Luk 4

Yang Sat Plư Yêsu

(Mat 4:1-11; Mar 1:12-13)

1Yêsu bă blai Yang Bơngăt Hiam, mơ̆ng ia krong Yurdan Ñu wơ̆t glaĭ, laih anŭn Yang Bơngăt Hiam atăt ba Ñu amăng tơdrŏn har. 2Pơ anŭn Ñu tŭ tơlơi yang sat plư amăng pă pluh hrơi. Ñu ƀu ƀơ̆ng huă ôh amăng pă pluh hrơi anŭn, laih anŭn tơ khul hrơi anŭn rơgao laih Ñu rơpa.

3Yang sat laĭ Ñu: “Tơdah Ih jing Ană Ơi Adai pơđar bĕ boh pơtâo anai blih jing hĭ ƀañ tơpŭng!”

4Yêsu laĭ glaĭ: “Hră Ơi Adai hmâo čih laih tui anai: ‘Mơnuih hơdip ƀu djơ̆ kơnơ̆ng yua kơ ƀơ̆ng ƀañ tơpŭng đôč ôh.’”#Mơñă 8:3.

5Yang sat atăt ba Ñu pơ anih hăng glong, kơčrâo brơi Ñu ƀiă mơnĭt abih bang dêh čar pơtao ƀơi lŏn tơnah, 6laih anŭn yang sat laĭ kơ Ñu: “Kâo či brơi kơ ih abih bang tơlơi dưi laih anŭn tơlơi guh kơang abih bang lŏn čar pơtao anai, yua kơ arăng hmâo jao brơi laih kơ kâo, laih anŭn kâo brơi kơ hlơi pô kâo kiăng. 7Tui anŭn tơdah ih bon kơkuh pơpŭ kơ kâo, abih mơnơ̆ng anŭn či lơ̆m kơ ih yơh.”

8Yêsu laĭ glaĭ: “Hră Ơi Adai Pơhiăp hmâo čih laih tui anai: ‘Brơi Ih khŏm kơkuh pơpŭ kơ Khua Yang Ơi Adai ih, laih anŭn kơnơ̆ng mă bruă kơ hơjăn Ñu đôč.’”#Mơñă 6:13.

9Yang sat atăt ba Ñu pơ plei Yêrusalem dơ̆ng, brơi Ñu dŏ ƀơi hăng ngŏ gor bơbŭng sang kơkuh pơpŭ, laih anŭn laĭ kơ Ñu: “Tơdah Ih jing Ană Ơi Adai, kơdâo trŭn bĕ mơ̆ng anih anai; 10Yua kơ Hră Ơi Adai Pơhiăp hmâo čih laih tui anai:

‘Ơi Adai či brơi ƀing ling jang Ñu wai lăng ih,’

11laih anŭn ‘Gơñu či pŭ mă ih amăng tơngan gơñu, hwĭ dah tơkai ih tơhnač djơ̆ boh pơtâo!’”#Adoh 91:11,12.

12Yêsu laĭ glaĭ: “Hră Ơi Adai Pơhiăp hmâo čih mơ̆n: ‘Ih anăm lông lăng Khua Yang Ơi Adai ih ôh.’”#Mơñă 6:16.

13Giơ̆ng ñu plư hăng abih tơlơi anŭn, yang sat đuaĭ hĭ mơ̆ng Yêsu, dŏ tơguan mông gal pơkŏn dơ̆ng.

Yêsu Čơdơ̆ng Bruă Ñu Amăng Čar Galilê

(Mat 4:12-17; Mar 1:14-15)

14Yêsu bă hăng tơlơi dưi mơyang Yang Bơngăt Hiam, wơ̆t glaĭ pơ čar Galilê, laih anŭn arăng hmư̆ hing Ñu tar ƀar tring jum dar. 15Ñu pơtô lu amăng sang bơjơnum, laih anŭn abih bang mơnuih pơpŭ bơni kơ Ñu.

