Luk 1
1
Tơlơi Pơmŭt Hiăp
1Hmâo lu mơnuih mă bruă hăng abih pran jua čih ruai glaĭ kơ tơlơi hmâo truh laih ƀơi tơ̆ng krah ƀing ta. 2Gơñu čih tơlơi anŭn djơ̆ tui hăng ƀing hmâo ƀuh laih mơ̆ng phŭn laih anŭn jing ƀing pô pơtô pơhaih tơlơi Ơi Adai pơhiăp anŭn kơ ƀing ta. 3Yua kơ anŭn yơh kâo kar kaĭ mơ̆n pơmĭn jing hiam, laih kâo kơsem pơklă abih bang tơlơi anŭn mơ̆ng phŭn, kiăng čih djơ̆ tui hăng pruăi tơlơi anŭn kơ ih, Ơ Ơi Thêôphil, 4Kiăng kơ ih dưi thâo khul tơlơi ih hmâo hrăm anŭn jing sĭt biă mă.
Tơlơi Laĭ Lui Hlâo Kơ Tơlơi Tơkeng Yôhan Ƀatem
5 #
I Čih 24:10. Rơnŭk Hêrôt ngă pơtao čar Yuđa,#1:5 čar Yuđa: Boh pơhiăp anai kiăng laĭ nao abih lŏn čar Palestin. hmâo sa čô khua ngă yang anăn ñu Sakari mơ̆ng tơpul Abija. Bơnai ñu mơ̆ng kơnŭng djuai Arôn anăn gơ̆ HʼÊlisabet. 6Abih dua gơñu hơdip tơpă hơnơ̆ng ƀơi anăp Ơi Adai, tui gưt abih bang tơlơi juăt laih anŭn tơlơi Khua Yang pơtă tơl arăng ƀu dưi ƀuah kơ gơñu ôh. 7Gơñu ƀu hmâo ană ôh, yua kơ HʼÊlisabet jing đah kơmơi plao, laih anŭn abih dua gơñu leng kơ tha laih.
8Djơ̆ tal tơpul ñu, Sakari ngă bruă khua ngă yang ƀơi anăp Ơi Adai. 9Tơ mă črăm tui hăng tơlơi juăt kơ ƀing khua ngă yang, ñu mă djơ̆ črăm dưi mŭt čuh mơnơ̆ng ƀâu mơngưi amăng sang kơkuh pơpŭ#1:9 Năng ai anai jing anih rơgoh, kơnơ̆ng pioh brơi kơ ƀing khua ngă yang đôč. Khua Yang. 10Amăng mông čuh mơnơ̆ng ƀâu mơngưi, abih bang mơnuih lu dŏ iâu laĭ pơ gah rơngiao. 11Hlăk anŭn hmâo sa čô ling jang Khua Yang pơƀuh brơi kơ Sakari, ñu dŏ dơ̆ng gah hơnuă kơƀang ngă yang čuh mơnơ̆ng ƀâu mơngưi. 12Tơ Sakari ƀuh ling jang anŭn, ñu rŭng răng laih anŭn hwĭ bral. 13Samơ̆ ling jang laĭ kơ ñu: “Ơ Sakari! Anăm hwĭ ôh, yua kơ Ơi Adai hmâo hmư̆ laih tơlơi ih iâu laĭ. Bơnai ih HʼÊlisabet či tơkeng kơ ih sa čô ană đah rơkơi, laih anŭn ih či pơanăn ñu Yôhan. 14Ih či hmâo tơlơi hơ̆k kơdơ̆k, mơak mơai, laih anŭn lu mơnuih či mơak yua kơ tơlơi tơkeng ñu. 15#Yap 6:3.Yua kơ ñu či jing prŏng ƀơi anăp Khua Yang, ñu ƀu či mơñum tơpai boh kơƀâu ƀôdah mơnơ̆ng mơñum hmâo tơpơi ôh, laih anŭn ñu či bă blai hăng Yang Bơngăt Hiam čơdơ̆ng mơ̆ng ñu hlăk dŏ amăng kian amĭ ñu. 16Ñu či ba lu ƀing ană plei Israel wơ̆t glaĭ kơ Khua Yang jing Ơi Adai ƀing gơñu. 17#Mal 4:5-6.Ñu či nao ƀơi anăp Khua Yang hăng jua pơmĭn laih anŭn tơlơi dưi mơyang Êli, kiăng pơsir pran jua ƀing ama hăng ană gơñu, laih anŭn ba ƀing mơnuih ƀu thâo gưt hiăp wơ̆t glaĭ kơ tơlơi kơhnâo kơ ƀing mơnuih tơpă, laih anŭn kiăng kơ prăp rơmet sa phung kơnŭng djuai hmâo pran jua hiam brơi kơ Khua Yang.”
