Luk 22
22
Tơlơi Črŏng Sai Kiăng Pơblư̆ Yêsu
(Mat 26:1-5; Mar 14:1-2; Yô 11:45-53)
1Phĕt Ƀañ Tơpŭng Ƀu Hmâo Tơpơi arăng pơanăn phĕt Tơlơi Găn, giăm truh laih.#Tơb 12:1-27. 2Ƀing khua ngă yang prŏng hăng ƀing nai pơtô tơlơi juăt hơduah jơlan kiăng pơdjai Yêsu; yua kơ gơñu hwĭ ană plei pla.
Yudas Pơblư̆ Yêsu
(Mat 26:14-16; Mar 14:10-11)
3Hlăk anŭn satan mŭt amăng Yudas arăng pơanăn Iskariôt, sa čô amăng pluh dua čô khua ding kơna. 4Yudas nao črŏng sai hăng ƀing khua ngă yang prŏng laih anŭn hăng ƀing khua tơhan sang kơkuh pơpŭ hơduah jơlan kiăng dưi jao brơi Yêsu kơ gơñu. 5Ƀing gơñu hơ̆k mơak biă mă, laih anŭn ƀuăn či brơi prăk kơ ñu. 6Tui anŭn ñu tŭ ư, laih anŭn hơduah hrơi gal dưi jao Yêsu kơ ƀing gơñu tơdang mơnuih lu ƀu thâo ôh.
Yêsu Pơkra Phĕt Tơlơi Găn
(Mat 26:17-25; Mar 14:12-21; Yô 13:21-30)
7Truh hrơi phĕt Ƀañ Ƀu Hmâo Tơpơi, jing hrơi arăng khŏm pơdjai ană triu phĕt Tơlơi Găn, 8Yêsu pơkiaŏ nao Pêtrôs hăng Yôhan laih anŭn laĭ: “Nao bĕ prăp rơmet phĕt Tơlơi Găn, kiăng ƀing ta dưi ƀơ̆ng.”
9Gơñu tơña kơ Yêsu: “Pơpă anih ih kiăng gơmơi prăp rơmet phĕt Tơlơi Găn?”
10Yêsu laĭ kơ gơñu: “Anai nê, tơ ƀing gih mŭt amăng plei laih, hmâo sa čô mơnuih đua čeh ia či bưp ƀing gih; đuaĭ tui ñu bĕ mŭt amăng sang ñu mŭt, 11laih anŭn laĭ kơ pô sang: ‘Nai tơña kơ ih: “Pơpă anih Kâo či ƀơ̆ng phĕt Tơlơi Găn hrŏm hơbĭt hăng ƀing ding kơna Kâo?”’ 12Pô sang či črâo brơi kơ ƀing gih sa boh anih prŏng amăng adŭ, mơnơ̆ng mơnuă prăp rơmet laih. Ƀơi anŭn yơh ƀing gih prăp rơmet.”
13Gơñu nao laih anŭn ƀuh tơlơi anŭn djơ̆ tui hăng tơlơi Yêsu hmâo laĭ laih kơ gơñu; laih anŭn gơñu pơkra rơmet phĕt Tơlơi Găn.
Tơlơi Ƀơ̆ng Pơgop Rơgoh Hiam
(Mat 26:26-30; Mar 14:22-26; I Kôr 11:23-25)
14Tơl truh mông laih, Ñu dŏ ber ƀơi kơƀang ƀơ̆ng huă, laih anŭn ƀing khua ding kơna dŏ hrŏm hơbĭt hăng Ñu. 15Ñu laĭ kơ ƀing gơ̆: “Kâo kiăng biă mă ƀơ̆ng phĕt Tơlơi Găn anai hrŏm hơbĭt hăng ƀing gih hlâo kơ Kâo tŭ tơlơi ruă nuă. 16Yua kơ Kâo laĭ hăng ƀing gih, Kâo ƀu či ƀơ̆ng phĕt Tơlơi Găn anai dơ̆ng ôh tơl phĕt anŭn pơgiơ̆ng sĭt hĭ amăng dêh čar pơtao Ơi Adai.”