Ană Plei Nasaret Hơngah Yêsu

(Mat 13:53-58; Mar 6:1-6)

16Yêsu truh pơ Plei Nasaret, anih arăng răk rong Ñu, laih anŭn tui hăng tơlơi Ñu juăt ngă, hrơi Saƀat Ñu mŭt amăng sang bơjơnum. Ñu tơgŭ kiăng đŏk hră Ơi Adai Pơhiăp. 17Arăng brơi kơ Ñu hơdrôm hră pô laĭ lui hlâo Êsai. Ñu pŏk hơdrôm hră anŭn, ƀuh anih hmâo tơlơi čih tui anai:

18“Yang Bơngăt Hiam Khua Yang dŏ ƀơi Kâo,

Yua kơ Ñu hmâo truač laih ia jâu kơ Kâo,#4:18 ƀôdah pơblang: Ñu ruah laih kâo Kiăng Kâo pơhaih Tơlơi Phrâo Hiam kơ ƀing ƀun rin.

19Ñu pơkiaŏ Kâo nao pơhaih tơlơi pŏk rơngai brơi kơ ƀing mơnă,

Ƀing bum mơta dưi ƀuh rơđah,

Ƀing arăng kơtư̆ juă dưi hmâo tơlơi rơngai.

Laih anŭn pơhaih thŭn Khua Yang či pơklaih ƀing ană plei pla Ñu.”#Êsai 61:1.

20Giơ̆ng tơlơi anŭn, Yêsu lom hĭ hơdrôm hră, brơi glaĭ kơ pô wai laih anŭn dŏ ber. Abih bang ƀing dŏ amăng sang bơjơnum dŏ lăng kơ Ñu soh sel. 21Laih anŭn Ñu čơdơ̆ng laĭ hăng ƀing anŭn: “Hrơi anai Hră Ơi Adai Pơhiăp ƀing gih hmư̆ anai hmâo krĕp djơ̆ laih.”

22Abih bang pơhaih Ñu jing hiam, laih anŭn hling hlang kơ tơlơi boh pơhiăp bă hăng tơlơi khăp pap tơbiă mơ̆ng amăng bah Ñu; laih anŭn ƀing gơñu laĭ: “Ƀu djơ̆ ôh hă Ñu jing ană đah rơkơi Yôsep?”

23Yêsu laĭ: “Sĭt yơh ƀing gih či laĭ kơ Kâo tơlơi raŏ anai: ‘Ơ ơi ia jrao, pơsuaih bĕ ih pô; kar kaĭ mơ̆n ngă ƀơi anai amăng plei ih pô abih tơlơi gơmơi hmư̆ ih hmâo ngă laih pơ plei Kapernum.’” 24Ñu laĭ dơ̆ng: “Sĭt biă mă Kâo laĭ kơ ƀing gih ƀu hmâo ôh sa čô pô laĭ lui hlâo hmâo tơlơi tŭ jum hiam amăng plei ñu pô.#Yô 4:44. 25Kâo laĭ kơ ƀing gih sĭt biă mă, rơnŭk Êli amăng čar Israel hmâo lu ƀing đah kơmơi djai rơkơi, tơdang adai khong klâo thŭn ha mơkrah, hmâo tơlơi ư̆ rơpa prŏng truh kơ abih tring.#I Pơtao 17:1. 26Samơ̆ Ơi Adai ƀu pơkiaŏ nao ôh Êli kơ sa čô amăng ƀing gơñu, kơnơ̆ng kơ sa čô đah kơmơi djai rơkơi pơ plei Sarepta amăng čar Sidôn đôč.#I Pơtao 17:8-16. 27Amăng rơnŭk pô laĭ lui hlâo Êlisê amăng čar Israel ăt hmâo lu mơnuih djơ̆ phŭng mơ̆n, samơ̆ ƀu hmâo ôh sa čô amăng ƀing gơñu dưi hmâo tơlơi rơgoh, kơnơ̆ng hơjan Naman čar Siri đôč.”#II Pơtao 5:1-14.

28Giơ̆ng kơ hmư̆ tơlơi anŭn, abih bang ƀing amăng sang bơjơnum bă hăng tơlơi hil biă mă. 29Gơñu tơgŭ, dui tơbiă Yêsu pơ gah rơngiao plei, ba Ñu pơ akŏ čư̆ ƀơi anih arăng pơdơ̆ng plei, kiăng glŏm trŭn Ñu. 30Samơ̆ Yêsu găn tơ̆ng krah gơñu hăng đuaĭ nao.

