Luk 5

Yêsu Iâu Ƀing Ding Kơna Tal Blŭng

(Mat 4:18-22; Mar 1:16-20)

1Tơdang Yêsu dŏ ƀơi hang ia dơnao Gênêsaret, ƀing ană plei pla pơčer pơrơsua nao giăm Yêsu kiăng hmư̆ tơlơi Ơi Adai pơhiăp.#Mat 13:1-2; Mar 3:9-10; 4:1. 2Yêsu ƀuh dua boh sŏng dŏ jĕ ƀơi hang ia, ƀing trah akan tơbiă laih mơ̆ng sŏng laih anŭn hlăk dŏ boh hơñual gơñu. 3Yêsu đĭ sa amăng dua boh sŏng, jing sŏng Simôn, laih anŭn rơkâo kơ ñu nao ataih ƀiă mơ̆ng hang. Yêsu dŏ ber amăng sŏng laih anŭn pơtô kơ ƀing ană plei pla.

4Giơ̆ng Ñu pơtô laih, Ñu laĭ kơ Simôn: “Nao bĕ pơ anih ia dlam hăng dăng bĕ hơñual ih.”

5Simôn laĭ glaĭ: “Ơ Nai, gơmơi dăng laih abih mlam samơ̆ ƀu hmâo akan ôh! Samơ̆ kiăng gưt hiăp Ih, kâo či dăng hơñual dơ̆ng.”#Yô 21:3. 6Laih gơñu dăng, hơñual gơñu djơ̆ akan lu biă mă tơl hơñual gơñu tơĭ.#Yô 21:6. 7Gơñu wơ̆t tơngan kơ ƀing gơ̆p gơñu đĭ amăng sŏng pơkŏn rai djru gơñu. Ƀing anŭn rai laih anŭn akan bă abih dua boh sŏng, tơl giăm či trăm amăng ia. 8Tơ Simôn Pêtrôs ƀuh tơlơi anŭn ñu bon ƀơi tơkai Yêsu laih anŭn laĭ: “Ơ Khua Yang, đuaĭ bĕ mơ̆ng kâo, yua kơ kâo jing sa čô mơnuih soh.”

9Yua kơ Simôn wơ̆t hăng abih bang ƀing hrŏm hơbĭt hăng ñu hling hlang kơ tơlơi gơñu hmâo akan lu anŭn. 10Wơ̆t Yakơ laih anŭn Yôhan, ƀing ană đah rơkơi Sêbêdê gơ̆p mă bruă hrŏm hơbĭt hăng Simôn hling hlang kar kaĭ mơ̆n. Yêsu laĭ kơ Simôn: “Anăm hwĭ ôh; mơ̆ng anai pơ anăp ih či jing mơnuih trah mơnuih.”

11Tơ gơñu waih sŏng truh pơ hang, gơñu lui hĭ abih bang mơnơ̆ng laih anŭn đuaĭ tui Yêsu.

Yêsu Pơsuaih Sa Čô Mơnuih Djơ̆ Phŭng

(Mat 8:1-4; Mar 1:40-45)

12Tơdang Yêsu dŏ amăng sa boh plei, hmâo sa čô mơnuih djơ̆ phŭng rơka bă drơi jan. Tơ ñu ƀuh Yêsu, ñu kŭp ƀô̆ ƀơi lŏn laih anŭn kơwưh kơ Ñu: “Ơ Khua Yang, tơdah Ih kiăng, Ih dưi pơrơgoh kâo!”#5:12 pơrơgoh brơi kâo: Tơlơi ruă anai, tơlơi juăt Môis yap ƀu rơgoh ôh.

