Luk 21

Đah Kơmơi Blao Pơyơr Prăk

(Mar 12:41-44)

1Yêsu angak mơta lăng laih anŭn ƀuh ƀing pơdrŏng plĕ prăk gơñu pơyơr amăng hip prăk sang kơkuh pơpŭ. 2Yêsu ăt ƀuh mơ̆n sa čô đah kơmơi blao ƀun rin pơyơr dua su. 3Ñu laĭ: “Sĭt biă mă Kâo laĭ kơ ƀing gih, đah kơmơi blao ƀun rin anai pơyơr lu hloh kơ abih bang ƀing pơkŏn. 4Yua kơ abih bang ƀing anŭn mă prăk rơbeh gơñu pơyơr kơ Ơi Adai, bơ kơ đah kơmơi anai ƀun rin biă mă samơ̆ ñu mă abih dram gơnam ñu hmâo kiăng dŏ hơdip pơyơr hĭ kơ Ơi Adai.”

Yêsu Laĭ Hlâo Kơ Tơlơi Răm Rai Sang Kơkuh Pơpŭ Plei Yêrusalem

(Mat 24:1-2; Mar 13:1-2)

5Tơdang hmâo đơđa mơnuih laĭ djơ̆ kơ sang kơkuh pơpŭ, tơlơi arăng pơhrôp pơhiam ñu hăng boh pơtâo yom, laih anŭn gơnam arăng pơyơr, Yêsu laĭ, 6“Kơ gơnam ƀing gih ƀuh anai, hrơi či truh, hlăk anŭn ƀu či hmâo sa boh pơtâo dŏ ƀơi hăng ngŏ boh pơtâo pơkŏn ôh, samơ̆ abih bang či glưh hĭ.”

Tơlơi Tơnap Tap Hăng Tơlơi Arăng Ngă Sat

(Mat 24:3-14; Mar 13:3-13)

7Gơñu tơña kơ Yêsu: “Ơ Nai, hơbin tơlơi anŭn či truh, laih anŭn hơgĕt gru kơnăl kơ tơlơi anŭn giăm truh?”

8Yêsu laĭ glaĭ: “Răng bĕ, anăm brơi arăng plư kơ ƀing gih ôh, yua kơ lu mơnuih či rai ƀlor amăng anăn Kâo laih anŭn laĭ: ‘Kâo yơh Krist’ laih anŭn ‘Hrơi anŭn giăm truh yơh!’ Anăm đuaĭ tui gơñu ôh. 9Laih anŭn tơ ƀing gih hmư̆ hing kơ tơlơi pơblah hăng tơlơi krŭ pơkơdơ̆ng, anăm hwĭ ôh; yua kơ tơlơi anŭn khŏm truh hlâo, samơ̆ aka ƀu truh hrơi hnal tuč ôh.”

10Yêsu laĭ kơ ƀing anŭn dơ̆ng: “Djuai mơnuih anai či pơkơdơ̆ng hăng djuai mơnuih pơkŏn, laih anŭn dêh čar pơtao anai či pơblah hăng dêh čar pơtao pơkŏn. 11Či hmâo tơlơi pơpư̆ lŏn tơnah kơtang, laih anŭn amăng lu anih či hmâo tơlơi ư̆ rơpa, tơlơi ruă djai, laih anŭn či hmâo tơlơi hwĭ hyưt biă mă hăng tơlơi gru kơnăl mơyang prŏng mơ̆ng adai. 12Samơ̆ hlâo kơ abih bang tơlơi anŭn truh, arăng či mă ƀing gih, ngă sat kơ ƀing gih, jao ƀing gih kơ khua sang bơjơnum, krư̆ ƀing gih, laih anŭn arăng či dui ba ƀing gih ƀơi anăp ƀing pơtao laih anŭn ƀing khua wai lăng lŏn čar yua kơ anăn Kâo. 13Anŭn či jing mông gal brơi kơ ƀing gih pơhaih tơlơi ƀing gih đaŏ. 14Brơi ƀing gih kơđŏm pioh tơlơi anŭn amăng pran jua, anăm pơmĭn hlâo ôh hyư̆m tơlơi ƀing gih či laĭ glaĭ;#Luk 12:11-12. 15yua kơ, Kâo či pha brơi kơ ƀing gih tơlơi pơhiăp laih anŭn tơlơi kơhnâo tơl abih bang ƀing ayăt roh ƀing gih ƀu dưi pơkơdơ̆ng ƀôdah pơgăl hăng ƀing gih ôh. 16Wơ̆t kơ amĭ ama adơi ayŏng, kơnŭng djuai ƀing gih pô, laih anŭn gơyut gơyâo ƀing gih či pleč jao lui ƀing gih, laih anŭn gơñu či pơdjai wơ̆t đơđa ƀing gih mơ̆n. 17Abih bang mơnuih či bơrơmŭt kơ ƀing gih yua kơ anăn Kâo. 18Samơ̆ ƀu hmâo ôh sa ară ƀuk ƀơi akŏ ƀing gih či rơngiă hĭ. 19Yua mơ̆ng tơlơi gir run, ƀing gih či pơklaih bơngăt ƀing gih.”

