Luk 9
9
Yêsu Pơkiaŏ Nao Pluh Dua Čô Khua Ding Kơna
(Mat 10:5-15; Mar 6:7-13)
1Yêsu iâu pơƀŭt glaĭ pluh dua čô khua ding kơna, pha brơi kơ gơñu tơlơi dưi mơyang laih anŭn tơlơi dưi kiăng puh pơđuaĭ abih bang yang sat, laih anŭn tơlơi dưi pơsuaih tơlơi duăm ruă. 2Yêsu pơkiaŏ nao gơñu pơtô tơlơi Dêh Čar Pơtao Ơi Adai laih anŭn pơsuaih ƀing mơnuih duăm ruă. 3Yêsu laĭ kơ gơñu: “Anăm djă ba sa mơta gơnam hơgĕt ôh kơ tơlơi ƀing gih hyu. Anăm djă ba gai jra, kơdŭng, ƀañ tơpŭng, ƀôdah prăk ôh; laih anŭn anăm ba dua blah ao ôh.#Luk 10:4-11; Bruă 13:51. 4Sang hlơi ƀing gih mŭt, dŏ bĕ pơ anŭn tơl ƀing gih đuaĭ. 5Laih anŭn anih pă arăng ƀu jum ƀing gih ôh, tơbiă bĕ mơ̆ng plei anŭn, tơtuh hĭ ƀruih lŏn mơ̆ng tơkai ƀing gih jing tơlơi ngă gơ̆ng jơlan pơkơdơ̆ng glaĭ hăng gơñu.”
6Ƀing gơñu nao laih anŭn găn lu boh plei, pơtô Tơlơi Phrâo Hiam tar ƀar anih laih anŭn pơsuaih ƀing duăm ruă.
Pơtao Hêrôt Rŭng Răng
(Mat 14:1-12; Mar 6:14-29)
7Hlăk anŭn pơtao Hêrôt, pô wai lăng tring Galilê hmư̆ abih tơlơi truh laih, laih anŭn ñu rŭng răng, yua kơ ƀing anai laĭ Yôhan hơdip glaĭ laih mơ̆ng ƀing djai.#Mat 16:14; Mar 8:28; Luk 9:19. 8Ƀing pơkŏn laĭ Êli hmâo pơrơđah rai, laih anŭn ƀing pơkŏn dơ̆ng laĭ sa čô amăng ƀing pô laĭ lui hlâo rơnŭk đưm hmâo hơdip glaĭ. 9Hêrôt laĭ: “Kâo čơ̆ng laih tơkuai Yôhan, samơ̆ hlơi pô anai kâo hmư̆ lu tơlơi ră ruai kơ ñu?” Laih anŭn Hêrôt hơduah jơlan kiăng ƀuh Yêsu.
Yêsu Čem Rơma Rơbâo Čô Mơnuih
(Mat 14:13-21; Mar 6:30-44; Yô 6:1-14)
10Tơ ƀing khua ding kơna wơ̆t glaĭ, gơñu ră ruai kơ Yêsu abih tơlơi gơñu hmâo ngă laih. Yêsu ba gơñu nao hơjăn pơ sa boh plei anăn plei Bêtsaida. 11Tơ ƀing mơnuih lu thâo tơlơi anŭn, gơñu đuaĭ tui Yêsu. Yêsu jum ƀing gơ̆ laih anŭn pơtô tơlơi dêh čar pơtao Ơi Adai kơ ƀing gơñu, laih anŭn pơsuaih brơi tơlơi duăm ruă kơ ƀing hlơi kiăng suaih.
12Adai čơdơ̆ng klam yơh, laih anŭn ƀing pluh dua čô khua ding kơna rai laĭ kơ Yêsu: “Brơi ƀing ană plei pla glaĭ bĕ kiăng kơ gơñu nao amăng khul plei jum dar, kiăng kơ hơduah mơnơ̆ng ƀơ̆ng huă laih anŭn anih pĭt đih. Yua kơ ƀing ta hlăk dŏ anai jing anih tơdrŏn tač.”
