Luk 8

Ƀing Ding Kơna Đah Kơmơi

1Giơ̆ng anŭn, Yêsu găn nao plei prŏng laih anŭn plei anĕt, pơhaih hăng pơtô Tơlơi Phrâo Hiam Dêh Čar Pơtao Ơi Adai. Pluh dua čô khua ding kơna nao hrŏm hăng Ñu. 2Laih anŭn ăt hmâo mơ̆n ƀing đah kơmơi nao hrŏm hăng Ñu, jing ƀing mơnuih Yêsu hmâo suaih laih mơ̆ng tơlơi yang sat ngă laih anŭn tơlơi duăm ruă: HʼMari Madala, mơ̆ng ñu yơh tơjuh čô yang sat tơbiă laih,#Mat 27:55-56; Mar 15:40-41; Luk 23:49. 3HʼYôana bơnai Kusa, ding kơna wai lăng sang Hêrôt, HʼSusana, laih anŭn lu ƀing pơkŏn dơ̆ng; ƀing đah kơmơi anŭn hmâo yua laih dram gơnam gơñu kiăng djru Yêsu laih anŭn ƀing ding kơna Ñu.

Bơhmutu Kơ Pô Sai Pơjeh

(Mat 13:1-9; Mar 4:1-9)

4Tơ ƀing mơnuih lu pơtŭm glaĭ, laih anŭn ƀing ană plei mơ̆ng lu boh plei phara rai pơ Ñu, Yêsu pơhiăp hăng tơlơi bơhmutu, 5“Sa čô mơnuih sai pơjeh nao sai pơjeh ñu. Tơdang ñu sai đơđa pơjeh lĕ kơtuai jơlan. Arăng juă laih anŭn čĭm čoh ƀơ̆ng hĭ pơjeh anŭn. 6Đơđa lĕ ƀơi ngŏ boh pơtâo. Pơjeh anŭn man čăt, ñu gliu hĭ yua kơ ƀu hmâo hyuh ia ôh. 7Đơđa lĕ amăng anih drơi, drơi čăt hrŏm laih anŭn ket hĭ pơdai anŭn. 8Hmâo đơđa pơjeh pơkŏn dơ̆ng lĕ amăng anih lŏn hiam, ñu čăt đĭ hăng mơboh sa asar jing sa rơtuh.” Giơ̆ng Ñu pơhiăp tui anŭn, Ñu laĭ kraih: “Hlơi pô hmâo tơngia thâo hmư̆, brơi ñu hmư̆ bĕ!”

Pơblang Kơ Tơlơi Bơhmutu

(Mat 13:10-17; Mar 4:10-12)

9Tơ ƀing ding kơna Ñu tơña Ñu hơgĕt tơlơi kiăng pia kơ tơlơi bơhmutu anŭn, 10Ñu laĭ: “Ơi Adai pha brơi kơ ƀing gih dưi thâo hluh tơlơi yom hơgơ̆m kơ Dêh Čar Pơtao Ơi Adai; Samơ̆ kơ ƀing pơkŏn Kâo pơhiăp kơ gơñu hăng tơlơi bơhmutu, kiăng kơ

Gơñu lăng samơ̆ gơñu ƀu thâo ƀuh ôh,

Laih anŭn gơñu hmư̆ samơ̆ ƀu thâo hluh ôh.”#Êsai 6:9-10 (LXX).

Yêsu Pơblang Kơ Tơlơi Bơhmutu Pô Sai Pơjeh

(Mat 13:18-23; Mar 4:13-20)

11“Anai tơlơi bơhmutu anŭn kiăng pia: pơjeh jing boh pơhiăp Ơi Adai. 12Pơjeh lĕ kơtuai jơlan jing ƀing hmư̆ boh pơhiăp, samơ̆ yang sat rai hăng mă hĭ pơjeh mơ̆ng pran jua gơñu, hwĭ kơ gơñu đaŏ laih anŭn hmâo hĭ tơlơi pơklaih. 13Pơjeh lĕ ƀơi boh pơtâo jing ƀing hmư̆ boh pơhiăp laih anŭn mă tŭ mơtam hăng tơlơi mơak, samơ̆ gơñu ƀu hmâo akha ôh. Gơñu đaŏ kơnơ̆ng jang jai đôč; laih anŭn tơ hmâo tơlơi lông lăng, gơñu lui wir hĭ. 14Bơ pơjeh lĕ amăng anih pum drơi, jing ƀing hmâo hmư̆ laih boh pơhiăp, samơ̆ tơdang gơñu rơbat nao amăng jơlan tơlơi hơdip gơñu, tơlơi ƀlơ̆ng bơngơ̆t, tơlơi pơdrŏng sah, laih anŭn tơlơi hơ̆k mơak kơ tơlơi hơdip lŏn tơnah anai kơpĭ ket hĭ gơñu, laih anŭn boh gơñu ƀu thâo tơsă ôh. 15Samơ̆ pơjeh lĕ amăng lŏn hiam jing ƀing hmư̆ boh pơhiăp, djă pioh boh pơhiăp anŭn amăng pran jua hăng tơlơi tơpă sĭt laih anŭn hiam, laih anŭn gơñu gir run tơl gơñu dưi mơboh.”