13Yêsu yơr tơngan ruaih gơ̆ laih anŭn laĭ: “Kâo kiăng yơh, rơgoh bĕ!” Tañ mơtam phŭng ñu rơngiă hĭ. 14Laih anŭn Yêsu pơtă kơ ñu anăm ră ruai kơ arăng ôh, samơ̆ “Nao pơdah ih pô kơ khua ngă yang bĕ laih anŭn pơyơr mơnơ̆ng ngă yang kơ tơlơi pơrơgoh tui hăng Môis pơtă laih, jing tơlơi gơ̆ng jơlan pơsĭt kơ ƀing ană plei pla.”#Lêwi 14:1-32.

15Arăng hmư̆ hing kơ Yêsu jai lu hloh dơ̆ng, laih anŭn hmâo lu mơnuih pơƀŭt glaĭ kiăng hmư̆ Ñu pơtô laih anŭn kiăng dưi suaih mơ̆ng tơlơi ruă duăm. 16Samơ̆ Yêsu đuaĭ pơ anih hơđơ̆ng rơiăt kiăng iâu laĭ.

Yêsu Pơsuaih Sa Čô Mơnuih Rơwen

(Mat 9:1-8; Mar 2:1-12)

17Sa hrơi anŭn, tơdang Yêsu dŏ pơtô hmâo ƀing Pharisi hăng ƀing nai pơtô tơlơi juăt dŏ ber giăm Ñu. Gơñu rai mơ̆ng rĭm boh plei amăng čar Galilê, čar Yuđa, laih anŭn mơ̆ng plei Yêrusalem. Tơlơi dưi mơyang Khua Yang dŏ hrŏm hơbĭt hăng Ñu kiăng pơsuaih tơlơi duăm ruă. 18Anai nê, hmâo ƀing mơnuih čơkung ba sa čô mơnuih đah rơkơi rơwen hăng sưng pĭt; gơñu hơduah jơlan kiăng ba ñu amăng sang laih anŭn dưm gơ̆ ƀơi anăp Yêsu. 19Samơ̆ ƀing gơñu ƀu hmâo jơlan dưi ba mŭt ñu ôh yua kơ mơnuih lu đơi. Tui anŭn gơñu đĭ ƀơi bơbŭng sang laih anŭn pŏk hĭ goč, gơñu pơañreng trŭn gơ̆ hrŏm hơbĭt hăng sưng ñu djơ̆ ƀơi anăp Yêsu tơ̆ng krah ƀing mơnuih lu. 20Tơ Yêsu ƀuh tơlơi đaŏ gơñu, Yêsu laĭ: “Ơ gơyut, tơlơi soh ih hmâo tơlơi pap brơi laih.”

21Ƀing nai pơtô tơlơi juăt hăng ƀing Pharisi čơdơ̆ng pơhiăp tơdruă gơñu: “Hlơi pô anai, khĭn pơhiăp pơgao hmiah hăng Ơi Adai? Hlơi pô dưi pap brơi tơlơi soh, kơnơ̆ng hơjăn Ơi Adai đôč?”

22Samơ̆ Yêsu thâo laih tơlơi gơñu pơmĭn, Yêsu laĭ kơ gơñu: “Yua hơgĕt ƀing gih tơña amăng pran jua ƀing gih? 23Hơgĕt tơlơi laĭ amuñ hloh: ‘Tơlơi soh ih hmâo pap brơi laih,’ ƀôdah laĭ: ‘Tơgŭ laih anŭn rơbat bĕ?’ 24Samơ̆ kiăng kơ ƀing gih thâo ƀơi lŏn tơnah Ană Mơnuih hmâo tơlơi dưi pap brơi tơlơi soh” — Ñu laĭ kơ mơnuih rơwen — “Kâo laĭ kơ ih, tơgŭ bĕ, mă sưng pĭt ih laih anŭn glaĭ pơ sang!”

25Tañ mơtam ñu tơgŭ ƀơi anăp ƀing anŭn, mă sưng ñu hmâo đih laih, laih anŭn glaĭ pơ sang, pơpŭ bơni kơ Ơi Adai. 26Abih bang leng kơ hling hlang laih anŭn pơpŭ bơni hơơč kơ Ơi Adai. Gơñu bă hăng hwĭ laih anŭn laĭ: “Hrơi anai gơmơi hmâo ƀuh laih lu tơlơi hling hlang!”