18Sakari laĭ kơ ling jang: “Hyư̆m kâo dưi thâo tơlơi anŭn či truh sĭt lĕ? Yua kơ kâo tha laih, laih anŭn bơnai kâo ăt tha laih mơ̆n.”
19 #
Đaniel 8:16; 9:21. Ling jang laĭ glaĭ: “Kâo Gabriel, pô dŏ ƀơi anăp Ơi Adai. Ơi Adai pơkiaŏ rai kâo pơhiăp hrŏm hăng ih laih anŭn pơthâo kơ ih tơlơi phrâo hiam anai. 20Anai nê, ih či kơmlô hĭ, ƀu dưi pơhiăp ôh tơl hrơi tơlơi anŭn hmâo truh hĭ, yua kơ ih ƀu đaŏ ôh kơ tơlơi kâo pơhiăp. Tơlơi pơhiăp anŭn či krĕp djơ̆ ƀơi hrơi Ơi Adai hmâo pơkă laih.”
21Hlăk anŭn, ƀing ană plei dŏ tơguan kơ Sakari, gơñu hling hlang yua kơ ñu dŏ sui amăng sang kơkuh pơpŭ. 22Tơ Sakari tơbiă, ñu ƀu dưi pơhiăp hăng ƀing gơñu ôh, laih anŭn gơñu thâo kơ ñu hmâo laih tơlơi pơƀuh amăng sang kơkuh pơpŭ anŭn. Yua kơ ñu ƀu dưi pơhiăp ôh, tui anŭn ñu ngă gru hăng tơngan kiăng pơhiăp hăng ƀing gơñu.
23Tơ khul hrơi ñu mă bruă abih laih, ñu glaĭ pơ sang. 24Sui ƀiă mơ̆ng anŭn, bơnai ñu HʼÊlisabet pi kian, laih anŭn pơdŏp ñu pô amăng rơma blan. Ñu laĭ tui anai: 25“Anai jing tơlơi Khua Yang hmâo ngă brơi laih kơ kâo. Amăng khul hrơi anai yơh, Ñu pap drap kơ kâo laih anŭn mă lui hĭ mơ̆ng kâo tơlơi mlâo hañ ƀơi anăp ƀing ană plei pla.”
Tơlơi Laĭ Lui Hlâo Kơ Tơlơi Tơkeng Yêsu
26Năm blan tơdơi, Ơi Adai pơkiaŏ ling jang Ñu Gabriel nao pơ sa boh plei amăng čar Galilê anăn plei anŭn Nasaret, 27#Mat 1:18.bưp sa čô đah kơmơi dra hmŭm hmâo djă kong laih hăng sa čô đah rơkơi, anăn gơ̆ Yôsep, amăng kơnŭng djuai Đawit. Dra hmŭm anŭn anăn gơ̆ HʼMari. 28Ling jang truh pơ HʼMari laih anŭn laĭ: “Kơkuh kơ ih, ơ pô Ơi Adai pap. Khua Yang dŏ hrŏm hơbĭt hăng ih!” 29Hmư̆ tơlơi pơhiăp anŭn, HʼMari rŭng răng biă mă, laih anŭn pơmĭn amăng pran jua ñu, hơgĕt tơlơi kơkuh anŭn jing. 30Ling jang laĭ kơ ñu: “Ơ HʼMari, anăm hwĭ ôh, yua kơ ih hmâo laih tơlơi pap ƀơi anăp Ơi Adai. 31#Mat 1:21.Anai nê, ih či pi kian laih anŭn tơkeng sa čô ană đah rơkơi, ih či pơanăn Ñu Yêsu. 32#II Sa 7:12-13,16; Êsai 9:6.Ñu či jing prŏng, laih anŭn arăng či iâu Ñu Ană Pô Glông Hloh, laih anŭn Khua Yang Ơi Adai či brơi kơ Ñu gre pơtao ơi Ñu Đawit. 33Ñu či wai lăng kơnŭng djuai Yakôp nanao hlŏng lar, laih anŭn Dêh Čar pơtao Ñu ƀu či thâo đŭt ôh.”
34HʼMari laĭ kơ ling jang: “Hyư̆m tơlơi anŭn dưi truh lĕ yua kơ kâo jing đah kơmơi dra aka dŏ hrŏm hăng đah rơkơi ôh?”
35Ling jang laĭ kơ ñu: “Yang Bơngăt Hiam či rai pơ ih, laih anŭn tơlơi dưi mơyang Pô Glông Hloh či gom ih; yua kơ anŭn yơh ană rơgoh hiam ih či tơkeng rai anŭn arăng či iâu Ñu jing Ană Ơi Adai. 36Anai nê, sa čô đah kơmơi kơnŭng djuai ih, HʼÊlisabet, hmâo pi kian laih sa čô ană đah rơkơi tơdang gơ̆ tha laih. Pô arăng iâu đah kơmơi plao, ñu pi kian hmâo năm blan laih. 37#Čơd 18:14.Yua kơ ƀu hmâo ôh sa mơta bruă hơgĕt Ơi Adai ƀu dưi ngă.”