Apui Kơđen Klŭp Hăng Reo

(Mar 4:21-25)

16“Ƀu hmâo ôh hlơi čuh apui kơđen laih anŭn gom hĭ ñu hăng kơthŭng ƀôdah pioh ñu gah yŭ sưng pĭt, samơ̆ pioh ñu ƀơi gơ̆ng apui kơđen, kiăng kơ hlơi pô mŭt amăng sang dưi ƀuh tơlơi bơngač.#Mat 5:15; Luk 11:33.

17Yua kơ ƀu hmâo ôh tơlơi hơgĕt hơgơ̆m tơl ƀu či bơrơđah hĭ, kŏn hmâo lơi tơlơi hơgĕt pơdŏp tơl arăng ƀu dưi thâo laih anŭn ba tơbiă pơ tơlơi bơngač.#Mat 10:26; Luk 12:2.

18Tui anŭn, răng bĕ kơ tơlơi ƀing gih hmư̆; yua kơ hlơi pô hmâo laih Ơi Adai či brơi thim dơ̆ng; samơ̆ kơ hlơi pô ƀu hmâo ôh, wơ̆t kơ mơnơ̆ng ñu pơmĭn ñu hmâo laih Ơi Adai či mă lui hĭ mơ̆n.”#Mat 25:29; Luk 19:26.

Amĭ Hăng Adơi Yêsu

(Mat 12:46-50; Mar 3:31-35)

19Hlăk anŭn amĭ hăng adơi Yêsu rai sem Ñu, samơ̆ yua kơ ƀing mơnuih lu gơñu ƀu dưi nao giăm pơ Ñu ôh. 20Hmâo mơnuih laĭ pơthâo Ñu: “Amĭ hăng adơi Ih dŏ pơ rơngiao kiăng bưp ih.”

21Samơ̆ Ñu laĭ glaĭ kơ gơñu: “Hlơi pô hmư̆ tơlơi Ơi Adai pơhiăp laih anŭn ngă tui, ƀing anŭn jing amĭ Kâo laih anŭn ƀing adơi ayŏng Kâo.”

Yêsu Khă Rơbŭ Kơthel

(Mat 8:23-27; Mar 3:31-35)

22Sa hrơi anŭn, Yêsu đĭ amăng sa boh sŏng hrŏm hăng ƀing ding kơna Ñu. Ñu laĭ kơ ƀing gơ̆: “Brơi ƀing ta găn nao pơ hang gah adih ia dơnao.” Tui anŭn gơñu nao. 23Tơdang sŏng gơñu nao, Yêsu pĭt hĭ. Hmâo rơbŭ kơthel truh ƀơi ia dơnao, laih anŭn ia mŭt bă sŏng, laih anŭn gơñu hlăk bưp tơlơi hyưt pưt. 24Gơñu nao râo Yêsu hăng laĭ: “Ơ Nai, Ơ Nai, ƀing ta djai yơh!” Yêsu mơdưh, khă angĭn hăng ia pah pŭng. Tui anŭn angĭn wơ̆t ia pah pŭng dŏ hơđơ̆ng hĭ laih anŭn rơiăt lơleh. 25Yêsu laĭ kơ ƀing gơñu “Pơpă tơlơi đaŏ ƀing gih lĕ?” Gơñu hwĭ, hling hlang laih anŭn bơlaĭ tơdruă gơñu: “Hlơi pô anai, tơl wơ̆t angĭn laih anŭn ia pah pŭng ăt gưt kơ Ñu mơ̆n?”