17Ñu mă sa boh kơčok, giơ̆ng kơ iâu laĭ bơni hơơč, Ñu laĭ: “Mă bĕ kơčok anai laih anŭn pơpha brơi tơdruă ƀing gih. 18Yua kơ Kâo laĭ kơ ƀing gih, mơ̆ng anai pơ anăp Kâo ƀu či mơñum dơ̆ng ôh tơpai boh kơƀâu anai tơl dêh čar pơtao Ơi Adai truh.”
19Laih anŭn Ñu mă ƀañ tơpŭng, giơ̆ng iâu laĭ bơni hơơč, Ñu wơ̆k ƀañ tơpŭng laih anŭn brơi kơ ƀing gơ̆ hăng laĭ: “Anai jing drơi jan Kâo, hmâo pơsăn brơi laih yua kơ ƀing gih. Ngă bĕ tơlơi anai kiăng hơdơr kơ Kâo.” 20Tơ ƀơ̆ng giơ̆ng laih, Ñu ăt ngă kar hăng anŭn mơ̆n laih anŭn laĭ: “Kơčok anai jing kơnol pơgop phrâo amăng drah Kâo, tuh brơi laih yua kơ ƀing gih.”#Yêr 31:31-34.
21“Samơ̆ anai, tơngan pô pơblư̆ lui Kâo hlăk dŏ ƀơi kơƀang hrŏm hăng Kâo.#Adoh 41:9. 22Yua kơ Ană Mơnuih či nao tui hăng tơlơi Ơi Adai hmâo dưm laih kơ Ñu; samơ̆ răm ƀăm yơh kơ pô pơblư̆ lui Ñu.”
23Ƀing ding kơna čơdơ̆ng tơña tơdruă gơñu kiăng thâo hlơi amăng ƀing gơñu či ngă tơlơi anŭn.
Tơlơi Pơrơjah Kơ Hlơi Jing Pô Prŏng Hloh
24Hmâo tơlơi pơrơjah amăng tơdruă ƀing ding kơna kiăng thâo hlơi či jing prŏng hloh amăng ƀing gơñu.#Mat 18:1; Mar 9:34; Luk 9:46. 25Samơ̆ Yêsu laĭ kơ gơñu: “Ƀing pơtao djuai tuai yua tơlơi dưi kiăng wai lăng ƀing gơñu; laih anŭn ƀing khua gĭt gai, arăng iâu gơñu jing ƀing mơnuih ngă bruă hiam.#Mat 20:25-27; Mar 10:42-44. 26Samơ̆ gah kơ ƀing gih ƀu djơ̆ tui anŭn ôh. Hlơi pô prŏng hloh amăng ƀing gih khŏm ñu jing kar hăng anĕt hloh, laih anŭn hlơi jing pô wai lăng khŏm ñu jing kar hăng ding kơna.#Mat 23:11; Mar 9:35. 27Yua kơ hlơi jing prŏng hloh, pô dŏ ber ƀơ̆ng huă ƀôdah pô buih bruă? Djơ̆ mơ̆ jing pô dŏ ber ƀơ̆ng huă? Samơ̆ Kâo dŏ tơ̆ng krah ƀing gih kar hăng sa čô mơnuih buih bruă.”#Yô 13:12-15.
28“Ƀing gih jing ƀing dŏ hrŏm hơbĭt laih hăng Kâo amăng tơlơi lông lăng truh kơ Kâo, 29hnŭn yơh Kâo pha brơi dêh čar pơtao kơ ƀing gih kar hăng Ama Kâo hmâo pha brơi kơ Kâo mơ̆n, 30kiăng kơ ƀing gih dưi ƀơ̆ng mơñum hrŏm hơbĭt hăng Kâo ƀơi kơƀang amăng dêh čar pơtao Kâo, laih anŭn dŏ ber ƀơi gre pơtao phat kơđi kơ pluh dua kơnŭng djuai Israel.”#Mat 19:28.
