Luk 7
7
Yêsu Pơsuaih Sa Čô Ding Kơna Khua Tơhan Rôm
(Mat 8:5-13)
1Giơ̆ng kơ Yêsu pơđŭt abih tơlơi Ñu pơhiăp anŭn kơ ƀing ană plei pla, Ñu mŭt amăng plei Kapernum. 2Sa čô khua tơhan kơ sa rơtuh čô hmâo sa čô ding kơna ñu khăp biă mă, dŏ ruă, giăm djai. 3Tơ ñu hmư̆ hing kơ Yêsu, ñu pơkiaŏ nao ƀing kŏng tha ƀing Yuđa rơkâo kơ Yêsu rai pơsuaih ding kơna ñu. 4Tơ ƀing anŭn truh pơ Yêsu, gơñu kơwưh kơ Yêsu hăng abih pran jua hăng laĭ: “ñu năng lăp kơ Ih ngă tơlơi anŭn kơ ñu, 5Yua kơ ñu khăp kơ kơnŭng djuai ƀing ta, laih anŭn ñu pơdơ̆ng brơi laih kơ ƀing ta sa boh sang bơjơnum.”
6Yêsu nao hrŏm hăng ƀing gơñu. Tơ Yêsu giăm truh pơ sang, khua tơhan pơkiaŏ gơyut ñu nao pơ Yêsu, hăng laĭ: “Ơ Khua Yang, anăm pơgleh ih pô ôh, yua kơ kâo ƀu lăp ôh jum ih mŭt amăng sang kâo. 7Yua kơ anŭn yơh kâo pơmĭn kâo pô kŏn lăp lơi nao pơ Ih. Samơ̆ kơnơ̆ng rơkâo Ih pơhiăp sa boh đôč, laih anŭn ding kơna kâo či suaih yơh. 8Yua kơ kâo ăt jing sa čô dŏ gah yŭ tơlơi dưi arăng, laih anŭn kâo ăt hmâo ƀing tơhan dŏ gah yŭ tơlơi dưi kâo. Kâo laĭ kơ sa čô: ‘Nao bĕ,’ laih anŭn ñu nao; kơ sa čô pơkŏn: ‘Rai bĕ,’ laih anŭn ñu rai, laih anŭn kơ ding kơna kâo: ‘Ngă tui anai,’ laih anŭn ñu ngă yơh.”
9Tơ Yêsu hmư̆ tơlơi anŭn, Ñu hling hlang kơ khua tơhan anŭn, laih anŭn wir lăng hăng laĭ kơ ƀing lu đuaĭ tui Ñu: “Kâo laĭ kơ ƀing gih, wơ̆t amăng Israel Kâo aka ƀuh ôh tơlơi đaŏ prŏng kar hăng anŭn.”
10Tơ ƀing mơnuih khua tơhan pơkiaŏ nao anŭn wơ̆t glaĭ pơ sang, gơñu ƀuh ding kơna anŭn suaih laih.
Yêsu Pơhơdip Glaĭ Ană Tơdăm Đah Kơmơi Blao
11Hrơi tơdơi,#7:11 Hrơi tơdơi; đơđa Hră Ơi Adai Pơhiăp so đưm čih Ƀiă tơdơi kơ anŭn. Yêsu nao pơ sa boh plei anăn Nain. Ƀing ding kơna Ñu laih anŭn khul mơnuih lu nao hrŏm hăng Ñu. 12Tơ Ñu giăm truh ƀơi amăng jang plei, anai nê arăng čơkung sa čô mơnuih djai, ană đah rơkơi sa čô đah kơmơi blao, ñu hmâo kơnơ̆ng sa čô ană anŭn đôč. Laih anŭn hmâo lu mơnuih mơ̆ng plei nao hrŏm hăng đah kơmơi anŭn. 13Tơ Khua Yang ƀuh đah kơmơi anŭn, Ñu hmâo tơlơi glưh pran jua hăng pap drap kơ gơ̆, hnŭn yơh Ñu laĭ: “Anăm hia ôh.” 14Ñu nao giăm, ruaih bong, laih anŭn ƀing mơnuih čơkung dơ̆ng glaĭ hĭ. Ñu laĭ: “Ơ dăm, Kâo laĭ kơ ih tơgŭ bĕ!” 15Pô djai anŭn pyut tơgŭ dŏ laih anŭn čơdơ̆ng pơhiăp. Yêsu jao gơ̆ kơ amĭ ñu. 16Abih bang mơnuih hwĭ biă mă, laih anŭn gơñu pơpŭ bơni hơơč kơ Ơi Adai, hăng laĭ: “Sa čô pô laĭ lui hlâo prŏng truh laih tơ̆ng krah ƀing ta,” laih anŭn “Ơi Adai hmâo rai čuă laih ƀing ană plei pla Ñu.” 17Arăng ră ruai tơlơi Yêsu ngă anai tar ƀar čar Yuđa laih anŭn abih tring jum dar.