Yêsu Pơsuaih Mơnuih Yang Sat Ngă

(Mat 8:28-34; Mar 5:1-20)

26Gơñu truh pơ tring Gêrasen#8:26 Gêrasen; đơđa Hră Ơi Adai Pơhiăp so đưm čih Gadara (lăng Mat 8:28); đơđa hră pơkŏn čih Gergesa. klă anăp tring Galilê. 27Tơdang Yêsu man tơbiă trŭn ƀơi hang, hmâo sa čô mơnuih mơ̆ng plei hmâo lu yang sat ngă nao bưp Ñu. Mơ̆ng sui laih ñu ƀu buh sum ao ôh, laih anŭn ñu ƀu dŏ amăng sang ôh, samơ̆ dŏ amăng par pơsat. 28Tơ ñu ƀuh Yêsu, ñu ur kraih, bon kŭp ƀơi anăp Yêsu laih anŭn laĭ: “Hơgĕt tơlơi Ih hmâo hăng kâo, Ơ Yêsu, Ană Ơi Adai Pô Pơ Glông Hloh? Kâo kơwưh kơ Ih, anăm pơtơnap kâo ôh.” 29Yua kơ Yêsu hmâo pơđar laih yang bơngăt grĭ hơƀak brơi ñu tơbiă mơ̆ng mơnuih anŭn. Yua kơ lu wơ̆t yang sat ngă kơ ñu; wơ̆t dah arăng gak wai laih anŭn čaŏ tơkai, akă tơngan ñu hăng hrĕ čuăk laih anŭn anŭh, samơ̆ ñu kơtŭng tơĭ hĭ hrĕ anŭn, laih anŭn yang sat ba pơđuaĭ ñu nao pơ tơdrŏn tač.

30Yêsu tơña kơ gơ̆: “Hlơi anăn ih?” Gơ̆ laĭ: “Phung lu,” yua kơ hmâo lu yang sat mŭt laih amăng ñu. 31Laih anŭn ƀing yang sat kơwưh kơ Yêsu anăm pơđar gơñu nao mŭt amăng hlŭng dlam ôh!

32Ƀơi kriăng čư̆ anŭn hmâo lu bơbui hyu ƀơ̆ng; laih anŭn ƀing yang sat kơwưh kơ Yêsu brơi gơñu mŭt amăng khul bơbui anŭn, laih anŭn Yêsu brơi yơh. 33Giơ̆ng anŭn ƀing yang sat tơbiă mơ̆ng mơnuih anŭn hăng mŭt amăng khul bơbui. Abih bang khul bơbui mơ̆ng kriăng čư̆ dơ̆ng lơ̆ng, kơdâo trŭn amăng ia dơnao, laih anŭn djai trăm abih.

34Tơ ƀing wai bơbui ƀuh tơlơi truh, gơñu đuaĭ kơdŏp hăng ră tơlơi anŭn djŏp plei pla amăng tring anŭn. 35Tui anŭn ƀing ană plei pla tơbiă nao kiăng lăng tơlơi truh anŭn. Gơñu truh pơ Yêsu, laih anŭn ƀuh mơnuih ƀing yang sat hmâo tơbiă đuaĭ laih. Gơ̆ dŏ ber ƀơi tơkai Yêsu, čŭt hơô sum ao, tơlơi pơmĭn tơngăl laih; laih anŭn gơñu hwĭ biă mă. 36Ƀing mơnuih hmâo ƀuh laih tơlơi truh anŭn ră ruai glaĭ kơ ƀing mơnuih pơkŏn kơ tơlơi mơnuih yang sat ngă anŭn hyư̆m ñu suaih laih. 37Tui anŭn abih bang ƀing ană plei pla jum dar tring Gêrasen rơkâo kơ Yêsu đuaĭ hĭ mơ̆ng gơñu, yua kơ gơñu hwĭ biă mă. Hnŭn yơh, Yêsu đĭ sŏng laih anŭn wơ̆t glaĭ. 38Mơnuih hmâo ƀing yang sat phrâo tơbiă anŭn kơwưh kiăng dưi dŏ hrŏm hăng Yêsu. Samơ̆ Yêsu brơi ñu glaĭ hăng laĭ, 39“Glaĭ bĕ pơ sang ih, laih anŭn ruai glaĭ abih tơlơi Ơi Adai hmâo ngă brơi laih kơ ih.” Tui anŭn gơ̆ nao laih anŭn ră ruai djŏp plei khul tơlơi Yêsu hmâo ngă brơi laih kơ ñu.