13Samơ̆ Yêsu laĭ kơ gơñu: “Ƀing gih yơh brơi mơnơ̆ng ƀơ̆ng huă kơ gơñu.”
Gơñu laĭ: “Gơmơi hmâo kơnơ̆ng rơma klŏ ƀañ tơpŭng hăng dua drơi akan đôč, kơnơ̆ng gơmơi khŏm nao blơi mơnơ̆ng ƀơ̆ng huă kơ abih bang ƀing mơnuih lu anai.” 14Yua kơ pơ anai hmâo giăm rơma rơbâo čô đah rơkơi. Yêsu laĭ kơ ƀing ding kơna Ñu: “Brơi gơñu dŏ ber bĕ tui hăng bôr, rĭm bôr rơma pluh čô.”
15Ƀing ding kơna ngă tui anŭn yơh, laih anŭn brơi abih bang ƀing gơñu dŏ ber. 16Yêsu mă rơma klŏ ƀañ tơpŭng hăng dua drơi akan anŭn, Ñu angak mơta pơ adai, bơni hơơč kơ Ơi Adai laih anŭn wơ̆k ƀañ tơpŭng, brơi kơ ƀing ding kơna pơpha brơi kơ ƀing mơnuih lu. 17Abih bang ƀơ̆ng laih anŭn trơi soh sel, laih anŭn gơñu duñ pơƀŭt čơđeh meh ƀañ tơpŭng, akan rơbeh anŭn bă pluh dua bai.
Pêtrôs Pơhaih Yêsu Jing Krist
(Mat 16:13-19; Mar 8:27-29)
18Sa hrơi tơdang Yêsu dŏ iâu laĭ hơjăn Ñu, ƀing ding kơna nao dŏ jum dar Ñu, Yêsu tơña kơ ƀing gơñu: “Hlơi Kâo jing tui hăng ƀing ană plei pla laĭ?”
19Gơñu laĭ glaĭ: “Yôhan ngă ƀatem, samơ̆ hmâo đơđa pơkŏn laĭ Êli, đơđa pơkŏn dơ̆ng laĭ sa čô amăng ƀing pô laĭ lui hlâo rơnŭk đưm hơdip glaĭ.”#Mat 14:1-2; Mar 6:14-15; Luk 9:7-8.
20Yêsu tơña kơ gơñu dơ̆ng: “Samơ̆ ƀing gih laĭ hlơi Kâo jing?”#Yô 6:68-69.
Pêtrôs laĭ glaĭ: “Ih jing Yang Krist mơ̆ng Ơi Adai.”
Yêsu Laĭ Hlâo Kơ Tơlơi Ñu Či Djai
(Mat 16:20-28; Mar 8:30 – 9:1)
21Yêsu khă laih anŭn pơđar kơ ƀing gơñu anăm pơhaih tơlơi anŭn kơ arăng ôh, 22Ñu laĭ: “Ană Mơnuih khŏm tŭ lu tơlơi tơnap tap, mơ̆ng ƀing kŏng tha, ƀing khua ngă yang prŏng laih anŭn ƀing nai pơtô tơlơi juăt hơngah lui, Ñu khŏm tŭ tơlơi arăng pơdjai, truh hrơi tal klâo Ñu khŏm hơdip glaĭ.”
