Luk 2

Tơlơi Tơkeng Kơ Yêsu

(Mat 1:18-25)

1Rơnŭk anŭn Sêsar Ôgust pơtrŭn asăp brơi abih bang mơnuih amăng lŏn tơnah čih anăn amăng hơdrôm hră yap ană plei pla. 2Anai jing tơlơi yap akŏ mơnuih tal blŭng hlâo, tơdang Kirinius jing khua wai lăng čar Siri. 3Rĭm čô khŏm glaĭ pơ plei phŭn gơñu pô kiăng brơi arăng čih pơmŭt anăn gơñu.

4Yôsep ăt kar kaĭ mơ̆n, mơ̆ng čar Galilê plei Nasaret, ñu đĭ nao pơ čar Yuđa plei Đawit, arăng pơanăn dơ̆ng jing plei Betlêhem, yua kơ ñu jing kơnŭng djuai laih anŭn ană tơčo Đawit, 5kiăng brơi arăng čih pơmŭt anăn ñu hrŏm hơbĭt hăng HʼMari, pô hmâo djă kong laih hăng ñu. Hlăk anŭn HʼMari dŏ pi kian. 6Tơdang gơñu dŏ pơ anŭn, hrơi HʼMari đih apui truh. 7Ñu tơkeng sa čô ană kơčoa đah rơkơi. Ñu sŏm ană ñu hăng khăn laih anŭn pơđih gơ̆ amăng atŏng rơ̆k, yua kơ ƀu hmâo anih ôh kơ gơñu dŏ amăng sang jưh.

Ƀing Wai Triu Hăng Ƀing Ling Jang Hiam

8Amăng tring anŭn hmâo ƀing wai triu dŏ krŏng amăng mlam pơ hmua, kiăng wai phung triu gơñu. 9Hmâo sa čô ling jang Khua Yang pơƀuh brơi kơ gơñu, tơlơi ang yang Khua Yang pơčrang jum dar gơñu, hnŭn yơh gơñu hwĭ biă mă. 10Samơ̆ ling jang laĭ kơ gơñu: “Anăm hwĭ ôh! Anai nê, kâo rai pơthâo brơi kơ ƀing gih sa Tơlơi Phrâo Hiam, jing tơlơi hơ̆k mơak prŏng brơi kơ abih bang mơnuih mơnam. 11Yua kơ hrơi anai amăng plei Đawit, arăng tơkeng laih kơ ƀing gih sa čô Pô Pơklaih, Ñu jing Krist, Khua Yang. 12Tơlơi anai jing gru kơnăl brơi kơ ƀing gih thâo krăn Ñu: Ƀing gih či ƀuh sa čô ană nge sŏm hăng khăn laih anŭn đih amăng atŏng rơ̆k.” 13Blĭp blăp mơtam, hmâo klăk klai ƀing ling jang hiam pơkŏn hrŏm hơbĭt hăng ling jang hiam anŭn adoh pơpŭ bơni kơ Ơi Adai tui anai:

14“Tơlơi guh kơang kơ Ơi Adai amăng anih glong hloh,

Laih anŭn tơlơi rơnŭk rơnua ƀơi lŏn tơnah, tơlơi pap kơ ƀing mơnuih Ñu khăp!”

15Giơ̆ng kơ phung ling jang đuaĭ mơ̆ng gơñu wơ̆t glaĭ pơ adai, ƀing wai triu bơlaĭ hăng tơdruă gơñu: “Nao bĕ ƀing ta pơ Plei Betlêhem kiăng lăng tơlơi hmâo truh laih jing tơlơi Khua Yang hmâo laĭ pơthâo laih kơ ƀing ta.”

16Tui anŭn, gơñu nao ječ mơtam, gơñu ƀuh HʼMari, Yôsep laih anŭn ană nge dŏ đih amăng atŏng rơ̆k. 17Tơ gơñu ƀuh ană nge anŭn, gơñu ruai glaĭ hơdôm tơlơi ling jang hiam laĭ kơ ană nge anŭn. 18Abih bang hlơi pô hmư̆ tơlơi ƀing wai triu ră ruai kơ tơlơi anŭn leng kơ hling hlang yơh. 19Samơ̆ HʼMari djă pioh laih anŭn pơmĭn kơ abih tơlơi anŭn amăng pran jua ñu. 20Ƀing wai triu wơ̆t glaĭ hĭ, gơñu adoh bơni laih anŭn pơ-ư ang kơ Ơi Adai yua kơ abih tơlơi gơñu hmâo hmư̆ hăng hmâo ƀuh laih, djơ̆ tui hăng tơlơi ƀing ling jang hiam hmâo pơthâo laih kơ gơñu.