Yêsu Laĭ Hlâo Pêtrôs Či Hơngah Ñu
(Mat 26:31-35; Mar 14:27-31; Yô 13:36-38)
31“Ơ Simôn, Simôn ih lăng anai, Satan kiăng pơi ƀing gih kar hăng pơdai. 32Samơ̆ Kâo iâu laĭ laih kơ ih, kiăng kơ tơlơi đaŏ ih ƀu tơdu ôh. Laih anŭn tơ ih wơ̆t glaĭ pơ Kâo dơ̆ng, brơi ih pơkơjăp ƀing adơi ayŏng ih bĕ.”
33Pêtrôs laĭ: “Ơ Khua Yang, kâo pre rơmet laih kiăng nao hrŏm hăng Ih wơ̆t amăng sang mơnă ƀôdah amăng tơlơi djai.”
34Yêsu laĭ glaĭ: “Ơ Pêtrôs, Kâo laĭ kơ ih, hrơi anai tơdang mơnŭ aka tơdjô̆ ôh, ih či hơngah ƀu thâo krăn Kâo klâo wơ̆t.”
Kơdŭng Prăk, Kơƀao, Hăng Đao Gưm
35Yêsu laĭ dơ̆ng: “Tơ Kâo pơkiaŏ ƀing gih nao, ƀu hmâo kơdŭng prăk ƀôdah kơƀao, ƀôdah klĭ juă, ƀing gih hmâo kơƀah hơgĕt mơ̆?” Gơñu laĭ: “Ƀu kơƀah hơgĕt ôh.”#Mat 10:9-10; Mar 6:8-9; Luk 9:3; 10:4.
36Yêsu laĭ kơ ƀing gơ̆: “Samơ̆ ră anai, hlơi hmâo kơdŭng prăk djă ba bĕ, hlơi hmâo kơƀao, ăt kar kaĭ mơ̆n; laih anŭn hlơi ƀu hmâo đao ôh, brơi ñu sĭ ao phyung ñu laih anŭn blơi sa ƀĕ đao. 37Yua kơ Kâo laĭ hăng ƀing gih, Tơlơi Ơi Adai Pơhiăp anai čih laih khŏm krĕp djơ̆ amăng Kâo yơh: ‘Arăng hmâo yap laih Ñu jing hrŏm hơbĭt hăng ƀing mơnuih soh’. Sĭt yơh, tơlơi čih laih djơ̆ kơ Kâo hlăk hmâo tơlơi krĕp djơ̆ yơh.”#Êsai 53:12. 38Gơñu laĭ: “Ơ Khua Yang, hmâo dua ƀĕ đao pơ anai.” Yêsu laĭ: “Djŏp yơh.”
Yêsu Iâu Laĭ Pơ Čư̆ Ôliwơ
(Mat 26:26-46; Mar 14:32-42)
39Giơ̆ng anŭn, Yêsu tơbiă laih anŭn rơbat nao pơ čư̆ Ôliwơ tui hăng tơlơi Ñu juăt ngă; Ƀing ding kơna Ñu nao hrŏm hơbĭt hăng Ñu. 40Tơ Yêsu truh laih pơ anih anŭn, Yêsu laĭ kơ ƀing ding kơna Ñu: “Iâu laĭ bĕ kiăng kơ ƀing gih ƀu lĕ ôh amăng tơlơi plư.”