23Laih anŭn Yêsu laĭ kơ abih bang gơñu: “Tơdah hlơi pô kiăng đuaĭ tui Kâo, brơi ñu khŏm hơngah hĭ ñu pô, rĭm hrơi glăm kơyâo bơrơkal ñu pô hăng đuaĭ tui Kâo.#Mat 10:38; Luk 14:27. 24Yua kơ hlơi kiăng pơklaih tơlơi hơdip ñu, ñu či rơngiă, samơ̆ hlơi pô rơngiă tơlơi hơdip ñu yua kơ Kâo ñu či hmâo glaĭ tơlơi hơdip ñu.#Mat 10:39; Luk 17:33; Yô 12:25. 25Hơgĕt tơlơi tŭ yua kơ sa čô mơnuih tơdah ñu hmâo abih lŏn tơnah samơ̆ ñu pô răm rai laih anŭn rơngiă hĭ? 26Yua kơ hlơi pô mlâo kơ Kâo laih anŭn kơ boh pơhiăp Kâo, Ană Mơnuih či mlâo kơ pô anŭn hlăk hrơi Ñu rai dơ̆ng amăng tơlơi guh kơang Ñu, tơlơi guh kơang ama Ñu, laih anŭn tơlơi guh kơang ƀing ling jang rơgoh hiam Ñu. 27Samơ̆ sĭt biă mă Kâo laĭ kơ ƀing gih, hmâo đơđa ƀing dŏ pơ anai ƀu či djai ôh hlâo kơ gơñu ƀuh Dêh Čar Pơtao Ơi Adai.”
Yêsu Hrih Drơi Jan
(Mat 17:1-8; Mar 9:2-8)
28Amăng sapăn hrơi tơdơi giơ̆ng Ñu pơhiăp khul tơlơi anŭn, Yêsu jak ba hrŏm hăng Ñu Pêtrôs, Yôhan laih anŭn Yakơ, đĭ pơ čư̆ kiăng kơ iâu laĭ.#II Pê 1:17-18. 29Tơdang Ñu iâu laĭ ƀô̆ mơta Ñu pơplih hĭ, ao Ñu jing kŏ laih anŭn bơngač kơmlă biă mă. 30Laih anŭn plŭt hmâo dua čô đah rơkơi, Môis hăng Êli dŏ pơhiăp hăng Ñu. 31Gơñu pơƀuh rai amăng tơlơi guh kơang laih anŭn pơhiăp kơ tơlơi Yêsu či djai, jing bruă Ñu či ngă pơsĭt pơ plei Yêrusalem. 32Pêtrôs hăng ƀing hrŏm hơbĭt hăng ñu mơhao pĭt biă mă, samơ̆ tơ gơñu amlư̆ mơdưh, gơñu ƀuh tơlơi guh kơang Yêsu hăng dua čô đah rơkơi dŏ dơ̆ng hăng Ñu. 33Hlăk dua čô đah rơkơi anŭn đuaĭ mơ̆ng Yêsu, Pêtrôs laĭ hăng Ñu: “Ơ Nai, hiam yơh ƀing ta dŏ ƀơi anai; brơi gơmơi ngă klâo boh sang khăn: sa boh kơ Ih, sa kơ Môis laih anŭn sa boh kơ Êli.” Pêtrôs pơhiăp samơ̆ ƀu thâo ôh hơgĕt tơlơi ñu hlăk pơhiăp. 34Tơdang Pêtrôs hlăk pơhiăp tơlơi anŭn, hmâo kơthul rai gom hĭ ƀing gơñu, laih anŭn ƀing gơñu hwĭ biă mă tơdang ƀuh kơthul gom gơñu. 35Laih anŭn hmâo asăp pơhiăp mơ̆ng kơthul laĭ: “Pô anai jing ană Kâo, pô Kâo hmâo ruah laih, brơi ƀing gih dŏ hmư̆ Ñu bĕ.”#Êsai 42:1; Mat 3:17; 12:18; Mar 1:11; Luk 3:22. 36Tơ asăp pơhiăp anŭn abih laih, kơnơ̆ng hơjăn Yêsu đôč dŏ ƀơi anŭn. Amăng khul hrơi anŭn, ƀing ding kơna Ñu dŏ rơiăt, ƀu hmâo ră ruai kơ arăng ôh hơdôm tơlơi hơgĕt gơñu hmâo ƀuh laih.
