Luk 3

Bruă Mă Yôhan Ƀatem

(Mat 3:1-12; Mar 1:1-8; Yô 1:19-28)

1Amăng thŭn tal pluh rơma Sêsar Tiber wai lăng, Pôntơ Pilat jing khua wai lăng čar Yuđa, Hêrôt wai lăng čar Galilê, laih anŭn adơi ñu Philip wai lăng čar Iturê hăng Trakônit, Lisanias wai lăng čar Abilen, 2amăng rơnŭk Anas hăng Kaip jing khua ngă yang prŏng hloh, hmâo boh pơhiăp Ơi Adai pơtrŭn kơ Yôhan ană đah rơkơi Sakari amăng tơdrŏn har. 3Tui anŭn ñu nao tar ƀar tring jum dar ia krong Yurdan pơtô tơlơi ƀatem kơ tơlơi kơhmal tơlơi soh, kiăng hmâo tơlơi pap brơi. 4Tui hăng tơlơi hmâo čih laih amăng hơdrôm hră pô laĭ lui hlâo Êsai:

“Hmâo asăp mơnuih ur kraih amăng tơdrŏn har,

Rơmet bĕ jơlan kơ Khua Yang, pơtơpă bĕ jơlan Ñu.

5Abih bang đŭng klŭng khŏm pơbă hĭ,

Abih bang čư̆ hăng bol čư̆ khŏm ngă mơdơ̆ hĭ,

Jơlan wĕ wŏ khŏm ngă tơpă glaĭ,

Jơlan klŭng hŭp khŏm jing lŏn daŏ;

6Laih anŭn abih bang kơnŭng djuai mơnuih či ƀuh tơlơi pơklaih Ơi Adai.”#Êsai 40:3; 52:10; Adoh 98:2.

7 # Mat 12:34; 23:33. Tui anŭn Yôhan laĭ kơ ƀing mơnuih lu rai kiăng tŭ tơlơi ñu ngă ƀatem: “Ơ ƀing djuai ala tơpơ̆ng, hlơi laĭ brơi kơ ƀing gih thâo đuaĭ mơ̆ng tơlơi Ơi Adai hil či truh? 8#Yô 8:33.Brơi ƀing gih mơboh năng lăp hăng tơlơi ƀing gih kơhmal tơlơi soh, laih anŭn anăm čơdơ̆ng laĭ ôh kơ ƀing gih pô: ‘Gơmơi hmâo Abraham jing ơi adon gơmơi,’ yua kơ kâo laĭ kơ ƀing gih, Ơi Adai dưi ngă brơi khul boh pơtâo anai jing hĭ ană tơčo Abraham. 9#Mat 7:19.Ră anai jong Ơi Adai hmâo dưm laih ƀơi akha kơyâo; abih bang kơyâo ƀu mơboh boh hiam ôh Ơi Adai či drom hĭ hăng glŏm amăng apui.”

10Ƀing ană plei tơña kơ ñu: “Tui anŭn hơgĕt gơmơi khŏm ngă lĕ?”

11Ñu laĭ glaĭ: “Hlơi pô hmâo dua blah ao, brơi ñu pha brơi kơ pô ƀu hmâo ôh; laih anŭn hlơi pô hmâo mơnơ̆ng ƀơ̆ng huă, brơi ñu ngă kar hăng anŭn mơ̆n.”

12 # Luk 7:29. Ăt hmâo mơ̆n ƀing ring jia rai kiăng tŭ ƀatem, laih anŭn gơñu tơña kơ Yôhan: “Ơ nai, hơgĕt gơmơi khŏm ngă lĕ?”

13Ñu laĭ kơ gơñu: “Anăm ring ôh rơgao hloh kơ nua arăng pơkơčah laih kơ ƀing gih.”

14Ƀing tơhan ăt tơña kar kaĭ mơ̆n: “Bơ gơmơi, hơgĕt gơmơi khŏm ngă lĕ?”

Ñu laĭ glaĭ: “Anăm pơhwĭ arăng, ƀôdah pơčeh ƀlor kiăng plah mă prăk arăng ôh, samơ̆ brơi ƀing gih mơak bĕ hăng prăk blan ƀing gih hmâo.”

15Tơdang ƀing ană plei dŏ kơčăng tơguan laih anŭn tơña amăng pran jua gơñu: “Djơ̆ mơ̆ Yôhan jing Yang Krist?” 16Hnŭn yơh, Yôhan laĭ glaĭ kơ abih bang gơñu: “Kâo ngă ƀatem kơ ƀing gih hăng ia, samơ̆ Pô mơyang hloh kơ kâo či rai, laih anŭn kâo ƀu lăp ôh kleh hrĕ klĭ juă Ñu. Ñu či ngă ƀatem kơ ƀing gih hăng Yang Bơngăt Hiam laih anŭn hăng apui. 17Ñu djă čơngua kiăng pơi pơrơgoh anih prăh pơdai ñu, laih anŭn pơƀŭt pơdai amăng atông, samơ̆ Ñu či čuh hĭ hơkam amăng apui ƀu thâo thăm ôh.”

18Hăng lu mơta tơlơi pơtô pơđur pơkŏn, Yôhan pơtô Tơlơi Phrâo Hiam kơ ƀing ană plei pla. 19#Mat 14:3-4; Mar 6:17-18.Samơ̆ Yôhan ƀuah kơ Hêrôt, pơtao wai lăng, yua kơ tơlơi ñu mă dŏ HʼHêrôđias bơnai adơi ñu, laih anŭn yua kơ abih bang tơlơi sat ñu hmâo ngă laih, 20thim kơ khul tơlơi soh anŭn dơ̆ng, ñu mă krư̆ Yôhan amăng sang mơnă.