41Yêsu nao ataih mơ̆ng ƀing gơñu kơplah wah sa wang arăng glŏm boh pơtâo, Ñu tŏ tơŭt iâu laĭ tui anai, 42“Ơ Ama, tơdah Ih kiăng, rơkâo Ih mă pơđuaĭ hĭ bĕ kơčok tơlơi ruă nuă anai mơ̆ng Kâo; samơ̆ tui hăng Ih kiăng, ƀu djơ̆ tui hăng Kâo kiăng ôh.” 43Hmâo sa čô ling jang mơ̆ng adai pơrơđah rai kơ Ñu laih anŭn pơkơtang brơi Ñu. 44Amăng tơlơi ruă nuă, Ñu iâu laĭ jai kơtang hloh dơ̆ng, ia hô̆ Ñu jing hĭ kar hăng tơdjoh drah prŏng lĕ ƀơi lŏn.#22:44 Đơđa Hră Ơi Adai Pơhiăp so đưm ƀu hmâo ôh jơlan 43-44. 45Giơ̆ng kơ iâu laĭ, Yêsu tơgŭ nao pơ ƀing ding kơna Ñu. Ñu ƀuh ƀing gơñu hlăk dŏ pĭt yua kơ tơlơi rơngot. 46Ñu laĭ kơ ƀing gơñu: “Hyư̆m ƀing gih dŏ pĭt lĕ? Tơgŭ laih anŭn iâu laĭ bĕ, kiăng kơ ƀing gih ƀu lĕ ôh amăng tơlơi plư.”
Arăng Mă Čaŏ Yêsu
(Mat 26:47-56; Mar 14:43-50; Yô 18:3-11)
47Tơdang Yêsu dŏ pơhiăp, hmâo sa phung mơnuih lu rai; pô arăng pơanăn Yudas, sa čô amăng pluh dua čô ƀing khua ding kơna, ba jơlan ƀing anŭn. Ñu nao jĕ Yêsu kiăng čŭm Yêsu. 48Samơ̆ Yêsu laĭ kơ ñu: “Ơ Yudas, ih yua tơlơi čŭm kiăng pơblư̆ lui Ană Mơnuih hă?”
49Tơ ƀing mơnuih dŏ hrŏm hơbĭt hăng Yêsu ƀuh tơlơi čơdơ̆ng truh, gơñu laĭ: “Ơ Khua Yang, gơmơi dưi yua đao kiăng koh mơ̆?” 50Sa čô amăng ƀing gơñu koh hĭ ding kơna khua ngă yang prŏng hloh laih anŭn tơĭ hĭ tơngia gah hơnuă ñu.
51Samơ̆ Yêsu laĭ: “Lui bĕ! Anăm koh dơ̆ng ôh!” Giơ̆ng anŭn Yêsu ruaih ƀơi tơngia pô ding kơna anŭn hăng pơhlao brơi gơ̆.
52Khua Yang Yêsu laĭ tui anai hăng ƀing khua ngă yang prŏng, ƀing tơhan gak wai sang kơkuh pơpŭ, laih anŭn ƀing kŏng tha rai mă Ñu: “Ƀing gih djă đao hăng gai rai mă Kâo kar hăng kiăng mă sa čô mơnuih klĕ dŏp hă? 53Tơdang rĭm hrơi Kâo dŏ hrŏm hăng ƀing gih amăng sang kơkuh pơpŭ, ƀing gih ƀu mă Kâo ôh. Samơ̆ ră anai jing mông kơ ƀing gih laih anŭn kơ tơlơi dưi mơyang kơnăm mơmŏt yơh.”#Luk 19:47; 21:37.
Pêtrôs Hơngah Yêsu
(Mat 26:57-58,69-75; Mar 14:53-54,66-72; Yô 18:12-18,25-27)
54Gơñu mă čăp Yêsu laih anŭn ba pơđuaĭ, gơñu ba Yêsu nao pơ sang khua ngă yang prŏng hloh. Pêtrôs đuaĭ tui mơ̆ng ataih ataih. 55Gơñu pơtŏ apui tơ̆ng krah wăl sang laih anŭn dŏ ber hrŏm hơbĭt, Pêtrôs ăt dŏ ber tơ̆ng krah ƀing gơñu mơ̆n. 56Tơdang Pêtrôs dŏ ber giăm apui, sa čô ding kơna đah kơmơi dŏ lăng kơ ñu ƀu ƀleh mơta ôh, laih anŭn laĭ: “Pô anai ăt dŏ hrŏm hơbĭt hăng Ñu mơ̆n.”