Tơlơi Yôhan Ƀatem Tơña Kơ Yêsu
(Mat 11:2-19)
18Ƀing ding kơna Yôhan ruai glaĭ kơ Yôhan abih tơlơi anŭn. Yôhan iâu dua čô ding kơna ñu, 19laih anŭn pơkiaŏ gơñu nao tơña Khua Yang: “Djơ̆ mơ̆ Ih jing Pô khŏm rai, ƀôdah gơmơi či dŏ tơguan pô pơkŏn?” 20Tơ ƀing anŭn truh pơ Yêsu, gơñu laĭ: “Yôhan Ƀatem pơkiaŏ rai gơmơi tơña kơ Ih: ‘Djơ̆ mơ̆ Ih jing Pô khŏm rai, ƀôdah gơmơi či dŏ tơguan pô pơkŏn?’”
21Ƀơi mông anŭn Yêsu pơsuaih lu mơnuih ruă duăm, mơnuih yang sat ngă, laih anŭn Ñu ngă brơi lu mơnuih bum mơta dưi ƀuh rơđah. 22Yêsu laĭ glaĭ kơ gơñu: “Nao ruai glaĭ bĕ kơ Yôhan hơgĕt tơlơi ƀing gih hmâo ƀuh laih anŭn hmư̆ laih: ƀing bum mơta dưi ƀuh rơđah dơ̆ng, ƀing rơwen tơkai thâo rơbat, ƀing djơ̆ phŭng dưi rơgoh,#7:22 jing rơgoh: Lăng 5:12. ƀing tơngil dưi hmư̆, ƀing djai hơdip glaĭ dơ̆ng, laih anŭn ƀing ƀun rin dưi hmư̆ Tơlơi Phrâo Hiam.#Êsai 35:5-6; 61:1. 23Mơyun hiam yơh kơ hlơi pô ƀu tơhnač rơbuh yua kơ Kâo!”
24Tơ ƀing Yôhan pơkiaŏ nao glaĭ laih, Yêsu čơdơ̆ng pơhiăp kơ ƀing lu tơlơi djơ̆ kơ Yôhan: “Ƀing gih nao lăng tơlơi hơgĕt amăng tơdrŏn tač? Sa ƀĕ gai trang bô angĭn pưh rơyuh hă? 25Tui anŭn hơgĕt tơlơi ƀing gih nao lăng lĕ? Sa čô đah rơkơi buh ao yom kơdrưh hă? Anai nê, ƀing buh ao yom kơdrưh laih anŭn hơdip pơdrŏng sah dŏ amăng sang pơtao. 26Tui anŭn hơgĕt tơlơi ƀing gih nao lăng lĕ? Sa čô pô laĭ lui hlâo hă? Djơ̆ laih, kâo laĭ kơ ƀing gih, hmâo pô yom hloh kơ pô laĭ lui hlâo dơ̆ng. 27Kơ pô anŭn yơh Hră Ơi Adai pơhiăp hmâo čih laih tui anai:
‘Anai nê, Kâo pơkiaŏ nao pô pơala Kâo nao hlâo kơ Ih,
Ñu či rơmet jơlan Ih hlâo kơ Ih truh.’#Mal 3:1.
28Kâo laĭ kơ ƀing gih, đơ ƀing mơnuih đah kơmơi tơkeng rai laih, ƀu hmâo pô prŏng hloh kơ Yôhan ôh; samơ̆ pô anĕt hloh amăng dêh čar pơtao Ơi Adai jing pô prŏng hloh kơ Yôhan.” 29Abih bang ƀing ană plei pla wơ̆t ƀing ring jia hmư̆ Yôhan pơtô, hmâo tŭ laih tơlơi ƀatem Yôhan, gơñu leng tŭ ư kơ Ơi Adai jing tơpă.#Mat 21:32; Luk 3:12. 30Samơ̆ ƀing Pharisi hăng ƀing nai pơtô tơlơi juăt hơngah tơlơi Ơi Adai ruah pioh brơi kơ gơñu, yua kơ gơñu ƀu tŭ ôh tơlơi ƀatem Yôhan.
31“Hăng tơlơi hơgĕt Kâo či pơhmu ƀing mơnuih rơnŭk anai lĕ, laih anŭn gơñu hrup hăng hlơi? 32Gơñu jing hrup hăng ƀing čơđai dŏ ber amăng anih sĭ mơdrô, laih anŭn gơñu pơ iâu tơdruă gơñu tui anai: ‘Gơmơi ayŭp laih đing dĕk kơ ƀing gih, samơ̆ ƀing gih ƀu yŭn suang ôh; gơmơi hri čok laih, samơ̆ ƀing gih ƀu hia ôh.’ 33Yua kơ Yôhan Ƀatem rai laih, ƀu ƀơ̆ng huă, laih anŭn ƀu mơñum tơpai ôh, anŭn yơh ƀing gih laĭ: ‘Ñu yang sat ngă.’ 34Ană Mơnuih hmâo rai laih ƀơ̆ng huă hăng mơñum, laih anŭn gơñu laĭ: ‘Anai nê, sa čô ră ƀơ̆ng, ră mơñum, gơyut gơyâo hăng ƀing ring jia laih anŭn ƀing mơnuih soh!’ 35Samơ̆ tơlơi kơhnâo pơsĭt ñu pô jing djơ̆ yua mơ̆ng boh than#7:35 Grek: ană bă. ñu.”