38HʼMari laĭ: “Anai nê kâo jing ding kơna đah kơmơi kơ Khua Yang. Brơi tơlơi anŭn truh kơ kâo tui hăng tơlơi ih hmâo pơhiăp laih.” Laih anŭn ling jang tơbiă đuaĭ hĭ.
HʼMari Nao Ngui HʼÊlisabet
39Hlăk anŭn HʼMari tơgŭ hăng tơlơi hăt hot nao pơ sa boh plei amăng čar kơdư Yuđa. 40Ñu mŭt amăng sang Sakari laih anŭn kơkuh kơ HʼÊlisabet. 41Tơ HʼÊlisabet hmư̆ tơlơi HʼMari kơkuh, ană amăng kian ñu pơpư̆ mơtam, laih anŭn HʼÊlisabet bă blai Yang Bơngăt Hiam. 42HʼÊlisabet pơhiăp kraih krin tui anai: “Ih hmâo tơlơi mơyun hiam hloh kơ ƀing đah kơmơi pơkŏn, laih anŭn mơyun hiam yơh kơ ană mơ̆ng kian pruăi ih! 43Hyư̆m tơlơi yom anai dưi truh kơ kâo, tơl amĭ Khua Yang kâo rai čuă ngui kâo? 44Yua kơ tơdang kâo hmư̆ tơlơi ih kơkuh kơ kâo, ană amăng kian kâo pơpư̆ hơ̆k kơdơ̆k. 45Mơyun hiam yơh kơ đah kơmơi hmâo đaŏ laih, yua kơ abih tơlơi Khua Yang laĭ kơ ñu či truh sĭt.”
HʼMari Adoh Bơni Hơơč Kơ Ơi Adai
46 #
I Sa 2:1-10. HʼMari laĭ:
“Bơngăt kâo bơni hơơč kơ Khua Yang,
47Bơngăt jua kâo hmâo tơlơi mơak amăng Ơi Adai Pô Pơklaih kâo.
48 #
I Sa 1:11. Yua kơ Ñu hmâo lăng laih kơ tơlơi luă gŭ ding kơna đah kơmơi Ñu.
Anai nê, mơ̆ng ră anai truh pơ anăp, mơnuih abih bang rơnŭk či yap kơ kâo jing mơnuih hmâo tơlơi mơyun hiam.
49Yua kơ Pô Mơyang biă mă hmâo ngă laih tơlơi yom pơphan kơ kâo.
Anăn Ñu jing rơgoh hiam.
50Ñu pap drap kơ ƀing hwĭ pơpŭ kơ Ñu,
Amăng abih bang rơnŭk.
51Ñu hmâo bơrơđah laih tơlơi kơtang hăng tơngan Ñu,
Ñu ngă čơlah čơlap hĭ ƀing hmâo pran jua tơlơi pơmĭn pơgao ang.
52 #
Jôp 5:11; 12:19. Ñu hmâo pơglưh trŭn hĭ laih ƀing khua gĭt gai mơ̆ng gre pơtao gơñu,
Laih anŭn yŏng đĭ ƀing thâo luă gŭ.
53Ñu brơi ƀing rơpa dưi trơi hăng mơnơ̆ng hiam jơman,
Laih anŭn Ñu puh pơđuaĭ hĭ ƀing pơdrŏng sah glaĭ hăng tơngan đôč đač.
54Ñu hmâo djru laih ƀing Israel, ding kơna Ñu,
Ñu hơdơr glaĭ tơlơi Ñu pap drap,
55 #
Čơd 17:7. Tui hăng Ñu hmâo pơhiăp laih hăng ƀing ơi adon ta,
Hăng Abraham laih anŭn hăng ƀing ană tơčo ñu hlŏng lar.”
56HʼMari dŏ hrŏm hơbĭt hăng HʼÊlisabet năng ai klâo blan, laih anŭn ñu wơ̆t glaĭ pơ sang ñu pô.
HʼÊlisabet Tơkeng Yôhan Ƀatem
57Hrơi HʼÊlisabet đih apui truh yơh. Ñu tơkeng sa čô ană đah rơkơi. 58Ƀing ană plei pla jum dar ñu hăng ƀing kơnŭng djuai ñu hmư̆ tơlơi Khua Yang hmâo bơrơđah laih kơ ñu tơlơi pap drap prŏng, laih anŭn gơñu hơ̆k mơak hrŏm hơbĭt hăng ñu.