57Samơ̆ Pêtrôs hơngah laih anŭn laĭ: “Ơ yă anŭn hơi, kâo ƀu thâo krăn Ñu ôh.”
58Ƀiă kơ anŭn, hmâo sa čô mơnuih pơkŏn ƀuh Pêtrôs laih anŭn laĭ: “Ih ăt jing sa čô amăng ƀing anŭn mơ̆n!”
Samơ̆ Pêtrôs laĭ: “Ơ čơkơi anŭn, kâo ƀu jing ƀing anŭn ôh.”
59Năng ai sa mông tơdơi kơ anŭn, hmâo sa čô pô pơkŏn laĭ khŭt khăt tui anai: “Sĭt biă mă pô anai ăt dŏ hrŏm hơbĭt hăng Yêsu mơ̆n, yua kơ ñu jing mơnuih Galilê mơ̆n.”
60Samơ̆ Pêtrôs laĭ: “Ơ čơkơi anŭn, kâo ƀu thâo ôh hơgĕt tơlơi ih laĭ!”
Hlăk anŭn mơtam tơdang Pêtrôs ăt dŏ pơhiăp, mơnŭ tơdjô̆ hĭ. 61Khua Yang wir lăng pơ Pêtrôs. Pêtrôs hơdơr glaĭ tơlơi Khua Yang hmâo laĭ laih kơ ñu: “Hrơi anai, hlâo kơ mơnŭ tơdjô̆, ih či hơngah Kâo klâo wơ̆t.” 62Pêtrôs tơbiă pơ rơngiao laih anŭn hia rơngot biă mă.
Arăng Djik Djak Hăng Taih Yêsu
(Mat 26:67-68; Mar 14:65)
63Ƀing mơnuih gak wai Yêsu djik djak kơ Yêsu laih anŭn taih Ñu. 64Gơñu gom mơta Yêsu laih anŭn tơña kơ Gơ̆: “Đao lăng bĕ, hlơi hmâo taih Ih?” 65Laih anŭn gơñu pơhiăp lu tơlơi ƀrưh hmiah pơkŏn dơ̆ng kơ Yêsu.
Yêsu Dŏ Ƀơi Anăp Ƀing Khua Phat Kơđi
(Mat 26:59-66; Mar 14:55-64; Yô 18:19-24)
66Truh mơguah, ƀing kŏng tha amăng ană plei pla, ƀing khua ngă yang prŏng, laih anŭn ƀing nai pơtô tơlơi juăt bơjơnum hrŏm hơbĭt; laih anŭn gơñu ba Yêsu nao pơ anăp ƀing khua phat kơđi. 67Gơñu laĭ: “Tơdah Ih jing Yang Krist, pơhaih bĕ kơ gơmơi thâo.”
Yêsu laĭ glaĭ kơ gơñu: “Tơdah Kâo laĭ tơlơi anŭn kơ ƀing gih, ƀing gih ƀu či đaŏ ôh; 68tơdah Kâo tơña kơ ƀing gih, ƀing gih ƀu či laĭ glaĭ ôh. 69Samơ̆ mơ̆ng ră anai truh pơ anăp Ană Mơnuih či dŏ ber gah hơnuă kơ Ơi Adai Pô Dưi Kơtang.”
70Abih bang gơñu laĭ: “Tui anŭn Ih jing Ană Ơi Adai hă?” Yêsu laĭ glaĭ: “Ƀing gih laĭ laih hlơi Kâo jing.”
71Tui anŭn gơñu laĭ: “Ƀing ta ƀu kiăng hmâo thim tơlơi gơ̆ng jơlan pơkŏn dơ̆ng tah? Ƀing ta hmâo hmư̆ laih tơlơi anŭn mơ̆ng amăng bah Ñu pô.”
Currently Selected:
Luk 22: JRA2016
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.
