâo krăn Ama lơi, kơnơ̆ng hơjăn Ană thâo laih anŭn kơ hlơi pô Ană kiăng bơrơđah Ama kơ ñu.”#Yô 3:35; 10:15.
23Laih anŭn Ñu wir lăng ƀing ding kơna hăng laĭ kơ hơjăn gơñu: “Mơyun hiam yơh kơ mơta dưi ƀuh tơlơi ƀing gih ƀuh ră anai! 24Yua kơ Kâo laĭ kơ ƀing gih, hmâo lu ƀing pô laĭ lui hlâo laih anŭn ƀing pơtao kiăng lăng tơlơi ƀing gih ƀuh, samơ̆ ƀu ƀuh ôh, laih anŭn kiăng hmư̆ tơlơi ƀing gih hmư̆, samơ̆ ƀu hmư̆ ôh.”
Tơlơi Bơhmutu Kơ Mơnuih Samari Hiam
25Hlăk anŭn, hmâo sa čô nai tơlơi juăt tơgŭ tơña kiăng lông lăng Yêsu hăng laĭ: “Ơ Nai, hơgĕt kâo khŏm ngă kiăng kơ dưi hmâo tơlơi hơdip hlŏng lar?”#Mat 22:35-40; Mar 12:28-34. 26Yêsu laĭ kơ ñu: “Hơgĕt arăng čih laih amăng tơlơi juăt? Hơgĕt tơlơi ih ƀuh amăng anŭn?” 27Ñu laĭ glaĭ: “Ih khŏm khăp kơ Khua Yang Ơi Adai ih hăng abih pran jua, hăng abih bơngăt, hăng abih tơlơi kơtang, laih anŭn hăng abih tơlơi pơmĭn#Mơñă 6:5. laih anŭn khăp kơ pô jum dar ih kar hăng kơ ih pô.”#Lêwi 19:18. 28Yêsu laĭ kơ ñu: “Ih laĭ glaĭ djơ̆ biă mă; ngă bĕ tui anŭn laih anŭn ih či hơdip.”#Lêwi 18:5.
29Samơ̆ ñu kiăng pơrơđah pô ñu jing pô tơpă hơnơ̆ng, tui anŭn ñu laĭ kơ Yêsu: “Hlơi jing pô jum dar kâo?”
30Yêsu laĭ glaĭ: “Sa čô mơnuih đah rơkơi trŭn mơ̆ng plei Yêrusalem nao pơ plei Yêrikô, gơ̆ bưp ƀing klĕ dŏp. Ƀing anŭn toh mă hĭ sum ao gơ̆, taih gơ̆ tơl djai mol laih anŭn lui hĭ gơ̆. 31Hmâo sa čô khua ngă yang rơbat ƀơi jơlan anŭn. Tơ ñu ƀuh gơ̆, ñu weh đuaĭ hĭ. 32Kar kaĭ mơ̆n hmâo sa čô mơnuih Lêwi, tơ ñu truh ƀơi anih anŭn, ƀuh gơ̆ ñu ăt weh đuaĭ laih anŭn rơbat nao. 33Samơ̆ hmâo sa čô mơnuih Samari rơbat ƀơi jơlan anŭn, truh giăm anih pô rơka dŏ anŭn. Tơ ñu ƀuh gơ̆, ñu hmâo tơlơi pap biă mă.#II Čih 28:15. 34Ñu nao pơ gơ̆, ñu mă ia ôliwơ hăng ia tơpai pơjrao laih anŭn pŏn hĭ anih rơka gơ̆; giơ̆ng anŭn ñu brơi gơ̆ đĭ aseh ñu pô, hăng ba nao gơ̆ pơ sang jưh, kiăng kơ wai lăng gơ̆, 35Hrơi tơdơi, ñu mă dua đơniê brơi kơ pô sang jưh hăng laĭ ‘Brơi ih wai lăng ñu, laih anŭn hơgĕt ih či pơhuač rơgao hloh dơ̆ng, tơ kâo wơ̆t glaĭ kâo či kla kơ ih dơ̆ng.’
36Hlơi amăng klâo čô anŭn tui hăng ih pơmĭn jing pô jum dar kơ pô bưp hăng ƀing mơnuih klĕ dŏp anŭn?”
37Nai tơlơi juăt laĭ glaĭ: “Pô hmâo bơrơđah laih tơlơi pap drap kơ pô bưp ƀing klĕ dŏp yơh.”
Yêsu laĭ kơ ñu: “Nao bĕ laih anŭn ngă kar hăng anŭn.”
Yêsu Nao Čuă HʼMart Hăng HʼMari
38Tơdang Yêsu hăng ƀing ding kơna Ñu hyu pơtô. Gơñu truh pơ sa boh plei; hmâo sa čô đah kơmơi anăn gơ̆ HʼMart jak jum Ñu amăng sang gơ̆.#Yô 11:1. 39Ñu hmâo sa čô adơi đah kơmơi anăn HʼMari. HʼMari dŏ ber ƀơi tơkai Khua Yang kiăng kơ hmư̆ tơlơi Ñu pơtô. 40Samơ̆ HʼMart gŭn yua kơ hăt buih bruă. Tui anŭn ñu nao pơ Yêsu laih anŭn laĭ: “Ơ Khua, Ih ƀu bơngơ̆t ôh hă adơi kâo lui hơjăn kâo pơkra mơnơ̆ng ƀơ̆ng huă? Tui anŭn rơkâo kơ Ih laĭ kơ ñu gŭm djru kâo đa.”
41Khua Yang laĭ kơ gơ̆: “Ơ HʼMart, HʼMart, ih ƀlơ̆ng bơngơ̆t laih anŭn rŭng răng yua kơ lu bruă; 42samơ̆ kơnơ̆ng hmâo sa mơta bruă kiăng đôč. HʼMari hmâo ruah mă laih gah hiam anŭn, jing tơlơi arăng ƀu či dưi sua mă mơ̆ng ñu ôh.”
Currently Selected:
Luk 10: JRA2016
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.