Đah Rơkơi Yang Sat Ngă

(Mar 1:21-28)

31Yêsu trŭn nao pơ Plei Kapernum, amăng tring Galilê, laih anŭn Ñu pơtô kơ ƀing gơñu amăng hrơi Saƀat. 32Gơñu hling hlang kơ tơlơi Yêsu pơtô, yua kơ boh pơhiăp Ñu bă hăng tơlơi dưi kơhưm.#Mat 7:28-29. 33Amăng sang bơjơnum hmâo sa čô đah rơkơi yang bơngăt grĭ hơƀak dŏ amăng ñu; laih anŭn ñu ur kraih kơtang, 34“Hơi! Hơgĕt tơlơi hmâo gơmơi hăng Ih, Ơ Yêsu plei Nasaret? Ih rai kiăng pơrai gơmơi hă? Kâo thâo hlơi Ih jing, Ih Pô rơgoh hiam mơ̆ng Ơi Adai!”

35Samơ̆ Yêsu khă ƀuah yang sat anŭn hăng laĭ: “Dŏ rơiăt laih anŭn tơbiă bĕ mơ̆ng mơnuih anai!” Giơ̆ng yang sat pơrơbuh ñu tơ̆ng krah mơnuih lu, laih anŭn yang sat tơbiă đuaĭ mơ̆ng ñu samơ̆ ƀu hmâo sa mơta ngă răm kơ ñu ôh.

36Abih bang gơñu hling hlang laih anŭn hăng bơlaĭ tơdruă gơñu: “Hơgĕt Boh Pơhiăp anai? Yua kơ hăng tơlơi dưi kơhưm laih anŭn tơlơi mơyang pơtă kơ ƀing yang bơngăt grĭ hơƀak, laih anŭn gơñu khŏm tơbiă mơ̆n.” 37Arăng hmư̆ hing kơ Ñu tar ƀar anih jum dar.

Yêsu Pơsuaih Tơhmua Simôn

(Mat 8:14-17; Mar 1:29-34)

38Yêsu tơbiă mơ̆ng sang bơjơnum laih anŭn mŭt amăng sang Simôn. Tơhmua đah kơmơi Simôn hmâo tơlơi duăm pơgrŭn kraih, laih anŭn gơñu rơkâo kơ Yêsu pơsuaih brơi kơ ñu. 39Yêsu dŏ dơ̆ng jĕ ñu, pơđar tơlơi duăm pơgrŭn laih anŭn tơlơi duăm pơgrŭn đuaĭ mơ̆ng ñu. Tañ mơtam ñu tơgŭ laih anŭn buih bruă kơ gơñu.

40Tơ yang hrơi lĕ laih, arăng ba abih bang ƀing mơnuih hmâo tơlơi ruă phara phara nao pơ Yêsu. Yêsu ah tơngan ƀơi rĭm čô laih anŭn pơsuaih gơñu. 41Ƀing yang sat ăt tơbiă mơ̆ng lu mơnuih laih anŭn ur kraih: “Ih jing Ană Ơi Adai!” Samơ̆ Yêsu khă ƀuah ƀing yang sat, laih anŭn ƀu brơi gơñu pơhiăp ôh, yua kơ gơñu thâo krăn Yêsu jing Yang Krist.

Yêsu Pơtô Amăng Lu Boh Sang Bơjơnum

(Mar 1:35-39)

42Tơ yang hrơi tơbiă, Yêsu nao pơ anih hơđơ̆ng rơiăt. Ƀing ană plei pla hơduah Yêsu laih anŭn tơ gơñu truh pơ Ñu, gơñu kiăng kơ̆ng Yêsu ƀu brơi Ñu đuaĭ mơ̆ng gơñu ôh. 43Samơ̆ Yêsu laĭ kơ gơñu: “Kâo khŏm pơhaih Tơlơi Phrâo Hiam kơ Dêh Čar Pơtao Ơi Adai kơ lu boh plei pơkŏn dơ̆ng, yua kơ tơlơi anŭn yơh Ơi Adai hmâo pơkiaŏ rai Kâo.”

44Tui anŭn Ñu dŏ pơtô amăng sang bơjơnum amăng tring Yuđa.

Currently Selected:

Luk 4: JRA2016

Highlight

Copy