Yêsu Pơsuaih Sa Čô Čơđai Yang Sat Ngă
(Mat 17:14-18; Mar 9:14-27)
37Ƀơi hrơi tơdơi anŭn tơdang gơñu trŭn laih mơ̆ng čư̆, sa phung mơnuih lu bưp Yêsu. 38Laih anŭn anai nê, mơ̆ng tơ̆ng krah phung mơnuih lu sa čô đah rơkơi ur laĭ: “Ơ Nai, kâo kơwưh kơ Ih, rơkâo kơ Ih pap drap kơ ană đah rơkơi kâo đa, yua kơ kâo hmâo kơnơ̆ng sa čô anai đôč. 39Tơ yang sat ngă kơ ñu, tŏ tơnŏ ñu ur kraih laih anŭn yang sat hơprah añăk ñu tơl blôk ia bah, ngă pơruă gơ̆ laih anŭn gleh biă mă ñu tơbiă mơ̆ng gơ̆. 40Kâo hmâo kơwưh laih kơ ƀing ding kơna Ih puh pơđuaĭ yang sat anai, samơ̆ gơñu ƀu dưi puh pơđuaĭ ôh.”
41Yêsu laĭ glaĭ: “Ơ kơnŭng djuai ƀu hmâo tơlơi đaŏ laih anŭn kơpĭl, hơdôm sui dơ̆ng Kâo či dŏ hrŏm hơbĭt laih anŭn gir hăng ƀing gih? Ba ană đah rơkơi ih pơ anai bĕ.”
42Tơdang gơ̆ rai, yang sat hơprah gơ̆ ƀơi lŏn, laih anŭn pơkơñak gơ̆. Samơ̆ Yêsu ƀuah yang bơngăt grĭ hơƀak anŭn, pơsuaih čơđai anŭn laih anŭn jao glaĭ kơ ama ñu.
Yêsu Laĭ Lui Hlâo Dơ̆ng Kơ Tơlơi Ñu Či Djai
(Mat 17:22-23; Mar 9:30-32)
43Abih bang mơnuih hling hlang kơ tơlơi dưi mơyang Ơi Adai. Tơdang abih bang dŏ hling hlang kơ abih tơlơi Yêsu hmâo ngă laih, Ñu laĭ kơ ƀing ding kơna Ñu tui anai: 44“Brơi ƀing gih hmư̆ pơñen bĕ khul tơlơi anai: Arăng či jao hĭ Ană Mơnuih amăng tơngan ƀing mơnuih.” 45Samơ̆ ƀing ding kơna ƀu thâo hluh ôh boh pơhiăp anŭn. Tơlơi anŭn jing hơgơ̆m kơ gơñu, gơñu ƀu dưi thâo hluh ôh tơlơi anŭn, samơ̆ gơñu hwĭ ƀu khĭn tơña ôh kơ Yêsu khul tơlơi pơhiăp anŭn.
Hlơi Pô Prŏng Hloh?
(Mat 18:1-5; Mar 9:33-37)
46Ƀing ding kơna pơrơjah tơdruă gơñu kơ tơlơi hlơi pô jing prŏng hloh amăng ƀing gơñu.#Luk 22:24. 47Samơ̆ Yêsu thâo tơlơi pơmĭn amăng pran jua gơñu, hnŭn yơh Yêsu mă sa čô čơđai anĕt laih anŭn pioh gơ̆ ƀơi djeo Ñu, 48laih anŭn laĭ kơ gơñu: “Hlơi pô jum čơđai anĕt anai yua kơ anăn Kâo kar hăng jum Kâo mơ̆n; laih anŭn hlơi pô jum Kâo kar hăng jum Pô hmâo pơkiaŏ rai Kâo laih. Yua kơ hlơi pô jing anĕt hloh kơ abih bang amăng ƀing gih, pô anŭn yơh jing prŏng hloh.”#Mat 10:40; Luk 10:16; Yô 13:20.