Yêsu Iâu Lêwi

(Mat 9:9-13; Mar 2:13-17)

27Giơ̆ng tơlơi anŭn Yêsu tơbiă laih anŭn ƀuh sa čô mơnuih ring jia, anăn gơ̆ Lêwi, dŏ ber ƀơi anih ring jia. Yêsu laĭ kơ ñu: “Đuaĭ tui Kâo bĕ!” 28Gơ̆ lui hĭ abih bang, tơgŭ laih anŭn đuaĭ tui Yêsu.

29Lêwi pơkra tơlơi ƀơ̆ng huă prŏng jum Yêsu amăng sang ñu, laih anŭn hmâo lu ƀing ring jia laih anŭn ƀing mơnuih pơkŏn ƀơ̆ng huă hrŏm hơbĭt hăng gơñu. 30Ƀing Pharisi laih anŭn ƀing nai pơtô tơlơi juăt pơhiăp brŏk hăng ƀing ding kơna Yêsu hăng laĭ: “Hyư̆m ƀing gih dŏ ƀơ̆ng huă laih anŭn mơñum hrŏm hơbĭt hăng ƀing ring jia laih anŭn ƀing mơnuih soh?”#Luk 15:1-2.

31Yêsu laĭ glaĭ gơñu: “Ƀu djơ̆ ƀing mơnuih suaih prăl ôh kiăng kơ ơi ia jrao, samơ̆ ƀing mơnuih duăm ruă yơh. 32Kâo ƀu rai iâu ƀing mơnuih tơpă ôh, samơ̆ iâu ƀing mơnuih soh kơhmal tơlơi soh.”

Tơlơi Tơña Kơ Tơlơi Ư̆ Asơi

(Mat 9:14-17; Mar 2:18-22)

33Ƀing anŭn laĭ kơ Ñu: “Ƀing ding kơna Yôhan nanao ư̆ ƀơ̆ng huă laih anŭn iâu laĭ, wơ̆t ƀing ding kơna ƀing Pharisi ngă tui anŭn mơ̆n, samơ̆ ƀing ding kơna ih ƀơ̆ng huă laih anŭn mơñum.”

34Yêsu laĭ kơ gơñu: “Dưi mơ̆ ƀing gih ngă brơi ƀing arăng jak kơ tơlơi ƀơ̆ng huă dŏ rơkơi bơnai ư̆ ƀơ̆ng huă tơdang han tao ăt dŏ hrŏm hơbĭt hăng gơñu? 35Samơ̆ truh hrơi arăng ba pơđuaĭ hĭ han tao mơ̆ng ƀing gơñu, hlăk anŭn gơñu či ư̆ ƀơ̆ng huă.”

36Yêsu ăt pơhiăp tơlơi bơhmutu kơ ƀing gơñu: “Arăng ƀu hek ôh sa pŏk bơnal mơ̆ng ao phrâo kiăng sĭt tĕp hăng ao so. Tơdah ngă tui anŭn, ao phrâo či tơĭ hĭ, laih anŭn bơnal phrâo ăt ƀu gal lăp hăng ao so ôh. 37Laih anŭn arăng ƀu pioh ôh tơpai phrâo amăng get klĭ so, tơdah ngă tui anŭn tơpai phrâo či blôk pơčah klĭ so anŭn, tơpai či hŏk hĭ laih anŭn kơdŭng klĭ či răm mơ̆n. 38Samơ̆ arăng pioh tơpai phrâo amăng get klĭ phrâo. 39Laih anŭn arăng ƀu kiăng dơ̆ng ôh tơpai phrâo tơ laih arăng mơñum tơpai so, yua kơ ñu laĭ: ‘tơpai so hiam hloh.’”

Currently Selected:

Luk 5: JRA2016

Highlight

Copy