Yêsu Ƀơ̆ng Huă Amăng Sang Simôn Pharisi
36Sa čô Pharisi jak Yêsu ƀơ̆ng huă hrŏm hăng ñu, Yêsu mŭt amăng sang pô anŭn laih anŭn dŏ ber ƀơ̆ng huă hrŏm hăng ñu. 37Laih anŭn anai nê, hmâo sa čô đah kơmơi soh sat amăng plei anŭn, tơ ñu thâo Yêsu dŏ ƀơ̆ng huă amăng sang sa čô mơnuih Pharisi, ñu djă ba sa boh get boh pơtâo hiam pioh bă hăng ia klôñ ƀâu mơngưi.#Mat 26:7; Mar 14:3; Yô 12:3. 38Ñu dŏ gah klon ƀơi tơkai Yêsu, ñu hia, ia mơta ñu ngă pơsah tơkai Yêsu; giơ̆ng anŭn ñu sut tơkai Yêsu hăng ƀuk ñu. Ñu čŭm tơkai Yêsu hăng truač ia ƀâu hiam ƀơi tơkai Yêsu. 39Mơnuih Pharisi, pô jak Yêsu ƀuh tơlơi anŭn, ñu pơmĭn tui anai: “Tơdah pô anai jing sa čô pô laĭ lui hlâo sĭt, Ñu thâo krăn yơh hlơi đah kơmơi pô ruaih Ñu anai laih anŭn hyư̆m gơ̆ jing, yua kơ gơ̆ jing sa čô mơnuih soh.”
40Yêsu laĭ kơ ñu: “Ơ Simôn, Kâo hmâo tơlơi kiăng pơhiăp hăng ih.” Ñu laĭ: “Ơ nai, pơhiăp bĕ!”
41“Sa čô mơnuih hmâo dua čô đom hơnưh ñu. Sa čô đom hơnưh rơma rơtuh đơniê laih anŭn sa čô pơkŏn rơma pluh đơniê. 42Yua kơ dua gơñu ƀu dưi kla ôh, pô hơnưh pơrơngai hĭ hơnưh gơñu. Tui anŭn hlơi amăng dua gơñu či khăp kơ pô hơnưh lu hloh?”
43Simôn laĭ glaĭ: “Kâo pơmĭn pô ñu pơrơngai hơnưh lu hloh anŭn.” Yêsu laĭ kơ ñu: “Ih pơmĭn djơ̆ yơh.”
44Laih anŭn Ñu wir lăng đah kơmơi anŭn hăng laĭ kơ Simôn: “Ih ƀuh mơ̆ đah kơmơi anai? Kâo mŭt laih amăng sang ih, ih ƀu brơi ia kơ Kâo rao tơkai ôh. Samơ̆ bơ đah kơmơi anai, gơ̆ hmâo pơsah laih tơkai Kâo hăng ia mơta laih anŭn sut hăng ƀuk gơ̆. 45Ih ƀu čŭm Kâo ôh, samơ̆ dơ̆ng mơ̆ng kâo mŭt amăng sang ih, gơ̆ ƀu pơdơi čŭm tơkai Kâo ôh. 46Ih ƀu truač ia jâu ƀơi akŏ Kâo ôh, samơ̆ ñu hmâo pik laih ia jâu ƀâu mơngưi ƀơi tơkai Kâo. 47Hnŭn yơh Kâo laĭ kơ ih tơlơi soh gơ̆ lu biă mă samơ̆ hmâo tơlơi pap brơi laih, yua kơ anŭn yơh gơ̆ khăp lu. Samơ̆ kơ pô hmâo tơlơi pap brơi ƀiă, ñu khăp ƀiă.”
48Laih anŭn Ñu laĭ kơ đah kơmơi anŭn: “Tơlơi soh ih Kâo pap brơi laih.”
49Tui anŭn ƀing dŏ ƀơ̆ng huă hrŏm hăng Ñu čơdơ̆ng bơlaĭ tơdruă gơñu pô: “Hlơi pô anai, tơl Ñu dưi pap brơi tơlơi soh arăng?”
50Yêsu laĭ kơ đah kơmơi anŭn: “Tơlơi đaŏ ih pơklaih ih laih; nao rơnŭk rơnua bĕ.”
Currently Selected:
Luk 7: JRA2016
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.