Yêsu Tŭ Ƀatem

(Mat 3:13-17; Mar 1:9-11)

21Tơ giơ̆ng abih bang mơnuih tŭ ƀatem laih, Yêsu ăt tŭ ƀatem mơ̆n. Hlăk Yêsu dŏ iâu laĭ, adai pŏk hĭ, 22#Čơd 22:2; Adoh 2:7; Êsai 42:1; Mat 3:17; Mar 1:11; Luk 9:35.laih anŭn Yang Bơngăt Hiam trŭn rai amăng rup hrup hăng čĭm bơrơgơ̆m găm ƀơi Ñu; laih anŭn hmâo asăp pơhiăp mơ̆ng adai laĭ: “Ih jing Ană Kâo khăp hơeng biă mă; amăng Ih Kâo hmâo tơlơi mơak biă mă.”

Kơnŭng Djuai Yêsu

(Mat 1:1-17)

23Năng ai Yêsu hmâo klâo pluh thŭn hlăk Ñu čơdơ̆ng mă bruă. Tui arăng pơmĭn, Ñu jing ană đah rơkơi Yôsep; Yôsep jing ană đah rơkơi Hêli. 24Hêli jing ană đah rơkơi Mathat, Mathat jing ană đah rơkơi Lêwi, Lêwi jing ană đah rơkơi Melki, Melki jing ană đah rơkơi Yanai, Yanai jing ană đah rơkơi Yôsep. 25Yôsep jing ană đah rơkơi Matathias, Matathias jing ană đah rơkơi Amôs, Amôs jing ană đah rơkơi Nahum, Nahum jing ană đah rơkơi Êsli, Êsli jing ană đah rơkơi Nagai; 26Nagai jing ană đah rơkơi Math, Math jing ană đah rơkơi Matathias, Matathias jing ană đah rơkơi Sêmêin, Sêmêin jing ană đah rơkơi Yôsek, Yôsek jing ană đah rơkơi Yôda. 27Yôda jing ană đah rơkơi Yôanan, Yôanan jing ană đah rơkơi Rêsa, Rêsa jing ană đah rơkơi Sôrôbabel, Sôrôbabel jing ană đah rơkơi Sêaltiêl, Sêaltiêl jing ană đah rơkơi Nêri. 28Nêri jing ană đah rơkơi Melki, Melki jing ană đah rơkơi Adi, Adi jing ană đah rơkơi Kôsam, Kôsam jing ană đah rơkơi Êlmadam, Êlmadam jing ană đah rơkơi Er. 29Er jing ană đah rơkơi Yôsuê, Yôsuê jing ană đah rơkơi Êliêser, Êliêser jing ană đah rơkơi Yôrim, Yôrim jing ană đah rơkơi Mathat, Mathat jing ană đah rơkơi Lêwi. 30Lêwi jing ană đah rơkơi Simêôn, Simêôn jing ană đah rơkơi Yuđa, Yuđa jing ană đah rơkơi Yôsep, Yôsep jing ană đah rơkơi Yônam, Yônam jing ană đah rơkơi Êliakim. Êliakim jing ană đah rơkơi Mêlêa. 31Mêlêa jing ană đah rơkơi Mêna, Mêna jing ană đah rơkơi Matatha, Matatha jing ană đah rơkơi Nathan, Nathan jing ană đah rơkơi Đawit. 32Đawit jing ană đah rơkơi Yêsê, Yêsê jing ană đah rơkơi Ôbet, Ôbet jing ană đah rơkơi Bôas, Bôas jing ană đah rơkơi Salmôn, Salmôn jing ană đah rơkơi Nahsôn. 33Nahsôn jing ană đah rơkơi Aminadap, Aminadap jing ană đah rơkơi Atmin, Atmin jing ană đah rơkơi Arni, Arni jing ană đah rơkơi Hêsrôn, Hêsrôn jing ană đah rơkơi Parês, Parês jing ană đah rơkơi Yuđa, 34Yuđa jing ană đah rơkơi Yakôp, Yakôp jing ană đah rơkơi Isak, Isak jing ană đah rơkơi Abraham, Abraham jing ană đah rơkơi Têra, Têra jing ană đah rơkơi Nakôr, 35Nakôr jing ană đah rơkơi Sêruk, Sêruk jing ană đah rơkơi Rêu, Rêu jing ană đah rơkơi Pêlek, Pêlek jing ană đah rơkơi Êber, Êber jing ană đah rơkơi Sêlah. 36Sêlah jing ană đah rơkơi Kainan, Kainan jing ană đah rơkơi Arpaksat, Arpaksat jing ană đah rơkơi Sem, Sem jing ană đah rơkơi Nôê, Nôê jing ană đah rơkơi Lamek, 37Lamek jing ană đah rơkơi Mêthusêla, Mêthusêla jing ană đah rơkơi Ênok, Ênok jing ană đah rơkơi Yared, Yared jing ană đah rơkơi Mahalalel, Mahalalel jing ană đah rơkơi Kainan. 38Kainan jing ană đah rơkơi Enôs, Enôs jing ană đah rơkơi Seth, Seth jing ană đah rơkơi Ađam, Ađam jing ană đah rơkơi Ơi Adai.

Currently Selected:

Luk 3: JRA2016

Highlight

Copy