Yêsu Laĭ Hlâo Kơ Tơlơi Răm Rai Plei Yêrusalem

(Mat 24:15-21; Mar 13:14-19)

20“Tơ ƀing gih ƀuh ƀing tơhan wang jum dar plei Yêrusalem laih, tui anŭn brơi ƀing gih thâo tơlơi pơrai plei anŭn giăm truh yơh. 21Hlăk anŭn hlơi pô dŏ amăng čar Yuđa brơi đuaĭ kơdŏp bĕ pơ čư̆. Laih anŭn hlơi pô dŏ amăng plei Yêrusalem brơi ñu tơbiă bĕ pơ rơngiao; hlơi pô dŏ pơ hmua anăm mŭt glaĭ amăng plei ôh. 22Yua kơ anŭn jing khul hrơi rŭ nua, kiăng pơsĭt abih tơlơi arăng hmâo čih laih.#Ôsê 9:7. 23Amăng khul hrơi anŭn tơnap tap yơh kơ ƀing đah kơmơi pi kian hăng ƀing pơmĕm ană! Yua kơ či hmâo tơlơi tơnap tap prŏng ƀơi lŏn tơnah laih anŭn tơlơi kreñ pơkơdơ̆ng glaĭ truh kơ ană plei pla anai. 24Gơñu či djai hăng đao gưm, laih anŭn arăng či dui ba gơñu jing mơnă ƀơi tơ̆ng krah abih bang ƀing djuai mơnuih. Laih anŭn ƀing djuai tuai či juă lin plei Yêrusalem tơl rơnŭk ƀing djuai tuai abih hĭ.”

Ană Mơnuih Trŭn Rai Dơ̆ng

(Mat 24:29-31; Mar 13:24-27)

25“Či hmâo gru kơnăl hling hlang amăng yang hrơi, amăng blan, laih anŭn amăng khul pơtŭ, laih anŭn ƀơi lŏn tơnah či hmâo tơlơi rŭng răng amăng ƀing djuai mơnuih, yua kơ gơñu ƀu thâo hơgĕt ngă ôh tơ hmư̆ dơnai ia rơsĭ laih anŭn ia pah pŭng ur grao.#Êsai 13:10; Êsê 32:7; Yôel 2:31; Bơrđ 6:12-13. 26Lu mơnuih či djai huăt hĭ yua kơ hwĭ bral tơdang dŏ tơguan kơ tơlơi či truh ƀơi lŏn tơnah; yua kơ tơlơi dưi kơtang amăng adai či pơpư̆ pơgơi. 27Hlăk anŭn gơñu či ƀuh Ană Mơnuih rai amăng kơthul hiăng hăng tơlơi dưi mơyang laih anŭn tơlơi guh kơang prŏng.#Đaniel 7:13; Bơrđ 1:7. 28Tơ tơlơi anŭn čơdơ̆ng truh, tơgŭ bĕ, angak đĭ akŏ ƀing gih, yua kơ tơlơi pơklaih ƀing gih giăm truh laih.”

Tơlơi Hrăm Mơ̆ng Phŭn Hra

(Mat 24:32-35; Mar 13:28-31)

29Yêsu pơhiăp hăng ƀing gơñu sa tơlơi bơhmutu: “Lăng bĕ kơ phŭn hra laih anŭn abih bang phŭn kơyâo pơkŏn. 30Tơ ƀing gih ƀuh gơñu čơdơ̆ng čơnăt hla, ƀing gih thâo bơyan phang giăm truh yơh. 31Kar hăng anŭn mơ̆n, tơ ƀing gih ƀuh abih tơlơi anŭn truh rai, brơi ƀing gih thâo kơ dêh čar pơtao Ơi Adai giăm truh laih.”

32“Sĭt biă mă Kâo laĭ kơ ƀing gih, ƀing mơnuih rơnŭk anai ƀu či rơgao hĭ ôh tơl abih tơlơi anŭn truh. 33Adai laih anŭn lŏn tơnah či rơgao hĭ, samơ̆ tơlơi Kâo pơhiăp ƀu či rơgao hĭ ôh.”

Brơi Dŏ Răng

34“Samơ̆ răng bĕ kơ gih pô, hwĭ kơ pran jua ƀing gih jing kơtraŏ hăng tơlơi ƀơ̆ng huă gao hơnơ̆ng, măt tơpai laih anŭn tơlơi ƀlơ̆ng bơngơ̆t kơ tơlơi hơdip rơnŭk anai laih anŭn Hrơi anŭn blĭp truh kơ ƀing gih kar hăng jal klŭp. 35Yua kơ tơlơi anŭn či truh kơ abih bang mơnuih dŏ tar ƀar rŏng lŏn tơnah. 36Tui anŭn, brơi ƀing gih dŏ răng nanao, laih anŭn iâu laĭ kiăng kơ ƀing gih hmâo tơlơi kơtang dưi klaih mơ̆ng abih tơlơi či truh, laih anŭn dŏ dơ̆ng ƀơi anăp Ană Mơnuih.”

37Rĭm hrơi Yêsu dŏ pơtô amăng sang kơkuh pơpŭ, samơ̆ mlam Ñu nao đơ̆m pơ čư̆ arăng pơanăn čư̆ Ôliwơ.#Luk 19:47. 38Ưm mơguah abih bang ană plei rai pơ Ñu kiăng hmư̆ tơlơi Ñu pơtô amăng sang kơkuh pơpŭ.

Currently Selected:

Luk 21: JRA2016

Highlight

Copy