Arăng Pơanăn Yêsu

21 # Lêwi 12:3; Luk 1:31. Sapăn hrơi mơ̆ng hrơi arăng tơkeng kơ Ñu, jing hrơi arăng khŏm khăt klĭ ană nge anŭn, arăng pơanăn Ñu jing Yêsu, tui hăng anăn ling jang hiam hmâo pơanăn hlâo kơ amĭ Ñu pi kian.

Tơlơi Pơyơr Yêsu Amăng Sang Kơkuh Pơpŭ

22Tơ khul hrơi ngă tơlơi pơrơgoh tui hăng Tơlơi Juăt Môis giơ̆ng hĭ laih, Yôsep hăng HʼMari ba nao Ñu pơ plei Yêrusalem kiăng pơyơr Ñu kơ Khua Yang, 23tui hăng Môis hmâo čih laih amăng Tơlơi Juăt Khua Yang: “Rĭm čô ană kơčoa đah rơkơi arăng khŏm pioh brơi jing rơgoh hiam kơ Khua Yang,”#Tơb 13:2,12,15; Lêwi 12:3-8. 24#Lêwi 12:6-8.laih anŭn pơyơr mơnơ̆ng ngă yang tui hăng tơlơi hmâo čih laih amăng tơlơi Juăt Khua Yang: “Dua drơi čĭm bơrơgơ̆m ƀôdah dua drơi ană čĭm kơtrâo.”

Tơlơi Simêôn Adoh. – Pô Laĭ Lui Hlâo HʼAn

25Hlăk anŭn, pơ Plei Yêrusalem hmâo sa čô đah rơkơi, anăn ñu Simêôn. Ñu jing mơnuih tơpă laih anŭn rơgoh hiam. Ñu dŏ čang rơmang tơlơi pơalum kơ ƀing ană Israel, laih anŭn Yang Bơngăt Hiam dŏ ƀơi ñu. 26Yang Bơngăt Hiam hmâo laĭ brơi kơ ñu thâo, ñu ƀu či djai ôh tơl ñu ƀuh Yang Krist Pô rai mơ̆ng Khua Yang. 27Hmâo tơlơi pơtrŭt mơ̆ng Yang Bơngăt Hiam, Simêôn nao pơ sang kơkuh pơpŭ djơ̆ ƀơi mông amĭ ama Yêsu ba rai ană nge Yêsu, kiăng ngă brơi kơ Ñu tui hăng tơlơi juăt hmâo pơtă. 28Simêôn pi mă ană nge anŭn hăng bơni hơơč kơ Ơi Adai tui anai:

29“Ơ Khua Yang, ră anai rơkâo kơ Ih brơi ding kơna Ih djai hăng tơlơi rơnŭk rơnua,

Tui hăng tơlơi Ih hmâo pơhiăp laih;

30Yua kơ mơta kâo hmâo ƀuh laih tơlơi pơklaih Ih,

31Ih hmâo pơkra laih ƀơi anăp abih bang kơnŭng djuai mơnuih,

32 # Êsai 42:6; 49:6; 52:10. Jing tơlơi bơngač pơčrang jơlan kơ ƀing djuai tuai,

Laih anŭn jing tơlơi guh kơang kơ Israel, ană plei pla Ih.”

33Amĭ ama Ñu hling hlang yua kơ tơlơi arăng laĭ kơ ană nge anŭn. 34Simêôn hơơč mơyun tơlơi hiam klă kơ gơñu laih anŭn laĭ kơ HʼMari amĭ Ñu: “Anai nê, Ơi Adai hmâo ruah laih ană anai kơ bruă pơrai laih anŭn pơklaih lu mơnuih amăng ƀing Israel, laih anŭn jing gru kơnăl arăng či pơhiăp pơkơdơ̆ng. 35(Bơ kơ ih pô, sa ƀĕ đao či klaŏ bơngăt jua ih), kiăng kơ tơlơi pơmĭn amăng lu hơtai pran mơnuih dưi pơrơđah.”