Hlơi Pô Ƀu Pơkơdơ̆ng Hăng Ƀing Gih Jing Gơ̆p Gih
(Mar 9:38-40)
49Yôhan laĭ: “Ơ Nai, gơmơi hmâo ƀuh laih sa čô mơnuih puh pơđuaĭ yang sat amăng anăn Ih, laih anŭn gơmơi khă ñu, yua kơ ñu ƀu tui ƀing ta ôh.” 50Samơ̆ Yêsu laĭ kơ Yôhan: “Anăm khă ñu ôh, yua kơ hlơi pô ƀu pơkơdơ̆ng hăng ƀing gih jing pô anŭn gah kơ ƀing gih.”
Ană Plei Samari Ƀu Jum Yêsu
51Tơ giăm truh hrơi arăng či pŭ ba Yêsu pơ adai, Ñu khư̆p ư nao pơ plei Yêrusalem. 52Yêsu pơkiaŏ ƀing pô pơala nao hlâo kơ Ñu. Gơñu nao laih anŭn mŭt amăng sa boh plei ƀing Samari kiăng prăp rơmet anih kơ Yêsu. 53Samơ̆ ƀing ană plei ƀu jum Ñu ôh yua kơ gơñu thâo Yêsu anăp nao tơpă plei Yêrusalem. 54Tơ ƀing ding kơna Ñu Yakơ hăng Yôhan ƀuh tơlơi anŭn, gơñu laĭ: “Ơ Khua Yang, Ih kiăng mơ̆ gơmơi pơđar kơ apui trŭn mơ̆ng adai čuh hĭ gơñu?”#9:54 Đơđa Hră Ơi Adai Pơhiăp so đưm thim “kar hăng Êli hmâo ngă laih”#II Pơtao 1:9-16. 55Samơ̆ Yêsu wir lăng laih anŭn ƀuah kơ gơñu.#9:55 Đơđa Hră Ơi Adai Pơhiăp so đưm thim “Ƀing gih ƀu thâo ôh yang bơngăt pă pơtrŭt ƀing gih, yua kơ Ană Mơnuih rai ƀu djơ̆ kiăng pơrai hĭ tơlơi hơdip ôh, samơ̆ kiăng pơklaih” 56Giơ̆ng anŭn gơñu hlŏng nao pơ sa boh plei pơkŏn.
Tơlơi Khŏm Hmâo Kơ Sa Čô Mơnuih Kiăng Dưi Đuaĭ Tui Yêsu
(Mat 8:19-22)
57Tơdang gơñu rơbat rŏk jơlan, hmâo sa čô mơnuih laĭ hăng Yêsu: “Kâo či đuaĭ tui Ih pơpă anih Ih nao.”
58Yêsu laĭ glaĭ: “Pơja hmâo amăng, čĭm amăng adai hmâo hruh, samơ̆ Ană Mơnuih ƀu hmâo anih đăl akŏ ôh.”
59Yêsu laĭ hăng sa čô pô pơkŏn: “Đuaĭ tui Kâo bĕ.” Samơ̆ ñu laĭ: “Ơ Khua Yang, brơi kâo glaĭ dơr hĭ ama kâo hlâo amơĭ.”
60Samơ̆ Yêsu laĭ kơ ñu: “Lui ƀing djai dơr mă ƀing djai gơñu pô; bơ ih nao bĕ pơhaih Dêh Čar Pơtao Ơi Adai.”
61Sa čô pơkŏn laĭ: “Ơ Khua Yang, kâo či đuaĭ tui Ih, samơ̆ blŭng hlâo brơi kâo nao laĭ pơthâo hăng kơnŭng djuai kâo amơĭ.”#I Pơtao 19:20.
62Yêsu laĭ kơ ñu: “Hlơi pô djă wăng čuar samơ̆ ăt dŏ lăng glaĭ pơ klon ƀu năng lăp kơ Dêh Čar Pơtao Ơi Adai ôh.”
Currently Selected:
Luk 9: JRA2016
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.