59 #
Lêwi 12:3. Ƀơi hrơi tal sapăn gơñu rai kiăng khăt klĭ ană nge anŭn hăng pơanăn ñu jing Sakari tui hăng anăn ama gơ̆. 60Samơ̆ amĭ ñu laĭ: “Ư ưh! Či pơanăn ñu Yôhan.”
61Gơñu laĭ kơ HʼÊlisabet: “Ƀu hmâo ôh sa čô amăng kơnŭng djuai ih hmâo anăn kar hăng anŭn.” 62Tui anŭn gơñu ngă gru hăng tơngan kiăng pơhiăp hăng ama ñu kiăng thâo hlơi ñu kiăng pơanăn kơ gơ̆.
63Sakari rơkâo sa pŏk hơnal, laih anŭn čih tui anai: “Anăn ñu Yôhan”. Abih bang gơñu dŏ kơtuă hling hlang. 64Mông anŭn mơtam, Sakari ha amăng bah, jơlah ñu klaih, ñu pơhiăp laih anŭn pơpŭ bơni hơơč kơ Ơi Adai. 65Abih bang ƀing mơnuih jum dar gơñu hwĭ biă mă. Arăng ruai abih tơlơi anŭn djŏp djang čar kơdư Yuđa. 66Abih bang ƀing hmư̆ tơlơi anŭn djă pioh amăng pran jua gơñu hăng laĭ: “Hyư̆m ană anŭn či jing lĕ?” Yua kơ sĭt biă mă tơngan Khua Yang hmâo dŏ hrŏm hơbĭt laih hăng ñu.
Tơlơi Sakari Laĭ Lui Hlâo
67Sakari, ama ñu, bă blai Yang Bơngăt Hiam laih anŭn laĭ lui hlâo tui anai:
68“Pơpŭ bơni kơ Khua Yang, Ơi Adai Israel,
Yua kơ Ñu hmâo čuă ngui laih anŭn song mă ƀing ană plei pla Ñu,
69Ñu hmâo pơjing brơi laih kơ ƀing ta sa čô Pô Pơklaih bă hăng tơlơi dưi mơyang,
Amăng sang Đawit, ding kơna Ñu.
70Kar hăng Ñu hmâo laĭ laih mơ̆ng rơnŭk đưm adih
Găn mơ̆ng amăng bah ƀing pô laĭ lui hlâo rơgoh hiam Ñu,
71Kiăng kơ ƀing ta dưi klaih mơ̆ng ƀing ayăt ƀing ta,
Laih anŭn mơ̆ng tơngan abih bang ƀing bơrơmŭt kơ ƀing ta.
72Kiăng pơsĭt tơlơi pap drap Ñu hmâo ƀuăn laih kơ ƀing ơi adon ƀing ta,
Laih anŭn hơdơr glaĭ tơlơi kơnol pơgop hiam rơgoh Ñu.
73Tui hăng tơlơi Ñu hmâo ƀuăn rơ̆ng laih hăng Abraham,
Ơi adon ƀing ta,
74Giơ̆ng kơ Ñu pơrơngai ƀing ta mơ̆ng tơngan ƀing ayăt,
Ñu či brơi kơ ƀing ta dưi buih bruă Ñu ƀu hmâo tơlơi hwĭ hơgĕt ôh.
75Hăng tơlơi rơgoh hơčih laih anŭn tơlơi tơpă klă
Ƀơi anăp Ñu abih hrơi ƀing ta dŏ hơdip.
76 #
Mal 3:1. Bơ ih, ơ ană, arăng či iâu ih jing pô laĭ lui hlâo kơ Pô Glông Hloh,
Yua kơ ih či rơbat ƀơi anăp Khua Yang kiăng pơkra rơmet jơlan Ñu,
77Kiăng kơ ƀing ană plei pla Ñu thâo hluh kơ tơlơi pơklaih,
Mơ̆ng tơlơi pap brơi tơlơi soh ƀing gơñu.
78Yua kơ tơlơi pap drap Ơi Adai ƀing ta,
Tơlơi bơngač Yang Hrơi či pơčrang brơi kơ ƀing ta mơ̆ng adai glong,
79 #
Êsai 9:1. Kiăng pơčrang rơđah ƀing dŏ amăng tơlơi kơnăm mơmŏt laih anŭn amăng tơ-u tơlơi djai,
Kiăng atăt ba ƀing ta rơbat amăng jơlan tơlơi rơnŭk rơnua.”
80Čơđai anĕt anŭn prŏng tui, bơngăt jua ñu jing kơtang. Ñu dŏ amăng tơdrŏn tač, tơl truh hrơi ñu pơrơđah ñu pô kơ ƀing Israel.
Currently Selected:
Luk 1: JRA2016
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.