36Ăt hmâo mơ̆n sa čô pô laĭ lui hlâo đah kơmơi, anăn ñu HʼAn, ană đah kơmơi Panuel, mơ̆ng kơnŭng djuai Aser. Ñu tha laih, ñu hmâo hơdip laih hăng rơkơi ñu tơjuh thŭn, 37giơ̆ng anŭn ñu jing hĭ đah kơmơi djai rơkơi, truh kơ ră anai hmâo sapăn pluh pă thŭn laih. Ñu ƀu tơbiă ôh mơ̆ng sang kơkuh pơpŭ, hrơi mlam ñu kơkuh pơpŭ kơ Ơi Adai, ư̆ ƀơ̆ng huă laih anŭn iâu laĭ. 38Ƀơi mông anŭn ñu truh, ñu bơni hơơč kơ Ơi Adai, laih anŭn pơhiăp tơlơi djơ̆ kơ Yêsu kơ abih bang ƀing dŏ čang rơmang kơ tơlơi pơrơngai plei Yêrusalem.

Wơ̆t Glaĭ Pơ Plei Nasaret

39 # Mat 2:23. Tơ gơñu ngă abih bang bruă tui hăng tơlơi juăt Khua Yang, gơñu wơ̆t glaĭ pơ plei Nasaret plei gơñu pô amăng čar Galilê. 40Čơđai Anĕt anŭn prŏng tui, kơjăp kơtang, bă blai tơlơi kơhnâo; laih anŭn tơlơi pap Ơi Adai dŏ hrŏm hơbĭt hăng Ñu.

Yêsu Nao Pơ Sang Kơkuh Pơpŭ

41 # Tơb 12:1-27; Mơñă 16:1-8. Rĭm thŭn djơ̆ hrơi phĕt Tơlơi Găn, amĭ ama Yêsu đĭ nao pơ plei Yêrusalem. 42Hlăk Yêsu pluh dua thŭn, Ñu hrŏm hơbĭt hăng amĭ ama Ñu đĭ nao pơ plei Yêrusalem kiăng pơhơdơr phĕt Tơlơi Găn tui hăng tơlơi gơñu juăt ngă. 43Tơ khul hrơi phĕt Tơlơi Găn abih hĭ laih, gơñu čơdơ̆ng wơ̆t glaĭ pơ plei gơñu, samơ̆ čơđai anĕt Yêsu dŏ glaĭ pơ plei Yêrusalem. Amĭ ama Ñu ƀu thâo ôh tơlơi anŭn. 44Gơñu pơmĭn dah Yêsu nao hrŏm hơbĭt hăng ƀing mơnuih lu rŏk jơlan, gơñu rơbat abih sa hrơi, giơ̆ng anŭn kah gơñu sem hơduah Yêsu amăng ƀing kơnŭng djuai laih anŭn ƀing gơyut Ñu. 45Tơ gơñu ƀu ƀuh Ñu ôh, gơñu wơ̆t glaĭ pơ plei Yêrusalem dơ̆ng kiăng kơ hơduah Ñu. 46Rơgao klâo hrơi, gơñu ƀuh Yêsu amăng sang kơkuh pơpŭ dŏ ber tơ̆ng krah ƀing khua pô pơtô. Ñu dŏ hmư̆ ƀing anŭn laih anŭn Ñu tơña kơ ƀing anŭn. 47Abih bang ƀing dŏ hmư̆ Ñu leng kơ dŏ kơtuă hling hlang kơ tơlơi rơgơi laih anŭn kơ tơlơi Ñu laĭ glaĭ. 48Tơ ƀuh Yêsu, amĭ ama Ñu dŏ hling hlang laih anŭn amĭ Ñu laĭ tui anai: “Ơ dăm, hyư̆m ih ngă kơ gơmơi tui anai lĕ? Anai nê, ama ih hăng kâo hyu sem hơduah ih hăng tơlơi hyơ̆k bơngơ̆t biă mă.”

49Yêsu laĭ glaĭ: “Yua hơgĕt ƀing ih sem hơduah kâo? Ƀing ih ƀu thâo ôh hă kâo khŏm mă bruă kơ Ama kâo?” 50Samơ̆ amĭ ama Ñu ƀu thâo hluh ôh kơ tơlơi Yêsu laĭ kơ gơñu.

51Giơ̆ng anŭn Yêsu glaĭ pơ plei Nasaret hrŏm hơbĭt hăng amĭ ama Ñu laih anŭn tui gưt kơ ƀing gơñu. Amĭ Ñu djă pioh abih tơlơi anŭn amăng pran jua ñu. 52#I Sa 2:26; Bơrt 3:4.Yêsu prŏng tui amăng tơlơi kơhnâo, amăng drơi jan, laih anŭn amăng tơlơi ngă bơmơak kơ Ơi Adai hăng ană mơnuih.

Currently Selected:

Luk 2: JRA2016

Highlight

Copy