Ană Dra Jairus Hăng Đah Kơmơi Ruă Tuh Drah

(Mat 9:18-26; Mar 5:21-43)

40Tơ Yêsu wơ̆t glaĭ, ƀing mơnuih lu čơkă drông Ñu, yua kơ abih bang ƀing gơñu leng kơ dŏ čang tơguan Ñu. 41Hmâo sa čô mơnuih rai, anăn ñu Jairus. Ñu jing khua wai sang bơjơnum. Ñu glung nao bon kŭp ƀơi tơkai Yêsu laih anŭn kơwưh rơkâo Yêsu nao pơ sang ñu, 42yua kơ ñu hmâo kơnơ̆ng sa čô ană đah kơmơi pluh dua thŭn giăm djai.

Tơdang Yêsu hlăk nao, ƀing mơnuih lu pơ kơpĭ Ñu. 43Hmâo sa čô đah kơmơi ruă tuh drah hmâo pluh dua thŭn laih. Ñu hmâo pơrơngiă laih abih dram gơnam kơ ƀing ơi ia jrao, samơ̆ ƀu hmâo hlơi dưi pơsuaih ñu ôh. 44Gơ̆ nao pơ gah klon Yêsu laih anŭn ruaih ƀơi jih ao Yêsu, tañ mơtam drah gơ̆ khơ̆t hĭ. 45Laih anŭn Yêsu tơña: “Hlơi ruaih Kâo?” Tơdang abih bang mơnuih hơngah, Pêtrôs laih anŭn ƀing hrŏm hăng ñu laĭ: “Ơ Nai, ƀing mơnuih lu jum dar Ih, gơñu kơpĭ Ih.”

46Samơ̆ Yêsu laĭ: “Hmâo sa čô mơnuih ruaih laih Kâo, yua kơ Kâo thâo tơlơi dưi mơyang tơbiă laih mơ̆ng Kâo.” 47Tơ đah kơmơi anŭn thâo kơ ñu ƀu dưi pơdŏp ôh, ñu tơtư̆ drơi jan glung nao bon ƀơi tơkai Yêsu, laih anŭn pơhaih ƀơi anăp abih bang mơnuih yua hơgĕt gơ̆ hmâo ruaih laih ao Yêsu laih anŭn hyư̆m gơ̆ suaih mơtam. 48Yêsu laĭ kơ gơ̆: “Ơ mŏ, tơlơi đaŏ ih hmâo pơsuaih ih laih. Nao rơnŭk rơnua bĕ!”

49Tơdang Ñu ăt dŏ pơhiăp, hmâo sa čô rai mơ̆ng sang khua wai sang bơjơnum laih anŭn laĭ: “Ană đah kơmơi ih djai laih, anăm pơgŭn Nai dơ̆ng ôh.”

50Samơ̆ tơ Yêsu hmư̆ tơlơi anŭn, Ñu laĭ kơ khua wai sang bơjơnum anŭn: “Anăm hwĭ ôh, kơnơ̆ng đaŏ đôč, ană dra ih či hơdip.”

51Tơ Yêsu truh pơ sang, Ñu ƀu brơi sa čô mŭt hrŏm hăng Ñu ôh, kơnơ̆ng Pêtrôs, Yôhan, Yakơ, laih anŭn amĭ ama čơđai anŭn. 52Abih bang hlăk dŏ čŏk hia rơngot kơ đah kơmơi anŭn; samơ̆ Yêsu laĭ: “Anăm čŏk hia ôh, yua kơ gơ̆ ƀu djai ôh, samơ̆ gơ̆ dŏ pĭt đôč.”

53Ƀing anŭn klao mưč kơ Yêsu, yua kơ gơñu thâo čơđai anŭn djai laih. 54Samơ̆ Yêsu djă tơngan gơ̆ hăng laĭ: “Ơ mŏ, tơgŭ bĕ.” 55Bơngăt gơ̆ wơ̆t glaĭ pơ gơ̆ dơ̆ng laih anŭn gơ̆ tơgŭ mơtam. Yêsu pơđar arăng ba mơnơ̆ng ƀơ̆ng huă kơ gơ̆. 56Amĭ ama gơ̆ hling hlang biă mă; samơ̆ Yêsu pơtă kơ gơñu anăm ruai kơ hlơi hlơi ôh hơgĕt tơlơi hmâo truh laih.

Currently Selected:

Luk 8: JRA2016

Highlight

Copy